JOHN 1
1
Rôandông Jabkhab
1Khhabâng ko jabkhab dâng wah; Jabkhab pa Joban demnâng dâng wah, ngãle Jabkhab pa Joban dâng wah. 2Khhabâng majû Jabkhab pa Joban demnâng dâng wah. 3Joban ma chentô pa jabkhab jũnma hôan wah; ate ahõ ma li theh mĩn hôanhõ. 4Jabkhab ko rôandông dâng wah,#1.4 Jabkhab ko rôandông dâng wah; bã Jabkhab demko rôam lahma rôandông hôan wah. ngãle rôandông pumma mihnyãn nyũchha nâng wẽnphiak kephû koh erah. 5Wẽnphiak pumma rangnyek ko phiak ekah, ngãle rangnyek pumma wẽnphiak pa tamah sietmah.
6Joban ma ate ngĩnmatte mihnyãn wãtheh chîenkat wah, ate mîn pa John dâng wah, 7Tema mihnyãn hehnâng wẽnphiak jũnma thôkoh rãng katwah, eroh kobã angã ngãma ngĩnkõng pa chohtat lahma epũtẽ dâlem a. 8Ate dede a ere wẽnphiak pa dangmah; rohkomĩn tema ere wẽnphiak pa thôkoh rãng katwah. 9Apa lĩnlin wẽnphiak pa dâng wah —are wẽnphiak pa hahtokkhoh ko kã lahma chentô mihnyãn hehnâng phiakkã erah.
10Jabkhab pa hahtokkhoh ko dâng wah, ngãle ate jũnma Joban ma hahtokkhoh hôan wah, rohkomĩn hahtokkhoh ma ate jetlõ mah. 11Te a ate dede diak ko katwah, rohkomĩn ate mihnyãn hehma ate kepmah. 12Khãka ma tenâng pũtẽ dâlem lahma kep ekah; eroh wah tema thin nâng Joban Chha dangthuk ekah. 13Thin a mihnyãn nyũchha nyõng awã hẽ angem jũnma chha lahma Joban Chha dâng dangmah; Joban dede thin Wã dâng phûmma thin a Joban Chha dang ekah.
14Jabkhab pa mihnyãn nyũchha rãng litdang kã erah, ngãle tenâng mînchên chân, ngãle toangtang pa mênchõng dang lahma nãng demnâng sõngkã erah. Nãngma ate rânghông pa khẽ ekĩ, ere rânghông pa ate Wã Chha ate lôlô dângthã rânghông choh lahma khẽ ekĩ.
15John ma ate jũnma jabwah. Tema ngatwah, “Ngãma ngãtek pa ate jũnma ngatwah, ‘Te a ngã diko ekãrah, rohkomĩn te a ngã nôma adong, chenrãngma ngãko ngã chhat mama ate dâng wah.’”
16Tenâng ajahthêm mînchên chân tông jũnko tema nãngnâng rongrup lemma rangkoh ehĩ. 17Joban ma Moses jũnma nãngnâng Nîem heh kohwah, rohkomĩn mînchên chân le toangtang pa Jisu Krista jũnma koh ehĩ. 18Hẽnma mĩn Joban mãthat khẽ ekah. Rohkomĩn Joban dang lahma Joban Wã demko tôngte wãtheh lôlô ate Chha pumma Joban pa jetthuk ehĩ.
John Baptist Wah Joban Ngĩnkõng
(Mt 3.1-12; Mk 1.1-8; Luk 3.1-18)
19Jerusalem wah Jews thôte jabte ngãle sôam aroakte ngãle Levi hehma John nâng, “Nanga hẽn a?” ngãma thôngphâ rãng chîenkat wah.
20John ma latûng maang ma, “Ngã a Messiah dangmek” ngãma sâ põangpõang dânthâng wah:
21Ephûmma thinma John nâng thôngphâ wah, “Eroh madang oko, nanga hẽn a?” “Nanga Elijah nẽ?”
John ma, “Dangmek,” ngãma dânthâng wah.
Thinma wîenthông phâ wah, “Nanga mõngnẽ?#1.21 mõng: Messiah kat ngĩn thôhok kohte ngiak tih pa.
“Dangmek,” ngãma tema dânthâng wah.
22Thinma ngatwah, “Eroh madang ako, nanga hẽn a epa ninâng thôkoh hĩ,” “Chenrãngma ngãko ni chîenkatte hehnâng nima ngak thô wênkoh min. Nanga nang dede hẽn ngãma ngãrîî eko a”
23John ma Isaiah mõng ma jabwah jabkhab pa jab lahma dânthâng wah:
“Ngã a ‘hahrãnkho nâng phôangrakte pa:
Teso khôam rãng lemtĩn hôankoh en!’”
24Pharisee hehma chîenkat tah ngĩnmatte heh, 25ma#1.25 Pharisee hehma chîenkat tah heh; bã Chîenkat rẽtah heh Pharisee dâng wah; thinma. John nâng thôngphâ wah, “Nanga Messiah mĩn ladang ngãle Elijah mĩn ladang ediko mõngmĩn ladang madang oko nangma chenrãngma baptijem koh eko a?”
26John ma dânthâng wah, “Ngãma joma baptijem koh ekãng, rohkomĩn nê chhãngko nêma lajetma wãtheh tonga. 27Te a ngã diko ekãrah, ngã a ate dãphhâng putkoh rãngjô punmek.”
28Are heh John ma baptijem koh ekah the Bethany hahwah Jordanjo sankat ngenâng dâng wah.
Joban Saak
29Edijâko John ma Jisu ate tânâng wãng lahma khêwah, ngãle eko tema ngatwah, “Sû en, hahtokkhoh wah pap hênphête Joban Saak pa anã! 30Ngãma ngãtek pa ate jũnma ngatwah, ‘Ngã diko wãtheh ekãrah, rohkomĩn te a ngã nôma adong, chenrãngma ngãko te a ngã chhat mama dâng wah.’ 31Te a hẽn pa dângmin a epa ngãma lajet wah, rohkomĩn ngãma te a Israel mihnyãn hehnâng jetthuk rãng joma baptijem koh ekah.”
32Ngãle John ma thin nâng thôkoh wah: “Ngãma rangkhhethung wah Ju pa wõ rãngrãng lit lahma kã lahma ate khoh ko tongkã lahma khẽtek. 33Ngãma mĩn ate mãjet dâng wah, rohkomĩn ngãnâng joma baptijem kohrãng chîente Joban ma ngãnâng ngatwah, ‘Nangma Ju kã lahma hẽn khoh nâng tongkã lahma khẽ eko a; epumma Asâthhôanju ma baptijem ekoh a.’ 34John ma ngatwah, “Ngãma epa khẽtek,” ngãle “Ngãma nê nâng te a Joban Chha ngãma thôkoh ekah.”
Khhabâng Jisu Dijûnte
35Edijâ komĩn ate dijûnte wãnîî demnâng ere theko John chep lahma dâng wah, 36Phûmma chenthû tema Jisu loatkhhoam lahma khêko, “Joban Saak pa anã!” ngãma ngatwah.
37Dijûnte wãnîî pumma ere jab pa tat lahma Jisu demnâng johchhôan wah. 38Jisu ma litphõng lahma ngiaksok kat ko ate diko jûnkhhoam lahma khêwah, ephûmma tema chîen wah, “Nêma chenni lẽmsû ekẽn a?”
Thinma dânthâng wah, “Rabi, Nanga chenko sõng eko a?” (Are ngãekah pa “Hêthôte” nâng ngãekah.)
39Tema dânthâng wah, “Kã latma sûkãrên,” (Epa sanhêmthah wanbelîî sanpoat ko dâng wah.) Ephûmma ate demnâng johkã lahma ate sôngthe pa khêkat wah, ngãle ere jâko ate demnâng johtông wah.
40Wãtheh pa, Simon Peter naa Andrew dâng wah. 41Lemlîen ma ate phô Simon chohmîn lahma, “Nima Messiah khẽtih” ngãma thôkoh wah. (Are ngãekah pa “Krista” ngãekah.) 42Ediko tema Simon Jisu tânâng siet hokwah.
Jisu ma tenâng sû lahma ngatwah, “Nangmîn pa Simon, John chha, rohkomĩn nangnâng Cephas ngãma roomin.” (Apa Peter ngãma ngãekah, ngãle apa “Lõng” ngãekah.)
Jisu Ma Philip Ngãle Nathanael Roo
43Edijâko Jisu Galilee nâng katrãng chepwah. Tema Philip chohmîn lahma ngatwah, “Ngã demnâng johchhõan hang!” 44(Philip pa Bethsaida wah dâng wah, Andrew le Peter nîîmĩn ere hahko sôngte dâng wah.) 45Philip ma Nathanael chohmin lahma tenâng thôkoh wah, “Moses ma Nîem nyapkhaa nâng raangtah pa nima lâchoh khẽ tih, ngãle ate jũnma mõng heh mamĩn raangtah. Te a Nazareth wah Joseph chha Jisu.”
46Nathanael ma chhîen wah, “Nazareth hahwah chenni komĩn asenli eta jîenhõnga.”
Philip ma, “Wãng lohma sûwãng roh,” ngãma dânthâng wah.
47Chenthû Jisu ma Nathanael ate tânâng wâng khẽ lahma ngatwah, “Israel jat lĩnlin pa anã; tenâng chenmin achhih ahõ!”
48Nathanael ma tenâng chhîen wah, “Nangma ngã chenroh jîenjet ehanga?”
Jisu ma dânthâng wah, “Philip ma nang roo mako nanga phuk bãngthong ko tong lohma khẽtih.”
49Nathanael ma dânthâng wah, “Hêthôte, Nanga Joban Chha! Nanga Israel heh Lowang!”
50Jisu ma tenâng ngatwah, “Ngãma nanga phuk bãngthong ko tong lohma khẽtih ngat rãngma nangma pũtẽ eko ã? Nangma enôma mĩn adong echohkhẽ oh!” 51Ngãle tema thin nâng ngatwah, “Ngãma nê nâng toangtang ngĩn thôkoh ekah: Nêma rangkhhethung pa laang lahma ekhẽ en, ngãle Mihnyãn Chha khoh ko rangwah Joban ngĩntatte heh awângte akatte ditkhhoam lahma ekhẽ en.”
Šiuo metu pasirinkta:
JOHN 1: Nokte
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
The Bible Society of India