युहन्ना 17
17
येशुगी ॱसुव तबे केच्च्य तीङ्स्युक्म १-२६
1हीगो सीन्नी, येशुगी इगी तेङ् यी़ ङो़ल ॱमीक् तेन हीन्दुक् झ्यीन ॱसुव तब बेत्। पब ह धी़जो़त् ॱलीस्सोङ्। ॱरेबु च्यानी नीज्यरङ्ल तो़प्प युङ्ज्ये यो़प्पल नीज्यरङ्गी ॱरेबुल तो़प्प युङे लेमु जेत्रो ॱनङ्। 2ॱरेबु च्याल पब नीज्यरङ्गी युङ्दु ची़प्पे मी घयेत्ल ॱरेबी़ फु तक्पे छी टो़च्च्ये यो़प्पल कोलीमी घयेक्की थोक्ल ॱरेबी़ ॱवङ् डोज्ये यो़प्प स्यक्न यो़क्केन् बेत्। 3फु तक्पे छी दी कोलीमी घयेक्की को़न्ज्योक् दी नीज्यरङ् च्यीगी च्यीक्रङ् दुक् ॱनो़न गन्दीय ङु ॱस्यीब धङ् नीज्यरङ्गी तङे येशु ख्रीष्ट् ङु ॱस्यीब हीगो बेत्। 4पबरङ्गी को़बे ले ङे डुप्न युङेन्। हीन्दुक् झ्यीन जम्बुलीङ् हीनी नीज्यरङ्ल तो़प्प युङे ले ङे झ्यीबेन्। 5ॱस धङ् ॱनम् छ्यादु ची़प्पले एल्लानी यो़क्केन् पबरङ्दङ् दल यो़प्पे यङ्गी ङे तो़त्वङ् छ्यीम्मी़ ओ़च्च्य दी ह यङ् ङल ॱनङ्रो झ्यी।
6हीन ङ च्याल नीज्यरङ्गी जम्बुलीङ्नी युङ्दु ची़प्पे मी घयेत्ल ङे नीज्यरङ् ङोस्स्यीन् टेप्पेन्। हीब घयेत् एल्ला नीज्यरङ्गी बेत्। ॱनी हुन्दो ङल ॱनङ्न यो़क्केन् बेत्। ॱनी हीब घयेत् नीज्यरङ्गी ॱसुङ्स्येत्ल नेन्न दो़क्केन् बेत्। 7ङल घङ् झ्युङ घयेत् हीगो कुरीक् नीज्यरङ् च्येन्नी युङ बेत् ॱनो़ब हीबे ॱह घोन यो़क्केन् बेत्। 8ॱनी नीज्यरङ्गी तो़म्बे ॱसुङ्स्येत् घयेत् ङे हीबल ॱस्येत्न टेप्पेन्। ॱनी हीबे हील नेन्न यो़क्केन् बेत्। ॱनी ङ नीज्यरङ्गी तङ्न, नीज्यरङ् च्येन्नी युङ हीम्ब हीबे गन्दीय ॱह घोन छ्य स्यक्न यो़क्केन् बेत्। 9जम्बुलीङ्गी मी ॱयोङ्गी ढीक्ल मेम्ब, नीज्यरङ्गी ङल ॱनङे मी हीब नीज्यरङ्गी झ्यीनी, हीबे ढीक्लरङ् ङ ॱसुव तोप्को़त्। 10ङल घङ् यो़प्प घयेत् नीज्यरङ्गी बेत्। ॱनी नीज्यरङ्ल घङ् यो़प्प घयेत् ङे बेत्। ॱनी ङल तो़प्प दी हीब च्येन्नी युङ्गेन् बेत्। 11ङ ह जम्बुलीङ् हीदु गक् मीत् दो़त्। नीज्यरङ् च्याल युङ्गेन्। हीब हीदु ले डोगेन् बेत्। धक्पर् हीम्बे पब नीज्यरङ्गी ङल ॱनङे मी हीबल नीज्यरङ्गी छेङ्गी लम्नी छ्योप्न, हज्यरङ् च्यीक् हीम्ब डस्सी हीब घयेत् एत् ॱसीम् च्यीक्ल युङ्ज्ये यो़प्प जेत्रो ॱनङ्। 12ङ हजो़त् थुक् हीबदङ् देत्न हीब नीज्यरङ्गी छेङ्गी लम्नी ङे छ्योप्न स्यक्पेन्। हीब हीन च्यीक् पी़प्पे ॱयोङ्म घयेत् ॱमत् तोर यो़त्। ॱनी ॱसुङ्रप्की केच्च्य ताज्ये यो़प्पल च्यीक्रङ् क खरप्ल डोगेङ्गी मी झ्यीनी, टप्सोङ्।
13ङ ह नीज्यरङ् च्याल ज्योक्पु युङ्गेन्। ङल यो़प्पे गेस दी हीबल झ्युङ्न, हीबे गेस दी छ्यीस्सील डोज्ये यो़प्पल ङ जम्बुलीङ् हीदु यो़च्च्याल हीगो सीक्को़त्। 14नीज्यरङ्गी तो़म्बे ॱसुङ्स्येत् घयेत् ङे हीबल ॱस्येत्न टेप्पेन्। ॱनी ङ हीगी मेम्ब डस्सी हीब अक् जम्बुलीङ् हीगी मुजङ् च्यीक्की मेम्बल जम्बुलीङ्गी मी घयेक्की हीबल ॱङीङ्मदुक् झ्यीक्केन् बेत्। 15हुगो झ्यीनी हीब जम्बुलीङ् हीनी ठीक्रो झ्यी सीन्न स्युव मीत् ज्यक्, बोर दी़त्ङेन् हुगी लक्नी हीब छ्योप्रो झ्यी सीन्न स्युव ज्यक्केन्। 16ङ हीगी मेम्ब डस्सी हीब अक् जम्बुलीङ् हीगी मुजङ् च्यीक्की मी मेम्बेत्। 17हीब घयेत् दीम्बे लम्नी नीज्यरङ्गी ढीक्ल ॱमीन स्योक्रो झ्यी। ॱनी दीम्ब हुगो म दी नीज्यरङ्गी ॱसुङ्रप् बेत्। 18नीज्यरङ्गी ङ जम्बुलीङ्ल तङ डस्सी ङे एक् हीब जम्बुलीङ्गी मी घयेत् च्याल तङेन्। 19हीब दीम्बे लम्नी नीज्यरङ्गी ॱवङ्गी होक्ल ॱमीन स्योक्पल हीबे ढीक्ल ङ ङरङ् नीज्यरङ्ल ॱरोक्ल ॱमीन यो़त्।
20ॱनी ङ हीबे ढीक्ल छ्युवक् मेम्ब, हीबे ॱस्येप्पे तम्गी ङल छ्य स्यक्न युङ्गेन् घयेक्की ढीक्ल अक् ॱसुव तोप्को़त्। 21ॱनी हुब घयेत् कुरीक् ॱसीम् च्यीक् डस्सी युङ्ज्ये यो़प्प तोङ्। पबरङ् ङदङ् मत् ढेब, ङ पबरङ्दङ् मत् ढेब यो़प्प डस्सी हुब घयेत् एत् हज्यरङ्दङ् मत् ढेब दो़च्च्ये यो़प्प तोङ्। हुगो झ्युङ्नी क, नीज्यरङ्गी ङ तङ्न युङ हीम्ब दी जम्बुलीङ्गी मी घयेक्की ॱह घोन हीगोल छ्य स्योक् छुगेन् बेत्। 22हज्यरङ् च्यीक् हीम्ब डस्सी हुब अक् कङ्ज्यीक्प च्यीक् डस्सी युङ्ज्येल नीज्यरङ्गी ङल टेप्पे तो़त्वङ् दी हुबल अक् ङे टेप्पेन्। 23ॱनी ङ हुबदङ् मत् ढेब, नीज्यरङ् ङदङ् मत् ढेब यो़प्प डस्सी हुब घयेत् एत् कुरीक् ॱसीम् च्यीक् ली़ च्यीक् डस्सील युङ्ज्ये यो़प्प तोङ्। हुगो झ्युङ्नी क, नीज्यरङ्गी ङ तङ हीम्ब दी धङ् नीज्यरङ्गी ङल झ्यम्ब जेप्प डस्सी हुबल अक् नीज्यरङ्गी झ्यम्ब जेक्कुक् ॱनो़ब जम्बुलीङ्गी मी घयेक्की ॱह घो छुगेन् बेत्।
24पबरङ्गी ङल ॱनङे मी घयेत् हीब ङ झ्यीस्सल इगीदु ॱलीत्न ङदङ् कङ्ज्यीक्ल दो़च्च्ये झ्युङ्न, हुनी ॱस धङ् ॱनम् छ्यादु ची़प्पले एल्लानी नीज्यरङ्गी ङल झ्यम्ब जेत्न ॱनङे तो़त्वङ् छ्यीम्मी़ ओ़च्च्य दी हीबे एक् त छुगेन् बेत् ॱनो़ब यो़त्। 25ढङ्बु हीम्बे पब नीज्यरङ् जम्बुलीङ्गी मी घयेक्की ङु ॱमीत् ॱस्यीगेन् बेत्। ङेरङ् नीज्यरङ् ङु ॱस्यीगो़त्। ॱनी नीज्यरङ्गी ङ तङ हीम्ब दी हीबे ॱह घोन यो़क्केन् बेत्। 26ॱनी नीज्यरङ्गी थुल ङल झ्यम्ब यो़प्प डस्सी हीबे ॱसीम्ल आक् झ्यम्ब झ्युङ्न, ॱयोङ्ल झ्यीच्च्ये यो़प्प धङ् ॱनी ङ हीबदङ् मत् ढेब दो़च्च्ये यो़प्प तोङ्। हीगी ढीक्ल ङे हीबल नीज्यरङ् ङोस्स्यीन् टेप्पेन्। ॱनी हरुङ्दङ् अङ् टो़क्केन् सीन्न ॱसुव तब बेत्।
Šiuo metu pasirinkta:
युहन्ना 17: LHM
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 1995 Wycliffe Bible Translators, Inc. and Nepal Bible Society