ယေႃးသူႉ 18
18
တၢင်းဢၼ်ၽႄပၼ်လိၼ်ဢၼ်ၵိုတ်းၵျၢၼ်ႇ
1ပရဵၵ်ႈသၢတ်ႈၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင်ၼၼ်ႉ ၸူႉၵၼ်တုမ်ၵၼ်ၵႃႈတီႈဝဵင်းသီႉလေႃႇလႄႈ ဢွၼ်ၵၼ်ပူၵ်းတင်ႈမူဝ်းၵႃႇၸဝ်ႈတီႈၸူႉတီႈတုမ်ပရဵၵ်ႈသၢတ်ႈၵႃႈတီႈၼၼ်ႈဢေႃႈ။ မိူင်းၼၼ်ႉ လႆႈၶၢမ်ႇတၢင်းဢၼ်ၶျႃးတူၵ်းတႅမ်ႇၵႃႈတီႈၽၢႆႇၼႃႈၶဝ်ဢေႃႈ။- 2မိူဝ်ႈၼၼ်ႉ ယင်းၵိုတ်းၵူၼ်းမဵဝ်းဢီႉသရေႇလႃႉၸဵတ်းမဵဝ်း ဢၼ်ဢမ်ႇပႆႇလႆႈၶၢမ်ႇတၢင်းဢၼ်ၽႄလိၼ်ဢမူၺ်ႇၶဝ်မႅင်ႇလႄႈ၊- 3ယေႃးသူႉလၢတ်ႈတီႈၵူၼ်းမဵဝ်းဢီႉသရေႇလႃႉတင်းလၢႆလႄႈဝႃႈ၊ သူႁဵတ်းထိူင်းႁဵတ်းၼၢၼ်းလွင်ႈဢၼ်ၶဝ်ႈလႄႈသိမ်းဢဝ်လိၼ် ဢၼ်ထႃႇဝရႃႉၽြႃး ၽြႃးပဵၼ်ၸဝ်ႈပူႇမွၼ်ႇသူပၼ်ၼၼ်ႉလႄႈ တၵ်းယူႇၶိင်ႇၵႃႇလႃႉႁိုင်ၵႃႈႁိုဝ်။- 4ဢွၼ်ၵၼ်လိူၵ်ႈၵဵပ်းဢဝ်ၵႃႈၼႂ်းသူယေႈမဵဝ်းသၢမ်ၵေႃႉတႃႉ။ ၵဝ်တၵ်းပွႆႇၸႂ်ႉၶဝ်လႄႈ၊ ၶဝ်ၼၼ်ႉတၵ်းလႆႈလုၵ်ႉလႄႈ လႄႇၵႂႃႇၵႃႈၼႂ်းဝၢၼ်ႈၼႂ်းမိူင်းလႄႈ တႅမ်ႈမၢႆဢဝ်ၸွမ်းၵႃႈၼင်ႇဢၼ် ၶဝ်ထိူၵ်ႈၶၢမ်ႇဢဝ်ဢမူၺ်ႇၼၼ်ႉသေယဝ်ႉ၊ တၵ်းလႆႈၶိုၼ်းမႃးၵႃႈတီႈၵဝ်ဢေႃႈ။- 5ၶဝ်တၵ်းလႆႈတတ်းမိူင်းႁဵတ်းၸဵတ်းပွတ်းသေဢေႃႈ။ မဵဝ်းယူႉတႃႉတၵ်းလႆႈယူႇၵႃႈၼႂ်းတီႈယူႇမၼ်းၽၢႆႇတၢင်းၸၢၼ်းဢေႃႈ။ မဵဝ်းယူဝ်းသႅပ်ႈတၵ်းလႆႈယူႇၵႃႈၼႂ်းတီႈယူႇမၼ်းၽၢႆႇတၢင်းႁွင်ႇဢေႃႈ။- 6သူတႅမ်ႈမၢႆဢဝ်မိူင်းႁဵတ်းၸဵတ်းပွတ်းသေယဝ်ႉ၊ တၵ်းလႆႈဢဝ်ပုင်ႇလိၼ်မႃးၸူးၵႃႈတီႈၵဝ်ဢေႃႈ။ ၵဝ်တၵ်းႁဵတ်းတၢင်းဢၼ်တူၵ်းၸႃႇၵွၵ်ႈပုၼ်ႈသူ ၵႃႈတီႈၽၢႆႇၼႃႈထႃႇဝရႃႉၽြႃး ၽြႃးပဵၼ်ၸဝ်ႈႁဝ်းၵႃႈတီႈၼႆႈဢေႃႈ။- 7ၵူၼ်းမဵဝ်းလေႇဝီႉတင်းလၢႆ ဢမ်ႇလႆႈမီးပုၼ်ႈမီးတႃႇၵႃႈၼႂ်းသူ။ ဢရႃႇယိတ်ႈပရေႃးႁဵၵ်ႈထႃႇဝရႃႉၽြႃးၼၼ်ႉ ပဵၼ်ဢမူၺ်ႇၶဝ်ဢေႃႈ။ မဵဝ်းၵၢတ်ႉ၊ မဵဝ်းရူႉပိၼ်ႇ၊ မဵဝ်းမၼႃႇသေႇ ၶိုင်ႈၼိုင်ႈၸိူဝ်းၼၼ်ႉ ၶၢမ်ႇဢဝ်ဢမူၺ်ႇဢၼ်မူဝ်းသေႇၶႃႈထႃႇဝရႃႉၽြႃး ပၼ်တီႈၶဝ်ၵႃႈတီႈၽၢႆႇဝၼ်းဢွၵ်ႇၼမ်ႉႁွင်ႈယေႃးတၢၼ်ႇၼၼ်ႉယဝ်ႉ၊ ဝႃႈၼင်ႇၼႆဢေႃႈ။- 8ၵူၼ်းၸိူဝ်းၼၼ်ႉဢွၼ်ၵၼ်လုၵ်ႉလႄႈၵႂႃႇဢေႃႈ။ ယေႃးသူႉၵေႃႈသင်ႇလၢတ်ႈတီႈၶဝ်ၸိူဝ်းဢၼ်ၵႂႃႇႁႂ်ႈလႆႈတႅမ်ႈမၢႆဢဝ်ပုင်ႇမိူင်းၸိူဝ်းၼၼ်ႉလႄႈဝႃႈ၊ သူၵႂႃႇလႄႈဢွၼ်ၵၼ်လႄႇၵႃႈၼႂ်းဝၢၼ်ႈၼႂ်းမိူင်းသေလႄႈ တႅမ်ႈမၢႆဢဝ်သေယဝ်ႉ၊ ၶိုၼ်းမႃးၸူးၵႃႈတီႈၵဝ်တႃႉ။ ၵဝ်တၵ်းႁဵတ်းတၢင်းဢၼ်တူၵ်းၸႃႇၵွၵ်ႈပုၼ်ႈသူ ၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းဝဵင်းသီႉလေႃႇဢေႃႈ၊ ဝႃႈၼင်ႇၼႆသေယဝ်ႉ၊- 9ၶဝ်ၵႂႃႇလႄႈ ဢွၼ်ၵၼ်လႄႇၵႃႈၼႂ်းဝၢၼ်ႈၼႂ်းမိူင်းသေလႄႈ တႅမ်ႈမၢႆဢဝ်မိူင်းႁဵတ်းၸဵတ်းပွတ်း ၸွမ်းၵႃႈၼင်ႇဢၼ်မီးဝၢၼ်ႈမီးဝဵင်းၼၼ်ႉသႂ်ႇၵႃႈၼႂ်းလိၵ်ႈယဝ်ႉၸင်ႇ ၶိုၼ်းမႃးၸူးၵႃႈတီႈယေႃးသူႉ ၵႃႈတီႈတပ်ႉသီႉလေႃႇၼၼ်ႉဢေႃႈ။- 10ယေႃးသူႉၵေႃႈ ႁဵတ်းတၢင်းဢၼ်တူၵ်းၸႃႇၵွၵ်ႈ ၵႃႈတီႈၽၢႆႇၼႃႈထႃႇဝရႃႉၽြႃး ၵႃႈၼႂ်းဝဵင်းသီႉလေႃႇလႄႈ ယေႃးသူႉၽႄလိၼ်ၼၼ်ႉပၼ်တီႈၵူၼ်းမဵဝ်းဢီႉသရေႇလႃႉတင်းလၢႆ ၸွမ်းလူၺ်ႈမဵဝ်းၽႂ်မဵဝ်းမၼ်းဢေႃႈ။
မိူင်းဢၼ်ၽႄမႅင်ႇပၼ်တီႈၸိူဝ်ႉၶိူဝ်းပိၼ်ႇယႃႇမိၼ်ႇ
11ႁဵတ်းတၢင်းဢၼ်တူၵ်းၸႃႇၵွၵ်ႈသေလႄႈ ၵူၼ်းမဵဝ်းပိၼ်ႇယႃႇမိၼ်ႇတင်းလၢႆ လႆႈၶၢမ်ႇဢဝ်ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ၼၼ်ႉၸမ်ႉ၊ ၼမ်ႉလိၼ်ၶဝ်ၼၼ်ႉ တူၵ်းၵႃႈတီႈၵႄႇဝူင်ႈၵၢင် ၵူၼ်းမဵဝ်းယူႉတႃႉ တင်းၵူၼ်းမဵဝ်းယူဝ်းသႅပ်ႈၸိူဝ်းၼၼ်ႉဢေႃႈ။- 12ၶွပ်ႇၼမ်ႉလႅၼ်လိၼ်ၶဝ်ၽၢႆႇတၢင်းႁွင်ႇၼၼ်ႉ ဢွၵ်ႇသေၵႃႈတီႈၼမ်ႉႁွင်ႈယေႃးတၢၼ်ႇလႄႈ လႅၼ်လိၼ်ၼၼ်ႉၶိုၼ်ႈၸူးၵႃႈတီႈၼႃႈတၢင်းႁွင်ႇဝဵင်းယေႇရီႉၶူဝ်းသေယဝ်ႉ၊ ၶိုၼ်ႈၸွမ်းၵႃႈၼိူဝ်ႁၢၼ်ႉလွႆၽၢႆႇဝၼ်းတူၵ်းလႄႈ တီႈသုတ်းတီႈတိူၵ်ႈမၼ်း မီးၵႃႈတီႈထိူၼ်ႇပေႇသဝႅၼ်ႇဢေႃႈ။- 13လႅၼ်လိၼ်ၼၼ်ႉသမ်ႉလုၵ်ႉသေၵႃႈတီႈၼၼ်ႈ တႆႇၸွမ်းၵႂႃႇၸူးဝဵင်းလူႉၸႃႉ ၵႃႈႁိမ်းဝဵင်းလူႉၸႃႉဢၼ်ဝႃႈ ဝဵင်းပေႇသလႃႉၼၼ်ႉ ၵႃႈတီႈၼႃႈတၢင်းၸၢၼ်းမၼ်းလႄႈ လႅၼ်လိၼ်ၼၼ်ႉ လူင်းႁွတ်ႈထိုင်ၵႃႈတီႈဝဵင်းဢႃႇတရုတ်ႉဢတ်ႉတႃႉ ၵႃႈႁိမ်းတိၼ်လွႆဢၼ်မီးၽၢႆႇတၢင်းၸၢၼ်းဝဵင်းပႅတ်ႉႁေႃႇရုၼ်ႇ ဢၼ်ၵႃႈတႂ်ႈၼၼ်ႉဢေႃႈ။- 14လႅၼ်လိၼ်ၼၼ်ႉသမ်ႉ ဢွၵ်ႇသေၵႃႈတီႈလွႆ ဢၼ်မီးၵႃႈတီႈၽၢႆႇၼႃႈဝဵင်းပႅတ်ႉႁေႃႇရုၼ်ႇ ဢၼ်ၵႃႈတႂ်ႈၼႃႈတၢင်းၸၢၼ်းမၼ်းၼၼ်ႉသေလႄႈ ငႅၵ်းလဵပ်ႈၸွမ်းႁိမ်းၽၢႆႇၼႃႈတၢင်းဝၼ်းတူၵ်း ဝၢႆႇၼႃႈၵႂႃႇၸူးၽၢႆႇတၢင်းၸၢၼ်းသေယဝ်ႉ၊ တီႈသုတ်းတီႈတိူၵ်ႈမၼ်း ပဵၼ်ၵႃႈတီႈဝဵင်းၵီႉရယတ်ႉပႃႇလႃႉဢၼ်ဝႃႈယႃႇရိမ်း ဢၼ်ၵူၼ်းမဵဝ်းယူႉတႃႉယူႇၼၼ်ႉဢေႃႈ။ ဢၼ်ၼႆႉၸမ်ႉ၊ ပဵၼ်ၶွပ်ႇၼမ်ႉလႅၼ်လိၼ်ၽၢႆႇဝၼ်းတူၵ်းဢေႃႈ။- 15လႅၼ်လိၼ်ၼႃႈတၢင်းၸၢၼ်း ဢၼ်လုၵ်ႉသေၵႃႈတီႈလႅၼ်လိၼ်သုတ်းဝဵင်းၵီႉရယတ်ႉယႃႇရိမ်ႇၵႂႃႇၼၼ်ႉ ဢွၵ်ႇသေၵႃႈတီႈၽၢႆႇၼႃႈဝၼ်းတူၵ်းၼၼ်ႉလႄႈ သုတ်းတိူၵ်ႈၵႃႈတီႈၼမ်ႉဢွၵ်ႇႁူးၼေႇၽတေႃႇသေယဝ်ႉ၊- 16လႅၼ်လိၼ်ၼၼ်ႉလူင်းၸူးၵႃႈတီႈတိၼ်လွႆသုတ်း ဢၼ်မီးၵႃႈတီႈၽၢႆႇၼႃႈၶူင်ႈႁူၺ်ႈႁိၼ်ႇၼုမ်ႇ ၵႃႈၼႂ်းပၢင်ႇႁူၺ်ႈရေႇၽဵမ်ႇ ၽၢႆႇၼႃႈတၢင်းႁွင်ႇၼၼ်ႉသေလႄႈ သမ်ႉလူင်းၵႂႃႇၵႃႈၼႂ်းၶူင်ႈႁူၺ်ႈႁိၼ်ႇၼုမ်ႇ ၽၢႆႇတၢင်းၸၢၼ်းဝဵင်းယေႇပူႉသီႉယဝ်ႉ၊ သုတ်းတိူၵ်ႈၵႃႈတီႈဝၢၼ်ႈဢႅၼ်ႇရေႃႇၵေးလႃႉလႄႈ၊- 17ၵႃႈတီႈၽၢႆႇၼႃႈတၢင်းႁွင်ႇၼၼ်ႉ ဢွၵ်ႇၵႂႃႇၸူးၵႃႈတီႈဝၢၼ်ႈဢႅၼ်ႇသေႇမိတ်ႉ တင်းဝၢၼ်ႈၵႄးလီႉလုၵ်ႉ ဢၼ်မီးသိုဝ်ႈၵုင်းဢတုမ်ႇမိမ်းၼၼ်ႉသေယဝ်ႉ၊ လူင်းၸူးၵႃႈတီႈမၢၵ်ႇႁိၼ်ပေႃႇႁၼ်ႇ လုၵ်ႈၸၢႆးရူႉပိၼ်ႇဢေႃႈ။- 18သမ်ႉတႆႇၸွမ်းၵႃႈတီႈႁိမ်းၽၢႆႇဢၼ်သိုဝ်ႈပၢင်ႇပဵင်းဢႃႇရၽႃႉ ၽၢႆႇတၢင်းႁွင်ႇမၼ်းၼၼ်ႉသေလႄႈ လူင်းၸူးၵႃႈၼႂ်းပၢင်ႇပဵင်းဢႃႇရၽႃႉၼၼ်ႉသေယဝ်ႉ၊- 19လႅၼ်လိၼ်ၼၼ်ႉတႆႇၸွမ်းၵႃႈႁိမ်းဝဵင်းပႅတ်ႉႁေႃႇၵလႃႉ ၽၢႆႇတၢင်းႁွင်ႇမၼ်းလႄႈ သုတ်းတိူၵ်ႈၵႃႈတီႈၵူတ်ႉၼွင်ၼမ်ႉၵိူဝ် ၽၢႆႇတၢင်းႁွင်ႇမၼ်း ၵႃႈတီႈသူပ်းၼမ်ႉႁွင်ႈယေႃးတၢၼ်ႇၼၼ်ႉဢေႃႈ။ ဢၼ်ၼႆႉၸမ်ႉ၊ ပဵၼ်ၶွပ်ႇၼမ်ႉလႅၼ်လိၼ်ၼႃႈတၢင်းၸၢၼ်းဢေႃႈ။- 20ၼမ်ႉႁွင်ႈယေႃးတၢၼ်ႇပဵၼ်ၶွပ်ႇၼမ်ႉလႅၼ်လိၼ်ၼႃႈဝၼ်းဢွၵ်ႇဢေႃႈ။ ဢၼ်ၼႆႉၸမ်ႉ၊ ၸွမ်းလူၺ်ႈလႅၼ်လိၼ်လဵပ်ႈႁွပ်ႈၼၼ်ႉသေလႄႈပဵၼ်ၼမ်ႉပဵၼ်လိၼ် ဢၼ်ၵူၼ်းမဵဝ်းပိၼ်ႇယႃႇမိၼ်ႇ လႆႈၶၢမ်ႇဢဝ်ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ၼၼ်ႉဢေႃႈ။- 21ဝဵင်းၵူၼ်းမဵဝ်းပိၼ်ႇယႃႇမိၼ်ႇၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ၼၼ်ႉၸမ်ႉ၊ ပႃးဝဵင်းယေႇရီႉၶူဝ်း၊ ဝဵင်းပႅတ်ႉႁေႃႇၵလႃႉ၊ ဝဵင်းဢေးမိၵ်ႉၵၸိၵ်ႉ၊- 22ဝဵင်းပေႇသရႃႇပႃႉ၊ ဝဵင်းၸေႇမရိမ်ႇ၊ ဝဵင်းပေႇသလႃႉ၊- 23ဝဵင်းဢႃႇဝိမ်ႇ၊ ဝဵင်းပရႃႉ၊ ဝဵင်းဢေႃႇၽရႃႉ၊- 24ဝဵင်းၶေႇၽႃႇႁႃႇမေႃႇၼႆႇ၊ ဝဵင်းဢေႃးၽၼီႉ၊ ဝဵင်းၵႃႇၽႃႉ ဢၼ်ဝႃႈဝဵင်းသိပ်းသွင်ဝဵင်း ဢိၵ်ႇတင်းဝၢၼ်ႈမၼ်းတင်းလၢႆၸိူဝ်းၼၼ်ႉ၊- 25ဝဵင်းၵီႉပွင်ႇ၊ ဝဵင်းရႃႇမႃႉ၊ ဝဵင်းပေႇရုတ်ႉ၊- 26ဝဵင်းမီႉၸပႃႇ၊ ဝဵင်းၶေႇၽီႉရႃႉ၊ ဝဵင်းမေႃႇၸႃႉ၊- 27ဝဵင်းရေႇၵိမ်ႇ၊ ဝဵင်းဢီႉရႃႉပေႇလႃႉ၊ ဝဵင်းတႃႇရလႃႉ၊- 28ဝဵင်းၸေးလႃႉ၊ ဝဵင်းဢေးလပ်ႉ၊ ဝဵင်းယေႇပူႉသီႉ၊ ဢၼ်ဝႃႈဝဵင်းယေႇရူႉသလႅမ်ႇ၊ ဝဵင်းၵီႉပႃႉ၊ ဝဵင်းၵီႉရယတ်ႉ ဢၼ်ဝႃႈ ဝဵင်းသိပ်းသီႇဝဵင်း ဢိၵ်ႇတင်းဝၢၼ်ႈမၼ်းတင်းလၢႆၸိူဝ်းၼၼ်ႉဢေႃႈ။ ဢၼ်ၼႆႉၸမ်ႉ၊ ပဵၼ်ဢမူၺ်ႇၵူၼ်းမဵဝ်းပိၼ်ႇယႃႇမိၼ်ႇ ၸွမ်းလူၺ်ႈမဵဝ်းပီႈမဵဝ်းၼွင်ႉၶဝ်ၼၼ်ႉဢေႃႈ။
Copyright © 2021 by OMF International, Shan Baptist Churches Fellowship