ယေႃးသူႉ 20
20
ဝဵင်းလူင်ၸိူဝ်းဢၼ်ပဵၼ်ပုၼ်ႈတႃႇပၢႆႈသွၼ်ႈ
1ထႃႇဝရႃႉၽြႃး သမ်ႉမီးဢမိင်ႉတီႈယေႃးသူႉလႄႈဝႃႈ၊- 2မႂ်းတၵ်းလႆႈသင်ႇလၢတ်ႈဝႆႉတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈၸမ်ႉ၊ လိူၵ်ႈၵဵပ်းဢဝ်ဝဵင်းတီႈဢၼ်ပၢႆႈၸူးလႄႈသွၼ်ႈပိုင်ႈၼၼ်ႉ ၸွမ်းၵႃႈၼင်ႇဢၼ် ၵဝ်ဢဝ်မူဝ်းသေႇသင်ႇလၢတ်ႈဝႆႉတီႈသူၼၼ်ႉ၊- 3ပုၼ်ႈဢၼ်ၵေႃႉဢၼ်လိုမ်းတူဝ်လႄႈ ယင်းဢမ်ႇၵျၢမ်ႇပွင်ဢဝ်တၢႆလႄႈ ဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉ တၵ်းလႆႈပၢႆႈၸူးလႄႈ သွၼ်ႈပိုင်ႈၼၼ်ႉဝႆႉတႃႉ။ တၵ်းလႆႈပဵၼ်ဝဵင်းဢၼ် သူၵၢင်းလွတ်ႈၵႃႈၼႂ်းမိုဝ်းၵေႃႉဢၼ် တၵ်းဢဝ်တၢႆၸွမ်းၼၼ်ႉလႄႈသွၼ်ႈပိုင်ႈဢေႃႈ။- 4ၵေႃႉၼၼ်ႉတၵ်းလႆႈပၢႆႈၸူးၵႃႈတီႈဝဵင်းၸိူဝ်းၼၼ်ႉသေဝဵင်းဝဵင်းလႄႈ ၸုၵ်းယူႇၵႃႈတီႈႁူးၽၵ်းတူဝဵင်းသေလႄႈ မွၵ်ႇလၢတ်ႈဢမူႉမၼ်းၼၼ်ႉ ထိုင်ႁူၵူၼ်းဢၼ်ပဵၼ်ၵႄႇပဵၼ်ႁူဝ်ဝဵင်းၼၼ်ႉၸိူဝ်းၼၼ်ႉသေယဝ်ႉ၊ ၶဝ်ၼၼ်ႉတၵ်းလႆႈႁွင်ႉဢဝ်မၼ်းၶဝ်ႈၵႃႈၼႂ်းဝဵင်းၸူးတီႈၶဝ်ၼၼ်ႉလႄႈၶျႃးတီႈယူႇမၼ်းပၼ်ၵႃႈၼႂ်းၶဝ်ၼၼ်ႉဢေႃႈ။- 5ပေႃးၵေႃႉဢၼ်တၵ်းဢဝ်တၢႆၸွမ်းၼၼ်ႉ လိုပ်ႈၸွမ်းလမ်းၸွမ်းမၼ်းၼၼ်ႉမႃးၸိုင်၊ ၶဝ်ဢမ်ႇလႆႈဢဝ်ၵေႃႉဢၼ်ဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉ ဢၢပ်ႈပၼ်ၵႃႈၼႂ်းမိုဝ်းမၼ်း။ လွင်ႈမၼ်းၸမ်ႉ မၼ်းၼၼ်ႉလိုမ်းတူဝ်သေလႄႈ ယင်းဢမ်ႇဝႆႉတၢင်းၽိတ်းတီႈၵူၼ်းႁိူၼ်းၸမ်ၵၼ်တင်းမၼ်းလႄႈ တိူဝ်ႉထုၵ်ႇဢဝ်တၢႆမႅၼ်ႈဢေႃႈ။- 6မၼ်းၼၼ်ႉ တၵ်းလႆႈယူႇၵႃႈၼႂ်းဝဵင်းၼၼ်ႉ တေႃႇထိုင်ႁွတ်ႈမၼ်းႁွတ်ႈထိုင်ၵႃႈတီႈၽၢႆႇၼႃႈပရဵၵ်ႈသၢတ်ႈလႄႈ၊ ၶၢမ်ႇတၢင်းဢၼ် ၸီႇယၢင်ႇတႅပ်းတတ်းတြႃး ဢိၵ်ႇတင်းတေႃႇထိုင်ႁွတ်ႈၶုၼ်ယိတ်ႈပရေႃးႁဵၵ်ႈ ဢၼ်မီးၸူဝ်ႈပၢၼ်ၼၼ်ႉထၼ်ႈပေႃးတၢႆယဝ်ႉၼၼ်ႉဢေႃႈ။ လိုၼ်းၼၼ်ႉၸင်ႇ၊ ၵေႃႉဢၼ်ဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉ တၵ်းလႆႈမီးဢၶႂၢင်ႉဢၼ်လႆႈၶိုၼ်းမႃးလႄႈ ယူႇၵႃႈၼႂ်းဝဵင်းမၼ်း ၵႃႈတီႈႁိူၼ်းတီႈယူႇမၼ်း ၵႃႈၼႂ်းဝဵင်းဢၼ်မၼ်းလႆႈဢွၵ်ႇပၢႆႈမိူဝ်ႈဢွၼ်တၢင်းၼၼ်ႉဢေႃႈ၊ ဝႃႈၼင်ႇၼႆသေယဝ်ႉ၊- 7ၶဝ်လိူၵ်ႈၵဵပ်းဢဝ်ဝဵင်းၵေႇတေႇသႃႉ ၵႃႈၼႂ်းမိူင်းၵႃႇလီႉလႄး ၵႃႈၼိူဝ်ႁၢၼ်ႉလွႆၼပ်ႉထလီႉ၊ ဝဵင်းသေႇၶိမ်ႇ ၵႃႈၼိူဝ်ႁၢၼ်ႉလွႆ ဢေႇၽရိမ်ႇ၊ ဝဵင်းၵီႉရယႃႉသႃႇၽႃႇ ဢၼ်ဝႃႈဝဵင်းႁေႇပြုၼ်ႇ ၵႃႈၼိူဝ်ႁၢၼ်ႉလွႆယူႉတႃႉၸိူဝ်းၼၼ်ႉဝႆႉဢေႃႈ။- 8ၵႃႈတီႈၽၢႆႇပုၼ်ႉၼမ်ႉႁွင်ႈယေႃးတၢၼ်ႇ သိုဝ်ႈဝဵင်းယေႇရီႉၶူဝ်း ၽၢႆႇဝၼ်းဢွၵ်ႇမၼ်းၼၼ်ႉၵေႃႈ၊ ၶဝ်တိုၵ်းဢဝ်ဝဵင်းပေႇၸႃႇ ၵႃႈတီႈထိူၼ်ႇ ၵႃႈၼႂ်းပၢင်ႇပဵင်းၵႃႈၼႂ်းဢိူင်ႇရူႉပိၼ်ႇ၊ ဝဵင်းရႃႇမုတ်ႉ ၵႃႈတီႈမိူင်းၵီႉလတ်ႉ ၵႃႈၼႂ်းဢိူင်ႇၵၢတ်ႉ၊ ဝဵင်းၵေႃႇလၼ်ႇ ၵႃႈတီႈမိူင်းပႃႇသၢၼ်ႇ၊ ၵႃႈၼႂ်းဢိူင်ႇမၼႃႇသေႇၸိူဝ်းၼၼ်ႉဝႆႉဢေႃႈ။- 9ဝဵင်းၸိူဝ်းၼႆႉၸမ်ႉ၊ ပဵၼ်ဝဵင်းဢၼ်လိူၵ်ႈၵဵပ်းဝႆႉဢၼ်ၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင် ဢိၵ်ႇတင်းၵူၼ်းတၢင်ႇၸိူဝ်ႉတၢင်ႇၶိူဝ်း ဢၼ်သွၼ်ႈပိုင်ႈယူႇၵႃႈၼႂ်းၶဝ်ၼၼ်ႉ ႁႂ်ႈၵေႃႉဢၼ်လိုမ်းတူဝ်လႄႈ ဢဝ်ဢသၢၵ်ႈၵူၼ်းတၢႆမႅၼ်ႈၼၼ်ႉ မီးဢၶႂၢင်ႉဢၼ်လႆႈပၢႆႈၸူးလႄႈ ၵၢင်းလွတ်ႈတၢင်းမိုဝ်းၵေႃႉဢၼ် တၵ်းဢဝ်တၢႆၸွမ်းၼၼ်ႉ တေႃႇထိုင်ႁွတ်ႈမၼ်းလႆႈၸုၵ်းယူႇၵႃႈတီႈၽၢႆႇၼႃႈပရဵၵ်ႈသၢတ်ႈၼၼ်ႉဢေႃႈ။
Copyright © 2021 by OMF International, Shan Baptist Churches Fellowship