ဢီႉသႃႇယႃႉ 44
44
ထႃႇဝရႃႉၽြႃးပဵၼ်သူႇလဵဝ်ၽြႃး
1မိူဝ်ႈလဵဝ်ၼႆႉၸမ်ႉ၊ ယႃႇၵုပ်ႈဢၼ်ပဵၼ်ၶႃႈၵဝ်၊ ဢီႉသရေႇလႃႉဢၼ်ၵဝ်လိူၵ်ႈၵဵပ်းဢဝ်ၼႆႉဢိူၺ်း၊ ထွမ်ႇငိၼ်းတႃႉ။- 2ထႃႇဝရႃႉၽြႃး ဢၼ်ႁဵတ်းပဵၼ်မႂ်း၊ ၸဝ်ႈဢၼ်ပွင်မႄးမႂ်းၸဵမ်မိူဝ်ႈၼႂ်းတွင်ႉမႄႈမႂ်းလႄႈ ၵမ်းလိုၼ်းတၵ်းၸွႆႈထႅမ်မႃႉၸႃႉမႂ်းယူႇၼၼ်ႉ မီးဢမိင်ႉဝႆႉၸမ်ႉ၊ ယႃႇၵုပ်ႈဢၼ်ပဵၼ်ၶႃႈၵဝ်၊ ယေႇသူႉရုၼ်ႇ ဢၼ်ၵဝ်လိူၵ်ႈၵဵပ်းဢဝ်ၼႆႉဢိူၺ်း၊ ယႃႇပေမႆႈၸႂ်ၶီၸႂ်။- 3လွင်ႈမၼ်းၸမ်ႉ ၵဝ်တၵ်းဢဝ်ၼမ်ႉသွၼ်းလေႃႇ ၵႃႈၼိူဝ်ၵေႃႉဢၼ်ယၢၵ်ႇၼမ်ႉ ၼၼ်ႉလႄႈ တၵ်းႁႂ်ႈၼမ်ႉထူမ်ႈႁူမ်ႇလိၼ်ဢၼ်ႁႅင်ႈဢၼ် ႁွင်ၼၼ်ႉဢေႃႈ။ ၵဝ်တၵ်းဢဝ်ဝီႉၺိၺ်ႇၵဝ် သွၼ်းလေႃႇၵႃႈၼိူဝ်မဵဝ်းမႂ်း ဢိၵ်ႇတင်းဢဝ် တၢင်းလီမင်ႇၵလႃႇ သွၼ်းလေႃႇၵႃႈၼိူဝ် ၸိူဝ်ႉၶိူဝ်းမႂ်းဢေႃႈ။- 4ၶဝ်ၵေႃႈတၵ်းဢွၵ်ႇပဵၼ်မႃး ၵႃႈၼႂ်းၵႄႈ တူၼ်ႈယိူဝ်ႈတူၼ်ႈယႃႈမိူၼ်ၸိူဝ်ႉၼင်ႇ တူၼ်ႈမူဝ်းမၶႃႉ ၵႃႈတီႈႁိမ်းႁွင်ႈၼမ်ႉၵႄးၼၼ်ႉဢေႃႈ။- 5ၵေႃႉၼိုင်ႈ တၵ်ႉလၢတ်ႈလႄႈဝႃႈ၊ ၵဝ်ပဵၼ်ၵူၼ်း ထႃႇဝရႃႉၽြႃးဢေႃႈ၊ ဝႃႈၼင်ႇၼႆလႄႈ ၵေႃႉၼိုင်ႈ တၵ်းဢဝ်ၸိုဝ်ႈဢဝ်သဵင်ယႃႇၵုပ်ႈ ႁွင်ႉႁဵၵ်ႈတူဝ်ၸဝ်ႈၵဝ်ႇဢေႃႈ။ ၵေႃႉၼိုင်ႈ တၵ်းဢဝ်တူဝ်လိၵ်ႈဢၼ်ဝႃႈ ၵူၼ်းထႃႇဝရႃႉၽြႃးဢေႃႈ၊ ဝႃႈၼင်ႇၼႆၼၼ်ႉ သမ်းသႂ်ႇၵႃႈတီႈမိုဝ်းမၼ်းလႄႈ ဢဝ်ၸိုဝ်ႈဢဝ်သဵင် ဢီႉသရေႇလႃႉႁွင်ႉႁဵၵ်ႈတူဝ်မၼ်းဢေႃႈ။- 6ထႃႇဝရႃႉၽြႃး၊ ၶုၼ်ႁေႃၶမ်းမဵဝ်း ဢီႉသရေႇလႃႉ ၸဝ်ႈဢၼ်ထုတ်ႇဢဝ်မဵဝ်းဢီႉသရေႇလႃႉ၊ ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃးၼၼ်ႉ မီးဢမိင်ႉဝႆႉၸမ်ႉ၊ ၵဝ်ၼႆႉပဵၼ်ၵေႃႉဢၼ်ဢွၼ်တၢင်းသုတ်း၊ ၵေႃႉဢၼ်လိုၼ်းလင်သုတ်းဢေႃႈ။ ၼွၵ်ႈသေၵဝ်ၼႆႉ ဢမ်ႇမီးၽြႃးတၢင်ႇသူႇတၢင်ႇပႃး။- 7ၸႃႉၸဵမ်မိူဝ်ႈဢၼ် ၵဝ်ၶၢၼ်းဝႆႉ မဵဝ်းၵူၼ်းမိူဝ်ႈၵွၼ်ႇဢွၼ်ၼႆႉၼၼ်ႉလႄႈ ၽူႈလႂ်တၵ်းႁွင်ႉသေႃႇလႄႈ ဢဝ်ဢွၵ်ႇၼႄပျႃးသေလႄႈ ၸီႇယၢင်ႇလွင်ႈတၢင်းၼႆႉတီႈၵဝ် မိူၼ်ၸိူဝ်ႉၼင်ႇၵဝ်ၼႆႉလႆႈ။ ႁႂ်ႈဢွၼ်ၵၼ်ဢဝ်လွင်ႈတၢင်းဢၼ် ယင်းတိုၵ်ႉပဵၼ်ယူႇ ဢိၵ်ႇတင်း လွင်ႈတၢင်းဢၼ် တၵ်းပဵၼ်မႃးၸိူဝ်းၼၼ်ႉ ဢွၵ်ႇၼႄပျႃး တီႈၶဝ်သေၵမ်းလူၺ်ႈ။- 8ယႃႇပေမႆႈၸႂ်ၶီၸႂ်။ ယႃႇပေၵူဝ်ပေႁႄ။ ၵဝ်မွၵ်ႇလၢတ်ႈၼႄပျႃးတီႈမႂ်း မိူဝ်ႈၵွၼ်ႇဢွၼ်ၼႆႉၼၼ်ႉဢမ်ႇၸႂ်ႈႁိုဝ်။ သူပဵၼ်သၢၵ်ႈသေႇၵဝ်ဢေႃႈ။ ၼွၵ်ႈသေၵဝ်ၼႆႉ ယင်းမီးၽြႃးတၢင်ႇသူႇတၢင်ႇပႃးလူးၵွၼ်ႇႁိုဝ်။ ၼွၵ်ႈသေၵဝ်ၼႆႉ ဢမ်ႇမီးမၢၵ်ႇႁိၼ် မၢၵ်ႇၽႃတၢင်းဢၼ်၊ ၵဝ်ဢမ်ႇႁူႉဢမ်ႇႁၼ်သေဢၼ်။
တၢင်းဢၼ်ဝႆႈရုၵ်ႈထူႉသၢင်းထူႉၼၼ်ႉပဵၼ်တၢင်းဢၼ်ငိူဝ်ႈငႃႉ
9ၶဝ်ၸိူဝ်းဢၼ်ႁဵတ်းရုၵ်ႈထူႉသၢင်းထူႉတင်းသဵင်ႈတင်းလူင် ပဵၼ်ဢၼ်လၢႆလၢႆဢမ်ႇပွင်ႇလွင်ႈၵႃႈသင်လႄႈ၊ လွင်ႈတၢင်းဢၼ် ထုၵ်ႇၸႂ်ၵျိူၵ်ႈၸႂ်ၶဝ်ၼၼ်ႉ ဢမ်ႇပၼ်ဢၵျူဝ်းလႆႈ။ သၢၵ်ႈသေႇၶဝ်တင်းလၢႆၼၼ်ႉ လွင်ႈၼင်ႇႁိုဝ်တၵ်းလီဢူၵ်းလီဢၢႆၸိုင်၊ တၵ်းဢမ်ႇၸၢင်ႈႁူႉၸၢင်ႈႁၼ်။- 10ၵေႃႉဢၼ်ႁဵတ်းပဵၼ်ၽြႃး၊ ၵေႃႉဢၼ်လေႃႇႁဵတ်းသွၼ်းႁဵတ်းရုၵ်ႈထူႉသၢင်းထူႉ ဢၼ်ဢမ်ႇပၼ်ဢၵျူဝ်းလႆႈၼၼ်ႉၸမ်ႉ၊ ပဵၼ်ၽူႈလႂ်။- 11တူၺ်းလူး၊ ၶဝ်ၸိူဝ်းဢၼ် ႁဵတ်းၵေႃႉသေႈလူၺ်ႈၵၼ်တၢင်ႇၵေႃႉၼၼ်ႉ ၵႃႈမီးၼၼ်ႉ တၵ်းဢွၼ်ၵၼ်ဢူၵ်းဢၢႆဢေႃႈ။ ၶဝ်ၸိူဝ်းဢၼ်ႁဵတ်းပဵၼ်ၼၼ်ႉ ပဵၼ်ၵူၼ်းၵူၺ်းဢေႃႈ။ ၶဝ်ၵႃႈမီးၼၼ်ႉ တၵ်းလႆႈၸူႉၵၼ်တုမ်ၵၼ်လႄႈ လုၵ်ႉၸုၵ်းယူႇဢေႃႈ။ တၵ်းလႆႈ တူၵ်းၸႂ်လႄႈ မီးတၢင်းဢၼ်ဢူၵ်းဢၢႆ ၽွမ်ႉၵမ်းလဵဝ်ၵၼ်ဢေႃႈ။- 12ၸၢင်ႈလဵၵ်းႁဵတ်းပဵၼ် တႃမၢတ်ႇလႄႈ ၸၢင်ႈဢဝ်ၽင်သႂ်ႇၵႃႈၼႂ်းထၢၼ်ႇၽႆးသေယဝ်ႉ၊ ဢဝ်ၶွၼ်ႉလဵၵ်းထုပ်ႉပေႃႉလႄႈ ဢဝ်ႁႅင်းၶႅၼ်မိုဝ်းဢွၵ်ႇႁဵတ်းဢေႃႈ။ မၼ်းတွင်ႉမႆႈၶႂ်ႈၵိၼ်လႄႈ ႁႅင်းဢူၼ်ႈၵႂႃႇဢေႃႈ။ မၼ်းဢမ်ႇလႆႈၵိၼ်ၼမ်ႉလႄႈ ႁိူဝ်ႉၼူၼ်းဢေႃႈ။- 13လၢၵ်ႈသမႃး ၸၢင်ႈဢဝ်မႆမီႈၽႅတ်းယူႇ၊ ဢဝ်လဵၵ်းၸီးမၢတ်ႈမၢႆလႄႈ ဢဝ်သိဝ်ႇတင်းလၢႆတွင်ႈႁဵတ်းသေလႄႈ ဢဝ်လဵၵ်း ဢၼ်တႅၵ်ႈမၼ်း တႅမ်ႈမၢႆဝႆႉသေလႄႈ တွင်ႈႁဵတ်းႁႂ်ႈမႅၼ်ႈၵၼ်တင်း ႁၢင်ႈၽၢင်ၵူၼ်းထၼ်ႈပေႃးႁႂ်ႈပႃးသရေႇၵူၼ်း ႁႂ်ႈလႆႈမီးယူႇ ၵႃႈၼႂ်း ႁိူၼ်းဢေႃႈ။- 14မၼ်းတႅပ်းၽၼ်းတူၼ်ႈဢႃႇရိတ်ႉတင်းလၢႆလႄႈ လိူၵ်ႈၵဵပ်းဢဝ်တူၼ်ႈၵူႉပႃႉရႃႉ၊ တင်းတူၼ်ႈမႆႉၼိမ် သေလႄႈ ၸၢင်ႈလုမ်းလႃးႁႂ်ႈ ယႂ်ႇမႃးလီလီငၢမ်းငၢမ်း ၵႃႈၼႂ်းပႃႇတူၼ်ႈၵႃႈၼႂ်းထိူၼ်ႇၼႂ်းၶိူဝ်းၸိူဝ်းၼၼ်ႉပုၼ်ႈမၼ်းဢေႃႈ။ မၼ်းၽုၵ်ႇတူၼ်ႈမႆႉပႅၵ်ႇသေလႄႈ ၼမ်ႉၽူၼ်ၵေႃႈၸၢင်ႈလဵင်ႉဝႆႉဢေႃႈ။- 15ပဵၼ်ၽိုၼ်းပုၼ်ႈဢၼ် ၵူၼ်းတၵ်းဢဝ်သႂ်ႇၽႆးတၢမ်ၽႆးဢေႃႈ။ မၼ်းၸၢင်ႈဢဝ်ၵမ်ႈၽွင်ႈႁဵတ်းၽႆးဢွမ်ႇဢေႃႈ။ လႆႈသမ်ႉ ၸၢင်ႈဢဝ် ၵမ်ႈၽွင်ႈသႂ်ႇၽႆးသေလႄႈ ၼိုင်ႈၶဝ်ႈမုၼ်းဢေႃႈ။ လႆႈသမ်ႉ ၸၢင်ႈဢဝ်ႁဵတ်းၽြႃးသေလႄႈ ၵူဝ်းၵႂၢႆႇဢေႃႈ။ ၸၢင်ႈဢဝ်တွင်ႈႁဵတ်းရုၵ်ႈထူႉ သေလႄႈ ၶုပ်ႉမူပ်ႇၵႃႈတီႈၽၢႆႇၼႃႈမၼ်းဢေႃႈ။- 16မၼ်းၸၢင်ႈဢဝ်မႆႉၼၼ်ႉ ပွတ်းၼိုင်ႈ သႂ်ႇၽႆးလႄႈ ဢဝ်ပွတ်းၼိုင်ႈ ႁုင်ၼိူဝ်ႉၵိၼ်ဢေႃႈ။ မၼ်းၸၢင်ႈဢဝ်ပိင်ႈဢဝ်ၽဝ် သေလႄႈ ၵိၼ်ႁႂ်ႈဢိမ်ႇႁႂ်ႈတဵမ်ဢေႃႈ။ လႆႈသမ်ႉ မၼ်းၸၢင်ႈဢွမ်ႇၽႆးၼၼ်ႉလႄႈ လၢတ်ႈလႄႈဝႃႈ၊ ဢိူဝ်ႈ၊ ၵဝ်ဢုၼ်ႇယဝ်ႉ။ လႆႈထူပ်းၽႆးယဝ်ႉ၊ ဝႃႈၼင်ႇၼႆဢေႃႈ။- 17ပွတ်းၼိုင်ႈ ဢၼ်ၵိုတ်းဢၼ်ၵျၢၼ်ႇၼၼ်ႉၸိုင် မၼ်းၸၢင်ႈဢဝ်ႁဵတ်းၽြႃး ဢၼ်ဝႃႈရုၵ်ႈထူႉၼၼ်ႉဢေႃႈ။ မၼ်းၸၢင်ႈၶုပ်ႉမူပ်ႇ သေလႄႈ ၵူဝ်းၵႂၢႆႇၵႃႈတီႈၽၢႆႇၼႃႈမၼ်းၼၼ်ႉလႄႈ ၸၢင်ႈသူးတွင်းလႄႈဝႃႈ၊ ၸဝ်ႈႁဝ်းပဵၼ်ၽြႃးၵဝ်ၶႃႈတီႈၶႃႈဢေႃႈ။ ၶႅၼ်းတေႃႈ ၵႄႇသႄႇၶျွတ်ႈဢဝ်ၶႃႈၸဝ်ႈသေၵမ်းတီႈၶႃႈ၊ ဝႃႈၼင်ႇၼႆဢေႃႈ။- 18ၶဝ်ၸိူဝ်ႉၼင်ႇၼၼ်ၼၼ်ႉ ဢမ်ႇမီးပိင်ႇၺႃႇ။ ဢမ်ႇမီးၺၢၼ်ႇ။ မၼ်းၸဝ်ႈဢိုတ်းဝႆႉႁူမ်ႇဝႆႉတႃၶဝ် ႁႂ်ႈၶဝ်ထၼ်ႈပေႃးဢမ်ႇႁၼ်လႆႈဢိၵ်ႇတင်းႁူဝ်ၸႂ်ၶဝ် ႁႂ်ႈၶဝ်ထၼ်ႈပေႃးဢမ်ႇႁူႉလႆႈၸႅင်ႈလႆႈဢေႃႈ။- 19ဢမ်ႇမီးၵေႃႉဢၼ်ၶုၵ်းၸႂ်လႆႈၶႆႈၸႂ်ထူပ်း ၵႃႈၼႂ်းႁူဝ်ၸႂ်မၼ်းလႄႈ မီးၺၢၼ်ႇမီးပိင်ႇၺႃႇလႄႈဝႃႈ၊ ၵဝ်လႆႈဢဝ်ပွတ်းၼိုင်ႈ သႂ်ႇၽႆး ယဝ်ႉ။ ၵဝ်လႆႈဢဝ်ၶဝ်ႈမုၼ်း ၽဝ်ၵႃႈၼိူဝ်ထၢၼ်ႇၽႆးၼၼ်ႉယဝ်ႉ။ ၵဝ်လႆႈဢဝ် ၼိူဝ်ႉပိင်ႈႁၢင်းသေလႄႈ ၵိၼ်ယဝ်ႉ။ ပွတ်းဢၼ် ယင်းၵိုတ်းယင်းၵျၢၼ်ႇဝႆႉၼၼ်ႉၸိုင် ၵဝ်တၵ်းလႆႈ ႁႂ်ႈပဵၼ်တီႈဢၼ်လီႁင်ႈဢဵတ်ႇသဵတ်ႇႁိုဝ်။ ၵဝ်တၵ်းလႆႈၶုပ်ႉမူပ်ႇ ၵႃႈတီႈၽၢႆႇၼႃႈ တုမ်မႆႉႁိုဝ်။ ဝႃႈၼင်ႇၼႆၼၼ်ႉ သေၵေႃႉသေၵူၼ်းလႃးလႃးလူင်ပႄႇ။- 20မၼ်းၼၼ်ႉ ၸၢင်ႈဢဝ်တဝ်ႈမုၵ်ႉၽႆးၵိၼ်ဢေႃႈ။ ႁူဝ်ၸႂ်မၼ်းဢၼ်လႆႈၶၢမ်ႇတၢင်းဢၼ်ပႅတ်ႉဢၼ်လႅၼ်ၼၼ်ႉ ႁႂ်ႈမၼ်းၽိတ်းတၢင်းပိူင်ႈတၢင်းၵႂႃႇ ထၼ်ႈပေႃးမၼ်းဢမ်ႇၵႄႇသႄႇၶျွတ်ႈဢဝ်ဝီႉၺိၺ်ႇမၼ်းလႆႈလႄႈ လၢတ်ႈလႄႈဝႃႈ၊ ၵႃႈၼႂ်းမိုဝ်းၶွၼ်ၶႂႃၵဝ်ၼႆႉ ပႃးမိၵ်ႉသႃႇတိၵ်ႉထီႉႁိုဝ်၊ ဝႃႈၼင်ႇၼႆၼၼ်ႉလႆႈလူင်ပႄႇ။
ထႃႇဝရႃႉၽြႃးပဵၼ်ၸဝ်ႈၽၢၼ်ႇသၢင်းလႄႈ ၸဝ်ႈၵႄႇၶျွတ်ႈ
21မဵဝ်းယႃႇၵုပ်ႈဢိူၺ်း၊ ၶုၵ်းၸႂ်လႆႈၶႆႈၸႂ်ထူပ်း လွင်ႈတၢင်းၸိူဝ်းၼႆႉတႃႉ။ မဵဝ်းဢီႉသရေႇလႃႉဢိူၺ်း၊ မႂ်းပဵၼ်ၶႃႈၵဝ်ဢေႃႈ။ ၵဝ်ႁဵတ်း ပဵၼ်မႂ်းလႄႈ မႂ်းပဵၼ်ၶႃႈၵဝ်ဢေႃႈ။ မဵဝ်းဢီႉသရေႇလႃႉဢိူၺ်း၊ ၵဝ်ဢမ်ႇလူင်ဢမ်ႇလိုမ်းမႂ်း။- 22ၵဝ်ထူမွတ်ႇတူႉၸရိူၵ်ႈမႂ်း ၸိူဝ်းၼၼ်ႉပႅတ်ႈ မိူၼ်ၸိူဝ်ႉၼင်ႇ မုၵ်ႉၽႃႈၽူၼ် ဢိၵ်ႇတင်း ဢပႅတ်ႈမႂ်းၸိူဝ်းၼၼ်ႉပႅတ်ႈ မိူၼ်ၸိူဝ်ႉၼင်ႇ ၶႅပ်းၽႃႈၽူၼ်ယဝ်ႉ။ ၶိုၼ်းမႃးၸူးတီႈၵဝ်တႃႉ။ ၵဝ်ထုတ်ႇဢဝ်မႂ်းယဝ်ႉ။- 23ၽႃႉၵၢင်ႁၢဝ်ဢိူၺ်း၊ ႁဵတ်းၵႂၢမ်းတႃႉ။ ထႃႇဝရႃႉၽြႃး ႁဵတ်းဝႆႉယဝ်ႉယဝ်ႉ။ ၵႃႈတီႈတႂ်ႈလိၼ်မိူင်းၶဝ်ဢိူၺ်း၊ ဢွၼ်ၵၼ်ႁွင်ႉသႅၼ်ႇတႃႉ။ လွႆတင်းလၢႆ ဢိၵ်ႇတင်းထိူၼ်ႇ တင်းတူၼ်ႈမႆႉ ၵႃႈဢၼ်မီးၵႃႈၼႂ်းမၼ်းၶဝ်ဢိူၺ်း၊ ဢွၼ်ၵၼ်ၵိဝ်သဵင်ဢၼ်ဢိုၼ်းၵတ်းဢိုၼ်းယဵၼ် ၼၼ်ႉတႃႉ။ ထႃႇဝရႃႉၽြႃး ထုတ်ႇဢဝ်မဵဝ်းယႃႇၵုပ်ႈယဝ်ႉ။ မၼ်းၸဝ်ႈတၵ်းႁႂ်ႈ မုၼ်ၽုင်းမၼ်းၸဝ်ႈ ထၢင်ႇသႃးၵွပ်ႈပိူဝ်ႈ မဵဝ်းဢီႉသရေႇလႃႉဢေႃႈ။- 24ထႃႇဝရႃႉၽြႃး ဢၼ်ထုတ်ႇဢဝ်မႂ်းလႄႈ ပွင်မႄးမႂ်းၸဵမ်မိူဝ်ႈၼႂ်းတွင်ႉမႄႈမႂ်းၼၼ်ႉ မီးဢမိင်ႉဝႆႉၸမ်ႉ၊ ၵဝ်ပဵၼ်ထႃႇဝရႃႉၽြႃး ဢၼ်ႁဵတ်းပဵၼ်လွင်ႈတၢင်းၵူႈၸိူဝ်ႉၵူႈပိူင်ဝႆႉ၊ ဢၼ်သူႇလဵဝ်ပႃးလဵဝ်ၵူၺ်း ၶဵင်ႈမုင်းၽႃႉၵၢင်ႁၢဝ်ဝႆႉ၊ ဢၼ်ယင်းမီးၵေႃႉမီးသေႈလႄႈ ဢဝ်လိၼ်မိူင်းသိူဝ်ႇလိူၼ်ႈဝႆႉ၊- 25ဢၼ်ဢဝ်ပုၵ်ႉပႃႉၼီႉမိၵ်ႈ မိၵ်ႉသႃႇသြႃႇတင်းလၢႆၼၼ်ႉ ႁၢႆပႅတ်ႈလႄႈ ႁႂ်ႈၸဝ်ႈပေႇတၢင်ႇလႆႈယွင်ႇမႃႈ ဢၼ်ႁႂ်ႈၵူၼ်း ဢၼ်မီးပိင်ႇၺႃႇ တင်းလၢႆဝၢႆႇၶိုၼ်းလႄႈ ႁႂ်ႈပိင်ႇၺႃႇၶဝ်မိူၵ်ႈၵႂႃႇ၊- 26ဢၼ်ႁႂ်ႈၵႂၢမ်း ၶႃႈ တူဝ်ၸဝ်ႈၵဝ်ႇတႄႇယူႇလႄႈ ႁဵတ်းၸွမ်းၵႃႈၼင်ႇဢၼ် တမၢၼ်ႇတူဝ်ၸဝ်ႈၵဝ်ႇ တင်းလၢႆ ႁေႃးလၢတ်ႈ၊ ဢၼ်လၢတ်ႈ လူၺ်ႈလွင်ႈ ဝဵင်းယေႇရူႉသလႅမ်ႇလႄႈဝႃႈ၊ မၼ်းတၵ်းပဵၼ်တီႈယူႇၵူၼ်းဢေႃႈ၊ ဝႃႈၼင်ႇၼႆလႄႈ လၢတ်ႈလူၺ်ႈလွင်ႈဝဵင်းယူႉတႃႉတင်းလၢႆ လႄႈဝႃႈ၊ ၶဝ်တၵ်းလႆႈမီးတၢင်းဢၼ် တႄႇႁဵတ်းယူႇဢေႃႈ။ ၵဝ်တၵ်းၵုမ်းတၵ်းမႄးတီႈဢၼ်ၵိူၼ်ႇဢၼ်လူႉၸိူဝ်းၼၼ်ႉဢေႃႈ၊ ဝႃႈၼင်ႇၼႆ၊- 27ဢၼ်လၢတ်ႈတီႈပၢင်ႇလၢႆႇလႄႈဝႃႈ၊ ႁႂ်ႈၼမ်ႉသဵင်ႈမူတ်းသေ။ ၵဝ်တၵ်းႁႂ်ႈၼမ်ႉႁွင်ႈၼမ်ႉၵႄးမႂ်းၸိူဝ်းၼၼ်ႉယူတ်းႁႅင်ႈဢေႃႈ၊ ဝႃႈၼင်ႇၼႆ၊- 28ဢၼ်လၢတ်ႈလူၺ်ႈလွင်ႈၶုၼ်ၵူႉရူႉလႄႈဝႃႈ၊ မၼ်းပဵၼ်ၵူၼ်း လဵင်ႉသူဝ်းထိင်းသူဝ်းၵဝ်လႄႈ တၵ်းႁႂ်ႈဢလူဝ်ႇၵဝ်ၵႃႈမီး ပျေႉၸုမ်ႇယူႇ သေလႄႈ ၸီႇယၢင်ႇလူၺ်ႈလွင်ႈဝဵင်းယေႇရူႉသလႅမ်ႇလႄႈဝႃႈ၊ မၼ်းတၵ်းလႆႈမီးတၢင်းဢၼ်တႄႇႁဵတ်းဢေႃႈ၊ ဝႃႈၼင်ႇၼႆလႄႈ လၢတ်ႈတီႈ ပိၵ်ႈမၢၼ်ႇၸဝ်ႈလႄႈဝႃႈ၊ ငဝ်ႈႁၢၵ်ႈတိူၵ်ႈမႂ်း တၵ်းလႆႈမီးတၢင်းဢၼ်ၶျႃးဝႆႉဢေႃႈ၊ ဝႃႈၼင်ႇၼႆၼၼ်ႉဢေႃႈ။
Copyright © 2021 by OMF International, Shan Baptist Churches Fellowship