Japarea̧ 4
4
Judio tjamo̧ yo̧ji̧ri̧ pio judiro̧ chjuari̧ mitëa̧diro̧jȩrȩ Pedro pio ju̧i̧, Juan pio ju̧i̧bo.
1Ado Pedro judi, Juan judi pumȩ ji̧ri̧ jabë ni̧bä chjaoji̧ri̧ oa, acji go̧düdärärëreji̧ri̧diro̧jȩrȩ tjamo̧ yo̧ji̧ri̧ judiro̧. Ütë tjamo̧ ja̧ bëräpȩ goë tuti ja̧bepaji̧ri̧ judiro̧, ado Chaducheo pio judiro̧borë acji go̧düdärärëreji̧ri̧diro̧jȩrȩ. Aja̧ Ütë tjamo̧ ja̧ bë oa jidaji̧ri̧ pio ji̧ri̧ ja̧ ütë pio ju̧i̧ nö̧ta acji go̧düdärärëreji̧ri̧diro̧jȩrȩ. 2Jabechji̧ Jechurë chjadüa̧ pio judiro̧ yo̧a̧ri̧rȩ Jechurë bëdüa̧ pio ju̧i̧ chjiari a̧ra̧ano̧a̧ oaiä, jabechji̧ goëdëri̧ cjia tjamo̧pe bagarëreji̧ri̧diro̧jȩrȩ. “Aja̧, Ütë tjamo̧ judi Jechu pio ju̧i̧ bëdü tänȩa̧ oaiä, jabechji̧ ja̧boa̧ji̧ri̧ ütebo oa peaja̧di bëdü tänȩpadejȩrȩ” yo̧mȩ ma̧ȩ pio ju̧i̧ a̧ra̧ano̧a̧ oaiä, ma̧ cjüëtü tjamo̧ri̧ jo̧rȩtaji̧ri̧pea̧diro̧jȩrȩ. 3Ado pio ju̧i̧iäji̧ri̧rȩ chjuari̧ mitëa̧diro̧jȩrȩ. Ado chaäa̧diro̧jȩrȩ. Jabechji̧ gȩnȩpea̧ oaiä, jabechji̧ chaäa̧diro̧jȩrȩ dopea̧rä ütarë iëno̧ë ta̧rë chjaopea̧ oa. 4Jabo judiro̧ Jechu pio ju̧i̧ chjiari a̧ra̧ano̧a̧ oaiä, jabechji̧ no̧i̧dërë quëna̧ji̧ri̧pea̧diro̧jo̧ȩ Ütë tjamo̧ ja̧ ma̧ȩ oa. Aja̧, 5 mil oari judiro̧ quëna̧ji̧ri̧pea̧diro̧jo̧ȩ. Ado ji̧ri̧ uëri ivi pio jini̧ro̧borë quëna̧ji̧ri̧pea̧ni̧ro̧jo̧ȩ.
5Ado dopea̧rä, pea chaäa̧ oa cjiaji̧ri̧ pio ji̧ri̧ ütarë iëno̧ iëno̧ ta̧rëpea̧ oa, a̧doparëreji̧ri̧dirȩ tjamo̧ yo̧ji̧ri̧ judiro̧. Judio tjamo̧ yo̧ji̧ri̧ judiro̧, ado ütëti̧ judiro̧, ado Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧ a̧doparëreji̧ri̧dirȩ Jerucharȩräpȩ ju̧ri̧ Jechurë chjadüa̧ pio ji̧ri̧ iëno̧ë ta̧rëpea̧ oa. 6Ado tjamo̧ goë tuti ja̧bepamȩ pio judiborë a̧dopea̧de, Ana̧ quȩmȩ pio judi. Ado ju̧i̧ ja̧ pumȩ pio judiro̧borë ëba a̧dopea̧diro̧jo̧ȩ. Caipja judi, Juan judi, Areja̧doro judi, ado tjamo̧ goë tuti ja̧bepaji̧ri̧ pio ji̧ri̧ ja̧ pumȩ pio judiro̧borë ëba a̧doparëreji̧ri̧diro̧jȩrȩ. 7Ja̧dëa ji̧ Jechurë chjadüa̧ pio ji̧ri̧ yu̧a̧ tänȩrëreji̧ri̧diro̧jȩrȩ. Ado tjamo̧ yo̧ji̧ri̧ ja̧ yaboräpȩ ju̧ri̧ cjia tänȩa̧ duri oa, iëno̧ë ta̧rëa̧diro̧jȩrȩ:
—¿Jabo yö̧ta dari̧ jauëchja cjiari̧ japea̧nȩrȩ mȩnȩro̧? —iëno̧ë ta̧rëa̧diro̧jȩrȩ. —¿Ado chjia ja̧ ma̧ȩrä japea̧nȩrȩ? ¿Chjia ja̧ quȩrä japea̧nȩrȩ? Chjadëri̧ yo̧chji̧ibe —yo̧ji̧ri̧rȩ iëno̧ iëno̧ cjia̧diro̧jȩrȩ judio tjamo̧ yo̧ji̧ri̧ judiro̧.
8Ado Pedro judi, Tjo Tjamo̧ ja̧ chjaoërä cjiamȩrȩ dëbë yo̧a̧dejȩrȩ, ja̧di ta̧rëri̧ yo̧mȩrȩ:
—Danȩrȩ, 'ütëti̧diro̧da, tjamo̧ yo̧ji̧ri̧ pio judiro̧diro̧da' quëna̧ jo̧rȩtamȩrȩ ma̧ȩ yürütämi̧ cjiarequededibe ca̧ oti̧ —yo̧a̧dejȩrȩ—. Chjadëri̧ ta̧rëchji̧coe. 9Danȩrȩ, iëno̧ë ta̧rë jirorenȩro̧ibe a̧ro̧rȩ pumȩ üi̧ pio ju̧i̧ chjadëri̧ a̧doa̧ pio ju̧i̧ chjiari, a̧ro̧rȩ ta piruremȩ pio ju̧i̧ chjaparȩa̧ pio ju̧i̧ chjiari. Ado pio ju̧i̧ chjiari chjadëri̧ dëbë yo̧tämi̧ cjiarequededibe, mȩnȩro̧ dabadëchea oa. 10Jabechji̧ mȩnȩro̧ ütëborë chjaodëri̧ bapë ta̧rërea̧mi̧ dari̧ chjadëri̧ yo̧tämi̧ cjiarequededibe, Icharai pio judiri ja̧ji̧ri̧bo —yo̧a̧dejȩrȩ—. Danȩrȩ, dibëa̧ yaboi̧räpȩ dae cjiamȩ üi̧ pio yodë chjapea̧ oa cjiade Jechu pio ju̧i̧ ja̧ jauëchja oaiä, Jechu ja̧ quȩ pio oaiä. Tjamo̧ davä. Jechu Quiricho pio ju̧i̧iä, Nachere quȩmȩ bë ma̧ri̧rimȩ pio ju̧i̧iä chjapea̧ oa cjiade. Pio mȩnȩro̧ toro cjide ja̧bo tänȩrëreji̧ri̧renȩro̧jo̧ȩ, jabo Ütë tjamo̧ pio judi bëdü tänȩrëremȩdejȩ —yo̧a̧dejȩrȩ—. 11Peaja̧di ta̧rëri̧ yo̧diibe Ütërë go̧ȩpa tänȩrërea̧ ma̧ȩ üdë Jechu pio ju̧i̧ chjiari. Ta̧rëchji̧vä:
"Ta̧dë oa jiadarëreji̧ri̧diro̧jo̧ȩ jo̧ oa cji̧däji̧ri̧ pio judiro̧. Jabo judiro̧ jiadarërea̧ ta̧dë pio judi ba chia tjamo̧de. Tjamo̧ goë chamȩ ta̧dëpea̧de."
Aja̧, ja̧di ta̧rëri̧ go̧ȩpea̧ oa cjiarëremȩde ma̧ȩ üdë Jechu pio ju̧i̧ chjiari. Ado danȩrȩ, Jechu pio judide pio jiro ta̧dëmi̧ damȩ judi. Ado pio mȩnȩro̧nȩrȩ pio jiro ta̧dë ba chia tjamo̧ oa jiadarëreji̧ri̧ judiro̧. 12Jabechji̧ pio ju̧i̧iämo̧i̧ chjätärea̧mi̧ dade ca̧ oti̧. Ado cja̧rȩmo̧ decjiade. Jechu pio ju̧i̧mo̧i̧ tuti yürü chjadürëremȩdejȩ Ütë tjamo̧ judi a̧ro̧rȩ chjätärea̧ dapea̧ oa. Pio ju̧i̧iämo̧i̧ chjätärea̧mi̧ dade —yo̧mȩrȩ dëbë ni̧bä chjaorëremȩdejȩrȩ tjamo̧ yo̧ji̧ri̧ pio ji̧ri̧iäpȩmo̧ Pedro judi.
13Ado judiorë tjamo̧ yo̧ji̧ri̧ pio judiro̧ ana̧ tjamo̧ri̧ jo̧rȩtaji̧ri̧rȩ darëreji̧ri̧diro̧jȩrȩ Pedro ju̧i̧, Juan ju̧i̧. 'Chia chia, uapadëji̧ri̧rȩ dëbë yo̧diro̧ibëda, Ütë tjamo̧ ja̧ ma̧ȩ oa dabaparea̧ jo̧räpȩ jädiädëa̧räbo goae tarari̧ ni̧bärea̧ chiadiro̧da, jabomo̧ pumȩ ba chiadëji̧ri̧borë dëbë yo̧rea̧ chiadiro̧da, ¿tjana̧ ju̧i̧iä uapadëji̧ri̧rȩ dëbë yo̧diro̧ibëda' quëna̧ jo̧rȩtaji̧ri̧rȩ gürü toboe cjia dae chjaorëreji̧ri̧diro̧jȩrȩ, ana̧ri̧ jo̧rȩtaji̧ri̧rȩ. Ado 'Jechu ja̧ jadüdiro̧da, Jechu pio ju̧i̧ nö̧ta tai̧ chjaorëreji̧ri̧ pio judiro̧diro̧da' quëna̧ jo̧rȩtaji̧ri̧pea̧dirȩ. 14Ado judiro̧ to̧bari̧ dëbë yo̧tärea̧ ji̧, jabechji̧ mau maearë cjiadiäa̧dirȩ. Jabechji̧ ta piruremȩrȩ chjapea̧ oa cjiamȩ pio ju̧i̧ irä daea̧ oaiä, Jechu ja̧ jadü pio ji̧ri̧ nö̧ta cjiamȩ pio ju̧i̧ daea̧ oaiä, jabechji̧ dëbë yo̧rea̧ dadëa̧diro̧jȩrȩ. 15Pio ju̧i̧iä a̧doparea̧ jo̧ tjori judiri go̧dü tänȩa̧diro̧jȩrȩ. Ado Jechu ja̧ jadü judiro̧ go̧düa̧ duri oa, tjamo̧ yo̧ji̧ri̧ judiro̧ jibëa̧ dëbëti̧ra̧ chia tarupea̧dirȩ pio ji̧ri̧ chjiari ni̧bä chjaopea̧ ji̧.
16—¿Jabo tjana̧ oa japatäreji̧ri̧rea̧rȩ yaba̧? Danȩrȩ, Jerucharȩräpȩ cjo̧ro̧ji̧ri̧ pio judiro̧ irä daea̧diro̧jȩrȩ. Ta piruremȩ pio ju̧i̧ jauëchja cjiari̧ chjaparȩa̧ji̧ri̧ oa irä daea̧diro̧jȩrȩ. Ado ma̧ȩ üdë bë nö̧tai̧ oa chjätäa̧ oaiä, cjäri̧ madirȩ, ta̧rëa̧ maeadirȩ yaba̧. Ado a̧ro̧rȩ peaja̧di, 'Tjamo̧ri̧ chjaparȩdëa̧ jirodiro̧ju̧i̧da' quëna̧rea̧mi̧dërea̧rȩ. Tjamo̧ri̧ chjaparȩa̧ jirodiro̧jo̧ȩ. 17Jabo danȩrȩ, ma̧ȩ üdë oëra̧ti̧pe bagachea oa, o judiro̧ goë je ta̧rëchea oa, jabechji̧ uapai̧ ta̧rëri̧ chji̧dëeatäreji̧ri̧rea̧ro̧jȩrȩ judiro̧ Jechu pio ju̧i̧ chjiari ni̧bädëtä bucho ana̧ —yo̧ji̧ri̧rȩ ni̧bä chjaorëreji̧ri̧dirȩ jibëa̧ dëbëti̧ra̧ chia judio tjamo̧ yo̧ji̧ri̧ pio judiro̧.
18Ado judiro̧ ni̧bä chjaoa̧ duri oa, ado chjereno̧ yu̧a̧ tänȩa̧diro̧jȩrȩ Jechu ja̧ jadü pio ji̧ri̧. Ado to̧bari̧ yo̧a̧diro̧jȩrȩ:
—Danȩrȩ, pio yaba̧ domȩri ja̧ Jechu pio ju̧i̧ chjiari ni̧bädëpea̧de bucho ana̧. Jabechji̧ cjapiri̧ cjo̧ro̧chji̧vä pio ju̧i̧ chjiari, a̧ra̧ano̧rea̧ decjiari̧.
19Jabo Pedro judi, Juan judi dëbë yo̧a̧diro̧jȩrȩ:
—¿Chjia ja̧ ma̧ȩrä cjo̧ro̧pea̧de? ¿Chjia ja̧ ma̧ȩ oa ta̧rë ta̧rë japapea̧de? ¿Dibëa̧ ma̧ȩ pio ju̧i̧ ta̧rë ja̧bopea̧de, jabo Ütë tjamo̧ ja̧ ma̧ȩ pio ju̧i̧ ta̧rë ja̧bopea̧de? ¿Chjia ja̧ ma̧ȩ oa ta̧rë ja̧bopea̧de? Chjia ja̧ ma̧ȩ oadë, jabechji̧ Ütë tjamo̧ pio ja̧ ma̧ȩ maea oa ta̧rë ta̧rë japapea̧de. Ado pio mȩnȩro̧borë pio ju̧i̧ chjiari chjadëri̧ ütarë jo̧rȩtatäreji̧ri̧nȩrȩ. 20Ja̧di dari̧ ütarë jo̧rȩtaji̧ri̧pea̧rea̧rȩ pio a̧ro̧rȩ. Ado pio ju̧i̧iä jabechji̧, Jechu pio ju̧i̧ chjiari cjapiri̧ cjo̧ro̧dëparea̧rȩ. A̧ro̧rȩ pio ju̧i̧ irä dae chjaoa̧ pio ju̧i̧iä, a̧ro̧rȩ pio ju̧i̧ irä ta̧rë chjaoa̧ oaiä, jabechji̧ pio ju̧i̧ chjiari a̧ra̧ano̧e ano̧rea̧mi̧dërea̧rȩ —yo̧ji̧ri̧rȩ dëbë yo̧rëreji̧ri̧diro̧jȩrȩ Juan judi, Pedro judi.
21Jabo tjamo̧ a̧dopaji̧ri̧ judiro̧ pio ju̧i̧ ta̧rëa̧ oaiä, to̧bari̧ ba dëbë yo̧a̧diro̧jȩrȩ. Jabechji̧ uapai̧ ta̧rëri̧ yo̧ë cji̧däji̧ri̧rȩ yo̧a̧diro̧jȩrȩ judiro̧ Jechu pio ju̧i̧ chjiari a̧ra̧ano̧chea oa. Ado ja̧di ta̧rëri̧ yo̧ ëte, baä tänȩa̧diro̧jȩrȩ. Jabechji̧ pio ji̧ri̧ gitoi̧ dari̧ japatärea̧ ji̧, eami̧ oa japarea̧ dadëa̧diro̧jȩrȩ. Jabechji̧ pumȩ judiro̧ ütëborë Ütë tjamo̧ pio ju̧i̧iäpȩmo̧ chjacjiamȩri̧ ni̧bäa̧ oaiä, Jechu ja̧ jadü judiro̧ ta piruremȩ pio ju̧i̧ jauëchja cjiari̧ chjaparȩa̧ oa cjia̧ oaiä, jabechji̧ bape chjaorea̧ dadëa̧diro̧jȩrȩ, pumȩ bubarë cjarari̧ cjiape bagachea oa. 22Jabechji̧ ta piruremȩ üdë, Jechu ja̧ jadü judiro̧ jauëchja cjiari̧ chjaparȩa̧ üdë, pea üi̧padäräa̧mȩrȩ cjo̧ro̧dërëremȩde, jabo ütama̧i̧pe järëremȩde. Jabechji̧ 40 ui goadërëremȩde jabo ji̧dë u̧i̧ ui ji̧ra̧ri̧ goarëremȩde. Ütama̧i̧pe jämȩrȩ cjo̧ro̧rëremȩde chjapea̧ oa cjiamȩ judi. Ado pio ju̧i̧iä bape chjaorea̧ dadërëreji̧ri̧diro̧jo̧ȩ.
Quëna̧ji̧ri̧ judiro̧ ni̧bärëreji̧ri̧diro̧jo̧ȩ Ütë tjamo̧ ju̧i̧iäpȩmo̧
23Ado Pedro judi, Juan judi chaärea̧ bëri pio judiri go̧dürea̧ daea̧rä, tjamo̧i̧ baärëreji̧ri̧dirȩ quëna̧ji̧ri̧ pio ji̧ri̧iäpȩ. Ado judiro̧ pio ji̧ri̧iäpȩ go̧düdärä ëte, chjö̧na̧i̧ oa ni̧bä chjaorëreji̧ri̧diro̧jȩrȩ. Tjamo̧ davä. Tjamo̧ yo̧ji̧ri̧ judiro̧ pio jibëiäpȩmo̧ ni̧bä chjaoa̧ pio ju̧i̧ chjiari, Jechu pio ju̧i̧ chjiari ni̧bädë matä yo̧a̧ pio ju̧i̧ chjiari, uapai̧ ta̧rëri̧ yo̧ë cji̧däa̧ pio ju̧i̧ chjiari ni̧bä chjaoa̧diro̧jȩrȩ. 24Ado quëna̧ji̧ri̧ judiro̧ pio ju̧i̧ ta̧rëa̧ oaiä, judiro̧ ütëborë ni̧bärëreji̧ri̧diro̧jo̧ȩ Ütë tjamo̧ ju̧i̧iäpȩmo̧ ji̧mo̧ ma cjiaji̧ri̧rȩ. Ja̧di ta̧rëri̧ yo̧ji̧ri̧rȩ ni̧bäa̧diro̧jo̧ȩ:
—Aja̧ Ama̧i̧, Ano̧mȩ tjamo̧renȩ. Pareapamȩ tjamo̧renȩ. Ado chjö̧na̧i̧därä oa pareaparëremȩrenȩ. Jabechji̧ a̧dë oa, ui oa, dabu oa, cho̧ oa, pua oa, chirirä cjo̧ro̧ji̧ri̧ chjö̧na̧i̧ oa, uirä cjo̧ro̧ji̧ri̧ chjö̧na̧i̧ oa pareaparëremȩrenȩ. Jabechji̧ Ano̧mȩ tjamo̧renȩ. 25Ado danȩ Ama̧i̧, mȩnȩ yürürërea̧ ma̧ȩ pio ju̧i̧ jo̧rȩtarea̧rȩ. Tjamo̧ davä. Mȩnȩ no̧mȩ tjamo̧ri ja̧ Tjo tjamo̧ pio ju̧i̧iä ibëa̧ taru Davirea̧ pio ju̧i̧iäpȩmo̧ yürürërea̧ ma̧ȩ pio ju̧i̧ jo̧rȩtarea̧rȩ. Na̧ mu̧i̧tjoi̧rea̧ Davi pio judi jibëa̧ yara̧ ni̧bärërea̧ ma̧ȩ pio ju̧i̧ jo̧rȩtarea̧ro̧jo̧ȩ, Jechu pio ju̧i̧ ja̧bo tänȩtämi̧ cjiarërea̧ pio ji̧ri̧ chjiari jabërä go̧ȩparërea̧ ma̧ȩ pio ju̧i̧. Aja̧ Ama̧i̧, ja̧di ta̧rëri̧ yo̧mȩ ma̧ȩ oa jo̧rȩtarea̧rȩ:
"¿Tjana̧ ju̧i̧iä judiodë pio judiro̧ ma̧ cjüëtüri̧ ërecjiapea̧diro̧jo̧ȩ Ütë tjamo̧ pio ju̧i̧iäpȩmo̧? Ado ¿tjana̧ ju̧i̧iä ana̧ri̧ dëbëpe chjaorea̧ järipatea̧diro̧jo̧ȩ Icharai pio judiri ja̧ji̧ri̧ judiro̧? 26Ado chiri nö̧tai̧ oa cjo̧ro̧ji̧ri̧ ütëti̧ judiro̧, chiri ütë cjo̧ro̧ji̧ri̧ pio judiro̧ ütëborë jëdano̧rëreji̧ri̧dirȩ acji tai̧pea̧ ji̧ Ano̧mȩ pio ju̧i̧iäpȩmo̧. Ado tjamo̧ yo̧ji̧ri̧ pio judiro̧borë a̧dope chjaorëreji̧ri̧dirȩ. Jabechji̧ judiro̧ ütëborë järipea̧dirȩ davä Ano̧mȩ pio ju̧i̧ dëbëpe chjaopea̧ oa, jënȩ mitëa̧ Chjätä Tänȩmȩ pio ju̧i̧bo dëbëpe chjaopea̧ oa."
Aja̧ Ama̧i̧, ja̧di ta̧rëri̧ go̧ȩparëremȩde Davirea̧ judi jabërä. 27Coëma cjiari̧ go̧ȩparëremȩde. Jabechji̧ judi go̧ȩparërea̧mi̧ a̧doparëreji̧ri̧dirȩ pumȩ no̧i̧dërë Jechu pio ju̧i̧ dëbëpe chjaopea̧ oa, pio ju̧i̧ ja̧bo tänȩpea̧ oa. Aja̧, pio yi Jerucharȩräpȩ a̧doparëreji̧ri̧dirȩ Ama̧i̧. Erode quȩmȩ ütë pio judi, Po̧chio Pirato quȩmȩ ütë pio judi, judiodë pio judiro̧, ado judio pio judiro̧borë a̧doparëreji̧ri̧dirȩ Jechu pio ju̧i̧ jiadaji̧ri̧rȩ. Tjamo̧ davä. Na̧ Mu̧i̧tjoi̧ tatachja pio ju̧i̧, mȩnȩ mitëa̧ pio ju̧i̧ jiadapea̧ oa a̧doparëreji̧ri̧dirȩ Amai̧, Chjätä Tänȩmȩ pio ju̧i̧ dëbëpe chjaopea̧ oa. 28Ja̧di dari̧ japarëreji̧ri̧dirȩ mȩnȩ pearä judirä ütarë jo̧rȩtarërea̧ pio ju̧i̧. Tjamo̧ davä. Na̧ jauëchjara̧ tänȩa̧ oaiä, jabechji̧ japarëreji̧ri̧dirȩ pio mȩnȩ ütara̧rämo̧. 29Ado yaba̧ Ano̧mȩ, jo̧rȩtaibe. Jabechji̧ uapai̧ ta̧rëri̧ yo̧ë cji̧däa̧diro̧ibe. Ado chjadëri̧ a̧doibe Amai̧, na̧ ma̧ȩ pio ju̧i̧ uapadëji̧ri̧rȩ ni̧bä chjaopea̧ oa, goae tarari̧ a̧ra̧no̧pea̧ oa. Jabechji̧ na̧ mu̧i̧tjoi̧rea̧rȩ Ama̧i̧. Pio ju̧i̧iä chjadëri̧ a̧doibe. 30Ado yaba̧ Ama̧i̧, jabechji̧ jauëchja cjiari̧ japarea̧ yürüibe a̧ro̧rȩ gito ja̧boji̧ri̧ pio ji̧ri̧ chjadëri̧ chjaparȩpea̧ oa, a̧ro̧rȩ pumȩ ji̧ri̧ chjadëri̧ na̧rȩpea̧ oa. Jabechji̧ Ama̧i̧, na̧ Mu̧i̧tjoi̧ tatachja pio ju̧i̧ ja̧ quȩ oaiä, Jechu pio ju̧i̧ ja̧ quȩ oaiä jauëchjari̧ japarea̧ yürüibe a̧ro̧rȩ chjadëri̧ na̧rȩpea̧ oa. Aja̧ Ama̧i̧, pio ju̧i̧mo̧i̧ ma̧ȩ oa ni̧bärea̧ro̧mȩ. Ja̧ditäde.”
31Ado judiro̧ Ütë tjamo̧ pio ju̧i̧ ni̧bä ëte jënȩro̧ a̧dopea̧ bë üdë chjaodëri̧ jö̧nö̧jö̧nö̧ai̧ mari̧ cjiarëremȩde. Ado Tjo tjamo̧ ja̧ chja̧oerä cjia maearë ni̧bärëreji̧ri̧dirȩ Ütë tjamo̧ ja̧ ma̧ȩ oa, uapadëji̧ri̧rȩ.
Jibëa̧ pio ju̧i̧ ëba goa marëreji̧ri̧diro̧jȩrȩ quëna̧ji̧ri̧ judiro̧
32Quëna̧ji̧ri̧ judiro̧ ütëbodärärë cja̧rȩmȩ chji̧ chiami̧ dari̧ jo̧rȩtarëreji̧ri̧dirȩ chjarapë jo̧rȩtarea̧ decjiari̧. 'Ca̧ea̧ üdë, jabechji̧ ca̧ea̧ madica̧da' quëna̧dërëreji̧ri̧dirȩ. 'Ca̧ jurarea̧ üdë, ca̧ chjibo üdë, ca̧ea̧ maeadica̧da' quëna̧ jo̧rȩtadërëreji̧ri̧dirȩ, jabo ji̧dë ma chjarapë yürürëreji̧ri̧diro̧jȩrȩ jibëa̧ dëbëti̧ra̧ chia, ji̧mo̧ ëba goaji̧ri̧rȩ. 33Ado Jechurë chjadüa̧ pio judiro̧, jabechji̧ goae tarari̧ a̧ra̧ano̧rëreji̧ri̧dirȩ A̧no̧mȩ Jechu judi bëdüa̧ pio ju̧i̧ chjiari. Ado Ütë tjamo̧ judi cjäri̧ri̧ cjiamȩrȩ ana̧ri̧ a̧do chjaorëremȩdejȩrȩ quëna̧ji̧ri̧ pio ji̧ri̧. 34Ado quëna̧ji̧ri̧ pio judiro̧ chjö̧na̧i̧ti̧ oa cjäri̧ ja̧boji̧ri̧ pio ji̧ri̧ chjadëri̧ a̧do chjaoa̧ oaiä, jabechi̧ cjäri̧ ja̧bodë marëreji̧ri̧dirȩ. O judiro̧, chiri gatëa̧ oa goaji̧ri̧ pio judiro̧, jabechji̧ gatë tänȩrëreji̧ri̧diro̧jo̧ȩ chëre oa mitëpea̧ oa. Ado jo̧ oa gatëa̧ oa goaji̧ri̧ pio judiro̧borë gatë tänȩrëreji̧ri̧diro̧jo̧ȩ. Ado judiro̧ boa̧ chëre pio ju̧i̧, 35jabechji̧ yürürëreji̧ri̧diro̧jȩrȩ Jechurë chjadüa̧ pio ji̧ri̧iäpȩmo̧, judiro̧ chjarapë yürüpea̧ oa cjäri̧ ja̧boji̧ri̧ pio ji̧ri̧iäpȩmo̧. Ado pio ju̧i̧iä cjäri̧ ja̧bodë marëreji̧ri̧dirȩ quëna̧ji̧ri̧ judiro̧, o judiro̧ chjadëri̧ yürüa̧ oaiä. 36Peaja̧di dari̧ japarëremȩde Joche quȩmȩ judi. Devi quȩmȩ pio judiri ja̧mȩ judi, ui ana̧ tjoro a̧rȩmȩ chiriräpȩ cjo̧ro̧rëremȩ judi, Chipire quȩmȩ chiriräpȩ ütëparëremȩ pio judi, peaja̧di chjadëri̧ a̧dorëremȩdejȩrȩ cjäri̧ ja̧boji̧ri̧ pio ji̧ri̧. Ado pio ju̧i̧iä Jechurë chjadüa̧ judiro̧ ano̧ mire quȩparëreji̧ri̧diro̧jo̧ȩ. Jabechji̧ Joche yo̧tärea̧ ji̧, Bernabe quȩra̧ pio ju̧ri̧ra̧ ano̧ mire quȩpea̧diro̧jo̧ȩ. O ji̧ri̧iäpȩmo̧ ji̧dë ma chjadëri̧ a̧domȩ tara, jabechji̧, 'o ji̧ri̧iäpȩmo̧ järiparȩmȩ' yo̧mȩ quȩra̧ pio ju̧ri̧ra̧ ano̧ mire quȩpea̧diro̧jo̧ȩ. 37Ado pio judi peaja̧di jibëa̧ chiri oa goarëremȩdejȩ. Gatëa̧ oa goarëremȩdejȩ. Jabo 'o ji̧ri̧ a̧dotäremȩquiji̧ri̧da' quëna̧ jo̧rȩta̧ oaiä, jabechji̧ gatë tänȩa̧dejȩ. Ado chëre oa mitë ëte, yürüa̧dejȩrȩ Jechurë chjadüa̧ pio ji̧ri̧iäpȩmo̧, judiro̧ chjarapë yürüpea̧ oa cjäri̧ ja̧boji̧ri̧ pio ji̧ri̧iäpȩmo̧.
Pašlaik izvēlēts:
Japarea̧ 4: Pume
Izceltais
Kopēt
Salīdzināt
Dalīties
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
©2021 Global Partners, All Rights Reserved