ACT 18
18
करिंथ इंदु पौल
1यंकसार पौल अथेनै शहरनी इडशी करिंथ शहरकी फोया. 2करिंथला पौल वगा यहुदी मनशीन भेटाशा वान फेर अक्वीला उंड्या, वाड पंत प्रांतटोड रहिवासी उंड्या, वान वडती प्रिस्कील्लादान जताक वाड इटलीकेल नेमकच वच्चीन्या, येनटीक की आंता यहुदी मंदी रोम शहर इडवाला इल्ला हुकुम क्लौद्याड तिशीन्या, आंका पौल वारनी भेटाशेदेंक फोया. 3पौल लेकाने वार मंडप बनाय मतेतोर उंडीर, वाड वार जताक निलच्या इंगा वार जताक फनी शेशेदेंक आंट्या. 4प्रत्येक शब्बाथ दिनमुनाड पौल सभास्थानला यहुदी मंदी जताक इंगा यहुदी लेनोर मंदी जताक चर्चा शेयदु, इंगा वाड यहुदी इंगा यहुदी लेनोर मंदीक समजाय मतेद प्रयत्न शेयदु.
5यप्पुड सिलाड इंगा तीमथ्यड मासेदोनियाकेल वापस वच्चीर, आप्पुड पौल यहुदी मंदीक उपदेश शेशेदेंक वानदी पुर्ण इच्ची, येशुडे ख्रिस्त उंडाड. इल्ला साक्ष इच्चेदेंक आंट्या. 6पण यप्पुड यहुदी मंदी पौलकी विरोध शेशीर इंगा वानदी निंदा शेशीर, आप्पुड वाड वार विरुद्ध वान फय मिंदुडी बट्टाल झटकाशा, वाड यहुदी मंदीन आन्या, “जर मिद तारण काक फो, तर आदी दोष मिद उंडी! मिद रक्ताम मी नत्ती मिंदा उंडाला! निन निर्दोष उंडान, इप्पुड केल निन गैर यहुदी मंदी तीकुडे फोयान.” 7पौल आंदुकेल यल्या इंगा सभास्थान देगार निलचेतोड तीत युस्त फेरोन परमेश्वर सेवक इल्लुक फोया. 8आ सभास्थानोड क्रिस्प इड पुढारी उंड्या, क्रिस्प इंगा वान इंटल्योन्टोर आंदार प्रभुन मिंदा विश्वास फेट्टीर, करिंथलोन शेंगेम मंदी पौली माटलु इनी विश्वास फेट्टीर, इंगा बाप्तिस्मा तिस्कुनीर. 9वगा मोब्बुला, प्रभुड कलाला वच्ची पौलनी आन्या, “यरस्कुनाक, माटलाडका उंड, शांत निलवाक. 10निन नी जताक उंडान, यवार पण नी मिंदा हल्ला शेशी, निक शेय पण आंचाक फोयार; येनटीक की इ शहरला शेंगेम ना मंदी उंडार.” 11दानिचांग पौल आंदु दीड वर्ष परमेश्वरदी वचन आ मंदीक नेरपुका निलच्या.
गल्लीयोड इंगा पौल
12यप्पुड गल्लीयोड अखया प्रांतटोड राज्यपाल उंड्या, आप्पुड काही यहुदी मंदी पौल विरोधला वगातळा वच्चीर इंगा वान न्यायासन मुंदार नीला फडा मतीर. 13यहुदी मंदी आनीर, “इ मनशी इ रितीता मंदीक परमेश्वरदी उपासना शेशेदेंक नेरपुतुनाड, याद नियमशास्त्र विरुद्ध उंडाद.” 14पौल येमाना माटलाडी इंताटला गल्लीयोड यहुदी मंदीन आन्या, “वगाट तरी अपराध लेकाते वाईट माटा उंटे तर निन मिद इनी तिस्कुंटुटीन. 15पण इदी वादविवाद शब्दलाता, फेरलाता इंगा मी नियमशास्त्र बद्दल उंडाद, तर मिरे सुस्कोंडा; येनटीक नाक इल्लोन माटलाला न्यायाधीश आय्येद लेद.” 16मंग गल्लीयोड वारनी न्यायासन मुंदाटेल गेदमेस काड्या. 17मंग वार आंदार सभास्थानलोन प्रमुख सोस्थनेस इन न्यायासन मुंदार मतीर, पण गल्लीयोड इ माटला तीकुड लक्ष इयालेद.
पौल अंत्युखियाक वापस वस्ताड
18पौल विश्वासी मंदी जताक शेंगेम नाळ निलच्या, यंकसार वाड यल्या इंगा सिरीया प्रांतला समुद्री दावाता फोया इंगा वान जताक प्रिस्किल्लाद इंगा अक्वीलाड इद्दार उंडीर, पौल किंख्रिया शहरला नत्तीद टकली शेस्कुन्या, येनटीक की वाड नवस शेशीन्या. 19मंग वार इफिसकी वच्चीर, पौल प्रिस्किल्लादान इंगा अक्वीलान आंदु इडशा, इंगा वाड सभास्थानलोंग फोया इंगा यहुदी मंदी जताक वादविवाद शेशा. 20यप्पुड वार वानकी आंदु निलचेद विनंती शेशीर, तर वाड स्वीकार शेयाक फो. 21पण फोयेताप्पुड वाड वारनी आन्या, “परमेश्वरदी इच्छा उंटे तर निन वापस मी तीकुड वच्यान” मंग वाड समुद्री दावाता इफिसलेल यल्ली फोया. 22यप्पुड पौल कैसरीयाक वच्या, आप्पुड वाड आंदुकेल फैनिक यरुशलेम शहरकी फोया इंगा मंडळीन भेटाशा, मंग वाड किंदीक अंत्युखियाक फोया. 23मंग काही नाळ निलचीनेंका वाड आंदुकेल फोया इंगा गलतिया इंगा फुग्रीया इ प्रदेशला लोन्केल प्रवास शेशी फोयेताप्पुड, वाड येशुन शिष्यलान विश्वासता मजबुत शेशा.
इफिसला अपुल्लोड
24अपुल्लो फेरोड वगाड यहुदी मनशी उंड्या, वाड आलेक्सांद्र शहरला फुट्टीन्या, वाड शेंगेम नेरशीनोड उंड्या, वाड इफिसकी वच्या, वानकी पवित्र शास्त्रद पुर्ण ज्ञान उंड्या. 25परमेश्वर दावाद शिक्षण वानकी इच्चेदेंक वच्चीन्या, वाड आत्माला आनंदीत उंड्या आंका येशुन बद्दल बरोबर नेरपुदु इंगा माटलाडदु, तरी वानकी फक्त योहानदी बाप्तिस्माने यरका उंड्या. 26वाड सभास्थानला हिम्मतता माटलाडेदेंक आंट्या, आप्पुड प्रिस्कीलाद इंगा अक्वीलाड वानदी भाषण इनी वान देगार फिल्चकुनीर इंगा वानकी परमेश्वरदी दावा इंगा स्पष्ट रुपता सुपीर. 27अपुल्लोनकी अखया देशकी फोयेद उंड्या, आप्पुड विश्वासी मंदी वानकी उत्तेजन इच्चीर इंगा आंदुड येशुन शिष्यलाक वानदी स्वागत शेशे इचांग पत्र राशीर, यप्पुड वाड पोहचाशा, आप्पुड यवार कृपा इचांग विश्वास फेट्टीनीर, वारकी वाड शेंगेम मदत शेशा. 28अपुल्लोड पवित्र शास्त्र लोन्केल इदी सिद्ध शेशीगास की येशुडे ख्रिस्त उंडाड, वाड यहुद्योरनी आंता मंदी मुंदार जोरदार शब्दलाता माटलाडीगास वारनी हारायमत्या.
Šiuo metu pasirinkta:
ACT 18: WNT
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės