ACT 25
25
फेस्तन मुंदार पौलदी चौकशी
1मंग फेस्त यहुदीया प्रांतलोंग वच्ची नेंका मुड नाळा बाद कैसरीयाकेल यरुशलेम शहरकी फोया. 2आप्पुड मुख्य याजकलु इंगा यहुदी मंदी लोन्केल मुख्य मन्सुल वान देगार पौल विरुद्ध तक्रार शेशीर. 3इंगा वानकी विनंती शेशीर की, कृपा शेशी वान यरुशलेम शहरकी फिल्चको; येनटीक की वार दावालाने वान मतेशेद योजना शेशीनीर. 4फेस्त उत्तर इच्या, “पौल कैसरीयाला कैदला उंडाड; निन स्वता लग्गाने आक्काड फोयेतोड उंडान. 5दिनिचांग आ मनशीद येमाना अपराध उंटे तर मी दिंटल्योन्केल प्रमुख मंदी ना जताक वच्ची वान मिंदा आरोपलु आंचाला.”
6मंग वाड वार नडमा आठ-दहा दिनमुल निलची कैसरीयाक यल्ली फोया इंगा इंगोगो नाड न्यायासन मिंदा कुसनीनेंका वाड आज्ञा इच्या की पौलनी येकेन दांडा. 7वाड वच्ची नेंका यरुशलेम शहरकेल वच्चीने यहुदी मंदी वान आजुबाजुक नीला फडी या माटलान वार सिद्ध शेशी शकायार इल्लोनी शेंगेम भयानक आरोपलु वान मिंदा आंचीर. 8पौल उत्तर इच्या की, “निन यहुदी मंदी नियमशास्त्रद विरुद्ध इंगा परमेश्वर भवन विरुद्ध इंगा कैसर विरुद्ध येमीच अपराध शेयालेद.” 9आप्पुड यहुदी मंदीन खुश शेशे इच्छाता फेस्त पौलनी आन्या, “यरुशलेम शहरकी फोई आंदु ना मुंदार इ माटला बद्दल नीद न्याय कावाला इल्ला नीद इच्छा उंडाद येम?” 10आप्पुड पौल आन्या, “कैसर न्यायासन देगार निन नीला फडीनान; इंदे नाद न्याय कावाला, निन यहुदी मंदीद येमीच अपराध शेयालेद, इदी निक पण शिंगार यरका उंडाद. 11निन सच्चे इचांग योग्य इल्ला येमाना अपराध शेशीन्टे तर निन सच्चेदेंक तैयार उंडान; पण वार ना मिंदा याद आरोप आंचीनार दांटल्योनदी वगाट पण माटा खरेम लेद, तर नन्नु वार स्वाधीन शेशेद यवारकीच अधिकार लेद; निन कैसर देगार न्याय आडगुतान.” 12आप्पुड फेस्तड मंत्रीलाद सल्ला तिस्केन उत्तर इच्या, “नु कैसर देगार न्याय आडगीनाव तर कैसर देगारे फोयाव.”
अग्रीप्पान मुंदार पौल
13मंग काही दिनमुल आयनेंका अग्रीप्पा राजाड इंगा बर्णिकाड इर इद्दार कैसरीयाक वच्ची फेस्तन भेटाशीर. 14आंदु वार शेंगेम नाळ निलचीनेंका, फेस्तड राजानकी पौल बद्दल शप्या, “वगा मनशी इंदु उंडाड, यवान फेलिक्स जेलला फेटनाड. 15निन यरुशलेम शहरकी फोयतीन आप्पुड यहुदी मंदीलोन मुख्य याजकलु इंगा आब्बागार शिकायत शेशी वानकी शिक्षा शिक्काला आंका नाक विनंती शेशीर. 16वारकी निन उत्तर इस्तीन की, आरोपीक दोष आंचेतोर मुंदार वच्ची आरोप बद्दल उत्तर इच्चेद संधी शिक्काकाना मुंची यवारकीच शिक्षा इच्चेद रोमी मंदीद रित लेद.” 17दिनिचांग वार इंदुक वच्ची नेंका निन येमीच दावा सुडालेद, पण इंगोगो नाडे न्यायासन मिंदा कुसनी निन आ मनशीन यकोचेद आज्ञा इस्तीन. 18वान मिंदा आरोप शेशेतोर यप्पुड वान विरुद्ध माटलाडेदेंक नीला फडीर, यल्ला निन विचार शेशीन्टीन आल्ला वार यादुच आरोप वान मिंदा आंचालेद. 19पण मना धर्म बद्दल इंगा यादो वगा मनशी बद्दल यवानदी फेर येशु उंडाद, वान बद्दल यहुदी मंदी आ मनशी जताक वादविवाद शेशीर, येशुड सच्ची फोयन्या, तरी पौलदी इल्ला आनकाम उंडाद की, येशुड जिवंत उंडाड. 20इ माटलाद चौकशी यल्ला शेयाला इदी नाक तेल्वाकुंदु, आप्पुड इ यहुदी मनशी विरुद्धला यहुद्योरी याय आरोपलु उंडाय, आटला बद्दल वान यरुशलेम शहरकी येका फोई वानदी न्याय शेयाला इल्ला वानदी इच्छा उंडाद येम, इल्ला निन वान आडगुतीन. 21सम्राट तीकेल नाद न्यायनिवाडा आय्यी नंताक निन कैदला उंटान इल्ला यप्पुड पौल आन्या, आप्पुड निन आज्ञा इस्तीन की, कैसर तीकुड आंपी नंताक वान जेलला फेटना. 22दिन मिंदा अग्रीप्पाड फेस्तन आन्या, “नाक स्वता इ मनशीद इनेद उंडाद,” फेस्तड वानकी उत्तर इच्या, “रेप,” वानदी माटा “नु इनी शकाशाव.”
23दिनिचांग इंगोगो नाड अग्रीप्पाड इंगा बर्णिकाड फेद्दा थाटमाटता लष्करी सरदारला जताक इंगा शहरलोन मुख्य नागरिकला जताक दरबारला प्रवेश शेशीर, आप्पुड फेस्तन आज्ञा लेका पौलनी आंदुक येकेन वच्चीर. 24मंग फेस्तड आन्या, “हे महाराज अग्रीप्पा इंगा मा जताक इंदु उंडीनोर आंता मंदी, इ मनशीन सुडना! इन बद्दल यरुशलेम इंगा कैसरीयाटोर आंता यहुदी मंदी ना तीकुड अर्ज इच्चीनार, इंगा विनंती शेशीनार की इन जित्ता उंडानीया राद. 25पण इन मतेशेदेंक दावाला इल्ला इड येमीच शेयालेद, इल्ला नाक कमशा इंगा वाड स्वता नाक सम्राट तीकेल न्याय शिक्काला इल्ला विनंती शेशा, दिनिचांग निन वान कैसर देगार न्याय इचांग आंपेद ठराय मततीन. 26पण सम्राटकी इन बद्दल राशी आंपेदेंक ना तीकुड निश्चित इल्ला येमीच लेद, दिनिचांग निन इन मी मुंदार इंगा विशेषतः राजा अग्रीप्पान मुंदार यकोची नीला फडामतीन, आदी दिनिचांग की, इ चौकशी नंतर नाक इ मनशी बद्दल येमाना राशेदेंक दावाला. 27आखरीक यादु पण कैदी आरोपलान रायांदे कैसर तीकुड आंपेद नाक बरोबर वाटायाद.”
Šiuo metu pasirinkta:
ACT 25: WNT
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės