मत्ती 28
28
येशू सीच लकीङ जीवाच
(मर्कूस १६:१-११; लूका २४:१-१२; यूहन्ना २०:१-१८)
1म्हुङ बाट्च दिनौ पीउह्राक लेखो आइतबार झिसमीसाङ न मरियम मग्दलिनी र अर्को मरियम येशूकी डाच चिहान ङोस्की नुङा। 2होडीक बेला मोसोमायाङ बाड्को भूइँचालो नुङा, हीजैडेनाङ स्वर्ग लकीङ प्रभु परमेश्वरौ काट दूत म्हाका झाल्न राहार चिहानुङ ल्हुङ्की सारीया र होसे मीटाक ङुवा। 3होच्यो मीटाहा सर्घाङ पीझ्यानाङ लेखा न ट्याङ्छ र बढीन चहिँ हिउँ ल्याक्च न फोक्सा बोच लेया। 4होसे सिपाहीको बीह्रीयार थेर-थेर बुरुक्ङ सीच बराबर न छाना।
5तर स्वर्गदूतै होसे मास्टो भर्मीकोलाक डेया, “नाखुरीक माबीह्रीनी, ङाकी थाहा ले, नाखुरीक क्रूसाङ टङ्गडीयार साट्च येशूकी पामन ले। 6होसको इला माले, होसकै डेनाङ लेखा न होसको सीच लकीङ जीवाम सोमने। रान्ही होसकोकी डाच ठाउँ ङोस्नी। 7छिटो नुङार होसकुङ चेलाकोलाक खबर यान्ही, ‘होसको च सीच लकीङ जीवाम सोमने र होसको नाखुरीक डेनाङ अघि गालीलाङ नुङ्ङ न ले। नाखुरीकै होसकोकी होला डाङ्ले।’ अब ङै डेकी पर्च कुरा नाखुरीककी डेम याम्हे।”
8होसे मास्टो भर्मीकोलाक बीह्रीम र सेया माह्राङ्ङ र सेया। होखुरीक चिहान लकीङ तुरुन्तै ख्योहार होसकुङ चेलाकोलाक सेटाक्की खेर्न नुङा।
9होटै मोसोमायाङ येशूये होखुरीककी डुपार डेया, “झोर्ले!” होखुरीक खेरेप नुङार होसकुङ मीकु घोवार झोरा र जय-जयकार जाटा। 10येशूये होखुरीककी डेया, “माबीह्रीनी नुङार ङौ चेलाकोलाक गालीलाङ नुङ्की डेम यान्ही र ङाकी होला होखुरीकै डाङ्ले।”
सिपाहीकुङ खबर
11जब होसे मास्टोको लामाङ नुङ्ङ न लेनाङ, चिहानाङ रुङ्की ङुच सिपाहीको कुडीक जना चहिँ सहराङ नुङार मुख्य पूजाहारीकोलाक होला छान्च पट्ट न घटनाकुङ बारेयाङ सेटाका। 12मुख्य पूजाहारीको र अगुवाको भेला छानार अब ही जाटीङ डेयार सल्लाह जाटा र होखुरीकै सिपाहीकोलाक वास्टै पैसा याहा 13र डेया, “नाखुरीकै याङ्च डेनी, ‘कान नाबीक मीस्न ङुच बेलाङ येशूओ चेलाको राहार होच्यो लाश खुसार आल्ल्हेसा।’ 14इडीक इसे कुरा हाकिमौ मेनेकेपाङ टाहा डेनाङ, कान होसेखाटा कुरा खाटाक्ले र नाखुरीककी जोगडीले।” 15होसे रुङ्च सिपाहीकै पैसा लार मुख्य पूजाहारीकै पाहाक्नाङ लेखा न जाटा। अनि इसे कुरा यहूदीकुङ मीघ्याङ चाहाँसम्म र फैलडीस्नने।
येशूओ महान आज्ञा
(मर्कूस १६:१४-१८; लूका २४:३६-४९; यूहन्ना २०:१९-२३; प्रेरित १:६-८)
16तब एघार जना चेलाको होसे गालीलुङ डाँडाङ नुङा, होला येशूये होखुरीककी नुङ्की डेमन्या। 17होखुरीकै येशूकी डाङार दण्डवत् जाटा, तर कुडीकै चहिँ होसकोकी शंका जाटा। 18तब येशू होखुरीक लेठाङ खेरेप राहार डेया, “स्वर्ग र पृथ्वीयाङ पट्ट न अधिकार ङाकी याम्हने। 19होटबाटै नुङ्नी, र पट्ट जातियुङ भर्मीकोलाक चेलाको खास्नी, अनि परमेश्वर बोइ, मीजा र पवित्र आत्मौ म्यार्मीनाङ बप्तिस्मा यान्ही। 20ङै नाखुरीककी आज्ञा जाट्च पट्ट न कुरा पालना जाट्की होखुरीककी पाहाक्नी। सेनी, ङा संसारौ अन्तिम दिनसम्म न सधैँ नाखुरीकखाटा न ले।”
Pašlaik izvēlēts:
मत्ती 28: EMGP
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
© 2025 by Mother Tongue Translators Society and Wycliffe Bible Translators, Inc.