مَتَّى 19
19
الْفَصْلْ تْسَعْطَاشْ
يَسُوعْ كَيْعَلّْمْ عْلَى الطّْلَاقْ
1وْمْلِّي كَمّْلْ يَسُوعْ هَادْ الْكْلَامْ، خْرَجْ مْنْ الْجَلِيلْ وْمْشَى لْجْوَايْهْ بْلَادْ الْيَهُودِيَّة اللِّي مْنْ الجِّهَة لْخْرَى دْيَالْ وَادْ الْأُرْدُنْ. 2وْتْبْعُوهْ بْزَّافْ دْ الجّْمَاعَاتْ دْ النَّاسْ وْشْفَاهُمْ تْمَّ. 3وْقَرّْبُو لْعَنْدُه الْفْرِّيسِيِّينْ وْسْوّْلُوهْ بَاشْ يْجَرّْبُوهْ: «وَاشْ حْلَالْ يْطَلّْقْ الرَّاجْلْ مْرَاتُه كِمَا كَانْ السَّبَبْ؟». 4وْهُوَ يْجَاوْبْهُمْ وْݣَالْ: «وَاشْ مَا قْرِيتُوشْ فْكْتَابْ اللَّهْ بْلِّي اللَّهْ خْلَقْ بْنَادْمْ مْنْ الْبْدُو دْكَرْ وْنْتْوَى، 5وْݣَالْ: هَادْشِّي عْلَاشْ غَيْخَلِّي الرَّاجْلْ بَّاهْ وْمُّه وْغَيْتَّاحْدْ مْعَ مْرَاتُه، وْغَيْوَلِّيوْ بْجُوجْهُمْ دَاتْ وَحْدَة. 6وْهَكَّا مَا غَيْبْقَاوْشْ جُوجْ وَلَكِنْ غَيْوَلِّيوْ دَاتْ وَحْدَة. وْاللِّي جْمْعُه اللَّهْ مَا يْقْدَرْشْ يْفَرّْقُه بْنَادْمْ». 7وْسْوّْلُوهْ الْفْرِّيسِيِّينْ: «وْعْلَاشْ وْصَّى مُوسَى بَاشْ يْعْطِي الرَّاجْلْ لْمْرَاتُه وَرْقَةْ الطّْلَاقْ مْلِّي يْطَلّْقْهَا؟».#متى 5:31 8وْجَاوْبْهُمْ يَسُوعْ: «رَاهْ عْلَى وْدّْ قْسُوحِيَّةْ قْلُوبْكُمْ سْمَحْ لِيكُمْ مُوسَى تّْطَلّْقُو عْيَالَاتْكُمْ، وَلَكِنْ هَادْشِّي رَاهْ مَا كَانْشْ مْلِّي خْلَقْ اللَّهْ آدَمْ وْحَوَّاءْ فْاللّْوّْلْ. 9رَانِي نْݣُولْ لِيكُمْ: اللِّي طَلّْقْ مْرَاتُه عْلَى شِي سْبَابْ مْنْ غِيرْ الْفْسَادْ وْتّْزَوّْجْ بْغِيرْهَا، رَاهْ كَيْفْسَدْ».#متى 5:32؛ 1كورنتوس 7:10،11
10وْݣَالُو لِيهْ تْلَامْدُه: «إِلَا كَانْتْ هَادِي هِيَ حَالْةْ الرَّاجْلْ مْعَ الْمْرَاة، خْيَرْ لِيهْ مَا يْتّْزَوّْجْشْ ݣَاعْ». 11وْجَاوْبْهُمْ يَسُوعْ: «مَاشِي كُلّْشِي كَيْقْبَلْ هَادْ الْكْلَامْ، غِيرْ هَادُوكْ اللِّي نْعَمْ عْلِيهُمْ اللَّهْ بَاشْ يْقْبْلُوهْ. 12حِيتْ كَايْنِينْ النَّاسْ اللِّي تّْوَلْدُو مْنْ كْرُوشْ مَّاوَاتْهُمْ مَا قَادْرِينْشْ عْلَى الزّْوَاجْ، وْكَايْنِينْ اللِّي رْدُّوهُمْ النَّاسْ هَكَّا. وْكَايْنِينْ اللِّي مَا كَيْتّْزَوّْجُوشْ عْلَى قْبَلْ مَمْلَكَةْ السَّمَاوَاتْ. اللِّي قْدَرْ يْفْهَمْ هَادْشِّي يْفَهْمُه».
يَسُوعْ كَيْبَارْكْ الدّْرَارِي الصّْغَارْ
13وْجَابُو لِيهْ النَّاسْ شِي وْلَادْ صْغَارْ بَاشْ يْحَطّْ يْدِّيهْ عْلِيهُمْ وْيْدْعِي مْعَاهُمْ، وْخَاصْمُو التّْلَامْدْ عْلَى اللِّي جَابُوهُمْ. 14وَلَكِنْ يَسُوعْ ݣَالْ: «خَلِّيوْ الدّْرَارِي يْجِيوْ لْعَنْدِي وْمَا تْحَبْسُوهُمْشْ، عْلَاحْقَّاشْ بْحَالْ هَادُو اللِّي لِيهُمْ مَمْلَكَةْ السَّمَاوَاتْ». 15وْحَطّْ يْدِّيهْ عْلِيهُمْ وْمْشَى مْنْ تْمَّ.
الشَّابْ اللِّي لَبَاسْ عْلِيهْ
16وْجَا عَنْدُه وَاحْدْ الشَّابْ وْݣَالْ لِيهْ: «آ الْمُعَلِّمْ، آشْ مْنْ عَمَلْ مْزْيَانْ نْقْدَرْ نْدِيرْ بَاشْ تْكُونْ عَنْدِي الْحَيَاةْ الدَّايْمَة؟». 17وْجَاوْبُه يَسُوعْ: «عْلَاشْ كَتْسَوّْلْنِي آشْ مْنْ عَمَلْ مْزْيَانْ؟ اللَّهْ بُوحْدُه هُوَ اللِّي مْزْيَانْ. وْإِلَا بْغِيتِي تْدْخُلْ لْلْحَيَاةْ الدَّايْمَة، دِيرْ بْالْوْصِيَّاتْ». 18وْهُوَ يْسْوّْلُه: «آشْ مْنْ وْصِيَّاتْ؟» وْجَاوْبُه يَسُوعْ: «مَا تْقْتَلْ، مَا تْفْسَدْ، مَا تْسْرَقْ، مَا تْشْهَدْ بْالزُّورْ، 19تّْهَلَّى فْبَّاكْ وْمُّكْ، وْبْغِي اللِّي قْرِيبْ لِيكْ كِيفْ كَتْبْغِي رَاسْكْ». 20وْهُوَ يْݣُولْ لِيهْ الشَّابْ: «رَانِي دْرْتْ بْهَادْ الْوْصِيَّاتْ كُلّْهُمْ، إِيوَا آشْ بَاقِي خَاصّْنِي؟». 21وْجَاوْبُه يَسُوعْ: «إِلَا بْغِيتِي تْكُونْ بْلَا عِيبْ، سِيرْ بِيعْ ݣَاعْ دَاكْشِّي اللِّي كَتْمْلَكْ وْعْطِي تَمَنُه لْلْمَسَاكِينْ، وْغَيْكُونْ عَنْدْكْ كَنْزْ فْالسَّمَاوَاتْ، وْأَجِي تْبَعْنِي!». 22وَلَكِنْ مْلِّي سْمَعْ الشَّابْ هَادْ الْكْلَامْ، مْشَى وْهُوَ حْزِينْ حِيتْ كَانْ لَبَاسْ عْلِيهْ بْزَّافْ.
23وْݣَالْ يَسُوعْ لْتْلَامْدُه: «نْݣُولْ لِيكُمْ الْحَقّْ: رَاهْ صْعِيبْ عْلَى شِي وَاحْدْ لَبَاسْ عْلِيهْ يْدْخَلْ لْمَمْلَكَةْ السَّمَاوَاتْ. 24وْنْزِيدْ نْݣُولْ لِيكُمْ: رَاهْ دْخُولْ الجّْمَلْ مْنْ عِينْ لِيبْرَة سْهَلْ مْنْ الدّْخُولْ دْيَالْ اللِّي لَبَاسْ عْلِيهْ لْمَمْلَكَةْ اللَّهْ!». 25وْتّْعَجّْبُو التّْلَامْدْ بْزَّافْ مْلِّي سْمْعُو هَادْ الْكْلَامْ وْݣَالُو: «عْلَى هَادْ الْحْسَابْ، شْكُونْ غَيْقْدَرْ يْنْجَا؟». 26وْشَافْ فِيهُمْ يَسُوعْ وْݣَالْ لِيهُمْ: «رَاهْ النَّاسْ مَا يْقَدْرُوشْ عْلَى هَادْشِّي، وَلَكِنْ اللَّهْ قَادْرْ عْلَى كُلّْشِي».
27وْجَاوْبُه بُطْرُسْ وْݣَالْ: «هَا حْنَا خَلِّينَا كُلّْشِي وْتْبَعْنَاكْ، آشْ غَادِي يْكُونْ الْجَزَاءْ دْيَالْنَا؟». 28وْݣَالْ لِيهُمْ يَسُوعْ: «نْݣُولْ لِيكُمْ الْحَقّْ: مْلِّي غَيْݣْلَسْ وَلْدْ الْإِنْسَانْ عْلَى عَرْشْ الْعَزّْ دْيَالُه فْالزّْمَانْ اللِّي غَيْوَلِّي فِيهْ كُلّْشِي جْدِيدْ، غَتْݣَلْسُو نْتُمَ اللِّي كَتّْبْعُونِي عْلَى طْنَاشْرْ عَرْشْ بَاشْ تْحَكْمُو قْبَايْلْ إِسْرَائِيلْ الطّْنَاشْ.#متى 25:31؛ لوقا 22:30 29وْكُلّْ مْنْ سْمَحْ فْدْيُورُه، وْلَا خُوتُه، وْلَا خْوَاتَاتُه، وْلَا بَّاهْ، وْلَا مُّه، وْلَا وْلَادُه، وْلَا الْأَرَاضِي دْيَالُه عْلَى قْبَلْ الْإِسْمْ دْيَالِي، رَاهْ غَادِي يْتّْرَدّْ لِيهْ دَاكْشِّي اللِّي سْمَحْ فِيهْ عْلَى مْيَةْ مَرَّة وْغَيْوْرَتْ الْحَيَاةْ الدَّايْمَة عَنْدْ اللَّهْ. 30رَاهْ بْزَّافْ مْنْ هَادُوكْ اللِّي كَانُو هُمَ اللّْوّْلِينْ غَادِي يْوَلِّيوْ هُمَ اللّْخْرِينْ، وْبْزَّافْ اللِّي كَانُو اللّْخْرِينْ غَادِي يْوَلِّيوْ هُمَ اللّْوّْلِينْ».#متى 20:16؛ لوقا 13:30
Pašlaik izvēlēts:
مَتَّى 19: MSTD
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved