بيخليها حقيقة لشعبه

المسيح هو وسيط العهد الجديد بحسب عبرانيين ٨: ٦. لكن إيه معنى الكلام ده؟ معناه إن دم المسيح اللي هو دم العهد الجديد (لوقا ٢٢: ٢٠، عبرانيين ١٣: ٢٠) اشترى وضمن تحقيق وعود الله لينا بشكل نهائي وحاسم.

ده معناه إن الله، وبحسب وعود العهد الجديد، بيغيرنا من الداخل بعمل روح المسيح. وده معناه إن الله بيعمل التغيير ده فينا بالإيمان، الإيمان بالله وبكل اللي لينا من الله في شخص المسيح .

ثمن العهد الجديد هو دم المسيح، والعهد ده بيتفعل بروح المسيح، وبنستمتع بيه (بنحصل عليه) بالإيمان بالمسيح.

أفضل مكان بنشوف فيه عمل المسيح بصفته وسيط العهد الجديد هو عبرانيين ١٣: ٢٠-٢١: «وَإِلَهُ السَّلَامِ الَّذِي أَقَامَ مِنَ الْأَمْوَاتِ رَاعِيَ الْخِرَافِ الْعَظِيمَ، رَبَّنَا يَسُوعَ، بِدَمِ الْعَهْدِ الْأَبَدِيِّ، لِيُكَمِّلْكُمْ فِي كُلِّ عَمَلٍ صَالِحٍ لِتَصْنَعُوا مَشِيئَتَهُ، عَامِلًا فِيكُمْ مَا يُرْضِي أَمَامَهُ بِيَسُوعَ الْمَسِيحِ، الَّذِي لَهُ الْمَجْدُ إِلَى أَبَدِ الْآبِدِينَ. آمِين»َ.

الكلمات اللي بتقول «عَامِلًا فِيكُمْ مَا يُرْضِي أَمَامَهُ» بتوصف إيه اللي بيحصل لما الله بيكتب الشريعة على قلوبنا بحسب وعد العهد الجديد. وبعدها يقول «بِيَسُوعَ الْمَسِيحِ» ودي العبارة اللي بتوضح إن يسوع هو وسيط العمل المجيد لنعمة الله السيادية.

وبكده يبقى معنى عيد الميلاد مش بس إن ربنا بيستبدل الظلال بالحقيقة، لكن كمان بيخلي الحقيقة دي واقع بالنسبة لشعبه. بيكتب الحقيقة دي على قلوبنا. الله مش بيجيب هدية الخلاص والتغيير بتاعة الكريسماس ويحطها تحت الشجرة، إن جاز التعبير، علشان تروح إنت تاخدها بقوتك. لكنه هو اللي بياخد الهدية ويحطها في قلبك وفي ذهنك وكمان يديك ختم اليقين بإنك ابن أو بنت لله.