MATEO 1
1
Jesukristupa uney kastankuna
1Jesukristupa uney kastankunapa libru, Dabidpa tsurin, Abrahampa tsurin. 2Abraham tsuriykorqan Isakta, Isaknam Jakobta, i Jakobnam Judáta i wawqinkunata. 3Judá tsuriykorqan Tamarchow Fáresta i Sarata, Fáresnam Esromta, i Esromnam Aramta. 4Arannam tsuriykorqan Aminadabta, Aminadabnam Naasonta, i Naasonnam Salmonta. 5Salmonnam tsuriykorqan Rahabchow Boosta, Boosnam tsuriykorqan Rutchow Obedta i Obednam Isaíta. 6Isaínam tsuriykorqan rey Dabidta, i rey Dabidnam tsuriykorqan Salomonta Uriaspa warmin kashqa kaqchow. 7Salomonnam tsuriykorqan Roboamta, Roboamnam Abiasta, i Abiasnam Asata. 8Asanam tsuriykorqan Josafatta, Josafatnam Joramta, i Joramnam Usiasta. 9Usyasna tsuriykorqan Jotamta, Jotamna Akasta, Akasna Esekiasta. 10Esekiasna tsuriykorqan Manasesta, Manasesnam Amonta, i Amonnam Josiasta. 11Josiasnam tsuriykorqan Jekoniasta i wawqinkunata, Babiloniyaman presu apey tyempuchow. 12Babiloniyaman presu apeypitanam, Jekonias tsuriykorqan Salatielta, i Salatielnam Sorobabelta. 13Sorobabelnam tsuriykorqan Abiudta, Abiudnam Eliakimta, i Eliakimnam Asorta. 14Asorna tsuriykorqan Sadokta, Sadoknam Akimta, i Akimnam Eliudta. 15Eliudnam tsuriykorqan Eliasarta, Eliasarnam Matanta, Matannam Jakobta; 16i Jakobnam tsuriykorqan Joséta, Maryapa qowan, peypitam Jesús yurirqan, Kristu jutiyoq.
17Keynowpam key llapan kastakuna Abrahampita Dabidyaq kayan chunka chusku; Dabidpita Babiloniyaman qarqushqa kayashqanyaq, chunka chusku; i Babilonyaman qarqushqa kayanqanpita Kristu jutiyoq yurenqankama, chunka chusku.
Jesukristupa yurikiynin
18Jesukristupa yurikiynin keynowmi karqan: Maman Marya Joséwan kasakuyánanpaq áninakushqa keykar, manaraq juntakáyaptin, Espiritu Santupita qeshyaqna kanaq. 19Qowan José, justu karnin, i penqakatsita mana munar, jaqirita munarqan pakeyllapa. 20I keypaq pey yarpakacheykaptin, kaq key Señorpa juk angelnin sweñíninchow yuriporqan i peyta nerqan: “José, Dabidpa tsurin, ama mantseytsu chaskita warmiki Maryata, peychow tsuriykushqa kaqqa, Espiritu Santupitam. 21I juk wamratam qeshpikonqa, i jutin churanki JESUS, pweblunta jutsankunapita pey salbanan kaptin.”
22Key llapanmi susederqan profetapa Señor nenqan kumplikánanpaq, nenqannow:
23Kaq keymi, juk
donsilla qeshyaqyanqa
i qeshpikonqa juk wamrata,
i jutin churanki Emanuel,
keymi ninan: Dyos noqantsikwan.
24I José riyarkurnam, rurarqan Señorpa angelnin ninqannow, i warminta chaskerqan. 25Peru manam juntakáyarqanraqtsu wawanta qeshpikunqanyaq i jutin churarqan Jesús.
Pašlaik izvēlēts:
MATEO 1: QUEAN
Izceltais
Dalīties
Kopēt
Vai vēlies, lai tevis izceltie teksti tiktu saglabāti visās tavās ierīcēs? Reģistrējieties vai pierakstieties
Quechua Ancash New Testament © Peruvian Bible Society, 1992.