Yaˍkoˆ li‸ 5
5
Paw sha ve chaw hui hta‸ shaˍ ti‸ piˇ ve
1Chaw paw chaw sha teˇ hpaˍ-oˬ, chi beu‸ na sheˍ. Tu‸ ve hkanˍ ve nawˬ hui awˬ hkʼoˆ lo gaˬ la tuˬ ve hta‸ pa taw, gʼaˇ hte‸ kuˬ hawˬ chehˇ-oˆ. 2Nawˬ hui ve mawˇ jeˬ lehˬ kuiˇ kʼai peuˬ. Nawˬ hui ve veu‸ kʼaˇ teˇ hpaˍ hta‸ htawˇ pfuhˇ shehˍ ma caˇ peuˬ. 3Nawˬ hui ve hpu shi htawˇ yawˇ caˇ peuˬ. Yawˇ caˇ ve oˇ ve lehˬ, nawˬ hui venˇbaˆ te ve hta‸ shaˉ hkiˆ hkanˍ leh, aˬ miˍ hkʼa shuˍ shuˍ nawˬ hui ve awˬ shaˍ hta‸ caˇ tuˬ yoˬ. Awˬ leh meuˇ ve awˬ nyi teˇ hpaˍ awˬ pon, nawˬ hui mawˇ jeˬ shaw hpoˆ taˍ peuˬ. 4Na sheˍ. Nawˬ hui ve ti mi hkʼaw caˬ gʼeu‸ shehˍ hpaˇ teˇ hpaˍ hta‸ heˍ leh awˬ hpfuhˇ maˇ piˇ ve pa taw, awˬ hpfuhˇ oˇ ve kuˬ chehˇ ve yoˬ. Caˬ gʼeu‸ shehˍ hpaˇ hui ve kuˬ hkawˇ htawˇ, hkʼa peu-eˬ awˬ hkʼoˆ uiˍ shehˍ hpaˇ Jawˇmawˇ Gʼuiˬsha ve naˍ paw awˬ hkʼaw lo geh peuˬ. 5Nawˬ hui miˬguiˬ hkʼoˆ lo paw sha jaˇ leh nyi hkʼaˇ suh htaˇ hkʼa gaˬ te taˍ peuˬ. Tiˇ pehˍ ve awˬ nyi awˬ pon nawˬ hui lehˬ, a shu yawˇ ve nyi ma hta‸ hu leh gu taˍ peuˬ. 6Hteˇ ve cawˇ ve chaw hta‸ nawˬ hui suhˉ taˆ leh tiˇ pehˍ peuˬ. Yawˇ nawˬ hui hta‸ maˇ tawˍ taˍ.
Yeunˇ hkanˍ leh bon lawˬ ve awˬ lawn
7Chi hta‸ pa taw, awˬ viˉ awˬ nyi teˇ hpaˍ-oˬ, Jawˇmawˇ Yeˍsuˆ gaˬ la htaˇ hkʼa gaˬ yeunˇ hkanˍ chehˇ-oˆ. Muiˬ caˇ paˍ lehˬ, miˬguiˬ ve awˬ hpfuhˇ hkʼaˆ ve awˬ shiˍ hta‸ gʼa tuˬ yawˇ law taˍ ve yoˬ. Mvuhˇ yeˬ awˉ lawˉ laˬ ve teˇ yanˇ leh, awˬ leh laˬ ve teˇ yanˇ hkʼa gaˬ, yawˇ yeunˇ hkanˍ leh law taˍ ve yoˬ. 8Nawˬ hui htawˇ, yeunˇ hkanˍ leh law taˍ-o‸. Jawˇmawˇ Yeˍsuˆ kʼaw‸ ya‸ la tuˬ ve awˬ yanˇ gaˬ la paˇ neˇ ve pa taw, nawˬ hui nyi ma yeˬ chehˇ-oˆ.
9Awˬ viˉ awˬ nyi teˇ hpaˍ-oˬ, nawˬ hui suhˉ jehˬ ve hta‸ maˇ gʼa hkanˍ tuˬ, teˇ gʼaˇ hta‸ teˇ gʼaˇ venˇbaˆ taˇ taˍ da‸. Nyi-o, Suhˉ jehˬ shehˍ hpaˇ lehˬ, yehˬ miˉ awˬ paˇ lo huˉ chehˇ taˍ peuˬ. 10Awˬ viˉ awˬ nyi teˇ hpaˍ-oˬ, Jawˇmawˇ Gʼuiˬsha ve awˬ meh hta‸ peun leh maˍ laˇ ve tcuh kaˍ paˍ teˇ hpaˍ lehˬ, tu‸ ve hkanˍ ve hta‸ gʼa hpuˇ htaˇ, yawˇ hui yeunˇ hkanˍ puiˉ ve nyi ma cawˬ ve hta‸ nawˬ hui henˇ yuˬ jawˬ yuˬ-o‸. 11Yeunˇ hkanˍ puiˉ ve chaw hui lehˬ, awˬ bon uiˍ ve yoˬ teh‸ ngaˬ hui kʼoˆ ve yoˬ. Yawˇbaˆ yeunˇ hkanˍ puiˉ ve awˬ lawn hta‸ nawˬ hui gʼa kaˇ peuˬ. Jawˇmawˇ Gʼuiˬsha yawˇ dawˇ taˍ ve hkʼe te piˇ leh, yawˇ hkʼaˬ ma ha‸ leh ha kʼaˉ puiˉ ve hta‸ nawˬ hui gʼa mawˬ peuˬ.
12Ngaˬ awˬ viˉ awˬ nyi teˇ hpaˍ-oˬ, a ciˉ ka‸ taˇ hkanˍ. Tawˇ chi lehˬ uiˍ jaˇ ve teˇ hkawˇ yoˬ. Mvuhˇ naw ma hta‸ maˇ kʼoˆ, miˬguiˬ hta‸ maˇ kʼoˆ, awˬ kaˍ awˬ nu ve awˬ ceuˬ hta‸ maˇ kʼoˆ, chi teˇ hpaˍ hta‸ cuˇ leh taˇ hkanˍ. Nawˬ hui suhˉ jehˬ ve hta‸ maˇ gʼa hkanˍ tuˬ, nawˬ ve tawˇ hkawˇ lehˬ, yoˬ ve kʼo yoˬ, maˇ heˆ ve kʼo maˇ heˆ teh‸ ceh tiˉ kʼoˆ loˬ.
13Nawˬ hui awˬ hkʼaw lo chaw teˇ gʼaˇ gʼaˇ tu‸ chehˇ hkanˍ chehˇ ve laˇ. Yawˇ hta‸ bon lawˬ piˇ lawˬ-o‸. Chaw teˇ gʼaˇ gʼaˇ ha lehˬ chehˇ ve laˇ. Yawˇ hta‸ kʼa muiˬ chiˇ mvuh piˇ lawˬ-o‸. 14Nawˬ hui awˬ hkʼaw lo chaw teˇ gʼaˇ gʼaˇ naˬ chehˇ gawˬ chehˇ ve laˇ. Yawˇ lehˬ, Hkri‸ yaˇ awˬ moˍ awˬ hoˉ chaw mawˇ teˇ hpaˍ hta‸ kuˬ cawˇ ve yoˬ. Yawˇ hui lehˬ, Jawˇmawˇ Yeˍsuˆ ve awˬ meh hta‸ cuˇ leh, chaw naˬ oˇ ve hta‸ naˍ manˇ shehˍ peuˬ hkʼaw‸ nawˉ, yawˇ awˬ pon bon lawˬ cawˇ ve yoˬ. 15Yonˍ ve awˬ hkʼaw lo bon lawˬ ve teˇ ceuˬ lehˬ, chaw naˬ hta‸ na-e la piˇ leh, Jawˇ mawˇ Yeˍsuˆ yawˇ hta‸ tu la piˇ tuˬ yoˬ. Yawˇ venˇbaˆ cawˬ ve kʼo, yawˇ ve venˇ baˆ hta‸ hpehˇ hkʼa piˇ tuˬ yoˬ. 16Hkʼe te leh, nawˬ hui na-e la tuˬ, teˇ gʼaˇ leh teˇ gʼaˇ venˇbaˆ kʼaoˍ maˍ da‸ leh, teˇ gʼaˇ leh teˇ gʼaˇ awˬ pon bon lawˬ-o‸. Hteˇ ve cawˇ ve chaw bon lawˬ ve lehˬ, kanˇ paˆ cawˬ maˇ jaˇ ve yoˬ. 17Eˇliˇya‸ lehˬ ngaˬ hui hkʼa shuˍ shuˍ chaw yaˇ hpeh‸ ve htawˇ, mvuhˇ yeˬ maˇ laˬ tuˬ yawˇ bon gʼaˇ hte‸ lawˬ htaˇ, shehˆ hkʼaw‸ leh ha pa hkaw‸ maˬ hkʼa gaˬ miˬguiˬ hkʼoˆ lo mvuhˇ yeˬ maˇ laˬ. 18Teˇ pawˆ yawˇ bon kʼaw‸ lawˬ htaˇ, mvuhˇ naw ma lehˬ mvuhˇ yeˬ kʼaw‸ laˬ piˇ leh, miˬguiˬ htawˇ awˬ shiˍ kʼaw‸ naw‸ la ve yoˬ.
19Ngaˬ awˬ viˉ awˬ nyi teˇ hpaˍ-oˬ, nawˬ hui awˬ hkʼaw lo chaw teˇ gʼaˇ gʼaˇ hteˇ ve cawˇ ve ya‸ kʼaw hta‸ ya‸ kʼai leh, chaw teˇ gʼaˇ gʼaˇ yawˇ hta‸ kʼaw‸ shiˍ hkʼaw‸ veu laˇ ve kʼo, 20venˇbaˆ yaˇ teˇ gʼaˇ ya‸ kʼaw ya‸ kʼai chehˇ ve hta‸ kʼaw‸ shiˍ hkʼaw‸ veu laˇ ve chaw oˇ ve teˇ gʼaˇ lehˬ, suh kuiˬ lo co ha teˇ maˬ hta‸ htaiˍ hkʼaw‸ piˇ leh, venˇ baˆ maˇ ve hta‸ yawˇ beh taˍ peuˬ teh‸, yawˇ hta‸ shiˍ piˇ-oˆ.
Šiuo metu pasirinkta:
Yaˍkoˆ li‸ 5: LHBE
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
Lahu Bible Edited © Thailand Bible Society and Bible Society of Myanmar, 2010, 2020.