1. Mojsije 45
45
O Josif mothol pire phralenđe ko si vo
1O Josif našti ćićidelas majbut pesko ilo angle pire sluge, zato čhuta muj: “Neka savora inkljen avri!” Gajda nas khonik e Josifesa kana phendas pire phralenđe ko si vo. 2Ali rovelas gadići zurale ando glaso kaj vi e Egipćaja ašunenas les, a vi e faraonesko dvoro saznaisardas pale godova.
3O Josif phendas pire phralenđe: “Me sem o Josif! Dali si mungro dad još džudo?”
Ali von sas gadići but zaprepastime kaj našti phendine lešće so phučla len.
4Askal o Josif phendas: “Aven majpaše.”
Kana avile, phendas: “Me sem tumaro phral o Josif, okova saves bićindine ando Egipat! 5Ali akana na aven uznemirime niti holjarike korkoro pe tumende zato kaj bićindine man akaring, kaj o Del bičhalda man angle tumende te spasin pe e trajurja. 6Već duj brš trajil e bok ande phuv, a još pandž brš či orila pe e phuv, a niti žetva avela. 7O Del bičhalda man angle tumende, te čudesno spasil tumare trajurja thaj te avel tumen potomstvo pe phuv. 8Gajda či bičhaldine man tumen akate, nego o Del. Vo čhuta man palo majbaro faraonesko službeniko, palo gospodari pe sasto ćher e faraonesko thaj palo vladari po sasto Egipat.
9Akana siđaren palpale mungre dadešće thaj phenen lešće: ‘Ćiro čhavo o Josif phenel gajda: O Del čhuta man palo gospodari po sasto Egipat. Av mande, na gndi tut. 10Trajija ando krajo Gošen thaj aveja manđe paše – tu, ćire čhavra, ćire unukurja, ćire bakhre, ćire guruva thaj sa so si tut. 11Me okote inćarava briga pale tute, kaj e bok trajila još pandž brš. Gajda či inćareja bok ni tu, ni ćiri familija ni khonik ćiro.’
12Korkoro šaj dićhen, sago vi tumaro phral o Venijamin, kaj me vi čače tumenca ćerav svato. 13Phenen mungre dadešće pale bari čast savi si manđe dini ando Egipat thaj pale sa so dikhline. Thaj sigo anen mungre dades akaring!”
14Askal dijas mrtiko pire phrales e Venijamine thaj liduj džene rovenas dok denas pe mrtiko. 15Pale godova e jasvenca delas mrtiko thaj čumidelas sa pire phralen. Posle godova lešće phral ćerdine svato lesa.
16Kana dži ke faraonesko dvoro avili e nevimata kaj aresline e Josifešće phral, o faraon thaj lešće službenikurja obraduisajle.
17O faraon phendas e Josifešće: “Phen ćire phralenđe: ‘Ćeren agajda: Natovarin hamasko pe tumare magarcurja thaj bolden tumen ando Hanaan. 18Askal anen tumare dades thaj tumare familije mande. Me dava tumen majlačhi phuv ando Egipat thaj pravarena tumen katar o obilje akale phuvjako.’
19A naredba del pe tuće te phenes lenđe: ‘Ćeren agajda: Len tumenđe varekozom vordona andar o Egipat pale tumare čhavra thaj pale tumare romnja. Anen vi tumare dade thaj aven akaring. 20Na žalin pale okova so mukline okote, kaj dela pe tumenđe okova majlačho ando sasto Egipat.’ ”
21Askal e Izraelošće čhave ćerdine gajda. O Josif dija len vordona thaj hamasko palo drom, sago kaj o faraon phendas. 22Svakonešće lendar dijas neve haljine, ali e Venijaminešće dijas trin šela rupune kovanice thaj pandž haljine. 23A akava bičhaldas pire dadešće: deš magarcurja natovarime okoleja so si majlačho ando Egipat, deš magarice natovarime e đivesa, mangresa thaj sa avresa so trubula les palo drom.
24Pale godova bičhaldas pire phralen po drom. Dok džanastar, phendas lenđe: “Na han tumen e dromesa maškar tumende!”
25Gajda von teljardine andar o Egipat thaj aresline pire dadešće e Jakovešće ando Hanaan.
26Kana phendine lešće: “O Josif si džudo thaj vladil po sasto Egipat!” o Jakov zaprepastisajlo thaj našti paćalas so ašunel. 27Von phendine lešće sa so o Josif phendas lenđe. Thaj kana o Jakov dikhla e vordona save o Josif bičhaldas pala leste, džudilo ando duho.
28Askal o Izrael phendas: “Uverisajlem! Mungro čhavo o Josif džudo si! Džava te dikhav les majsigo nego so merav.”
Šiuo metu pasirinkta:
1. Mojsije 45: RČB
Paryškinti
Dalintis
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės