ဢီႉသႃႇယႃႉ 53
53
1ၵႂၢမ်းသတၢင်းသဵင်ၶၢဝ်ႇဢၼ်ႁဝ်းႁေႃးလၢတ်ႈၼႆႉၸိုင် ၽူႈလႂ်ယုမ်ႇ။ ၶႅၼ်မိုဝ်း ထႃႇဝရႃႉၽြႃးၼၼ်ႉၸိုင် ထၢင်ႇသႃးတီႈၽူႈလႂ်။- 2ယႂ်ႇၽႄႈတူဝ်းတွၼ်းမႃးယူႇ ၵႃႈတီႈၽၢႆႇၼႃႈမၼ်းၸဝ်ႈလႄႈ၊ မၼ်းၼၼ်ႉ ၸိူဝ်ႉၼင်ႇယွတ်ႈၼင်ႇၵူႇဢိၵ်ႇတင်း ၸိူဝ်ႉၼင်ႇၵိင်ႇၼင်ႇၶႃႊ ဢၼ်တႅၵ်ႇဢွၵ်ႇမႃး ၵႃႈတီႈလိၼ်ဢၼ်ႁႅင်ႈႁွင်ၼၼ်ႉဢေႃႈ။ မၼ်းဢမ်ႇမီးႁၢင်ႈၽၢင်ဢၼ်ႁၢင်ႈလီႁၢင်ႈငၢမ်း ပုၼ်ႈဢၼ်ႁဝ်း လီဢဝ်ႁဵတ်းပမႃႇၼႃႉၼၼ်ႉ။ ဢမ်ႇပျေႉၸုမ်ႇဝႆႉတင်းလၢၵ်ႈၶၼႃႇ ၼႃႈတႃဢၼ်ႁဝ်းလီႁၵ်ႉလီပႅင်း။- 3မၼ်းလႆႈၶၢမ်ႇတၢင်းဢၼ်ႁဵတ်းဢမ်ႇပေႃးၼင်ႇႁိုဝ်လႄႈ ပဵၼ်ၵေႃႉဢၼ်ၵူၼ်းတင်းလၢႆ ၸုၼ်ႉပႅတ်ႈဢေႃႈ။ မၼ်းပဵၼ်ၵေႃႉဢၼ် ပျေႉၸုမ်ႇဝႆႉတင်း တၢင်းဢၼ်မႆႈၸႂ်ၶီၸႂ်၊ ၵေႃႉဢၼ်မိုတ်ႈၵိုဝ်းၵၼ်တင်းဝူၺ်ႇတၼႃႇ တၢင်းဢၼ်ၸဵပ်းဢၼ်သႅပ်ႇလႄႈ မၼ်းပဵၼ် ၸိူဝ်ႉၼင်ႇၵေႃႉဢၼ်လႆႈၶၢမ်ႇတၢင်းဢၼ် ၵူၼ်းတင်းလၢႆ ဝၢႆႇၼႃႈပႅတ်ႈၼၼ်ႉဢေႃႈ။ မၼ်းလႆႈၶၢမ်ႇတၢင်းဢၼ်ႁဵတ်းဢမ်ႇပေႃးၼင်ႇႁိုဝ်ယူႇလႄႈႁဝ်းဢမ်ႇရူဝ်ႇသေႇၵူဝ်ယမ်မၼ်း။- 4ၵူၺ်းၵႃႈ မၼ်းၼၼ်ႉ ႁၢပ်ႇပႃးဢဝ်တၢင်းၶႆႈတၢင်းပဵၼ်ႁဝ်းလႄႈ ပႃးဢဝ်ဝူၺ်ႇတၼႃႇႁဝ်းၵႂႃႇဢေႃႈ။ ႁဝ်းမၢတ်ႈမၼ်းပဵၼ်ၵေႃႉဢၼ် လႆႈၶၢမ်ႇတၢင်းဢၼ်မၼ်းၸဝ်ႈပၼ်တၢမ်ႇ၊ တၢင်းဢၼ် ၽြႃးပဵၼ်ၸဝ်ႈ သင်ႇသွၼ်သုင်းမႃႉ၊ တၢင်းဢၼ်မၼ်းၸဝ်ႈၶျႃးတူၵ်းတီႈတႅမ်ႇ ၼၼ်ႉယဝ်ႉ။- 5မၼ်းၼၼ်ႉ လႆႈၶၢမ်ႇတၢင်းဢၼ်တႅင်းသႂ်ႇ ၸဵပ်းသႅပ်ႇၼႃႇလူင်လၢင် ၵွပ်ႈပိူဝ်ႈဢပႅတ်ႈတၢင်းဢၼ်ႁဝ်းပူၼ်ႉလိူဝ် ၸိူဝ်းၼၼ်ႉလႄႈ လႆႈၶၢမ်ႇတၢင်းဢၼ်ၼဵၵ်းၶိုတ်ႈလႅဝ်ၼႂ်းၵႂႃႇ ၵွပ်ႈပိူဝ်ႈ ဢပႅတ်ႈတၢင်းဢၼ်ႁဝ်းၽိတ်းပိူင်ႈ ၸိူဝ်းၼၼ်ႉဢေႃႈ။ တၢင်းဢၼ်ၸၢင်ႈ သင်ႇသွၼ်သုင်းမႃႉဢၼ် ႁႂ်ႈပဵၼ်ၵတ်းယဵၼ်ၶျၢမ်းသႃႇ တၢင်းဢၼ်ၼိမ်ၸႂ်တီႈႁဝ်းၼၼ်ႉ ႁွတ်ႈထိုင်ၵႃႈၼိူဝ်မၼ်းလႄႈ ႁဝ်းမီးတၢင်းဢၼ် တၢင်းၸဵပ်းတၢင်းသႅပ်ႇႁၢႆၵႂႃႇ ၵွပ်ႈပိူဝ်ႈႁွႆးတၢမ်ႇဢၼ်မၼ်းလႆႈၶၢမ်ႇၸိူဝ်းၼၼ်ႉဢေႃႈ။- 6ႁဝ်းၵႃႈမီးတင်းသဵင်ႈတင်းလူင် ၽိတ်းတၢင်းပိူင်ႈတၢင်းၵႂႃႇ မိူၼ်ၸိူဝ်ႉၼင်ႇသူဝ်းၼၼ်ႉယူႇ၊ ဝႄႈပိူင်ႈငႅၵ်းၸွမ်းသဵၼ်ႈတၢင်း တူဝ်ၸဝ်ႈၵဝ်ႇၵႂႃႇ ႁင်းၽႂ်ႁင်းမၼ်းယူႇလႄႈ ထႃႇဝရႃႉၽြႃး ဢဝ်ဢပႅတ်ႈႁဝ်း တင်းသဵင်ႈတင်းလူင် တၢင်ႇသႂ်ႇၵႃႈၼိူဝ်မၼ်းၼၼ်ႉဢေႃႈ။- 7မၼ်းၼၼ်ႉ လႆႈၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄး ဢိၵ်ႇတင်း တၢင်းဢၼ်ၶျႃးတႅမ်ႇလႄႈ ယင်းဢမ်ႇၽုၺ်ႇပိုတ်ႇသူပ်းမၼ်းလႄႈ ယူႇဢေႃႈ။ ၸိူဝ်ႉၼင်ႇ သူဝ်းဢွၼ်ႇဢၼ်လႆႈၶၢမ်ႇတၢင်းဢၼ်ဢဝ်ၵႂႃႇ ႁႂ်ႈလႆႈဢဝ်တၢႆၼၼ်ႉ ဢိၵ်ႇတင်းၸိူဝ်ႉၼင်ႇသူဝ်းဢၼ် ယင်းဢမ်ႇႁွင်ႉဢမ်ႇသႅၼ်ႇ ၵႃႈတီႈၽၢႆႇၼႃႈၵေႃႉဢၼ်ၵႅတ်းႁႆးၶူၼ်မၼ်းယူႇၼၼ်ႉလႄႈ မၼ်းၼၼ်ႉ ယင်းဢမ်ႇပိုတ်ႇပၢၵ်ႇလႄႈယူႇဢေႃႈ။- 8ၵွပ်ႈပိူဝ်ႈ တုၵ်ႉၶႃႉတၢင်းၽၢၼ်ဢိၵ်ႇတင်း တၢင်းဢၼ်ၸီႇယၢင်ႇတႅပ်းတတ်းၼၼ်ႉလႄႈ မၼ်းလႆႈၶၢမ်ႇတၢင်းဢၼ်ဢဝ်ဢွၵ်ႇၵႂႃႇဢေႃႈ။ၼႂ်းၸူဝ်ႈပၢၼ်မၼ်းၼၼ်ႉ ၽူႈလႂ်ၶုၵ်းၸႂ်လႆႈၶႆႈၸႂ်လူၺ်ႈလွင်ႈ ဢၼ်မၼ်းလႆႈၶၢမ်ႇတၢင်းဢၼ်ပႄႇၽဵဝ်ႈပႅတ်ႈသေၵႃႈၼႂ်းၶဝ်ၸိူဝ်းဢၼ် ဢသၢၵ်ႈလိပ်းယူႇၼၼ်ႉ။ မၼ်းလႆႈၶၢမ်ႇတၢင်းဢၼ်မၼ်းၸဝ်ႈ ပၼ်တၢမ်ႇ ၵွပ်ႈပိူဝ်ႈဢပႅတ်ႈတၢင်းဢၼ် ၵူၼ်းၵဝ်တင်းလၢႆပူၼ်ႉလိူဝ် ၸိူဝ်းၼၼ်ႉဢေႃႈ။- 9ပိၵ်ႉသမ်ႉ မၼ်းဢမ်ႇႁဵတ်းဢႃႉထမ်ႇမႃႉလႄႈ၊ ဢမ်ႇမီးမူႉသႃႇတီႈသူပ်းမၼ်းသေၵေႃႈ၊ ၶဝ်ၸီႇယၢင်ႇႁႂ်ႈမၼ်းလႆႈၶၢမ်ႇတၢင်းဢၼ်ၽင်လိၼ် လူၺ်ႈၵၼ်တင်း ၶဝ်ၸိူဝ်းဢၼ်ႁၢႆႉဢၼ်မိူၵ်ႈၼၼ်ႉ ဢိၵ်ႇတင်းလူၺ်ႈၵၼ်တင်း သထေးတင်းလၢႆ ၼႂ်းမိူဝ်ႈဢၼ်မၼ်းတၢႆ ၼၼ်ႉဢေႃႈ။- 10ထႃႇဝရႃႉၽြႃး မီးဢလူဝ်ႇၶႂ်ႈၼဵၵ်းၶိုတ်ႈမၼ်းလႅဝ်ၼႂ်းၵႂႃႇလႄႈ ႁႂ်ႈမၼ်းၸဵပ်းသႅပ်ႇဢေႃႈ။ မၼ်းၼၼ်ႉ ဢဝ်ၸႂ်ဝီႉၺိၺ်ႇမၼ်းႁဵတ်းတၢင်းပုၵ်ႈၸေႃႇယိတ်ႈ ဢၼ်ၽေႇဢပႅတ်ႈ သေယဝ်ႉ တၵ်းလႆႈႁၼ်မဵဝ်းၸိူဝ်ႉၶိူဝ်းမၼ်းလႄႈ ဢသၢၵ်ႈမၼ်းၵေႃႈတၵ်းယၢဝ်း ယိုၼ်းဢေႃႈ။ တၢင်းၵျၢမ်ႇတၢင်းပွင် ထႃႇဝရႃႉၽြႃးၵေႃႈ တၵ်းႁွတ်ႈထိုင်တၢင်းဢၼ်ပျေႉၸုမ်ႇၵႃႈတီႈမိုဝ်းမၼ်းဢေႃႈ။- 11မၼ်းတၵ်းႁၼ်ဢၵျူဝ်း ဝူၺ်ႇတၼႃႇဢၼ်ၸႂ်ဝီႉၺိၺ်ႇမၼ်းလႆႈၶၢမ်ႇၼၼ်ႉလႄႈ ၶိုတ်းၸႂ်ပဵင်းၸႂ်ဢေႃႈ။ ၵွပ်ႈပိူဝ်ႈတၢင်းဢၼ် မိုတ်ႈၵိုဝ်းၵၼ်တင်းၶႃႈၵဝ် ဢၼ်သိုဝ်ႈတေႃႇၼၼ်ႉလႄႈ မၼ်းၼၼ်ႉ တၵ်းႁႂ်ႈၵူၼ်းၼမ်ၼႃႇ တႄႇယူႇၼႂ်းတၢင်းဢၼ်သိုဝ်ႈတေႃႇဢေႃႈ။မၼ်းလႆႈႁၢပ်ႇဢဝ်ဢပႅတ်ႈၶဝ်ၵႂႃႇဢေႃႈ။- 12ၵွပ်ႈပိူဝ်ႈ ဢၼ်မၼ်းဢဝ်ဢသၢၵ်ႈမၼ်းသွၼ်းလေႃႇ တေႃႇထိုင်ႁွတ်ႈထၼ်ႈပေႃးတၢႆလႄႈ လႆႈၶၢမ်ႇတၢင်းဢၼ်ၼပ်ႉဢၢၼ်ႇၶဝ်ႈပႃးလူၺ်ႈၵၼ်တင်းၶဝ်ၸိူဝ်းဢၼ်ဢမ်ႇတြႃးၼၼ်ႉသေယဝ်ႉ၊ ႁပ်ႉဢဝ်ဢပႅတ်ႈၵူၼ်းၼမ်ၼႃႇၵႂႃႇလႄႈ တွင်းပၢၼ်ႇပုၼ်ႈၶဝ်ၸိူဝ်းဢၼ်ဢမ်ႇတြႃးၼၼ်ႉလႄႈ ၵဝ်တၵ်းၽႄဢဝ်ပုၼ်ႈဢဝ်တႃႇ ဝႆႉပုၼ်ႈမၼ်းလူၺ်ႈၵၼ်တင်း ၵူၼ်းယႂ်ႇၵူၼ်းလူင်တင်းလၢႆဢေႃႈ။ မၼ်းတၵ်းၽႄဢဝ်ဢုၵ်ႉၸႃႇ ဢၼ်ႁိမ်ဢဝ်လႄႈလႆႈၼၼ်ႉ လူၺ်ႈၵၼ်တင်းၶဝ်ၸိူဝ်းဢၼ်ႁႅင်းယႂ်ႇၼႃႇၼၼ်ႉဢေႃႈ။
Copyright © 2021 by OMF International, Shan Baptist Churches Fellowship