ဢီႉသႃႇယႃႉ 32
32
ၶုၼ်ႁေႃၶမ်းဢၼ်သိုဝ်ႈတေႃႇ
1တူၺ်းလူး၊ ၶုၼ်ႁေႃၶမ်းပႃးၼိုင်ႈ တၵ်းဢုပ်ႉပိူင်ႇမႅၼ်ႈၸွမ်းတၢင်းဢၼ်သိုဝ်ႈတေႃႇလႄႈ မူးမၢတ်ႈၽွင်းမိူင်းတင်းလၢႆ တၵ်းဢွၼ်ၵၼ် ၸီႇယၢင်ႇၸွမ်းၼင်ႇတြႃးဢေႃႈ။- 2ၶုၼ်ၼၼ်ႉ တၵ်းပဵၼ်ၸိူဝ်ႉၼင်ႇ တီႈဢၼ်ႁႄႉလူမ်းၵင်ႈလူမ်း၊ တီႈဢၼ်လပ်ႉၽူၼ်လူင် လူမ်းလူင်ၼၼ်ႉ ဢိၵ်ႇတင်းၸိူဝ်ႉၼင်ႇ ၼမ်ႉႁွင်ႈၼမ်ႉၵႄးဢၼ်လႆယူႇၵႃႈတီႈလိၼ် ဢၼ်ႁႅင်ႈဢၼ်ႁွင်ၼၼ်ႉ တင်းၸိူဝ်ႉၼင်ႇ ငဝ်းႁူမ်ႈမၢၵ်ႇႁိၼ်လူင် ၵႃႈၼႂ်းမိူင်း တီႈဢၼ် ၵူၼ်းႁိူဝ်ႉၵူၼ်းဢူၼ်ႈၼၼ်ႉဢေႃႈ။- 3မၢၵ်ႇတႃၶဝ်ၸိူဝ်းဢၼ်ႁၼ်ၼၼ်ႉ တၵ်းဢမ်ႇလႆႈၽိူမ်လႆႈမူဝ်းလႄႈ ႁူၶဝ်ၸိူဝ်းဢၼ်ငိၼ်းၼၼ်ႉ တၵ်းထွမ်ႇဢဝ်ဢေႃႈ။- 4ႁူဝ်ၸႂ်ၶဝ်ၸိူဝ်းဢၼ်ဢမ်ႇမီးသတီႉၼၼ်ႉ တၵ်းႁူႉၸႅင်ႈပိင်ႇၺႃႇလႄႈ လိၼ်ႉၶဝ်ၸိူဝ်းဢၼ် ဢႃႉဢၼ်ၵၵ်းၼၼ်ႉၵေႃႈ တၵ်းၸၢင်ႈလၢတ်ႈၵႂၢမ်း ႁႂ်ႈပေႃးပီႇလီမႅၼ်ႈလီဢေႃႈ။- 5ၵမ်းလိုၼ်းၵေႃႉဢၼ်ယုတ်ႈၼၼ်ႉ ဢမ်ႇလႆႈၶၢမ်ႇတၢင်းဢၼ်ႁွင်ႉႁဵၵ်ႈဝႃႈ ၵေႃႉဢၼ်မျၢတ်ႈ။ ၵေႃႉဢၼ်ထီႇၼဵဝ်ၵေႃႈ ဢမ်ႇလႆႈၶၢမ်ႇတၢင်းဢၼ်ႁွင်ႉႁဵၵ်ႈဝႃႈ ၵေႃႉဢၼ်ယိုၼ်ႈမႅင်ႇ။- 6လွင်ႈမၼ်းၸမ်ႉ ၵေႃႉဢၼ်ယုတ်ႈၼၼ်ႉတၵ်းလၢတ်ႈၵႂၢမ်း ဢၼ်ယုတ်ႈလႄႈ ႁူဝ်ၸႂ်မၼ်းတၵ်းၵျၢမ်ႇပွင် တၢင်းၵျၢမ်ႇတၢင်းပွင် ဢၼ်ဢမ်ႇလီဢမ်ႇငၢမ်း ႁႂ်ႈလႆႈႁဵတ်းဢႃႉထမ်ႇမႃႉသေလႄႈ ဢဝ်တင်းသူပ်းၽိတ်းပိူင်ႈ ထႃႇဝရႃႉၽြႃးယူႇ၊ ႁႂ်ႈလႆႈႁႂ်ႈၶဝ်ၸိူဝ်းဢၼ် ဢိုပ်းဢၼ်ယၢၵ်ႈၼၼ်ႉ ယဵင်ႈၶႅၼ်းတွင်ႉမႆႈသႆႈလိူတ်ႇယူႇ၊ ႁႂ်ႈၶဝ်ၸိူဝ်းဢၼ်ယၢၵ်ႇၼမ်ႉၶေႃးႁွင်ၼၼ်ႉ ဢမ်ႇလႆႈၵိၼ်ၼမ်ႉယူႇဢေႃႈ။- 7ၶိူင်ႈပိူင်ဢၼ်ၵေႃႉဢၼ်ထီႇၼဵဝ်သုင်းသွင်ႇၼၼ်ႉ ပဵၼ်ဢၼ်ႁၢႆႉၼႃႇလႄႈ ပိၵ်ႉသမ်ႉၵေႃႉဢၼ်ၸုတ်ႈဢၼ်လုတ်ႈၼၼ်ႉ လၢတ်ႈမၢၼ်ႇမၢၼ်ႇမႅၼ်ႈမႅၼ်ႈသေၵေႃႈ၊ မၼ်းၸၢင်ႈၵျၢမ်ႇပွင်တၢင်းၵျၢမ်ႇတၢင်းပွင် ဢၼ်ဢမ်ႇလီဢမ်ႇငၢမ်းႁႂ်ႈလႆႈဢဝ်တင်းၵႂၢမ်းမူႉသႃႇ ယႃႉၽဵဝ်ႈၵေႃႉဢၼ်ၽၢၼ်ဢၼ်ၵိၼ်းၼၼ်ႉပႅတ်ႈဢေႃႈ။- 8ၵေႃႉဢၼ်မီးၸေႇတၼႃႇၸမ်ႉ၊ ၸၢင်ႈၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ၸၢပ်ႈသႅင်ႇၵၼ်တင်း ၸေႇတၼႃႇၼၼ်ႉလႄႈ တၵ်းလႆႈတႄႇယူႇၼႂ်း လွင်ႈတၢင်းဢၼ် ၸၢပ်ႈသႅင်ႇၵၼ်တင်းၸေႇတၼႃႇဢေႃႈ။
မႄႈယိင်းဝဵင်းယေႇရူႉသလႅမ်ႇ
9မႄႈယိင်းဢၼ်ယူႇ တႄႇတႄႇၼိမ်ၼိမ်ၶဝ်ဢိူၺ်း၊ ဢွၼ်ၵၼ်လုၵ်ႉလႄႈ ထွမ်ႇငိၼ်းသဵင်ၵႂၢမ်းဢၼ် ၵဝ်လၢတ်ႈၼႆႉတႃႉ။ လုၵ်ႈယိင်း ဢၼ်ဢမ်ႇမီးသတီႉၶဝ်ဢိူၺ်း၊ ဢွၼ်ၵၼ်ဝၢႆႇႁူတေႃႇၵႂၢမ်းၶဝ်တႃႉ။- 10မႄႈယိင်းဢၼ်ဢမ်ႇမီးသတီႉၶဝ်ဢိူၺ်း၊ တေႃႇထိုင်ႁွတ်ႈပီႊၼိုင်ႈ လိူဝ်လိူဝ်လႄႈ သူတၵ်းယၢပ်ႇၸႂ်ယုင်ႈၸႂ်ဢေႃႈ။ လွင်ႈမၼ်းၸမ်ႉ တၢင်းဢၼ်သိမ်းဢဝ်မၢၵ်ႇၸပိတ်ႈၼၼ်ႉ တၵ်းထၢတ်ႇၵႂႃႇလႄႈ ၶိင်ႇဢၼ်သိမ်းဢဝ်မၢၵ်ႇၶဝ်ႈႁူင်းၶဝ်ႈၼၼ်ႉ တၵ်းဢမ်ႇလႆႈႁွတ်ႈလႆႈထိုင်။- 11မႄႈယိင်းဢၼ်ယူႇ တႄႇတႄႇၼိမ်ၼိမ်ၶဝ်ဢိူၺ်း၊ ဢွၼ်ၵၼ်သၼ်ႇဝႆတႃႉ။ သူၸိူဝ်းဢၼ်ဢမ်ႇမီးသတီႉၶဝ်ဢိူၺ်း၊ ဢွၼ်ၵၼ် မီးတၢင်းဢၼ်ယၢပ်ႇၸႂ်ယုင်ႈၸႂ်တႃႉ။ ထွတ်ႇၶူဝ်းၼုင်ႈတၢင်းမႆသူ ပႅတ်ႈသေလႄႈ၊ ဢဝ်ၶူဝ်းၼုင်ႈၼင်ပေႃႁတ်ႉဢႅဝ်သူတႃႉ။- 12ၶဝ်တၵ်းမီးတၢင်းဢၼ်တူပ်းဢူၵ်းယႅၼ်ႉဢူၵ်းပုၼ်ႈႁႆႊၼႃး ဢၼ်သႃႇယႃႇ ဢိၵ်ႇတင်းတူၼ်ႈၶိူဝ်းမၢၵ်ႇၸပိတ်ႈ ဢၼ်မၢၵ်ႇၼမ် ၼၼ်ႉဢေႃႈ။- 13တူၼ်ႈၼၢမ်ၵူႈၸိူဝ်ႉၵူႈပိူင် တၵ်းဢွၵ်ႇၵႃႈၼိူဝ်လိၼ်ၵူၼ်းၵဝ်တင်းလၢႆ ဢိၵ်ႇတင်းၵႃႈၼိူဝ်ႁိူၼ်း ဢၼ်ၸူမ်းပျေႃႇ ၵႃႈမီးၵႃႈၼႂ်းဝဵင်း ဢၼ်သႂၢင်ႇသိူဝ်းၼၼ်ႉလႄႈ မုင်းႁူမ်ႇဝႆႉဢေႃႈ။- 14လွင်ႈမၼ်းၸမ်ႉ ႁေႃၶမ်းတၵ်းလႆႈၶၢမ်ႇတၢင်းဢၼ် ၸုၼ်ႉပႅတ်ႈလႄႈ ဝဵင်းဢၼ်ၵူၼ်းၼမ်ၵူၼ်းၵိုၼ်းၼၼ်ႉ တၵ်းသဵတ်ႇယဵၼ်ၵႂႃႇ ဢေႃႈ။ ၵုင်းဢိၵ်ႇတင်း တိူၵ်ႈတီႈတိုၵ်းသိုၵ်းတင်းလၢႆ တၵ်းပဵၼ်ၶုမ်ပဵၼ်ႁူးတီႈဢၼ် လီႈဢၼ်ႁႄရိူင်းတင်းလၢႆမူၼ်ႈပျေႃႇ၊ တီႈဢၼ် ၽုင်သူဝ်းလႄႇၵိၼ်ၼၼ်ႉၵႂႃႇ၊- 15တေႃႇထိုင်ႁွတ်ႈၶိင်ႇမိူဝ်ႈဢၼ် ဝီႉၺိၺ်ႇၸဝ်ႈလႆႈၶၢမ်ႇတၢင်းဢၼ်သွၼ်းလေႃႇသေၵႃႈၼိူဝ်ၵၢင်ႁၢဝ်လူင်းမႃးသႂ်ႇ ၵႃႈၼိူဝ်ႁဝ်းလႄႈ ထိူၼ်ႇပဵၼ်ပၢင်ႇတူင်ႈႁႆႊတူင်ႈၼႃးဢၼ်မၢၵ်ႇၼမ်ႁူင်းၼမ်လႄႈ ပၢင်ႇတူင်ႈႁႆႊတူင်ႈၼႃးဢၼ်မၢၵ်ႇၼမ်ႁူင်းၼမ်ၼၼ်ႉ လႆႈၶၢမ်ႇတၢင်းဢၼ် မၢတ်ႈပဵၼ်ၸိူဝ်ႉၼင်ႇ ပႃႇမႆႉပႃႇၸိင်ၼၼ်ႉဢေႃႈ။- 16မိူဝ်ႈၼၼ်ႉ တၢင်းဢၼ်ၸီႇယၢင်ႇၸွမ်းၼင်ႇတြႃး တၵ်းလႆႈတႄႇယူႇၵႃႈတီႈထိူၼ်ႇလႄႈ၊ ပႃႇရမီႇတၢင်းဢၼ်သိုဝ်ႈတေႃႇၼၼ်ႉ တၵ်းတူၵ်းတီႈတူၵ်းလႅၼ်ယူႇ ၵႃႈၼႂ်းတူင်ႈၼႃးဢၼ်မၢၵ်ႇၼမ်ႁူင်းၼမ်ၼၼ်ႉဢေႃႈ။- 17တၢင်းဢၼ်တြႃးတၢင်းဢၼ်သိုဝ်ႈတေႃႇ ပွင်ႁဵတ်းၼၼ်ႉ တၵ်းပဵၼ်တၢင်းဢၼ်ၼိမ်ဢၼ်လီလႄႈ ဢၵျူဝ်းတၢင်းဢၼ်သိုဝ်ႈတေႃႇၼၼ်ႉ တၵ်းပဵၼ်တၢင်းဢၼ်တႄႇဢၼ်ၼိမ် ဢိၵ်ႇတင်း တၢင်းဢၼ်လွတ်ႈၽေးလွတ်ႈရၢၼ်ႇယူႇသေႇသေႇဢေႃႈ။- 18ၵူၼ်းၵဝ်တင်းလၢႆ တၵ်းလႆႈယူႇၵႃႈၼႂ်းတီႈယူႇဢၼ်တႄႇလီၼိမ်လီ၊ ၵႃႈၼႂ်းႁိူၼ်းတီႈဢၼ်လွတ်ႈၽေးလွတ်ႈရၢၼ်ႇ၊ ၵႃႈၼႂ်းတီႈဢၼ် ၵတ်းယဵၼ်ၶျၢမ်းသႃႇၼိမ်လီၼိမ်ငၢမ်း ၸိူဝ်းၼၼ်ႉဢေႃႈ။- 19ၵူၺ်းၵႃႈ မၢၵ်ႇႁဵပ်းတၵ်းတူၵ်း ၼႂ်းမိူဝ်ႈဢၼ်ပႃႇမႆႉပႃႇၸိင်လူမ်ႉၼၼ်ႉလႄႈ ဝဵင်းၵေႃႈတၵ်းလႆႈၶၢမ်ႇတၢင်းဢၼ်ၵိူၼ်ႇယႃႉတူၵ်း ၽဵၼ်ႈပဵင်း ၵၼ်တင်းလိၼ်ဢေႃႈ။- 20သူၸိူဝ်းဢၼ်ၸၢင်ႈဝၢၼ်ႇၸိူဝ်ႉဝၢၼ်ႇၽၼ်း ၵႃႈတီႈႁိမ်းၼမ်ႉၵူႈတီႈၵူႈလႅၼ်လႄႈ ပွႆႇတိၼ်ဝူဝ်း ဢိၵ်ႇတင်းတိၼ်လီႈ ၸိူဝ်းၼၼ်ႉ မီးမင်ႇၵလႃႇဢေႃႈ။
Copyright © 2021 by OMF International, Shan Baptist Churches Fellowship