Domano Ma̧ȩ 15
15
Ju chiami̧ dari̧ quëna̧ji̧ri̧ oa chi̧dëearequededibe
1Pio a̧ro̧rȩ, ju chiami̧ dari̧ quëna̧ji̧ri̧ pio judiro̧ chjadëri̧ a̧dotäreji̧ri̧rea̧ro̧jȩrȩ ju chiadëmi̧ dari̧ quëna̧ji̧ri̧ pio ji̧ri̧iäpȩmo̧. Jabechji̧ ibëa̧ maea oa jo̧rȩtadëtäreji̧ri̧rea̧rȩ. Ibëa̧ chji̧rämo̧ jo̧rȩtatadëtäreji̧ri̧rea̧rȩ, jabo judiro̧ chachari̧ arami̧ da pio ju̧i̧ ano̧ mire arami̧ dari̧ a̧dotäreji̧ri̧rea̧ro̧jȩrȩ judiro̧ ütëchjape bagarea̧mi̧ dari̧. 2Tjamo̧ davä, a̧ro̧rȩ japatämi̧ cjia̧ pio ju̧i̧mo̧i̧ jo̧rȩtadëtäreji̧ri̧rea̧rȩ, jabo ibëa̧ omȩ pio ju̧i̧ chjadëri̧ a̧dopea̧ oa järitäreji̧ri̧rea̧rȩ judiro̧ ju chiami̧ dari̧ quëna̧pe jäpea̧ oa. 3Jabechji̧ Quiricho judi pio yoa chirirä cjo̧ro̧rä judirä peaja̧di dari̧ cjo̧ro̧rëremȩde. Jibëa̧ maea oa jo̧rȩtadëa̧de jabo Ütë tjamo̧ pio ju̧i̧ ja̧ oa jo̧rȩtamȩrȩ cjo̧ro̧rëremȩde. Peaja̧di ta̧rëri̧ go̧ȩpea̧ oa cjiade Ütë tjamo̧ ja̧ ma̧ȩ üdë. Jechu judi Ütë tjamo̧ pio ju̧i̧iäpȩmo̧ yo̧bëmi̧ go̧ȩpea̧ oa cjiarëremȩde. Ta̧rëchji̧vä:
"Pumȩ judiro̧ pio mȩaiäpȩmo̧ ma̧ȩ goaedëti̧ra̧ ya̧ea̧ ji̧, jabechji̧ pio coaiäpȩmo̧ ma ano̧ mire acji cjatäa̧dique."
Aja̧, ja̧di ta̧rëri̧ yo̧rëremȩde Quiricho judi. 4Ado pio jiro ma̧ȩ üdë, jabërä go̧ȩpea̧ oa cjiarërea̧ ma̧ȩ üdë, yabo yürüa̧ pënȩrä jabërä go̧ȩpea̧ oa cjiarërea̧ ma̧ȩ chjö̧na̧i̧rȩ, jabechji̧ go̧ȩpea̧ oa cjiarëremȩde ibë chjadëri̧ a̧dopea̧ oa. Tjamo̧ davä. Ibë dabapa tänȩpea̧ oa, ibë järiparȩpea̧ oa, ibë chichipami̧ dari̧ japapea̧ oa go̧ȩpea̧ oa cjiarëremȩde. Aja̧, a̧ro̧rȩ chjai̧dëri̧ chjätäräbo chjuari̧ quëna̧pea̧ oa, a̧ro̧rȩ ma̧ chjua jo̧rȩtaji̧ri̧rȩ cjo̧ro̧pea̧ oa, a̧ro̧rȩ jidataji̧ri̧rȩ cjo̧ro̧pea̧ oa jabërä go̧ȩpea̧ oa cjiarëremȩde Ütërȩ go̧ȩpa tänȩrërea̧ ma̧ȩ pio judi.
5Danȩrȩ, Ütë tjamo̧ pio judide ibë järiparȩmȩ judi, ibë ma̧ chjua jo̧rȩtarea̧ yürümȩ judi. Ado pio judi chjadëri̧ a̧dotädidibe Jechu Quiricho pio ju̧i̧ cho̧rëdiäpea̧ oa. Aja̧, pio judi chjadëri̧ a̧dotädidibe mȩnȩro̧ cja̧rȩmȩ chji̧ chiami̧ dari̧ jo̧rȩtapea̧ oa, mȩnȩro̧ jadüchiami̧ bubami̧ dari̧ cjiachea oa. Aja̧, Jechu Quiricho pio judi cjo̧ro̧mi̧ dari̧ cjo̧ro̧tä eadidibe. 6Ado ja̧di dari̧ cjo̧ro̧a̧ oaiä, jabechji̧ cja̧rȩmȩ jo̧rȩtarea̧ chiaji̧ri̧rȩ chjacjiamȩ tjamo̧ri̧ ni̧bärea̧ dapanȩrȩ ibëa̧ Ütë pio ju̧i̧iäpȩmo̧, Ano̧mȩ Jechu Quiricho ja̧ Amai̧ pio ju̧i̧iäpȩmo̧.
7Pio ju̧i̧iä yo̧requededibe. Jabechji̧ Quiricho judi pio dibë ba chia dami̧ dari̧ ba chia dachji̧vä dibëa̧ dëbëti̧ra̧ chia. Ado pumȩ judiro̧ pio dibë daea̧ oaiä, Quiricho pio judimi̧ dari̧ cjo̧ro̧ji̧ri̧ oa daea̧ oaiä, jabechji̧ chjacjiamȩri̧ ni̧bäpadiro̧jo̧ȩ Ütë tjamo̧ pio ju̧i̧iäpȩmo̧. 8Jabechji̧ Quiricho judi pearä birë ma̧na̧rërea̧ ji̧, jabechji̧ ma̧na̧rëremȩde judio pio ji̧ri̧ ja̧ mu̧i̧tjoi̧pe bagapea̧ oa, pio ji̧ri̧ chjadëri̧ na̧rȩpea̧ oa, judiro̧ Ütë tjamo̧ pio ju̧i̧ chjiari coëma cjiari̧ quëna̧pea̧ oa. 'Aja̧, Ütë tjamo̧ judi yo̧a̧mi̧ japamȩdida, ado ibëa̧ ütëti̧rea̧ pio ji̧ri̧ yo̧ë cji̧därërea̧ pio ju̧i̧ tjamo̧ri̧ japadäräpadida, jabechji̧ ibëa̧ ütëti̧rea̧ pio ji̧ri̧ yo̧ë cji̧därërea̧ ma̧ȩ üdë tjamo̧i̧padäräa̧ oa cjiapadida' quëna̧ dabapea̧ oa chjadëri̧ birë ma̧na̧rëremȩdiibe Jechu judi. 9Jabo danȩrȩ, judiodë pio ji̧ri̧ ja̧bo birarëremȩde. Tjamo̧ davä. Judiodë pio ji̧ri̧bo a̧doera̧pea̧dejȩrȩ, judiro̧ Ütë tjamo̧ pio ju̧i̧iäpȩmo̧ chjacjiamȩri̧ ni̧bäpea̧ oa, Ütërë pio jibëiäpȩmo̧ cjäri̧ri̧ cjia daea̧ pio ju̧i̧iä chjacjiamȩri̧ ni̧bäpea̧ oa. Ado pio ju̧i̧ chjiari jo̧rȩtamȩrȩ go̧ȩparëremȩde Davirea̧ pio judi jabërä go̧ȩparërea̧ ji̧. Ta̧rëchji̧vä:
"Aja̧, judiodë pio ji̧ri̧ nö̧ta cjiamȩrȩ chjacjiamȩri̧ ni̧bäparequedemȩ pio ji̧ri̧ ja̧ chjarerämȩrȩ. Pio mȩaiäpȩmo̧ chjacjiamȩri̧ jo̧rȩtamȩrȩ go̧a̧parequedemȩ pio ji̧ri̧ nö̧ta."
Aja̧, ja̧di ta̧rëri̧ go̧ȩpea̧ oa cjiade. 10Ado pio yoa ma̧ȩbo go̧ȩpea̧ oa cjiade judiodë pio ji̧ri̧ chjiari. Ta̧rëchji̧vä:
"Judiodë pio ji̧ri̧iäpȩmo̧ yo̧requededibe. Danȩrȩ, ma̧ chiadëri̧ cjiari̧ jo̧rȩtachji̧vä judi mitëa̧ pumȩ pio ji̧ri̧ nö̧ta, judio pio ji̧ri̧ nö̧ta."
Aja̧, ja̧di ta̧rëri̧ go̧ȩpea̧ oa cjiade. 11Ado cja̧rȩmo̧räpȩ peaja̧dimi̧ ta̧rëri̧ go̧ȩpea̧ oa cjiade judiodë pio ji̧ri̧ chjiari. Ta̧rëchji̧vä:
"Aja̧, mȩnȩro̧, judiodë pio judiro̧, jabechji̧ chjacjiamȩri̧ ni̧bächji̧vä dibëa̧ Ano̧mȩ pio ju̧i̧iäpȩmo̧. Jabechji̧ pumȩ ütëbodärärë chjacjiamȩri̧ ni̧bätädiro̧jo̧ȩ, chiriräpȩti̧ oa cjo̧ro̧ji̧ri̧ judiro̧."
12Aja̧, ado peaja̧dimi̧ ta̧rëri̧ go̧ȩparëremȩde Ichaia judi. Ta̧rëchji̧vä:
"Aja̧, Jeche#15:12 Jeche judi, Davi pio ju̧i̧ ja̧ amai̧de. Ado pio ju̧i̧iä pio judiri ja̧mȩ judi, jabechji̧ Chjätä Tänȩmȩ pio judide. pio judiri ja̧mȩ judi, Davi pio ju̧i̧ ja̧ jäja pio judiri ja̧mȩ pio judi ma̧na̧padiibe chiri ütëmȩrȩ cjo̧ro̧pea̧ oa. Ado chiri tjamo̧ yo̧mȩrȩ cjo̧ro̧mȩpea̧rä, jabechji̧ pio ju̧i̧ ja̧ chja̧oerämo̧ cjo̧ro̧padirȩ judiodë judiro̧ ütëborë, pio ju̧i̧iämo̧i̧ jidataji̧ri̧rȩ."
Aja̧, ja̧di ta̧rëri̧ go̧ȩpea̧ oa cjiade jabërä cjiarërea̧ ma̧ȩ üdë judiodë pio ji̧ri̧ chjiari. Ado pio ju̧i̧iä yo̧requededibe. Quiricho judi birarërea̧ ji̧, jabechji̧ judiodë pio ji̧ri̧ ja̧bo birarëremȩde.
13Danȩrȩ, Ütë tjamo̧ pio judiri ma̧na̧ tjamo̧diibe jidatarea̧ üdë. Ja̧di tara pio ju̧i̧iä goë cjo̧dëreconȩ pio dibë chjiari. Jabechji̧ mȩnȩro̧ pio ju̧i̧iäpȩmo̧ quëna̧ji̧ri̧rȩ cjo̧ro̧ tara, jabechji̧ dibëa̧ chji̧ üdë tjuri cjiami̧ dari̧ cjiatä goë cjo̧dëreconȩ ma̧ chiadëri̧ cjiari̧ jo̧rȩtarea̧ra̧, ma̧ chjupi̧ cjiari̧ jo̧rȩtarea̧ra̧ a̧de. Ado ja̧dëa ji̧ Tjo tjamo̧ ja̧ jauëchja oaiä, jabechji̧ jidatarea̧ ji̧ra̧ tjamo̧ oa chiaji̧ri̧rȩ cjo̧ro̧panȩrȩ, a̧dë chjäte ji̧ra̧ri̧ chiari̧.
Ja̧di dari̧ japarëremȩde Pablo judi
14Ca̧ oti̧, tjamo̧ri̧ dabarequede pio dibë chjiari. 'Aja̧, chjadëri̧ jape chjaodiro̧da, Ütë tjamo̧ ja̧ ma̧ȩ oa chjadë tjamo̧ri̧ dabapea̧diro̧da, ado jibëa̧ dëbëti̧ra̧ chia chjadëri̧ a̧ra̧ano̧rea̧ chiadiro̧da' quëna̧ dabarequede pio dibë chjiari. 15Jabo cüdë pio yoa ma̧ȩ oa go̧ȩpea̧ ji̧, jabechji̧ oëadëmȩmi̧ darë go̧ȩpea̧requededibe. Jabechji̧ pio dibë chjadëri̧ jo̧rȩta tänȩpea̧ oa, cuchu chiadëri̧ go̧ȩpea̧requededibe. Jabechji̧ pio judide ca̧ ja̧beparea̧ üdë. Ütërë cjäri̧ri̧ cjiamȩrȩ yürüa̧ oaiä ca̧ ja̧beparea̧de. 16Jabechji̧ Jechu Quiricho pio judi chjadüa̧ oa ja̧beparequede pio ju̧i̧ ja̧ mu̧i̧tjoi̧mȩrȩ. Aja̧, judiodë pio ji̧ri̧iäpȩmo̧ ma̧ȩ chjadëi̧ pio ju̧i̧ a̧ra̧ano̧pea̧ oa ja̧beparequede Ütë tjamo̧ ja̧ bëräpȩ goë tuti ja̧bepamȩmi̧ dari̧. Jabechji̧ judiodë pio judiro̧ quëna̧ji̧ri̧pea̧ji̧ri̧ oa yürümi̧ dari̧ yürüparequedejȩrȩ Ütë tjamo̧ pio ju̧i̧iäpȩmo̧. Aja̧, ca̧ yürürea̧mi̧ da oa yürümȩrȩ yürüpareconȩ goaeri̧ pjea̧ cjitëmi̧ dari̧ cjiapamȩ pio ju̧i̧, Tjo tjamo̧ pio ju̧i̧iä china̧chjari̧ tutia̧ oa cjiapamȩ pio ju̧i̧.
17Ado cüdë ja̧bepea̧ oaiä, judiodë no̧i̧dërë quëna̧ji̧ri̧pea̧ pio ju̧i̧ chjiari jo̧rȩta̧ oaiä, 'jabechji̧ Jechu Quiricho pio judiri ja̧mȩrȩ chjadëri̧ ja̧beparea̧ daea̧quëda' quëna̧ jo̧rȩtamȩrȩ ma̧ chiadëri cjia tjamo̧requede. 18Jabo pio coa chjiari yo̧rea̧mi̧dëde jabo. Cüdë ma ja̧didë. Quiricho pio judide. Pio coaiä ana̧ri̧ ja̧beparëremȩde judiodë judiro̧ ma̧ȩ chjadëi̧ pio ju̧i̧ quëna̧ji̧ri̧pe bagarea̧mi̧ dari̧. Ado pio ju̧i̧iä oëadëmȩmi̧ dari̧ ni̧bärequede pio ju̧i̧ chjiari, judi pio coaiä ni̧bäa̧ pio ju̧i̧ chjiari, judi pio coaiä ana̧ri̧ ja̧bepea̧ pio ju̧i̧ chjiari. 19Tjamo̧ davä. Pio coaiä ana̧ri̧ ja̧beparëremȩde jauëchja cjiari̧ na̧rȩ chjaomȩrȩ. Tjo tjamo̧ pio judi jibëa̧ jauëchja ana̧ oa yürüa̧ oaiä ja̧di dari̧ ja̧beparea̧ daea̧requede. Danȩrȩ, Quiricho pio ju̧i̧ chjiari ma̧ȩ ütëbo oa to̧bari̧ ni̧bäriä tai̧ chjaorëremȩrequede ma̧ȩ chjadëi̧ pio ju̧i̧. Tjamo̧ davä. Jerucharȩ bë ma̧ri̧ri pio judiri Iriria quȩmȩ chiriräpȩ yuro to̧bari̧ ni̧bäriä tai̧ chjaorëremȩrequede davä, pio jiro ma̧ȩ oa ni̧bä chjaomȩrȩ. 20Ado jadi dari̧ ja̧bepea̧ üdë ji̧mo̧ baäde cüdë peadëri ja̧ jo̧rȩtarërea̧ pio ju̧i̧ nö̧ta. Tjamo̧ davä, jo̧rȩtarëremȩrequedejȩrȩ cja̧rȩmȩ co ta̧rëdëa̧räpȩ cjo̧ro̧ji̧ri̧ pio ji̧ri̧iäpȩmo̧ a̧ra̧ano̧pea̧ ji̧. 'Aja̧, pio ji̧ri̧iäpȩmo̧ ma̧ȩ chjadëi̧ oa a̧ra̧ano̧pea̧ chiaquiji̧ri̧da, Quiricho pio ju̧i̧ chjiari cja̧rȩmȩ co ta̧rëdëa̧ pumȩ pio ji̧ri̧iäpȩmo̧ a̧ra̧ano̧pea̧ chiaquiji̧ri̧da' quëna̧ jo̧rȩtarequede peadëri ja̧, ado cja̧rȩmo̧rȩ a̧ra̧ano̧a̧ duri pio ju̧i̧ a̧de a̧ra̧ano̧chea oa. 21Ado peaja̧dimi̧ dari̧ yo̧diibe ma̧ȩ üdë.
"Aja̧, pumȩ judiro̧ pio ju̧i̧ chjiari cja̧rȩmȩ co a̧ra̧ano̧dëa̧ pio judiro̧ daba dapadiro̧jo̧ȩ. Ado pumȩ judiro̧ pio ju̧i̧ chjiari cja̧rȩmȩ co ta̧rëdëa̧ pio judiro̧ tjamo̧ri̧ dabapapadirȩ."#15:21 Ichaia 52:15
Aja̧, ja̧di ta̧rëri̧ go̧ȩpea̧ oa cjiade ma̧ȩ üdë. Ado Ütë tjamo̧ judi no̧mȩ tjamo̧ri ja̧ ea jana̧ chjadürërea̧ ma̧ȩ pio ju̧i̧ chjiari ana̧ri̧ ja̧bepatämi̧ cjiarequede.
Pablo judi chëre oa yürü ëte, goëdepadejȩrȩ Domaräpȩ quëna̧ji̧ri̧ pio ji̧ri̧
22Aja̧, ca̧ oti̧, cüdë oëra̧ti̧ oa a̧rȩmȩ chiriräpȩ cjo̧ro̧ji̧ri̧ pio ji̧ri̧iäpȩmo̧ ma̧ȩ chjadëi̧ pio ju̧i̧ a̧ra̧ano̧riä chjätäti̧ cjiarërea̧ oaiä, jabechji̧ pio dibëiäpȩ järea̧ dadëa̧requede. Domaräpȩji̧ri̧ oa goëde järea̧ dadëa̧requededibe. 23Jabo yaba̧ goëde jätämi̧ cjiarequededibe. Pio ju̧i̧ tjamo̧ri̧ jo̧rȩtarequede. Jabechji̧ ca̧ ja̧beparea̧ pio ju̧i̧ japadäräa̧ oaiä, cüdë tai̧rërea̧ chiriräpȩ ja̧bepadäräa̧ oaiä, jabechji̧ goëde jätämi̧ cjiarequededibe cüdë ui ji̧ra̧ tjamo̧ri ja̧ jo̧rȩtarërea̧mi̧. 24Danȩrȩ, Epana quȩmȩ chiriräpȩ jäpea̧ chiarequede. Ado cüdë järä, jabechji̧ pio dibë dariä jäparequede goae tjamo̧ri̧ ëba ni̧bä chjaopea̧ oa, ibëa̧ chji̧ üdë maimi̧ dari̧ cjiapea̧ oa. Ado ja̧dëa ji̧ cüdë Epanaräpȩ jäpea̧ ji̧ go̧dürä, jabechji̧ a̧dopai̧ darenȩro̧coe mȩnȩro̧ a̧dorea̧ tararä judi, cüdë jabëdiächea oa, cüdë ja̧dira̧ chjadëri̧ go̧düdäräpea̧ oa. 25Jabo jabërequede jabo. Pearä judi jäpea̧ chiarequede Jerucharȩräpȩ. Jabechji̧ chëre oa a̧de jäpea̧ chiarequede Ütë tjamo̧ ja̧ pumȩ ja̧ oa. 26Aja̧, pio jiro chëre üdë yürüa̧ oa cjiarëremȩde Ütë tjamo̧ pio ju̧i̧ ja̧ u̧ri̧ ja̧ oa. Jabechji̧ Machedoniaräpȩ a̧dopaji̧ri̧ judiro̧, a̧doparea̧ ji̧ra̧räpȩ a̧dopaji̧ri̧ pio judiro̧ yürürëreji̧ri̧diro̧jo̧ȩ pio jiro chëre oa. Ado Acayaräpȩ a̧dopaji̧ri̧ judiro̧, a̧doparea̧ ji̧ra̧räpȩ a̧dopaji̧ri̧ pio judiro̧borë yürürëreji̧ri̧dirȩ. Jabechji̧ Jerucharȩräpȩ quëna̧ji̧ri̧ ja̧ oa, chö̧na̧i̧ti̧ oa cjäri̧ ja̧boji̧ri̧ ja̧ oa yürürëreji̧ri̧dirȩ. 27Aja̧, ado cja̧rȩmo̧rȩ tänȩa̧ oa yürüdëa̧dirȩ jabo jabechji̧, tjamo̧ri̧ yürütämi̧ cjiaji̧ri̧rȩ yürürëreji̧ri̧dirȩ, ma̧ chiadëri̧ cjiaji̧ri̧rȩ. Tjamo̧ davä. Yürüdëri̧ cjiaji̧ri̧rȩ yürüdëa̧dirȩ, jabo jënȩro̧ Jerucharȩräpȩ cjo̧ro̧ji̧ri̧ judio pio ji̧ri̧iä ma̧ȩ ba chia oa ta̧rëa̧ oaiä, jabechji̧ pio ji̧ri̧iäpȩmo̧ ba cjiadiämi̧ dari̧ cjiadiäji̧ri̧rȩ yürütämi̧ cjiarëreji̧ri̧diro̧jȩrȩ. Tjamo̧ davä. Judio judiro̧ Ütërë pio jibëiäpȩmo̧ jibëa̧ tjo ja̧ oa yürüa̧ pio ju̧i̧ ëba goami̧ dari̧ yürürëreji̧ri̧diro̧jȩrȩ judiodë pio ji̧ri̧iäpȩmo̧. Ado pio ju̧i̧iä bacjiadiämi̧ dari̧ cjiarëreji̧ri̧dirȩ judio pio ji̧ri̧iäpȩmo̧. Jabechji̧ judio judiro̧ jibëa̧ tjo ja̧ oa pio jibëiäpȩmo̧ a̧dorërea̧ oaiä, jabechji̧ judiodë pio judiro̧ jibëa̧ chërera̧ ano̧ mire a̧dotämi̧ cjiarëreji̧ri̧diro̧jȩrȩ.
28Pio ju̧i̧iä yo̧requededibe ca̧ oti̧. Pio yoa ja̧beparea̧ oa ja̧bepadäräa̧rä, Judiodë judiro̧ yürüa̧ chëre pio ju̧i̧ ütëbo oa irä yürüa̧rä, jabechji̧ Epanaräpȩmo̧ ano̧ mire jäparequede pio dibë dariä jämȩrȩ. 29Ado cüdë pio dibëiäpȩ go̧düdäräa̧rä, ibëa̧ tjo üdë goae tjamo̧ri̧ cjiadiäpade Quiricho pio judi a̧dë chjäte chjadëri̧ yürüa̧ oaiä. Pio ju̧i̧ tjamo̧ri̧ dabarequede.
30Ca̧ oti̧, Jechu Quiricho judi ibëa̧ Ano̧mȩde. Ado Tjo tjamo̧ pio ju̧i̧iä ibëa̧ dëbëti̧ra̧ chia tjamo̧ri̧ earea̧ chiarea̧rȩ. Ado pio ju̧i̧iä cjo̧dëtarequededibe pio coa chjiari goë cjo̧dëtä. 31Goë cjo̧dëchji̧vä pio coa chjiari, Ütë tjamo̧ judi pio coa chjadëri̧ a̧dotä, coa chjadëri̧ jidatä Judea chiriräpȩ quëna̧dëji̧ri̧ judiro̧ coa conȩdachea oa. Ado cüdë a̧de jäpea̧ chëre pio ju̧i̧ chjiaribo goë cjo̧dëtä earequededibe. Jerucharȩräpȩ quëna̧ji̧ri̧ judiro̧ pio ju̧i̧ mitërä, jabechji̧ ma̧ chiadëri̧ cjiari̧ jo̧rȩtaji̧ri̧rȩ datädiro̧jo̧ȩ. 'Jabechji̧dida, chjadëri̧ yürüa̧diro̧ibëda' quëna̧tädirȩ. Pio ju̧i̧ chjiaribo cjo̧dëtä earequededibe ca̧ oti̧. 32Ado pio ji̧ri̧iäpȩmo̧ yürü ëte, jabechji̧ Ütë tjamo̧ judi chjadëri̧ go̧düdärärea̧ yürürä judi, pio dibëiäpȩ go̧düdäräparequede a̧dë chjäte ma̧ chiadëri̧ cjiamȩrȩ. Ado judirä, jabechji̧ ibëa̧ chji̧ oa chjupi̧ bagami̧ tarari̧ a̧dopaparea̧rȩ ibëa̧ dëbëti̧ra̧ chia ma̧ chiadëri̧ cjiape järea̧mi̧ dari̧, ibëa̧ tjoro järätä chjapami̧ dari̧. 33Aja̧ ca̧ oti̧, ma̧ chjupi̧ cjiari̧ jo̧rȩtarea̧ yürümȩ Ütë pio judi chjadëri̧ ëba cjiatädidibe. Ja̧ditäde.
Pašlaik izvēlēts:
Domano Ma̧ȩ 15: Pume
Izceltais
Kopēt
Salīdzināt
Dalīties
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2021 Global Partners, All Rights Reserved