प्रेषित 22
22
याहुदिला संगा पौलदी शेशेतोड भाषण
1बंधू जनलू इंगा आब्बागार मंडळीळ, नीन येम पण इपुड मिक प्रत्युत्तर शेस्तान आदी एकांडा. 2वाड मना संगा इब्री भाषाला माटलाळतुनाल इदी एकाशी वार इंगा शांत आयीर, इंगा वाड आन्या.
3नीन यहुदी उंडान, नाद जन्म किल्कीयालोन तार्स नगरला आय्या इंगा नीन इ शहरला गमलीयेल काळला देगार शिनावोळ नुस फेदोळ आयी इनाक आबातातागार नियम शास्रद शिक्षण कडकडीत रीतीता शिकीनाद इंगा यला मीर आंदार इफोद द्यावार विषयला आवेशी उंडार आले नीन पण उंटीन. 4मंस्लान इंगा आंडेरणी कटी तुरुंगला येशी शरीरला शिक्षा इच्ची पण नीन 'इ दावाद' पाठलाग शेस्तीन. 5आ विषयला महायाजक इंगा आंदार आबातातागार वर्ग पण ना साक्षी उंडार; नीन वा तीकेल बंधू जनलाक पत्रल तीस्कोनी दिमिष्की फोदुन; दिनकस्रोम की, यवार आंदू उंडीर वारणी पण कटी यरुशलेम शहरला शासन शेशेदेंक एका दाला. 6इंगा इल्ला आय्या की, फोता-फोता नीन दिमिष्क शहर देगारा पोहोचास्तीन आप्पुड आंटे मद्यान वेळला मोळामकेल ना भोवती वगा फेदाद यलगु चमकाश्या. 7आप्पुड नीन भुमी मिंदा फडतीन इंगा “शौल, शौल, नाद छळ येनटीक शेस्ताव?” इल्ला वाणी ना संगा नीन माटलाळ तांना ऐकास्तीन. 8नीन आळगुतीन, प्रभू, नु यवार उंडाव? वाड नन्नु आन्या, “या नासरी येशुनदी नु छळ शेस्ताव वाड नीने उंडान.” 9आप्पुड ना संगा यवार उंडीर वारकी यलगु काम्पिच्या खरेम, पण ना संगा माटलाळेतोंदी आवाज वार ऐकालेर. 10इंगा नीन आंटीन, प्रभू नीन येम शेयाला? प्रभूड नन्नु आन्या, “लेशी दिमिष्कला फो;इंगा नु येम पण शेयाला दांचांग ठहरामतीनाळ, आ आंदार विषयला नीक इंदू शपिदेंक वची.” 11आ यलगु तेज इचांग नाक काम्पिया कुंदु; दांचांग ना सोबतील नाद शेई फटी नन्नु दिमिष्ककी एका फोईर.
12इंगा हनन्या फेरटोळ यवार तरी ओकोळ मणशी उंड्या, वाड नियमशास्रलेका नीतिमान उंड्या इंगा इंदू नीलचेटोर आंदार यहुदीळ वान विषयला शिंगार माटलाळदर. 13वाड ना देगारा नीला फडी नन्नु आन्या, शौल तमुळ, इकाड सूळ, आद्दे वेळला नीन इंगा वान तीकुड मिन्दिक सुस्तीन. 14इंगा वाड आन्या मना पूर्वजला द्यावार निसंबंधला ठहरामतीनाळ की, वांडी इच्छा येम उंडाद इदी नु समजाशी तीस्कोनाला; इंगा आ नीतिमान मंशीन सुळाला इंगा वान नोरदी आवाज ऐकाला. 15येनटीक की येम नु सुशीनाव इंगा यीनिनाव आ विषयला नु आंदार मंदी मुंदार दान साक्षी आयाव. 16तर इपुड उशीर येन्टीक शेस्ताव? लेव, वान फेरुद धावा शेशी बाप्तिस्मा तीस्को इंगा स्वता पापलाद कडगी लय.
17इंगा इल्ला आय्या की, नीन यरुश्लेम शहरकी माघारी वचीनेन्का, परमेश्वर भवनला प्रार्थना शेस्तांना नाद भान लेकुंड्या. 18आप्पुड नीन वान सुस्तीन; वाड नन्नु आन्या, “बेगाना शेय, येरुशलेम शहरकेल लगान येली फो; येनटीक की नु ना विषयला इचीनेद साक्ष वार मानायाक खोयार.” 19आप्पुड नीन आंटीन, प्रभू, वारकी यर्क उंडाद की, नि मिंदा विश्वास फेटेटोरनी नीन बंदीला येशी प्रत्येक सभास्थानला वारणी मातुतूदून. 20नीद साक्षी स्तेफन इनदी रक्तामता निंडी फोया आप्पुड स्वता देगार नीला फडी सहमत उंटीन मतुदू इंगा वान मतेटोरी बटाल संभाळीदुम. 21आप्पुड वाड नाक शप्या, “फो नीन नीनु इंगोगो राष्ट्रतीकुड दुराम आम्पडीस्ताम.”
रोमन नागरिक आंका उंडीनेद पौलदी हक्क
22इ वाक्य पर्यंत मंदी वांदी ऐकाशीर; मग वार किर्लुका आनीर, दुन्याम लोन्केल इन फेटा कानडा, इनदी जगाशेळदी लायकी लेद. 23वार किर्लुका इंगा स्वताय बेटूळी बटाल शरीर मिंदकेल तीशेशी मोळामला दुमू उडा मतुतांना. 24सरदार शिपाइलकी शपीर, पौलनी चाबूकता मतना, इ प्रकारता मंदी पौल उलटा येनटीक किर्लूतुणार इदी सरदार की यरका शेस्कोनेळदी उंड्या. 25इंगा वार वान वादयलता कटीर, आप्पुड देगार उंडीने शताधिपतीन पौल आन्या, “रोमन मंशीन इंगा यवान दोषी ठहरामता लेद यीलोन देबाल मतकाम कायदेशीर उंडाद येम?” 26इदी ऐकाशी शताधीपती सरदार देगार फोई आन्या, मनाम इदी येम सेस्तुनाम? आ मणशी रोमन उंडाळ. 27आप्पुड सरदार वान देगारा वची आन्या, “नाक शप, नु रोमन उंडाव येम?” वाड आन्या, “हाऊ.” 28सरदार उत्तर इच्या, “नीन इदी नागरिक पनदी हक्क संगेम दुडलु इच्ची कोणकोणडान.” पौल आन्या, “नीन तर फुटीने गालाने रोमन उंडान.” 29दिन मिंदकेल यवार वांदी चोकशी शेशेटोळ उंड्या वार लगाने वान देगार नुस येली फोया; शिवाय इड रोमन उंडाळ इल्ला सरदारकी तेलच्या आप्पुड वांकी पण येर्पू आय्या, येनटीक वाड वान कटीन्या.
सन्हेंद्रिन सभामुंदार पौलदी आत्मसमर्पण
30यहुदी मंदी वान मिंदा याद आरोप येकोचीर वाड येम उंडाड इदी खरेम तेल्वाला इल्ला सरदार मनला उंड्या, दांचांग इन्गोगा नाड वाड वान मोकळा शेश्या इंगा मुख्य याजक मंदी इंगा आंता न्याय सभा इरनी ओगातळा आय्येद हुकुम शेशी पौलनी किंदा ऐकोन वची वान मुंदार नीला फडामतीर.
Šiuo metu pasirinkta:
प्रेषित 22: Wrr
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
CC BY SA