ဢီႉသႃႇယႃႉ 40
40
ၶေႃႈၵႂၢမ်းဢၼ်ႁႂ်ႈၵူၼ်းမဵဝ်းၸဝ်ႈပေႇၸႂ်ၼိမ်ၸႂ်
1ၽြႃးပဵၼ်ၸဝ်ႈသူ မီးဢမိင်ႉဝႆႉၸမ်ႉ၊ သူဢွၼ်ၵၼ်ႁႂ်ႈၵူၼ်းၵဝ်တင်းလၢႆ ပေႇၸႂ်ၼိမ်ၸႂ်တႃႉ။ ႁႂ်ႈပေႇၸႂ်ၼိမ်ၸႂ်တႃႉ။- 2ဢွၼ်ၵၼ်လၢတ်ႈၵႂၢမ်း ဢၼ်ႁႂ်ႈပေႇၸႂ်ၼိမ်ၸႂ်ၼၼ်ႉ တီႈဝဵင်းယေႇရူႉသလႅမ်ႇလႄႈ ႁွင်ႉသႅၼ်ႇတီႈမၼ်း လူၺ်ႈလွင်ႈဢၼ် ၶိင်ႇဢၼ် မၼ်းလႆႈႁၢပ်ႇဢမူႉသိုၵ်းသဵင်ႈယဝ်ႉလႄႈ ဢပႅတ်ႈမၼ်းၵေႃႈပေႇမူတ်းယဝ်ႉၼၼ်ႉတႃႉ။ လွင်ႈမၼ်းၸမ်ႉ ပုၼ်ႈဢပႅတ်ႈမၼ်း ၵႃႈမီးၼၼ်ႉ မၼ်းလႆႈၶၢမ်ႇဢဝ်သွင်ပုၼ်ႈ တီႈမိုဝ်းထႃႇဝရႃႉၽြႃးယဝ်ႉ။- 3သဵင်ၵေႃႉဢၼ်ႁွင်ႉသႅၼ်ႇၵႃႈတီႈၼႂ်းထိူၼ်ႇလႄႈဝႃႈ၊ မႄးသဵၼ်ႈတၢင်း ထႃႇဝရႃႉၽြႃးတႃႉ။ ႁႂ်ႈသဵၼ်ႈတၢင်း ၽြႃးပဵၼ်ၸဝ်ႈ သိုဝ်ႈၵႃႈတီႈပၢင်ႇပဵင်းၼၼ်ႉတႃႉ။- 4တီႈဢၼ်ၶူင်ႈဢၼ်ယၢၼ်းၵႃႈမီးၸိုင် တၵ်းလႆႈထူမ်ဢေႃႈ။ လွႆလူင်လွႆဢွၼ်ႇ ၵႃႈမီးၸိုင် တၵ်းလႆႈၵိူၼ်ႇႁႂ်ႈတႅမ်ႇဢေႃႈ။ သဵၼ်ႈတၢင်းဢၼ်ၵူတ်ႉဢၼ်ငွၵ်း တင်းလၢႆၸိုင် တၵ်းလႆႈႁႂ်ႈသိုဝ်ႈဢေႃႈ။ တၢင်းဢၼ်ႁုၵ်းႁၵ်းၶုၵ်းၶီႈၶုၵ်းၶၵ်းတင်းလၢႆၵေႃႈ တၵ်းလႆႈၽဵဝ်ႈ ႁႂ်ႈလိူမ်ႈဢေႃႈ။- 5မုၼ်ၽုင်းထႃႇဝရႃႉၽြႃး တၵ်းထၢင်ႇသႃးပေႃႇမႃးလႄႈ ၵူၼ်းတင်းသဵင်ႈတင်းလူင် တၵ်းလႆႈႁၼ်ၼင်ႇၵၼ်ဢေႃႈ၊ ဝႃႈၼင်ႇၼႆလႄႈ သူပ်းထႃႇဝရႃႉၽြႃး မီးဢမိင်ႉဢေႃႈ။- 6လႆႈသမ်ႉ သဵင်ၵေႃႉၼိုင်ႈ လၢတ်ႈလႄႈဝႃႈ၊ ႁွင်ႉပၢဝ်ႇႁွင်ႉသေႃႇတႃႉ၊ ဝႃႈၼင်ႇၼႆလႄႈ ၵေႃႉၼိုင်ႈထၢမ်လႄႈဝႃႈ၊ ၵဝ်တၵ်းလႆႈဢဝ် လွင်ႈၵႃႈသင်ႁွင်ႉပၢဝ်ႇႁွင်ႉသေႃႇ၊ မိူဝ်ႈဢၼ်ဝႃႈၼင်ႇၼႆၸိုင်၊ မၼ်းလၢတ်ႈလႄႈဝႃႈ၊ ၼိူဝ်ႉၵူၼ်းလိူတ်ႈၵူၼ်းၵႃႈမီးပဵၼ်တူၼ်ႈယိူဝ်ႈ တူၼ်ႈယႃႈလႄႈ မုၼ်ၽုင်းမၼ်းၵႃႈမီး ပဵၼ်ၸိူဝ်ႉၼင်ႇမွၵ်ႇ ၵႃႈၼႂ်းထိူၼ်ႇၼၼ်ႉဢေႃႈ။- 7တူၼ်ႈယိူဝ်ႈတူၼ်ႈယႃႈၼၼ်ႉ ၸၢင်ႈႁဵဝ်ႇၸွပ်ႈယူတ်းႁႅင်ႈၵႂႃႇလႄႈ မွၵ်ႇမၼ်းၵေႃႈၸၢင်ႈႁူင်ႈၵႂႃႇ ၼႂ်းမိူဝ်ႈဢၼ်လူမ်း ထႃႇဝရႃႉၽြႃး ထူဝ်းၼၼ်ႉဢေႃႈ။ ၵူၼ်းတင်းလၢႆ ပဵၼ်တူၼ်ႈယိူဝ်ႈတူၼ်ႈယႃႈ ဢမၢၼ်ႇၶၼ်ပဵၼ်ဢေႃႈ။- 8တူၼ်ႈယိူဝ်ႈတူၼ်ႈယႃႈၼၼ်ႉ ၸၢင်ႈႁဵဝ်ႇၸွပ်ႈယူတ်းႁႅင်ႈၵႂႃႇလႄႈ မွၵ်ႇမၼ်းၵေႃႈၸၢင်ႈႁူင်ႈၵႂႃႇဢေႃႈ။ ၼုၵ်ႈၵပၢတ်ႈတြႃး ထႃႇဝရႃႉၽြႃးၸမ်ႉ၊ တႄႇယူႇၵူႈၶိင်ႇၵူႈၶႃႇ တႃႇသေႇဢမ်ႇထၢတ်ႇဢေႃႈ၊ ဝႃႈၼင်ႇၼႆဢေႃႈ။- 9ၵေႃႉဢၼ် မွၵ်ႇလၢတ်ႈသတၢင်းသိူဝ်းပျေႃႇ တီႈလွႆၸီႉဢုၼ်ႇဢိူၺ်း၊ ၶိုၼ်ႈၵႃႈၼိူဝ်လွႆဢၼ်သုင်တႃႉ။ ၵေႃႉဢၼ်မွၵ်ႇလၢတ်ႈ သတၢင်းသိူဝ်းပျေႃႇတီႈဝဵင်းယေႇရူႉသလႅမ်ႇဢိူၺ်း၊ ဢဝ်တင်းႁႅင်းသေလႄႈ သႅၼ်ႇသဵင်ၵိဝ်သဵင်တႃႉ။ ယင်းဢမ်ႇၵူဝ်ဢမ်ႇႁႄလႄႈသႅၼ်ႇသဵင်ၵိဝ်သဵင်တႃႉ။ လၢတ်ႈတီႈဝၢၼ်ႈတီႈဝဵင်းယူႉတႃႉတင်းလၢႆလႄႈဝႃႈ၊ ဢွၼ်ၵၼ်တူၺ်းၽြႃးပဵၼ်ၸဝ်ႈသူတႃႉ၊ ဝႃႈၼင်ႇၼႆတႃႉ။- 10တူၺ်းလူး၊ ၸဝ်ႈထႃႇဝရႃႉၽြႃးၼၼ်ႉ တၵ်းပႃးတင်းတၼ်းၶူဝ်းဢၼ်ယႂ်ႇၼႃႇမႃးလႄႈ ဢဝ်ၶႅၼ်မိုဝ်းမၼ်းၸဝ်ႈ ဢုပ်ႉပိူင်ႇပုၼ်ႈ မၼ်းၸဝ်ႈဢေႃႈ။ တူၺ်းလူး၊ ၵႃႈၶၼ်ဢၼ်မၼ်းၸဝ်ႈထိူၵ်ႈၶၢမ်ႇဢဝ်ၼၼ်ႉ ပႃးတီႈမၼ်းၸဝ်ႈယူႇလႄႈ သူးလၢပ်ႈမၼ်းၸဝ်ႈၸိူဝ်းၼၼ်ႉ မီးယူႇၵႃႈတီႈၽၢႆႇၼႃႈမၼ်းၸဝ်ႈဢေႃႈ။- 11မၼ်းၸဝ်ႈတၵ်းလဵင်ႉလူ ၽုင်သူဝ်းမၼ်းၸဝ်ႈယူႇ မိူၼ်ၸိူဝ်ႉၼင်ႇ ၵူၼ်းဢၼ်လဵင်ႉသူဝ်းထိင်းသူဝ်းၼၼ်ႉလႄႈ ႁွပ်ႇဢဝ်သူဝ်းဢွၼ်ႇတင်းလၢႆဝႆႉ ၵႃႈၼႂ်းၶႅၼ်ၼႂ်းမိုဝ်းမၼ်းၸဝ်ႈသေလႄႈ ၵွတ်ႇဢဝ်ဢုမ်ႈဢဝ်ဝႆႉ ၵႃႈၼႂ်းဝၢင်ႈႁူဝ်ဢူၵ်းမၼ်းၸဝ်ႈဢေႃႈ။ သူဝ်းမႄႈဢၼ်မီးလုၵ်ႈဢွၼ်ႇဢၼ်ၵိၼ်ၼူမ်းၸိူဝ်းၼၼ်ႉၵေႃႈ မၼ်းၸဝ်ႈတၵ်းၵွႆႈတႅင်ႇဢဝ်သူင်ႇၵႂႃႇ ထိူင်းထိူင်းလွႆးလွႆးဢေႃႈ။
ဢမ်ႇမီးၽူႈလႂ်မိူၼ်ၵၼ်တင်းထႃႇဝရႃႉၽြႃး
12ၵေႃႉဢၼ်ဢဝ်ဢူင်ႈမိုဝ်းတူင်တူၺ်းၼမ်ႉ၊ ဢဝ်မိုဝ်းၶိုပ်ႈတူၺ်းတႅၵ်ႈတူၺ်းၽႃႉၵၢင်ႁၢဝ်၊ ဢဝ်ၵွၵ်းတၢင်ၵွၵ်းၶႂၢႆးၼပ်ႉတူၺ်းတူင်တူၺ်းမုၼ်ႈလိၼ်၊ ဢဝ်ယႃႇၸူႇၸင်ႈတူၺ်းႁိဝ်ႈတူၺ်းလွႆလူင်တင်းလၢႆလႄႈ ဢဝ်ယွႆးၸင်ႈတူၺ်းႁိဝ်ႈတူၺ်းလွႆဢွၼ်ႇတင်းလၢႆၼၼ်ႉၸမ်ႉ၊ ပဵၼ်ၽူႈလႂ်။- 13ၽူႈလႂ်ၸႅတ်ႈတူၺ်းထၢမ်တူၺ်းဝီႉၺိၺ်ႇ ထႃႇဝရႃႉၽြႃး။ ၽူႈလႂ်တိူင်ႇပၢင်ႇၵၼ်တင်းမၼ်းၸဝ်ႈ သေလႄႈ ပၼ်တၢင်းၵျၢမ်ႇတၢင်းပွင်။- 14မၼ်းၸဝ်ႈတိူင်ႇပၢင်ႇႁူမ်ႈလူၺ်ႈၵၼ်တင်းၽူႈလႂ်။ ၽူႈလႂ်သင်ႇသွၼ်ပၼ်မၼ်းၸဝ်ႈလႄႈ ၼႄပျႃးသဵၼ်ႈတၢင်းတြႃးတီႈမၼ်းၸဝ်ႈ။ ၽူႈလႂ်ၽုၺ်ႇဢွၵ်ႇၼႄပၼ်ပိင်ႇၺႃႇ တီႈမၼ်းၸဝ်ႈလႄႈ ၸီႉၼႄသဵၼ်ႈတၢင်းၺၢၼ်ႇတီႈမၼ်းၸဝ်ႈ။- 15ၵူၼ်းၵူႈၸိူဝ်ႉၵူႈမဵဝ်း ပဵၼ်ၸိူဝ်ႉၼင်ႇယွတ်ႇၼမ်ႉ ဢၼ်တူၵ်းသေၵႃႈတီႈပုင်းၼမ်ႉၼၼ်ႉလႄႈ လႆႈၶၢမ်ႇတၢင်းဢၼ်မၢတ်ႈပဵၼ် ၸိူဝ်ႉၼင်ႇမုၼ်ႈဢွၼ်ႇ ဢၼ်ၸပ်းတီႈ ယႃႇၸူႇၼၼ်ႉဢေႃႈ။ တူၺ်းလူး၊ မၼ်းၸဝ်ႈယိပ်းၵမ်ဢဝ်ၵုၼ်ၼႂ်းၼမ်ႉတင်းလၢႆ ယုၵ်ႉၶိုၼ်ႈ မိူၼ်ၸိူဝ်ႉၼင်ႇ မုၼ်ႈဢွၼ်ႇၽွင်ဢွၼ်ႇ ဢၼ်လဵၵ်ႉၼႃႇသေပိူၼ်ႈၼၼ်ႉဢေႃႈ။- 16ထိူၼ်ႇလေႇပၼုၼ်ႇၼၼ်ႉ ဢမ်ႇပေႃးဢမ်ႇၵုမ်ႇပုၼ်ႈဢၼ်တၵ်းသႂ်ႇၽႆးၸပ်းၽႆး။ တရိၵ်ႈသၢၼ်ႇဢၼ်မီးၵႃႈၼႂ်းထိူၼ်ႇၼၼ်ႉ ၸိူဝ်းၼၼ်ႉၵေႃႈ ဢမ်ႇပေႃးဢမ်ႇၵုမ်ႇပုၼ်ႈဢၼ်တၵ်းႁဵတ်းယိတ်ႈဢၼ်တုတ်ႇၽႆး။- 17ၵူၼ်းၵူႈၸိူဝ်ႉၵူႈမဵဝ်း ပဵၼ်ၸိူဝ်ႉၼင်ႇဢၼ်ဢမ်ႇၸႂ်ႈၵႃႈသင်လႃးလႃး ၵႃႈတီႈၽၢႆႇၼႃႈမၼ်းၸဝ်ႈလႄႈ မၼ်းၸဝ်ႈမၢတ်ႈပဵၼ်ၸိူဝ်ႉၼင်ႇဢၼ် ယဵင်ႈၶႅၼ်းလဵၵ်ႉၼႃႇသေ လွင်ႈတၢင်းဢၼ်ဢမ်ႇၸႂ်ႈၵႃႈသင်လႃးလႃးၼၼ်ႉ ဢိၵ်ႇတင်းၸိူဝ်ႉၼင်ႇဢၼတ်ႉတႃႉ ၼၼ်ႉဢေႃႈ။- 18ပိူဝ်ႈၼႆလႄႈ သူတၵ်းဢွၼ်ၵၼ်ဢဝ် ၽြႃးပဵၼ်ၸဝ်ႈ တႅၵ်ႈတူၺ်းပုင်ႇႁၢင်ႈၵႃႈသင်။ တၵ်းလႆႈဢဝ်ပုင်ႇႁၢင်ႈၽၢင်ၵႃႈသင် တႅၵ်ႈၵၼ်တိူင်းၵၼ် တင်းၽြႃးပဵၼ်ၸဝ်ႈ။- 19ၵူၼ်းဢၼ်မေႃတွင်ႈမေႃၶၵ်းၼၼ်ႉ လေႃႇႁဵတ်းသွၼ်းႁဵတ်းရုၵ်ႈထူႉသေယဝ်ႉ၊ ၸၢင်ႈၶမ်းဢဝ်ၶမ်းဢုမ်ႇႁေႃႇလႄႈ ၸၢင်ႈႁဵတ်းမႆငိုၼ်းတင်းလၢႆသႂ်ႇဢေႃႈ။- 20ၵေႃႉဢၼ်ဢမ်ႇလူႇဢမ်ႇတၢၼ်း တၢင်းလူႇတၢင်းတၢၼ်း ဢၼ်ထိူၵ်ႈၵႃႈထိူၵ်ႈၶၼ်ၼၼ်ႉၼၼ်ႉ ၸၢင်ႈလိူၵ်ႈၵဵပ်းဢဝ်တူၼ်ႈမႆႉဢၼ်ဢမ်ႇၸၢင်ႈၽင်ႉၸၢင်ႈဢူႉၼၼ်ႉသေလႄႈ ၸၢင်ႈႁႃဢဝ်လၢၵ်ႈသမႃး ဢၼ်လၵ်းလႅမ်ၼၼ်ႉ ႁႂ်ႈလႆႈႁဵတ်းရုၵ်ႈထူႉဢၼ်တမ်းဝႆႉ မၼ်ႈမၼ်ႈၶိူင်ႇၶိူင်ႇၼၼ်ႉဢေႃႈ။- 21သူဢမ်ႇႁူႉႁိုဝ်။ သူဢမ်ႇငိၼ်းႁိုဝ်။ ၸႃႉၸဵမ်မိူဝ်ႈၵေႃႇၸႃႉႁူဝ်ပိုင်းၼၼ်ႉလႄႈ ဢမ်ႇၽုၺ်ႇဢွၵ်ႇၼႄပျႃးတီႈသူႁိုဝ်။ ၸႃႉၸဵမ်မိူဝ်ႈဢၼ်တႄႇႁဵတ်းလိၼ်မိူင်းဝႆႉ ၼၼ်ႉလႄႈ သူဢမ်ႇႁူႉဢမ်ႇၸႅင်ႈႁိုဝ်။- 22ပဵၼ်ၸဝ်ႈ ဢၼ်ၼင်ႈယူႇၵႃႈၼိူဝ်ၸၢၵ်ႈလိၼ်မိူင်းလႄႈ မၢတ်ႈၵူၼ်းလိၼ်မိူင်းတင်းလၢႆ ပဵၼ်ၸိူဝ်ႉၼင်ႇၸၵ်းတႅၼ်ၵူၺ်း၊ ၸဝ်ႈဢၼ်ၶဵင်ႈ မုင်းၽႃႉၵၢင်ႁၢဝ်မိူၼ်ၸိူဝ်ႉၼင်ႇ ပိၵ်ႈတၢၼ်ႇၼၼ်ႉလႄႈ ၽုၺ်ႇၵီႈ မိူၼ်ၸိူဝ်ႉၼင်ႇမူဝ်းၵႃႇ ပုၼ်ႈဢၼ်တၵ်းယူႇၼၼ်ႉ၊- 23ၸဝ်ႈဢၼ်ႁႂ်ႈၶုၼ်တင်းလၢႆပဵၼ်ဢၼ်ဢမ်ႇပွင်ႇလွင်ႈၵႃႈသင်လႄႈ ႁႂ်ႈၵူၼ်းလူင်ဢၼ်ၸီႇယၢင်ႇတြႃးလိၼ်မိူင်း တင်းလၢႆ ပဵၼ်ၸိူဝ်ႉၼင်ႇ ဢၼတ်ႉတႃႉၼၼ်ႉဢေႃႈ။- 24ၸႂ်ႈယဝ်ႉ။ ၶဝ်ၼၼ်ႉ ဢမ်ႇလႆႈၶၢမ်ႇတၢင်းဢၼ်ၽုၵ်ႇဢၼ်သွမ်ႈ ဢမၢၼ်ႇၶၼ်ပဵၼ်။ ၸိူဝ်ႉၽၼ်းၶဝ်ဢမ်ႇလႆႈၶၢမ်ႇတၢင်းဢၼ်ဝၢၼ်ႇဢၼ်ပိုၼ်ဢမၢၼ်ႇၶၼ်ပဵၼ်။ တူၼ်ႈၶဝ်ႈလမ်းၶဝ်ႈဢမ်ႇလႆႈယင်ႇႁၢၵ်ႈၵႃႈတီႈလိၼ် ဢမၢၼ်ႇၶၼ်ပဵၼ်။ မၼ်းၸဝ်ႈပိဝ်သႂ်ႇၵႃႈၼိူဝ်ၶဝ်လႄႈ ၶဝ်ၼၼ်ႉ ႁဵဝ်ႇၸွပ်ႈယူတ်းႁႅင်ႈၵႂႃႇလႄႈ လူမ်းၽိဝ်ႇႁုင်ထူဝ်းဢဝ်ၶဝ်ၵႂႃႇပႅတ်ႈ မိူၼ်ၸိူဝ်ႉၼင်ႇ ၵႅပ်ႇၼၼ်ႉဢေႃႈ။- 25ပိူဝ်ႈၼႆလႄႈ သူတၵ်းဢဝ်ၵဝ်တႅၵ်ႈတူၺ်းပုင်ႇႁၢင်ႈၵႃႈသင်၊ ၵဝ်ၼႆႉတၵ်းလႆႈမိူၼ်ၸိူဝ်ႉၼင်ႇၽူႈလႂ်၊ ဝႃႈၼင်ႇၼႆလႄႈ ၽြႃးဢၼ်မူတ်းၸၢင်ႇထၢမ်ဢေႃႈ။- 26ဢွၼ်ၵၼ် ဢဝ်တႃသူႁႅၼ်တူၺ်းၵႃႈၼိူဝ်တႃႉ။ ၽူႈလႂ်ၽၢၼ်ႇသၢင်းႁဵတ်းပဵၼ် လွင်ႈတၢင်းၸိူဝ်းၼၼ်ႉ။ ၽူႈလႂ်ထုတ်ႇ ဢဝ်ၶဝ်ဢွၵ်ႇလႄႈ ၼပ်ႉဢၢၼ်ႇႁႂ်ႈပဵၼ်မူႇပဵၼ်ၽုင်။ မၼ်းၸဝ်ႈဢဝ်ၸိုဝ်ႈသဵင်ႁွင်ႉႁဵၵ်ႈၶဝ် တင်းသဵင်ႈတင်းလူင်ဢေႃႈ။ ၵွပ်ႈပိူဝ်ႈဢၼ် ႁႅင်းမၼ်းၸဝ်ႈယႂ်ႇလႄႈ မၼ်းၸဝ်ႈပျေႉၸုမ်ႇဝႆႉတင်းတၼ်းၶူဝ်းၼၼ်ႉလႄႈ၊ ယင်းဢမ်ႇပေႃႇဢမ်ႇဢွၵ်ႇလႄႈ ဢမ်ႇလႆႈယူႇ သေၸိူဝ်ႉသေပိူင်။- 27မဵဝ်းယႃႇၵုပ်ႈဢိူၺ်း၊ ၵွပ်ႈပိူဝ်ႈ ၸိူဝ်ႉၼင်ႇႁိုဝ်လႄႈ မႂ်းလၢတ်ႈ၊ ဢီႉသရေႇလႃႉဢိူၺ်း၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈမႂ်းဝႃႈ၊ သဵၼ်ႈတၢင်းၵဝ် မီးတၢင်းဢၼ်သိူင်ႇမႅပ်ႉဝႆႉသေ ၵႃႈတီႈ ထႃႇဝရႃႉၽြႃးလႄႈ ဢမူႉသုမ်းၸွမ်းပႅတ်ႈသေၵႃႈတီႈ ၽြႃးပဵၼ်ၸဝ်ႈၵဝ် ၼၼ်ႉယဝ်ႉ၊ ဝႃႈၼင်ႇၼႆ ၼင်ႇႁိုဝ်။- 28မႂ်းဢမ်ႇယၢမ်ႈႁူႉႁိုဝ်။ မႂ်းဢမ်ႇယၢမ်ႈငိၼ်းႁိုဝ်။ ၽြႃးပဵၼ်ၸဝ်ႈ ဢၼ်တႄႇယူႇတႃႇသေႇ ဢမ်ႇထၢတ်ႇ၊ ထႃႇဝရႃႉၽြႃး၊ ၸဝ်ႈဢၼ် ၽၢၼ်ႇသၢင်းႁဵတ်းပဵၼ် တေႃႇထိုင်ႁွတ်ႈ တီႈသုတ်းလိၼ်မိူင်းၼၼ်ႉ ယင်းဢမ်ႇမီးတၢင်းဢၼ်ႁိူဝ်ႉဢၼ်ၼူၼ်း၊ တၢင်းဢၼ်ယၢပ်ႇၸႂ် ၶၢၼ်ၸႂ်လႄႈယူႇဢေႃႈ။ ဢမ်ႇၸႅတ်ႈထၢမ်ၸႅတ်ႈတူၺ်းၺၢၼ်ႇမၼ်းၸဝ်ႈလႆႈလႃးလႃး။- 29မၼ်းၸဝ်ႈပၼ်ႁႅင်းတီႈ ၵေႃႉဢၼ်ႁိူဝ်ႉဢၼ်ၼူၼ်း ၼၼ်ႉလႄႈ ပၼ်ဢၶႂၢင်ႉဢၼ်ပျေႉၸုမ်ႇဝႆႉတင်း တၢင်းၵတ်ႉတၢင်းၶၼ် ၼၼ်ႉ တီႈၵေႃႉဢၼ်ႁိူဝ်ႉၸႂ်ဢူၼ်ႈၸႂ်ၼၼ်ႉဢေႃႈ။- 30ၵူၼ်းၼုမ်ႇၵူၼ်းၵမ် တင်းလၢႆ တၵ်းႁွတ်ႈထိုင် တၢင်းဢၼ်ႁိူဝ်ႉဢၼ်ၼူၼ်းလႄႈ ယၢပ်ႇၸႂ်ၶၢၼ်ၸႂ်ဢေႃႈ။ ၵူၼ်းဢွၼ်ႇဢၼ် လိူၵ်ႈၵဵပ်းဢဝ်တင်းလၢႆၼၼ်ႉၵေႃႈ တၵ်းတိူဝ်ႉမႅၼ်ႈလႄႈလူမ်ႉဢေႃႈ။- 31ၶဝ်ၸိူဝ်းဢၼ် မုင်ႈမွင်းထႃႇဝရႃႉၽြႃးယူႇၼၼ်ႉၸမ်ႉ၊ တၵ်းၶိုၼ်းမီးဢဵၼ်မီးႁႅင်းလႄႈ တၵ်းယုၵ်ႉပိၵ်ႇၵီႈပိၵ်ႇယူႇ မိူၼ်ၸိူဝ်ႉၼင်ႇ လၢင်းတႃႉၶမ်းဢေႃႈ။ ၶဝ်တၵ်းၶုၼ်ႇလႅၼ်ႈၵႂႃႇလႄႈ ဢမ်ႇလႆႈမီးတၢင်းဢၼ်ယၢၵ်ႈၸႂ်ၶၢၼ်ၸႂ်။ ၶဝ်တၵ်းၵႂႃႇတၢင်းပႆတၢင်းလႄႈ ဢမ်ႇလႆႈမီး တၢင်းဢၼ်ႁိူဝ်ႉဢၼ်ၼူၼ်း။
Copyright © 2021 by OMF International, Shan Baptist Churches Fellowship