Domano Ma̧ȩ 14
14
Ju chiadëmi̧ dari̧ quëna̧ji̧ri̧ pio ji̧ri̧bo ba chia dapea̧de
1Danȩrȩ ca̧ oti̧, a̧ro̧rȩ, ju chiadëmi̧ dari̧ quëna̧ji̧ri̧ ütëbodärä oa chjadëri̧ jeatäreji̧ri̧rea̧ro̧jȩrȩ, cjäri̧ri̧ cjia daji̧ri̧rȩ. Jabechji̧ judiro̧ quëna̧ji̧ri̧borë o oa cjö̧na̧pai̧ dadiro̧jo̧ȩ. Tjamo̧ davä. Ütë tjamo̧ judi china̧chja tänȩdëa̧räbo, cjö̧na̧pai̧ dadiro̧jo̧ȩ. Jabo jabechji̧ ba chia datäreji̧ri̧rea̧ro̧jȩrȩ a̧ro̧rȩ. Ea tjamo̧ji̧ri̧rȩ datäreji̧ri̧rea̧ro̧jȩrȩ eacji̧ quëna̧ japarea̧mi̧dëri̧. Danȩrȩ, eami̧ quëna̧mȩ üdë ju chiadëmi̧ dari̧ quëna̧rä judi, jabechji̧ tjaoëpai̧ dari̧ jo̧rȩtaräbo, ba chia datäreji̧ri̧rea̧ro̧jo̧ȩ dëbë ni̧bätarea̧ decjiari̧. Judi jo̧rȩta̧ pio ju̧i̧ chjiari, judi japea̧ pio ju̧i̧ chjiari dëbë ni̧bätadë matäreji̧ri̧rea̧rȩ pio ju̧i̧ nö̧ta. 2Danȩrȩ, ju chiami̧ dari̧ quëna̧mȩ judi, jabechji̧ dami̧ti̧ jurarea̧ oa jurade, 'jurarea̧ orë china̧chjadida, juradëpea̧dida' quëna̧rea̧ decjiari̧. Jabo ju chiadëmi̧ dari̧ quëna̧mȩ judi, jabechji̧ o oamo̧i̧ jurade. Go̧a̧ oa juradëde. 'Go̧a̧ üdë juradëpea̧dida, cjö̧na̧pacuni̧da' quëna̧ jo̧rȩtamȩrȩ cjo̧ro̧de. 3Jabo ja̧di dari̧ quëna̧räbo, jabechji̧ badë dadëtäreji̧ri̧rea̧ro̧jo̧ȩ dami̧ti̧ jurarea̧ oa juraji̧ri̧ judiro̧. Tjamo̧ davä. Go̧a̧ decjia oa juramȩ pio ju̧i̧iäpȩmo̧ badë dadë matäreji̧ri̧rea̧ro̧jo̧ȩ. Ado go̧a̧ decjia oa juramȩ judi, peaja̧di badë dadëtäremȩdejȩ dami̧ti̧ jurarea̧ oa juramȩ pio ju̧i̧iäpȩmo̧. "Cjäri̧ marenȩ, chjai̧dëri̧ juramȩrenȩ” yo̧dëtäremȩdejȩ. Jabechji̧ quëna̧ji̧ri̧ ütëbodärä oa cjäri̧ri̧ cjiamȩrȩ ba chia da madejȩ Ütë tjamo̧ judi. Pio ju̧i̧iä ibëa̧ omȩ oa badë darea̧mi̧dëde.
4Danȩrȩ, o judiro̧ jibëa̧ mu̧i̧tjoi̧ goadirȩ. Ado mu̧i̧tjoi̧ üdë, jabechji̧ jibëa̧ ano̧mȩ pio ju̧i̧ ja̧ oa ja̧bepade. Pio ju̧i̧ ja̧ dachoro ja̧bepade. Ju̧i̧ ütarë damȩ pio ju̧i̧ ja̧ dachoro ja̧bepade. Ado tjaoërë, mu̧i̧tjoi̧ ano̧mȩdë pio judi, cjäri̧ made, jibëa̧ mu̧i̧tjoi̧dë oa tja̧reparȩrea̧mi̧dëde. Pio ju̧i̧iäpȩmo̧ tuti yo̧rea̧mi̧dëde. Ado peaja̧dide ibëa̧ omȩ pio ju̧i̧iä. Danȩrȩ, Ütë tjamo̧ pio ju̧i̧ ja̧ mu̧i̧tjoi̧de. Pio ju̧i̧ ja̧de. Ibëa̧dëde. Ado pio ju̧i̧iä a̧ro̧rȩ ano̧ji̧ri̧dërë aene ni̧bärea̧mi̧dëde. “Aja̧, pio mȩnȩ go̧a̧ oa jura tara, jabechji̧ Ütë tjamo̧ judi cjäri̧ri̧ cjia dadëpadimȩ” yo̧rea̧mi̧dëde. Jabechji̧ go̧a̧ jura̧mȩbo cjäri̧ri̧ cjiamȩrȩ chjadëri a̧dodejȩ Ütë tjamo̧ judi, ütëchjai̧pe bagarea̧mi̧ dari̧. Ado pio ju̧i̧iä yo̧requededibe. Jurarea̧ pio ju̧i̧ chjiari dëbë ni̧bätadëpea̧de.
5Cja̧rȩmȩ coëma jo̧rȩtadërea̧rȩ. Danȩrȩ, cja̧rȩmȩrȩ, jabë ju chiadëmi̧ dari̧ quëna̧mȩ pio judi, jabechji̧ china̧chjari̧ tutidejȩ do oa, jënȩ ütara̧ do oa. 'Jabechji̧ ba chia tjamo̧dida' quëna̧ jo̧rȩtadejȩ jënȩ ütara̧ do pio ju̧i̧. Jabo ado cja̧rȩmo̧ üdë ja̧di dari̧ jo̧rȩtadëde. Jabechji̧ cja̧rȩmȩ ba chia maeara̧ jo̧rȩtadejȩ do chjö̧na̧i̧ oa. Tjamo̧ davä. A̧ro̧rȩ ütëborë cja̧rȩmȩ coëma cjiadiä maeari̧ jo̧rȩtadërea̧rȩ. Jabo danȩrȩ ca̧ oti̧, a̧ro̧rȩ ibëa̧ chji̧ra̧ quëna̧ pio ju̧i̧ chjuari̧ quëna̧ji̧ri̧rȩ cjo̧ro̧täreji̧ri̧rea̧rȩ, 'oëra̧ quëna̧ jiroquëda' quëna̧rea̧ decjiari̧. 6Ado pumȩ üdë, 'Aja̧, do yo̧a̧ri̧rȩ ba chiadiro̧da, china̧chjari̧ tutipea̧diro̧da' quëna̧mȩ judi, peaja̧di dari̧ quëna̧mȩrȩ cjo̧ro̧de. Ado jënȩ quëna̧ra̧ pio ju̧ri̧ra̧ Ano̧mȩ pio ju̧i̧iäpȩmo̧ chjadëri̧ japatämi̧ cjiamȩrȩ cjo̧ro̧de. Ado cja̧rȩmo̧ pumȩ üdë, 'Aja̧, cja̧rȩmȩ do üdë china̧chjadëdida jabo do chjö̧na̧i̧rȩ cja̧rȩmȩ ba chia maeadiro̧da' quëna̧mȩ judi, peaja̧di jo̧rȩtamȩrȩ cjo̧ro̧de, jibëa̧ Ano̧mȩ pio ju̧i̧iäpȩmo̧ chjadëri̧ japatämi̧ cjiamȩrȩ. Ado peaja̧dide jurarea̧ pio ju̧i̧ chjiari. Dami̧ti̧ jurarea̧ oa juramȩ judi, go̧a̧bo juramȩ judi, jabechji̧ jibëa̧ Ano̧mȩ pio ju̧i̧iäpȩmo̧ chjadëri̧ japatämi̧ cjiamȩrȩ jurade. Ado pio ju̧i̧iä chjacjiamȩri̧ ni̧bädejȩ jurarea̧ pio ju̧i̧ chjiari. Ado go̧a̧dë maea oa juramȩ judi peaja̧di dari̧ japade. Peaja̧di chjacjiamȩri̧ ni̧bädejȩ jurarea̧ pio ju̧i̧ chjiari. Jabechji̧, Ano̧mȩ pio ju̧i̧iäpȩmo̧ chjadëri̧ japatämi̧ cjiamȩrȩ jurade. 7,8Danȩrȩ, a̧ro̧rȩ quëna̧ji̧ri̧ pio judiro̧ Ütë tjamo̧ ja̧ mu̧i̧tjoi̧rea̧rȩ. Ibëa̧ Ano̧mȩ pio ju̧i̧ ja̧ mapea̧rea̧rȩ. Ado pio ju̧i̧iä ibëa̧ maea oa jo̧rȩtaji̧ri̧rȩ japadëtäreji̧ri̧rea̧rȩ jabo jabechji̧, ibëa̧ Ano̧mȩ pio ju̧i̧iä goaerä judimo̧ japatäreji̧ri̧rea̧ro̧jo̧ȩ. Danȩrȩ, a̧ro̧rȩ cjo̧ro̧a̧ üdë goae tjamo̧ matäremȩdejȩ. Ado a̧ro̧rȩ ja̧boa̧ üdë, peaja̧di goae tjamo̧täremȩdejȩ. Jabechji̧ ja̧boa̧räbo pio ju̧i̧ ja̧ mu̧i̧tjoi̧rea̧rȩ. Ado a̧ro̧rȩ cjo̧ro̧a̧ üdë, a̧ro̧rȩ ja̧boa̧ üdë, jabechji̧ pio ju̧i̧iäpȩmo̧ ma goae tjamo̧täremȩdejȩ. 9¿Tjana̧ ju̧i̧iä goae tjamo̧ matäremȩdejȩ? Tjana̧ ju̧i̧iädë, jabechji̧ Quiricho pio judi ja̧boa̧remȩrȩ bëdürëremȩde. Cjo̧ro̧de. Ano̧mȩrȩ cjiadiäa̧de. Cjo̧ro̧ji̧ri̧ pio ji̧ri̧ ja̧ Ano̧mȩrȩ cjiadiäa̧de. Ado ja̧boa̧ji̧ri̧ pio ji̧ri̧ ja̧ Ano̧mȩrȩ cjiadiäa̧de peaja̧di. Pio ju̧i̧iä a̧ro̧rȩ cjo̧ro̧a̧ üdë, a̧ro̧rȩ ja̧boa̧ üdë, pio ju̧i̧iäpȩmo̧ goae tjamo̧täremȩdejȩ. 10Ado pio ju̧i̧iä iëno̧ë ta̧rërequededibe. Mȩnȩro̧, go̧a̧ decjia oa juraji̧ri̧ judiro̧, ¿Tjana̧ ju̧i̧iä teracabari̧ ütarë yo̧renȩrȩjȩrȩ go̧a̧ juraji̧ri̧ pio ji̧ri̧iäpȩmo̧? ¿Tjana̧ ju̧i̧iä badë darenȩro̧jȩrȩ? Ado mȩnȩro̧, dami̧ti̧ jurarea̧ oa juraji̧ri̧ judiro̧, ¿tjana̧ ju̧i̧iä badë darenȩro̧jȩrȩ o ji̧ri̧iäpȩmo̧? Ja̧di dari̧ japarea̧mi̧dëde. Danȩrȩ, a̧ro̧rȩ ma ja̧didë. A̧ro̧rȩ tjamo̧ ütaraji̧ri̧ ma ja̧didë. Ütë tjamo̧ pio judide tjamo̧ ütaramȩ judi. Ado ütara̧ doro pio ju̧i̧ ja̧ dëbëräpȩ ju̧ri̧ cjiadäräparea̧rȩ a̧ro̧rȩ ütëbodärärë pio judi ibë ütarapea̧ oa. 11Peaja̧di ta̧rëri̧ go̧ȩpea̧ oa cjiade Ano̧mȩ ja̧ ma̧ȩ üdë. Ja̧di ta̧rëri̧ go̧ȩpea̧ oa cjiade:
"Danȩrȩ, cjo̧ro̧rea̧ chiamȩ Ütë pio judimȩrȩ ni̧bärequededibe ma̧ȩ coëma oa. Pumȩ ütëbodärärë ca̧ dëbëräpȩ ju chatura̧ cjiaji̧ri̧rȩ chjacjiamȩri̧ jo̧rȩtapadiro̧coe pio coaiäpȩmo̧. Ado ütëbodärärë jibëa̧ yara̧ pio ju̧ri̧ra̧ yo̧padirȩ davä pio coa chjiari. “Aja̧, mȩnȩ Ütë tjamo̧renȩ” yo̧padirȩ cja̧rȩmȩrȩ a̧dë cjiadiärea̧ decjiari̧."
Aja̧, ja̧di ta̧rëri̧ yo̧rëremȩde Ütë tjamo̧ judi. 12Ado pio ju̧i̧iä tjamo̧ri̧ dabarea̧rȩ Ütë tjamo̧ judi ibë ütarapea̧ pio ju̧i̧ chjiari. Tjamo̧ davä. A̧ro̧rȩ ütëbodärärë ütara̧ doro, pio ju̧i̧ ja̧ dëbëräpȩ cjiaparea̧rȩ judi ibë ütarapea̧ oa, ibë iëno̧ iëno̧ cjiapea̧ oa. Ado ibë iëno̧ iëno̧ ta̧rëmȩ pio ju̧i̧ dëbë yo̧parea̧ro̧jo̧ȩ davä, a̧ro̧rȩ japea̧ pio ju̧i̧ chjiari.
13Pio ju̧i̧iä yo̧requededibe. Dibëa̧ oti̧ pio ji̧ri̧ teracabari̧ ütarë yo̧dëchji̧jȩrȩ. Tjamo̧ davä, teracabari̧ ütara ëte aenȩ ni̧bädë matäreji̧ri̧rea̧ro̧jȩrȩ. Jabechji̧ pio ji̧ri̧ ütararërea̧ ji̧, a̧ro̧rȩ japea̧ pio ju̧i̧ ano̧ mire ütaratäreji̧ri̧rea̧rȩ. Danȩrȩ, a̧ro̧rȩ japea̧ pio ju̧i̧iä ta aneno̧mi̧ dari̧ cjiadiäpai̧ dadirȩ. A̧ro̧rȩ japea̧ oaiä oëra̧diäpai̧ dadirȩ. Pio ju̧i̧iä ano̧ mire jo̧rȩtatäreji̧ri̧rea̧rȩ. 'Jaeboquëda, ca̧ omȩ pio ju̧i̧iäpȩmo̧ chjai̧dëri̧ japadëri̧ cjiacuni̧da, ana̧ri̧ jo̧reta tänȩdëri̧ cjiacuni̧da, ado cüdë japea̧ pio ju̧i̧iä oëra̧diächea oa, chja ja̧di japadëtäremȩcuni̧da' quëna̧ jo̧rȩtatäreji̧ri̧rea̧rȩ.
Ibëa̧ dëbëti̧ra̧ chia eaji̧ri̧rȩ cjo̧ro̧pea̧de
14Jabo danȩrȩ ca̧ pumȩ, jurarea̧ pio ju̧i̧ chjiari tjamo̧ri̧ dabarequede Ano̧mȩ Jechu pio ju̧i̧iä. Danȩrȩ, eami̧ti̧ jurarea̧ üdë, jabechji̧ china̧chjadëde. Ado pio ju̧i̧iä, 'Aja̧, pio jiro jurarea̧ oa cjö̧na̧papea̧ chiacuni̧da' quëna̧rea̧mi̧dëde. Jabo eami̧ pumȩ üdë jibëa̧ chji̧ra̧ jo̧rȩtarä judi, 'Jabo cjäri̧ maquëda, pio jiro jurarea̧ oa juradëtäremȩcuni̧da, pio coaiä china̧chjadida, cüdë pio ju̧i̧ jurarä judi chjai̧dë gȩrȩ chiami̧ dari̧ cjiadiäpai̧ daquëda' quëna̧rä judi, chja jabechji̧ juradëtäremȩdejȩ. 15Ado danȩrȩ ca̧ oti̧, pio a̧ro̧rȩborë juradëtäreji̧ri̧ jirorea̧ro̧jo̧ȩ. Danȩrȩ, ibëa̧ omȩ üdë a̧ro̧rȩ jura̧ pio ju̧i̧iä ana̧ri̧ jo̧rȩtape bagarä judi, a̧ro̧rȩ jura̧ pio ju̧i̧iä coere a̧rȩdärämi̧ dari̧ cjiarä judi, jabechji̧ juradëtäreji̧ri̧rea̧ro̧jo̧ȩ. Jabechji̧ jurarä judi, Ütërë ea̧ chja̧oerä cjo̧ro̧dërea̧rȩ. Danȩrȩ, pio jiro pumȩ ju̧i̧ chjiaribo ano̧ mire ja̧borëremȩde Quiricho judi, pio ju̧i̧ ea tjamo̧mȩrȩ. Ado pio a̧ro̧rȩborë chjadëri̧ eatäreji̧ri̧rea̧ro̧jo̧ȩ pio jiro jurarea̧ oa juradëa̧ oaiä. Aja̧, pio judi coere a̧rȩdärämi̧ dari̧ cjiachea oa, judi oëra̧diächea oa, jabechji̧ juradëtäreji̧ri̧rea̧ro̧jo̧ȩ. 16Ado pio ju̧i̧iä yo̧requededibe. Danȩrȩ, eami̧ üdë pio dibëiä chjadëräbo, pio dibëiä china̧chjadëräbo, jabechji̧ japadëchji̧jo̧ȩ dibëa̧ omȩ pio ju̧i̧iä chjai̧dërä judi. Jabechji̧ pumȩ judiro̧ pio mȩa chjiari chjai̧dëri̧ ni̧bächea oa, jabechji̧ japadëchji̧jo̧ȩ. 17Jabechji̧ Ütërë yo̧a̧ chja̧oerä cjo̧ro̧a̧ üdë, tjaoëpai̧ dari̧ cjo̧ro̧rea̧de. Tjaoëpai̧ dari̧ jo̧rȩtarea̧de. Ibëa̧ oti̧ pio ji̧ri̧ nö̧ta ori̧ bagari̧ ëba cjiarea̧de. Tjo tjamo̧rȩ yürüa̧ oa ma̧ chiadëri̧ cjiari̧ jo̧rȩtarea̧de. Coëma cjiari̧ cjo̧ro̧rea̧de. Jurarea̧ pio ju̧i̧ chjiari tjamo̧ri̧ jo̧rȩtadërea̧de. Jararea̧ pio ju̧i̧ chjiari jo̧rȩtadërea̧de, jabo ba chia pio ju̧i̧ chiarimo̧ jo̧rȩtarea̧de. 18Ado a̧ro̧rȩ Quiricho pio ju̧i̧ ja̧ oa ja̧di dari̧ ja̧bepaji̧ri̧rȩ cjo̧ro̧rä judi, jabechji̧ ma̧ chiadëri̧ cjiapade Ütë tjamo̧ judi pio ibëiä. Ado pumȩ judiro̧ peaja̧di ma̧ chiadëri̧ cjiaji̧ri̧rȩ dapadiro̧ibe peaja̧di.
19Ado pio ju̧i̧iä ji̧dë ma järitäreji̧ri̧rea̧rȩ goaeri̧ jadü cjiarea̧ pio ju̧i̧. Ado peaja̧di ji̧dë ma järitäreji̧ri̧rea̧rȩ o ji̧ri̧iäpȩmo̧ ju chiaparȩmi̧ dari̧ japapea̧ oa. Tjamo̧ davä. Järitäreji̧ri̧rea̧rȩ ja̧di dari̧ cjo̧ro̧pea̧ ji̧, nȩmo̧diärea̧ decjiari̧. 20Jabechji̧ a̧ro̧rȩ jura̧ pio ju̧i̧iä tja̧reparȩmi̧ dari̧ japadëtareji̧ri̧rea̧ro̧jo̧ȩ Ütë tjamo̧ ju̧i̧, pumȩ pio ji̧ri̧ jëdano̧mȩ pio ju̧i̧. Dëdë, dami̧ti̧ jurarea̧ üdë jabechji̧ jurapea̧de. China̧chjadëde. Jabo ibëa̧ omȩ üdë a̧ro̧rȩ go̧a̧ oa jura̧ pio ju̧i̧iä ana̧ri̧ jo̧rȩtarä judi, coere a̧rȩdärämi̧ dari̧ cjiarä judi, jabechji̧ tja̧reparȩmi̧ dari̧ japarea̧ro̧jo̧ȩ jëdano̧mȩ ju̧i̧. Ado pio ju̧i̧iä jabechji̧, juradëtäreji̧ri̧rea̧ro̧jo̧ȩ. 21Tjamo̧ davä. Ibëa̧ omȩ üdë a̧ro̧rȩ eami̧ oa japea̧ pio ju̧i̧iä ta aneno̧mi̧ dari̧ cjiarä judi, jabechji̧ japadëtäreji̧ri̧rea̧ro̧jo̧ȩ. Japë ano̧täreji̧ri̧rea̧ro̧jo̧ȩ. Tjamo̧ davä. A̧ro̧rȩ eami̧ oa japea̧ oaiä adëdiämi̧ dari̧ cjiadiärä judi, a̧ro̧rȩ go̧a̧ pio ju̧i̧ jura̧ oaiä, a̧ro̧rȩ ërü oa jara̧ oaiä, a̧ro̧rȩ eami̧ oa japea̧ oaiä poëdiämi̧ tarari̧ cjiarä judi, jabechji̧ japadëtäreji̧ri̧rea̧ro̧jo̧ȩ.
22Pio ju̧i̧iä yo̧requededibe. Eami̧ quëna̧mȩ judi, ju chiami̧ dari̧ quëna̧mȩ judi, jabechji̧ jënȩ jo̧rȩtami̧ jurapai̧ dade. Tjamo̧ davä. Jibëa̧ chji̧ üdë pio jȩaiäpȩmo̧ aeno̧mi̧ dari̧ japadërä judi, judi jura̧ pio ju̧i̧ chjiari aeno̧mi̧ dari̧ japadërä judi, jabechji̧ chji̧ chjöchjamȩrȩ jurapai̧ dade Ütë tjamo̧ ja̧ dachoro. Jabo jabë ju chiadëmi̧ dari̧ quëna̧mȩ pio ju̧i̧ ja̧ dachoro juradëtäremȩdejȩ jabo. Jabechji̧ ta aneno̧mi̧ dari̧ cjiachea oa, juradëtaremȩdejȩ. Tjamo̧ davä, Ütë tjamo̧ pio judi yürüa̧ oa dami̧ti̧ jurarea̧ oa jurapai̧ darea̧rȩ jare ano̧a̧ oa cjiami̧ dari̧. Ado goae tjamo̧de davä ja̧di dari̧ cjo̧ro̧pea̧ üdë. Jabo danȩrȩ ca̧ oti̧, a̧ro̧rȩ ibëa̧ omȩ pio ju̧i̧iä juradërä judi, judi ana̧ri̧ jo̧rȩtachea oa juradërä judi, ji̧dë u̧i̧ goaede. Tjamo̧ davä, a̧ro̧rȩ jare ano̧a̧ oa cjiami̧ dari̧ jura̧ oaiä ta aneno̧mi̧ dari̧ cjiadëtäremȩde ibëa̧ omȩ üdë. Pio ibëiä ta anemo̧mi̧ dari̧ cjiarä judi, chjai̧dëri̧ japarea̧rȩ.
23Jabo tjamo̧ri̧ dabadëmȩ judi, eami̧ jurarea̧ pio ju̧i̧ chjiari jabë chjarapë jo̧rȩtamȩmi̧ dari̧ jo̧rȩtarä judi, jabechji̧ juradëtäremȩdejȩ. 'Aja̧, jurarea̧ pio ju̧i̧ chjiari jare ano̧a̧ oa cjiami̧ dari̧ cjiaquëda' quëna̧dërä judi, 'dami̧ti̧ jurarea̧ oa jurapai̧ daquëda' jabë tjamo̧ri̧ quëna̧dërä judi, jabechji̧ pio jȩaiä china̧chja pio ju̧i̧ juradëtäremȩdejȩ. Judi jurarä judi, chjai̧dëri̧ japade. Ado pio ju̧i̧iä yo̧requededibe ca̧ oti̧. A̧ro̧rȩ eami̧ oa japarä tjamo̧ri̧ dabadërä judi, 'Aja̧, ja̧di dari̧ japea̧ üdë jabechji̧dida, Ütë tjamo̧ pio ju̧i̧iä jabechji̧ tjamo̧dida' quëna̧dërä judi, jabechji̧ japadëtäreji̧ri̧rea̧rȩ. Japarä judi, chjai̧dëri̧ japarea̧rȩ. Pio ju̧i̧iä japadëtäreji̧ri̧rea̧ro̧jo̧ȩ.
Pašlaik izvēlēts:
Domano Ma̧ȩ 14: Pume
Izceltais
Kopēt
Salīdzināt
Dalīties
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2021 Global Partners, All Rights Reserved