प्रेरित 15
15
यरूशलेमुङ सभा
1कुडीक भर्मीकै यहूदिया लकीङ एन्टिओखियाङ राहार विश्वासीकोलाक याङ्च शिक्षा पाहाक्की ठाला, “नाखुरीक मोशौ रीति अनुसार खतना माजाटा डेनाङ च नाखुरीकुङ उद्धार छान्की माह्योक्ले।” 2तब पावल र बारनाबासौ होखुरीकखाटा विचारको माखाटा र वादविवाद छान्रखीङ होलुङ भाइकै पावल, बारनाबास र अरु कुडीक जनाकी इसे प्रश्नओ फैसलौ लागि प्रेरितको र अगुवाको लेठाङ यरूशलेम नुङ्की डेम भाका। 3अनि मण्डलीयुङ सदस्यकै होखुरीककी होटै बिदा याहा। होखुरीक फोनिके र सामरिया छान्चै नुङ्नाङ अन्यजातिकै प्रभुकी ग्रहण जाट्च पट्ट न कुरा होखुरीककी सेटाका। इसे खबर सेरखीङ होलुङ पट्ट विश्वासीको एकदम आनन्दित छाना।
4जब होखुरीक यरूशलेमाङ टाह्रा तब होखुरीककी मण्डलीयुङ विश्वासी, प्रेरित र अगुवाकै स्वागत जाटा। अनि परमेश्वरै होखुरीक लकीङ जाट्च पट्ट न कामकुङ बारेयाङ होखुरीकै होला सेटाक्ङ याहा। 5तर इसे कुरा सेरखीङ फरिसी दलुङ कुडीक जना विश्वास जाट्चकै टोङ्हार डेया, “अन्यजातिकुङ खतना छान्की र होखुरीककी मोशौ व्यवस्था मन्डीकी पर्ले डेम आज्ञा याखी न पर्ले।”
6इसे विषयो छलफल जाट्कीयो लागि प्रेरितको र अगुवाको भेला छाना। 7अनि निकै बेरसम्म वादविवाद छान्रखीङ पत्रुसै सोवार होखुरीककी डेया, “ए डाजेभाइको, नाखुरीककी थाहा न ले, वास्टै समय अगाडि कुटजाट्न परमेश्वरै ङा लकीङ अन्यजातिकै सेछ समाचारौ वचन सेख्यो र विश्वास जाट्ख्यो डेम नाखुरीकुङ मीघीङ ङाकी चुन्डीया। 8भर्मीकुङ मीमनुङ कुरा वार्छ परमेश्वरै होखुरीककी र काल्हाकी लेखा न पवित्र आत्मा याहार होखुरीककी ग्रहण जाट्च कुरा टान्हाका। 9होसकै होखुरीक र काल्हौ मीघ्याङ हीर भेदभाव माडा तर होखुरीकुङ मीमन चहिँ विश्वासै शुद्ध खास्न याहा। 10होटबाटै अब अन्यजाति विश्वासीकुङ काँधाङ इसे जुवा डाम याहार नाखुरीकै हीजै परमेश्वरौ परीक्षा जाट्ले? इसे जुवा न त काल्हौ बोइ बाज्युकै न त काल्है न बुकी ह्योक्ले। 11तर कान विश्वास जाट्ले, की प्रभु येशूओ अनुग्रह लकीङ कानै उद्धार डुप्नने, होटजाट्न न होखुरीकै र डुप्नने।”
12तब सभाङ ङुचको पट्ट न माच्याक्ङ ङुवा र अन्यजातिकुङ मीघ्याङ परमेश्वरै होखुरीक लकीङ कुङ्च चिन्हको र अचम्मुङ कामको जाटा होच्यो बारेयाङ बारनाबास र पावलै बयान यान्हाङ पट्टकै ध्यान याहार सेया।
13होखुरीक ङाक्ङ भ्यारखीङ याकूबै डेया, “ए डाजेभाइको, ङौ कुरा सेनी, 14परमेश्वर लहे न दया जाटार अन्यजातिकुङ हृदयाङ काम जाट्न होखुरीककी लहो भर्मी खासा डेच कुरा च सिमोन पत्रुसै डेम भ्यामने ट। 15अगमवक्ताकै धर्मशास्त्राङ र याङ्च न वचन रीक्ङने,
16‘इसे कुरा न्हुइङ ङा ल्हेस्ले र दाऊदौ फुट्च घरानाकी
ङा फेरि सोट्ले।
र होच्यो भत्कडीस्चकी ङा फेरि बलियो खास्न याल्हे,
17होटबाटै ङै लहो खास्की आर्घाच अरु अन्यजाति भर्मीको
ङा लेठाङ राल्हे,
18इसे कुरा परमप्रभुये डेमने, सुये खायाक लकीङ इसे कुराको जनडीमने।’#आमोस ९:११-१२”
19याकूबै फेरि डेया, “होटबाटै ङौ विचार इसे न हो, परमेश्वर पट्टी ल्हेस्च अन्यजातिकोलाक कान दु:ख माहीङ। 20बरु होखुरीककी इट डेयार रीक्ङ कइङ की ‘मूर्तिकी चढडीच हीर ठोकको माज्याकी, व्यभिचार माजाट्की, मीघाटी युकार साट्च पशुकुङ स्या माज्याकी र ह्यु र माज्याकी।’ 21हीजैडेनाङ पहिलुङ पुस्ता लकीङ न सहरै पिच्छी मोशौ व्यवस्था पाहाक्ने, यहूदी सभा ङुच इमाङ इसे हरेक म्हुङ बाट्च याकाङ परेस्न न ले।”
विश्वास जाट्च अन्यजातिकोलाक रीक्च चिठी
22प्रेरितको, अगुवाको र मण्डलीयुङ पट्ट न खाटार होखुरीक मध्ये लकीङ भर्मीको भाकार पावल र बारनाबास खाटा एन्टिओखियाङ बीर्न्हकाकी मीमन जाटा। होखुरीक मध्याङ नीस जना मुख्य भर्मीको, यहूदा डेच बारसाबास र सिलासकी चुन्डीया। 23अनि होसे बुली जनौ मीहुटाङ होखुरीकै इट डेच चिठी याम्हका एन्टिओखिया, सिरिया र किलिकियाङ लेच अन्यजाति विश्वासी डाजेभाइकोलाक, प्रेरितको र अगुवाकुङ अभिवादान। 24कानुङ मीघीङ नुङार सु-सु भर्मीकै कानुङ आदेश बिना न उल्टो शिक्षा पाहाकार नाखुरीकुङ मीमन बीगारीम दु:ख याम्हने डेच कुरा कानै सेमने। 25होटबाटै कान पट्टकै सहमति जाट्च अनुसार कुडीक जना डाजेभाइकोलाक चुन्डीयार होखुरीककी प्यारो बारनाबास र पावलखाटा नाखुरीक लेठाङ बीर्न्हकाकी कानकी सेम्ह सेया। 26इसे नीस भर्मीको चहिँ याङ्च हो, होखुरीकै प्रभु येशू ख्रीष्टौ खातिर लाहाकी जोखीमाङ पार्नने। 27होटबाटै कानै यहूदा र सिलासकी बीर्न्हकामने। होखुरीकै र नाखुरीककी होसे न कुराको डेम याल्हे। 28हीजैडेनाङ पवित्र आत्मा र कानकी इसे सेम्ह सेया र इसे खाँचो लेच कुराको डेनाङ अरु वास्टै नियमकुङ भारी नाखुरीककी बुसाक्की माछान्ने। 29अब नाखुरीकै मूर्तिकी चढडीच ठोकको माज्याकी, ह्यु माज्याकी, मीघाटी युकार साट्च पशुकुङ स्या माज्याकी र व्यभिचार माजाट्की। नाखुरीकै इसे कुराको पालना जाटा डेनाङ नाखुरीक पट्टकोलाक सेम्ह छान्ने। लौ छीनीयो लागि बिदा छानीङ।
30बिदा याह्रखीङ होखुरीक एन्टिओखियाङ टाह्रा र मण्डलीयुङ पट्ट न भर्मीकोलाक भेला जाटार चिठी याहा। 31अनि होसे हौसला याछै रीक्च अर्तीयो चिठी परेसार होखुरीक माह्राङा। 32यहूदा र सिलास मेखुरीक र अगमवक्ता लेचबाटै डाजेभाइकोलाक वास्टै कुरा वचन लकीङ पाहाक्चै होखुरीककी विश्वासाङ बलियो खासा। 33अनि होखुरीक कालाप दिन होला ङुवा, र होलुङ विश्वासी डाजेभाइकै आशिष याहार होखुरीककी बीर्न्हकाच डाजेभाइको लेठाङ न ल्हेसार नुङा। 34[तर सिलास चहिँ होला न ङुवा।] #१५:३४ कोइ कोइ संस्करनौ बाइबलाङ इसे पद माले।
35पावल र बारनाबास एन्टिओखियाङ न ङुवा। होखुरीक र अरुकै होला ङुठर प्रभुओ शिक्षा पाहाका र सेछ समाचार प्रचार जाटा।
पावल र बारनाबास भाच
36हीर समय न्हुइङ पावलै बारनाबासकी डेया, “अब कान नुइङ, कुसे-कुसे सहराङ कानै प्रभुओ वचन प्रचार जाट्न्या। होसे सहरकोवाङ ल्हेस्न नुङ्ङ विश्वासी डाजेभाइकोलाक डुपीङ र होखुरीक कोङ्च ले ङोसीङ।” 37बारनाबासै यूहन्ना डेच मर्कूसकी र आल्छ मीमन जाटा। 38तर पावलै चहिँ होसकी आल्खी मामन्डीया, हीजैडेनाङ होसे पामफिलिया लकीङ काम माभ्यामन न ल्हेस्नन्या। 39होखुरीक मीघ्याङ काट हीर सल्लाह माखाट्चबाटै होखुरीक भा। बारनाबासै मर्कूसकी लार जहाजाङ काल्हार साइप्रस लाक नुङा। 40पावलै सिलासकी रोजडीया र विश्वासी डाजेभाइकै आशिष ङेम्ह याह्रखीङ होखुरीक बिदा छानार नुङा। 41तब होखुरीक सिरिया र किलिकिया छान्चै नुङा होखुरीकै होला लेच मण्डलीयुङ विश्वासीकोलाक प्रभुवाङ बलियो खासा।
© 2025 by Mother Tongue Translators Society and Wycliffe Bible Translators, Inc.