प्रेरित 6
6
सात जना सेवककोलाक भाक्च
1होसे दिनाङ विश्वासीकुङ संख्या बड्डीस्चै राम्हन्या। होटै हिब्रू ङाक्च विश्वासीकुङ विरुद्धाङ ग्रीक ङाक्च विश्वासीकै गन-गन जाट्की ठाला। हीजैडेनाङ दिन-दिनै ज्याच गाच ठोकको पुङ्ङ यान्हाङ होखुरीकुङ विधवाकै सेम्ह माडुप्मन्या। 2होटबाटै बाह्र जना प्रेरितकै पट्ट न विश्वासीकोलाक आर्घार डेया, “परमेश्वरौ वचन प्रचार जाट्की डासार ज्याच गाच कास्च सेवा जाट्की कानकी सेम्ह माछान्ने। 3होटबाटै भाइको, नाखुरीक लकीङ पवित्र आत्मा र बुद्धिये न्हेप्च र पट्ट लकीङ आदर डुप्च सात जना लेन्जा भर्मी भाक्नी अनि होखुरीककी न कानै इसे कामौ जिम्मा येहीङ। 4तर काल्हाको चहिँ प्रार्थना र वचन प्रचार जाट्च कामाङ पूरा समय लग्डीसीङ।”
5प्रेरितकुङ इसे कुरा समुहुङ पट्टकोलाक जाक्ङ सेया। होखुरीकै पवित्र आत्मै र विश्वासै न्हेप्च स्तिफनसकी भाका। होटै होखुरीकै फिलिप, प्रखरस, निकनोर, तीमोन, पर्मिनास र एन्टिओखियुङ पहिला अन्यजाति लेच चाहाँ यहूदी धर्म मन्डीच निकोलाउसकी र भाका। 6अनि होखुरीकै होसे भाक्च भर्मीकोलाक प्रेरितकुङ अगाडि राका र प्रेरितकै प्रार्थना जाटार होखुरीक मीटाक लहो मीहुट डा।
7परमेश्वरौ वचन फैलडीस्चै नुङार विश्वासीकुङ संख्या यरूशलेमाङ साप्फी बड्डीसा। अनि वास्टै पूजाहारीकै र येशूकी विश्वास जाटा।
स्तिफनसकी घोच
8स्तिफनसै परमेश्वरौ अनुग्रह र शक्तिये न्हेपार भर्मीकुङ मीघ्याङ चिन्हको र बा-बाड्सो अचम्मौ कामको जाटा। 9तर कुडीक जना भर्मीकै चहिँ होच्यो विरोध जाट्की ठाला। होखुरीक “सभा ङुच इमुङ स्वतन्त्र” डेच दलुङ यहूदी भर्मीको लेया। होखुरीक अलेक्जेन्ड्रिया सहर र कुरेनी, किलिकिया र एशिया इलाका लकीङ राम्हन्या। होखुरीक पट्ट न खाटार स्तिफनसखाटा वादविवाद जाट्की ठाला। 10तर पवित्र आत्मै स्तिफनसकी बुद्धियो आत्मा याहा, होसे ङाक्नाङ सुयेर होसकी जुकी माह्योका। 11होटै होखुरीकै खुसुक्क भर्मीकोलाक सोटार इट डेकी लैडीया, “मोशा र परमेश्वरौ विरुद्धाङ निन्दा जाटार होचे ङाक्च कानै सेया।” 12होटजाट्न होखुरीकै जनताकोलाक, अगुवा र धर्मगुरुकोलाक भड्कडीया र होखुरीकै स्तिफनसकी घोवार महासभाङ राका। 13होटै न्हुइङ होखुरीकै स्तिफनसौ बारेयाङ ङाक्की डेम झूटो साक्षीकोलाक लैडीया, “इसे भर्मीये सधैँ परमेश्वरौ पवित्र मन्दिर र व्यवस्थौ विरुद्धाङ ङाक्ले। 14हीजैडेनाङ इचे इट डेच कानै सेया, ‘नासरतौ येशूये इसे ठाउँकी नाश जाट्ले र मोशै कानकी याछ रीतिथितिकी र बदलीम याल्हे।’” 15होला महासभाङ ङुच पट्टकै स्तिफनसकी सेम्हजा ङोसा र होच्यो मीटाहा स्वर्गदूतौ मीटाहा लेखा न चम्कडीस्च डाङा।
© 2025 by Mother Tongue Translators Society and Wycliffe Bible Translators, Inc.