Tit 3
3
Fa jieda goodet Woakj reedsennen
1Halp äant denkjen, Rejierungen un Jewaulten unjadon to sennen un to jehorchen, fa jieda goodet Woakj reed to sennen, Ree 13:1 2kjeenen to lastren, nich striedarisch to sennen, jelind, aule Saunftmoot to bewiesen jäajen aule Menschen. Flp 4:5
3Wiels uk wie wieren eenmol onvestendich, onjehuarsom, vefieet, deenden veschiedne Losten un Vejnieejen, läwden en Boosheit un Aufgonst, vehaust un hausten eenaunda. 1Kor 6:11; Efs 2:2; 5:8; 1Pe 4:3 4Oba aus de Frintlichkjeit un Leew von Gott, ons Rada, to de Menschen erscheen, Tit 2:11 5rad Hee ons, nich derch Jerajchtichkjeits-Woakjen, dee wie jedonen hauden, oba no siene Boarmherzichkjeit, derch daut Wauschen von de Wadajeburt un de Ernierunk vom Heiljen Jeist, 6woonen Hee rikjlich äwa ons utjegoten haft derch Jesus Christus, onsen Rada, 7daut wie, jerajchtfoadicht derch siene Jnod, sullen Oawen woaren no de Hopninj von daut eewje Läwen. Ree 3:23
8Daut Wuat es to vetruen; un ekj well, daut du dit faust bestädichst, om daut dee, woone aun Gott jleewent jeworden sent, sikj besträwen, goode Woakjen to doonen. Dit es goot un nutzboa fa de Menschen. 9Oba de tierichte Strietfroagen un Jeschlajchts-Rejista un Striedarieen un Kjamfen äwa daut Jesaz, meid; wiels dee sent nutzloos un ladich. 1Tim 1:4; 4:7; 2Tim 2:14 10Eenen sektäarischen#3:10 sektäarisch: Spoolungen ve-uasoaken; zenkjrich. Mensch wies wajch, no de ieeschte un tweede Vemonunk, Mat 18:15-17; 2Joh 1:10 11un weet, daut een soona vekjieet es un sindicht un es en sikj selfst ve-uadeelt. 1Tim 6:4-5
Bestalungen un Jriss
12Wan ekj Artemas ooda Tiechikus no die schekjen woa, dan sie flietich, no mie to komen no Nikopolis, wiels ekj hab beschloten, doa to äwawintren. Efs 6:21 13Zenas, dän Ofkot, un Apollos, jeff iernstlich daut Jeleit#3:13 Ooda: de Bejleitunk., daut äant nuscht fält. Apj 18:24; 1Kor 3:5-6 14Lot oba uk de Onsaje lieren, sikj besträwen, goode Woakjen to doonen fa de needje Bederfnissen, daut see nich onfruchtboa sent. Tit 2:14 15Aul dee, waut bie mie sent, jreessen die. Jrees dee, dee ons em Gloowen leewen! De Jnod sie met junt aula! Amen. No Titus jeschräwen, de ieeschta Bischof, bestädicht fa de Kreetasche Jemeent, jeschräwen von Nikopolis en Mazedonien.
Copyright © 2023 von de Kjennichs-Bibel Jesalschoft