ACT 5
5
हनन्या इंगा सप्पीरा
1आप्पुड हनन्या फेरोड वगा मनशी इंगा वान वडती सप्पीरा इर स्वताद भुमी आम्मीर, 2मंग वाड आ दुळ्ळालोन्केल काही भाग वडती संमतीता फेटकुन्या, इंगा काही भाग यकोची प्रेषितला काळा देगार फेट्या. 3आप्पुड पेत्र आन्या, हनन्या, नु पवित्र आत्मा जताक खोटा माटलाडाला इंगा भुमी किंमत लोन्केल काही दुडलु फेटकुनाला इल्ला शैतान नी मनला येनटीक निंच्या? 4याड नंताक आदी भुमी नी देगार उंड्या आदी नीदे लेकुंड्या येम? इंगा यप्पुड आम्मुती आप्पुड नी शेतल्या येमी लेकुंड्या येम? नु इदी माटा नी मनला येनटीक यकोस्ती? नु मनशी जताक लेद तर परमेश्वर जताक खोटा माटलाडती. 5हनन्याड इ माटलु इनीगास किंदा फडी फोया इंगा जेम इडस्काड्या इंगा इनेतोर मंदी शेंगेम यरस्कुनीर. 6आप्पुड काही जवान बिळ्ळु लेशी वान फाळ्या मिंदा येशीर, इंगा बैटीक येका फोई बुडस्काडीर.
7मंग मुड घंटाल आयनेंका वान वडती लोनीक वच्या, येम पण आयन्या आदी दानकी यरका लेकुंड्या. 8आप्पुड पेत्र दान आन्या, “नाक शप मीर इन्ने दुडलाला भुमी आम्मुतीर येम.” आदी आन्या, “हुं, इन्ने इटलाला.” 9पण पेत्र दान आन्या, “नु इंगा नी मोगुड प्रभुनदी आत्माद परीक्षा सुशेदेंक सहमत येनटीक आयतीर? सुड यवार नी मोगुन बुडशीर वारी काळ वाकील देगारे उंडाय, वार निन्नु पण यतकेन बैटीक फोयार.” 10आप्पुड लगेच वान काळा देगार फडी जेम इडशा, इंगा जवान बिळ्ळु लोनीक वच्चीर आप्पुड आदी वारकी सच्चीनेद कमशा इंगा वार दान पण बैटीक यतकेन फोई दान मोगुन देगार बुडशीर. 11इंगा आंता मंडळीक इंगा यवार इ माटलु इनीर वार आंदार शेंगेम यरस्कुनीर.
प्रेषितला तीकेल चिन्हल इंगा चमत्कारलु
12आप्पुड प्रेषितला शेतलाता मंदीला शेंगेम चमत्कारलु इंगा चिन्हल घडायदु. इंगा आंदार विश्वासी मंदी वगामनता शलमोन मंडपला जमा आयदुर. 13इंगा अविश्वासी मंदी लोन्केल यवार दिंटल्याच हिम्मत लेकुंड्या की वार फोई वार दिंटल्या कुडाला; तरी पण मंदी वारदी प्रशंसा शेयदुर, 14इंते लेद तर प्रभुन मिंदा विश्वास फेटेतोर शेंगेम मनसुलाद इंगा आंड्योरदी संख्या वाढास्केन फोदु. 15इन्नी चमत्कारलु आय्या की मंदी बिमारोरनी यत्ती दावाल मिंदा फेटदुर इंगा मंचाम मिंदा इंगा पलंगला मिंदा फंडा मतदुर, दिनिचांग की यप्पुड पेत्र वच्ची, वानदी साट तरी वार दिंटल्योन्केल यवाराना मिंदा फडाला. 16इंगा यरुशलेम शहर, देगार उळालोन्केल शेंगेम मंदी बिमार इंगा अशुद्ध आत्माल आंटीनोरनी येकेन वद्दुर इंगा आंदारनी बागा शेशेदेंक वद्दु.
पेत्रन जेलला येशेद
17आप्पुड महायाजकलु इंगा वार सोबतील, यवार सदुकी पंतटोर सदस्य उंडीर, कोफामता कालेदेंक आंटीर; 18इंगा वार प्रेषितलान फट्टी वारनी जेलला येस्काडीर. 19पण आबद प्रभुन दुत जेलुय कवाडलु तेरशा इंगा वारनी बैटीक यकोची आन्या, 20“फोंडा, इंगा परमेश्वर भवनला नीला फडी इ जीवनदी पुर्ण संदेश मंदीक शपना.”
21इदी इनी फद्दु फुट्टीन नग्रेम वार परमेश्वर भवनलोंग फोई नेरपेदेंक आंटीर, इक्काड महायाजक इंगा वान जताक यवार उंडीर वार वच्ची महासभान इंगा इस्राएल मंदी आब्बागारनी वगातळा फिल्चीर, इंगा वारनी येकेन दांडा आंका शप्पी आंपीर. 22पण आंदुक फोयने परमेश्वर भवनदी रखवाली शेशेतोर सैनिकलाक वार जेलला कमसाक फोईर, आंका वार वापस वच्ची शप्पीर, 23“जेल मट्टांग बंद शेशीनेद इंगा कवाड देगार रखवाली शेशेतोर नीला फडीनोर माक कमशीर, पण जेल उघडाशी नेंका माक लोना यवारुच कमसा लेद.” 24इदी बातमी इनी दिनदी येम परिणाम आय्यी, दिन बद्दल परमेश्वर भवनलोन सरदारलु इंगा मुख्य याजक मंदी विचारला फडी फोईर. 25इंताटला यवाड तरी वच्ची वारकी शप्या, सुडना, “या मंदीन मीर जेलला येशीन्टीर वार तर परमेश्वर भवनला नीला फडी मंदीक नेरपुतुनार.” 26आप्पुड सरदार सैनिकला जताक फोई वारकी त्रास इयांदे येकेन वच्चीर, येनटीक की वार मंदीक यरस्कुंदुर की मंदी वारकी राळ मताराद.
27वार वारनी यकोची महासभा मुंदार नीला फडा मतीर, आप्पुड महायाजक वारनी आडग्या, 28“इ फेरता नेरपाकुंडा, इल्ला मिम मिक चेतावनी इच्ची शप्पीन्टीम का लेद, तरी सुडना, मीर मी शिक्षणता पुर्ण यरुशलेम शहरनी निंचेशीनार इंगा इ मनशी रक्तपातदी दोष मा मिंदा यकोचेदेंक सुस्तुनार.” 29पण पेत्र इंगा बाकीचे प्रेषितलु उत्तर इच्चीर, “मनशी आज्ञा काना परमेश्वर आज्ञाद पालन शेशेद माद कर्तव्य उंडाद, 30या येशुन मीर क्रुस मिंदा टांगाशी मतेस्तीर, वान मना पुर्वजला परमेश्वर सच्चीनोर लोन्केल लेप्या.#अनुवाद 21:22-23. 31वाने परमेश्वर प्रभु इंगा तारण इच्चेतोड ठरायमती, वान मंची शेय तीकुड कुसना मतीनाड, दिनिचांग की वाड इस्राएलकी पश्चात्तापदी इंगा पापला क्षमाद देणगी इयाला.#लूक 24:47. 32इ माटला बद्दल मिम साक्षी उंडाम इंगा पवित्र आत्मा पण साक्षी उंडाद याद परमेश्वर आ मंदीक इच्चीनाड यवार वानदी आज्ञापालन शेस्तार.”
33इदी इनीगास वार चिडाशी फोईर इंगा वारनी जेमता मतेशेद विचार शेशेदेंक आंटीर. 34पण आंता मंदीला प्रतिष्ठित मानाशीनोड गमलीयेल फेरोड वगा परुशी शास्राध्यापक उंड्या, वाड न्यायसभाला नीला फडी प्रेषितलान काही वेळ इचांग बैटीक आंपेदेंक शप्या. 35मंग वाड वारनी आन्या, “हे इस्राएललोन मंदीलाला, सावधान मिक येम पण इ मंदी जताक शेशेद उंडाद, विचार शेशी शेयना. 36येनटीक की काही नाळा पहिला, थुदास इड मुंदारकी वच्ची निन यवाडाना उंडान, इल्ला आनेदेंक आंट्या, वान जताक तरी चारशे मंदी कुडीर पण वान मतेशेदेंक वच्या, इंगा वान जताक यंता मंदी कुडीनीर वार इक्काड-आक्काड पांगाशी वारदी नाश आय फोया. 37वाड आयनेंका जनगणना आप्पुड, गालीलटोड यहूदाड उंड्या, वाड पण काही मंदीन वान तीकुड शेस्कुन्या; वाड पण नाश आय फोया, इंगा वान आंदार शिष्यल इक्काड-आक्काड पांगाशी फोईर. 38दिनिचांग निन मिक शपतान की, इ मंदी तीकेल धुराम निलना इंगा वारनी फोनिंडा येनटीक की इदी माटा लेकाते फनी मनशीद उंटे तर लग्गाने नाश आय्यी. 39पण इदी जर परमेश्वर तीकेल उंडाद तर मीर वारदी यप्पुडुच नाश शेशी शकायाक फोयार,” इंगा मिक यरका आय्यी की मीर परमेश्वर विरुद्ध लढाई शेशेद प्रयत्न शेस्तुनार.
40आप्पुड वार गमलीयेलदी माटा इनीर, इंगा आ प्रेषितलान लोनीक फिल्चीर इंगा वारकी चाबुकता देब्बाल मतेदेंक आंचीर इंगा इदी आज्ञा इच्ची इडस्काडीर की येशुन फेरता दिन मुंदारकी माटलाडाकुंडा. 41वार इ माटाता आनंदीत आय्यी महासभा मुंदाटेल यल्ली फोईर दिनिचांग की मिम वान फेर इचांग अपमान आय्ये योग्य तरी ठरास्तीम. 42इंगा वार धीन्नाम, परमेश्वर भवनला इंगा इंडला इंडलाक फोई नेरपेद, इंगा येशुड इडे ख्रिस्त उंडाड इदी सुवार्ता शप्पेद इडवा लेकुंडीर.
Šiuo metu pasirinkta:
ACT 5: WNT
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės