ဢီႉသႃႇယႃႉ 30
30
လိၵ်ႈမၼ်ႈၵႅၼ်ႇဢၼ်ႁဵတ်းတေႃႇၵၼ်တင်းမိူင်းဢေႇၵိပ်ႉတူႉ
1ထႃႇဝရႃႉၽြႃး မီးဢမိင်ႉၸမ်ႉ၊ ၵူၼ်းမဵဝ်းဢၼ်ပုင်ႇၵၢၼ်ႇၸိူဝ်းၼၼ်ႉ မီးဢႃႉမင်ႇၵလႃႇဢေႃႈ။ ၶဝ်ၼၼ်ႉ ယင်းဢမ်ႇဢိင်ၵဝ် သေလႄႈ တိူင်ႇပၢင်ႇလၢတ်ႈၸႃၵၼ်ယူႇဢေႃႈ။ ၶဝ်ယင်းဢမ်ႇမီးဢၶႂၢင်ႉဝီႉၺိၺ်ႇၵဝ်လႄႈ တေႃးႁုၵ်ႇတမ်ႇၵၢမ်းပဵၼ်ဢၼ်လဵဝ်ၵၼ် ႁႂ်ႈလႆႈဢဝ်ဢပႅတ်ႈထၢပ်ႈသႂ်ႇထႅင်ႈယူႇတိၵ်းတိၵ်းဢေႃႈ။- 2ၶဝ်ယင်းဢမ်ႇလဝ်ႊယွၼ်းဢဝ်ဢၶႂၢင်ႉ ဢၼ်ဢွၵ်ႇသူပ်းၵဝ်လႄႈ ဢွၼ်ၵၼ်လူင်းၸူးၵႃႈတီႈမိူင်းဢေႇၵိပ်ႉတူႉ ႁႂ်ႈလႆႈဢိင်ပိုင်ႈ မုၼ်ၽုင်းၶုၼ်ၽႃႇရေႃးလႄႈ သွၼ်ႈပိုင်ႈယူႇၼႂ်းႁူမ်ႈ ဢေႇၵိပ်ႉတူႉၼၼ်ႉဢေႃႈ။- 3ပိူဝ်ႈၼႆလႄႈ တၢင်းဢၼ်သူဢိင်ပိုင်ႈမုၼ်ၽုင်းၶုၼ်ၽႃႇရေႃးၼၼ်ႉ တၵ်းပဵၼ်တၢင်းဢၼ်ဢူၵ်းဢၼ်ဢၢႆ တီႈသူလႄႈ တၢင်းဢၼ်သူသွၼ်ႈပိုင်ႈယူႇၼႂ်းႁူမ်ႈ ဢေႇၵိပ်ႉတူႉၼၼ်ႉ တၵ်းပဵၼ်တၢင်းဢၼ်ၼႃႈလူႉတီႈသူဢေႃႈ။- 4ၶုၼ်မၼ်းၸိူဝ်းၼၼ်ႉ ဢွၼ်ၵၼ်မီးယူႇၵႃႈတီႈဝဵင်းၸေႃးၼႃႉယဝ်ႉ။ သၢၼ်ႇတမၢၼ်ႇမၼ်းၸိူဝ်းၼၼ်ႉ ဢွၼ်ၵၼ်ႁွတ်ႈထိုင်ၵႃႈတီႈဝဵင်းႁႃၼိတ်ႉယဝ်ႉ။- 5ၶဝ်ၵႃႈမီးၼၼ်ႉ တၵ်းဢွၼ်ၵၼ်ဢူၵ်းဢၢႆလူၺ်ႈလွင်ႈၵူၼ်းမဵဝ်းဢၼ် ယင်းဢမ်ႇၶဝ်ႈဢသုင်းဢသွင်ႇ၊ ဢမ်ႇပၼ်ဢၼ်ၸွႆႈဢၼ်ထႅမ်၊ ဢမ်ႇႁဵတ်းၵျေးၸူးလႆႈလႄႈ ပဵၼ်လွင်ႈဢၼ်လီဢူၵ်းလီဢၢႆ ဢိၵ်ႇတင်းလွင်ႈဢၼ် သရေႇလူႉၵူၺ်းၼၼ်ႉဢေႃႈ။- 6ပျႃႇတိၵ်ႈၸဝ်ႈလူၺ်ႈလွင်ႈတရိၵ်ႈသၢၼ်ႇ ၵႃႈၼႂ်းမိူင်းပွတ်းတၢင်းၸၢၼ်းၼၼ်ႉၸမ်ႉ၊ ၵႃႈၼႂ်းမိူင်းဢၼ်ယၢပ်ႇၽိုတ်ႇလႄႈယၢၵ်ႈၽၢၼ်တီႈဢၼ်သၢင်ႇသီႈလူင်သၢင်ႇသီႈၼုမ်ႇ၊ ငူးႁၢႆႉ၊ ငူးၽႆး ဢၼ်ၸၢင်ႈမိၼ်တင်းလၢႆမီးၼၼ်ႉ ၶဝ်ဢွၼ်ၵၼ်ဢဝ်ဢုၵ်ႉၸႃႇၸေးၸိမ်ႇၶဝ်တၢင်ႇသႂ်ႇၵႃႈၼိူဝ်ႁူဝ်မႃႇ လီႈၼုမ်ႇလီႈၵမ်တင်းလၢႆလႄႈ ဢဝ်ၽၼ်ႇတႃႇၶဝ်ၼမ်ၼႃႇတၢင်ႇသႂ်ႇ ၵႃႈၼိူဝ်ၼွၵ်ႇၵလႃးဢုၵ်ႉ တင်းလၢႆသေလႄႈ ၵႂႃႇၸူးၵႃႈတီႈၵူၼ်းမဵဝ်း ဢၼ်ဢမ်ႇႁဵတ်းၵျေးၸူးတီႈၶဝ်လႆႈၼၼ်ႉလူင်ပႄႇ။- 7မိူင်းဢေႇၵိပ်ႉတူႉၼၼ်ႉ ယင်းဢမ်ႇပၼ်ဢၵျူဝ်းလႆႈလႄႈ ၸွႆႈထႅမ်မႃႉၸႃႉလၢႆလၢႆလွၵ်ႇလွၵ်ႇၵူၺ်ႉ။ ပိူဝ်ႈၼႆလႄႈ ၵဝ်တၵ်းႁွင်ႉႁဵၵ်ႈၸိုဝ်ႈမၼ်း ရႃႇၶပ်ႉ ဢၼ်ယင်းဢမ်ႇတူင်ႉဢမ်ႇၼိုင်လႄႈ ယူႇၼၼ်ႉဢေႃႈ။
ၵူၼ်းဢမ်ႇထွမ်ႇဢမ်ႇဢဝ်
8တေႃႈလဵဝ်ၼႆႉလွင်ႈဢၼ်တၵ်းလႆႈၵႂႃႇလႄႈ တႅမ်ႈသႂ်ႇဝႆႉၵႃႈၼႂ်းသၢင်ႇပုၼ်းၵႃႈတီႈၽၢႆႇၼႃႈၶဝ်၊ လွင်ႈဢၼ်တၵ်းလႆႈၸႅၼ်ႇလိၵ်ႈ သေလႄႈ မၢတ်ႈမၢႆဝႆႉ ႁႂ်ႈလႆႈတႄႇယူႇၶိင်ႇၵႃႇလႃႉၵမ်းလိုၼ်း သိုပ်ႇသိုပ်ႇတၢမ်းတၢမ်း တႃႇသေႇဢမ်ႇထၢတ်ႇၼၼ်ႉၸမ်ႉ၊- 9ၵူၼ်းမဵဝ်းၼႆႉပဵၼ်မဵဝ်းဢၼ်ၸၢင်ႈပုင်ႇၵၢၼ်ႇ၊ မဵဝ်းဢၼ်ၸၢင်ႈသုင်းမူႉသႃႇ၊ မဵဝ်းဢၼ်ဢမ်ႇမီးဢလူဝ်ႇၶႂ်ႈထွမ်ႇဢဝ်တြႃး ထႃႇဝရႃႉၽြႃးလႄႈ၊- 10ၸၢင်ႈလၢတ်ႈတီႈၵူၼ်းဢၼ် ႁူပွင်ႇတႃလႅင်းတင်းလၢႆလႄႈဝႃႈ၊ ယႃႇပေႁၼ်သေၵမ်း၊ ဝႃႈၼင်ႇၼႆလႄႈ ၸၢင်ႈလၢတ်ႈတီႈ ပရေႃးၽႅတ်ႈတင်းလၢႆလႄႈဝႃႈ၊ ယႃႇပေဢဝ်ၵႂၢမ်းဢၼ်မၢၼ်ႇဢၼ်မႅၼ်ႈၼၼ်ႉ ႁေႃးပၼ်တီႈႁဝ်းသေၵမ်း၊ လၢတ်ႈၵႂၢမ်းဢၼ်ၶျေႃးဝွၼ်း ၼၼ်ႉၵူၺ်းသေၵမ်း။ ဢဝ်ၵႂၢမ်းဢၼ်ပႅတ်ႉလႅၼ်ၼၼ်ႉႁေႃးပၼ်သေၵမ်း။- 11ဝႄႈပိူင်ႈသဵၼ်ႈတၢင်းသေၵမ်း။ ငႅၵ်းဢွၵ်ႇသေၵႃႈၼႂ်းႁွႆးတၢင်းၼၼ်ႉသေၵမ်း။ ႁႄႉၵင်ႈႁႄႉလပ်ႉၽြႃးဢၼ်မူတ်းၸၢင်ႇ မဵဝ်းဢီႉသရေႇလႃႉၼၼ်ႉ သေၵႃႈတီႈၽၢႆႇၼႃႈႁဝ်းသေၵမ်း၊ ဝႃႈၼင်ႇၼႆဢေႃႈ။- 12ပိူဝ်ႈၼႆလႄႈ ၽြႃးဢၼ်မူတ်းၸၢင်ႇ မဵဝ်းဢီႉသရေႇလႃႉ မီးဢမိင်ႉၸမ်ႉ၊ ၵွပ်ႈပိူဝ်ႈဢၼ်သူပႄႇပႅတ်ႈၼုၵ်ႈၵပၢတ်ႈၸဝ်ႈ သေလႄႈ သွၼ်ႈပိုင်ႈၸပ်းၸွမ်းတၢင်းဢၼ် ၼိၵ်ႈၸၢၵ်ႈငႅၼ်းသႄး တၢင်းဢၼ်ၸႂ်ၵူတ်ႉၸႂ်ငေႃး ၼၼ်ႉလႄႈ၊- 13ဢပႅတ်ႈသူၼၼ်ႉ တၵ်းပဵၼ်ၸိူဝ်ႉၼင်ႇႁွႆးတႅၵ်ႇႁွႆးလူႉလမ်းဢုတ်ႇဢၼ်ၸမ်တၵ်းၵိူၼ်ႇတူၵ်းပင်းတူၵ်း၊ ဢၼ်ငၢၵ်ႈဢွၵ်ႇ ၵွင်ႇဢွၵ်ႇ ဢမ်ႇပဵင်းဢမ်ႇၽဵၼ်ႈ ၵႃႈတီႈၽႃဢုတ်ႇဢၼ်သုင်ၼၼ်ႉလႄႈ တၢင်းဢၼ်မၼ်းပင်းလူႉၼၼ်ႉ တၵ်းၶီႉၶႃႉပဵၼ်ၵမ်းလဵဝ်ၼၼ်ႉဢေႃႈ။- 14တၵ်းလႆႈတႅၵ်ႇ ၸိူဝ်ႉၼင်ႇဢၼ်မေႃႈလိၼ်တႅၵ်ႇၼၼ်ႉလႄႈ ယင်းဢမ်ႇမီးတၢင်းဢၼ်သေလၢႆလႄႈ တၵ်းလႆႈၶၢမ်ႇတၢင်းဢၼ်ဢဝ်တႅၵ်ႇပႅတ်ႈထၼ်ႈပေႃး ဢမ်ႇလႆႈထူပ်းလႆႈႁၼ်ၽၢၵ်ႇမေႃႈပုၼ်ႈဢၼ် တၵ်းၸေႃႉဢဝ်ထၢၼ်ႇၽႆး ၵႃႈၼႂ်းၽီးၽႆး ဢိၵ်ႇတင်းပုၼ်ႈဢၼ် တၵ်းတဵၵ်းၼမ်ႉၵႃႈၼႂ်း ၼမ်ႉၼွင်ၼၼ်ႉသေၽၢၵ်ႇသေဢၼ်ၼၼ်ႉဢေႃႈ။- 15ၸဝ်ႈထႃႇဝရႃႉၽြႃး၊ ၽြႃးဢၼ်မူတ်းၸၢင်ႇမဵဝ်းဢီႉသရေႇလႃႉ မီးဢမိင်ႉၸမ်ႉ၊ သူတၵ်းႁွတ်ႈထိုင်တၢင်းဢၼ်ၵႄႇသႄႇၶျွတ်ႈဢဝ် ၼႂ်းတၢင်းဢၼ်ၶၢႆႉပုတ်ႈ ဢိၵ်ႇတင်း ၼႂ်းတၢင်းဢၼ်ယူႇၼိမ်ၼိမ်လီလီၼၼ်ႉလႄႈ တၵ်းလႆႈတၢင်းၵတ်ႉတၢင်းၶၼ် ဢဵၼ်ႁႅင်းၼႂ်းတၢင်းဢၼ် ယူႇၼိမ်ၼိမ်လီလီ ဢိၵ်ႇတင်း တၢင်းဢၼ်ယုမ်ႇမၢတ်ႈၼၼ်ႉဢေႃႈ။ ၵူၺ်းၵႃႈသူဢမ်ႇမီးဢလူဝ်ႇၶႂ်ႈလႆႈ ၸိူဝ်ႉၼင်ႇၼၼ်။- 16သူဢွၼ်ၵၼ်လၢတ်ႈလႄႈဝႃႈ၊ ႁဝ်းဢမ်ႇယူႇၸိူဝ်ႉၼင်ႇၼၼ်။ တၵ်းၶီႇမႃႉသေလႄႈ ဢွၵ်ႇပၢႆႈဢေႃႈ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ သူတၵ်းလႆႈဢွၼ်ၵၼ်ဢွၵ်ႇပၢႆႈဢေႃႈ။ သူဢွၼ်ၵၼ်လၢတ်ႈလႄႈဝႃႈ၊ ႁဝ်းတၵ်းၶီႇတူဝ်ဢၼ်ၶၼ်ဢၼ်ၽႂ်းဢေႃႈ၊ ဝႃႈၼင်ႇၼႆဢေႃႈ။ ပိူဝ်ႈၼႆလႄႈ ၶဝ်ၸိူဝ်းဢၼ်လိုပ်ႈၸွမ်းလမ်းၸွမ်းသူၼၼ်ႉ တၵ်းၶၼ်ၽႂ်းဢေႃႈ။- 17သူႁဵင်ၼိုင်ႈ တၵ်းလႆႈဢွၵ်ႇပၢႆႈ ၵွပ်ႈပိူဝ်ႈတၢင်းဢၼ်ၵူၼ်းၵေႃႉၼိုင်ႈ လွၵ်ႇငိုတ်ႈၼၼ်ႉလႄႈ သူၼမ်ၼႃႇတၵ်းဢွၵ်ႇပၢႆႈၵွပ်ႈပိူဝ်ႈ ဢၼ် ၵူၼ်းႁႃႈၵေႃႉ လွၵ်ႇငိုတ်ႈၼၼ်ႉတေႃႇထိုင်ႁွတ်ႈထၼ်ႈပေႃး ႁႂ်ႈသူလႆႈပဵၼ်ၸိူဝ်ႉၼင်ႇ သဝ်မၢတ်ႈ သဝ်တွင်းဢၼ်ပူၵ်းဝႆႉ ၵႃႈၼိူဝ်ပၢႆလွႆၸိၵ်းလွႆ ဢိၵ်ႇတင်းၸိူဝ်ႉၼင်ႇလၢမ်ႇ ဢၼ်ပူၵ်းဝႆႉၵႃႈၼိူဝ်လွႆၼိူဝ်ၵုင်းၼၼ်ႉဢေႃႈ။- 18ၵူၺ်းၵႃႈ ထႃႇဝရႃႉၽြႃး တၵ်းမုင်ႈမွင်းယူႇ ႁႂ်ႈလႆႈႁဵတ်းၵျေးၸူး တီႈသူလႄႈ ၶၢမ်ႇတၢင်းဢၼ်ယုၵ်ႉယွင်ႈႁႂ်ႈလႆႈႁဵတ်းၵရူႉၼႃႇ တီႈသူဢေႃႈ။ လွင်ႈမၼ်းၸမ်ႉ ထႃႇဝရႃႉၽြႃးပဵၼ်ၽြႃးပဵၼ်ၸဝ်ႈ ဢၼ်ၸွမ်းတြႃးဢေႃႈ။ ၶဝ်ၸိူဝ်းဢၼ်မုင်ႈမွင်းမၼ်းၸဝ်ႈယူႇၵႃႈမီး တင်းသဵင်ႈတင်းလူင်ၼၼ်ႉ မီးမင်ႇၵလႃႇဢေႃႈ။
ၽြႃးပဵၼ်ၸဝ်ႈတၵ်းပၼ်တၢင်းလီတီႈၵူၼ်းမၼ်းၸဝ်ႈ
19ၵူၼ်းတင်းလၢႆ တၵ်းလႆႈယူႇၵႃႈၼႂ်းၸီႉဢုၼ်ႇ ၵႃႈတီႈဝဵင်းယေႇရူႉသလႅမ်ႇဢေႃႈ။ ၵမ်းလိုၼ်းမႂ်းတၵ်းဢမ်ႇလႆႈႁႆႈလႆႈႁွင်ႉ။ မၼ်းၸဝ်ႈ တၵ်းထွမ်ႇဢဝ်သဵင်ဢၼ်မႂ်း သႅၼ်ႇႁွင်ႉၼၼ်ႉလႄႈ ဢဵတ်းလူၵႄႇသႄႇဢဝ်မႂ်းဢေႃႈ။ မိူဝ်ႈဢၼ်မၼ်းၸဝ်ႈငိၼ်းသဵင်ၼၼ်ႉၸိုင် မၼ်းၸဝ်ႈတၵ်းဢိူဝ်ဢေႃႈ။- 20ပိၵ်ႉသမ်ႉထႃႇဝရႃႉၽြႃး ဢဝ်ၶဝ်ႈမုၼ်းတုၵ်ႉၶႃႉတၢင်းၽၢၼ် ဢိၵ်ႇတင်းၼမ်ႉဝူၺ်ႇတၼႃႇလဵင်ႉလူမႂ်းသေၵေႃႈ၊ သြႃႇမႂ်းၸိူဝ်းၼၼ်ႉ ၵမ်းလိုၼ်းတၵ်းဢမ်ႇလႆႈတဵတ်ႇမႅပ်ႉလႄႈယူႇ။ မႂ်းတၵ်းလႆႈဢဝ်မၢၵ်ႇတႃမႂ်းႁၼ်သြႃႇမႂ်းၸိူဝ်းၼၼ်ႉဢေႃႈ။- 21ပေႃးမႂ်းၽိတ်းပိူင်ႈသဵၼ်ႈတၢင်းၵႂႃႇ ၵႃႈတီႈၽၢႆႇၶႂႃ ၵႃႈတီႈၽၢႆႇသၢႆႉၸိုင်၊ ႁူးႁူမႂ်းတၵ်းလႆႈငိၼ်းသဵင်ၵႂၢမ်းဢၼ်လၢတ်ႈၵႃႈတီႈ ၽၢႆႇလင်မႂ်းလႄႈဝႃႈ၊ သဵၼ်ႈတၢင်းဢၼ်ၼႆႉ ၸိုဝ်ႈၸႂ်ႈဢေႃႈ။ ၸွမ်းသဵၼ်ႈတၢင်းၼႆႉတႃႉ၊ ဝႃႈၼင်ႇၼႆဢေႃႈ။- 22သူတၵ်းလႆႈႁဵတ်းႁႂ်ႈငိုၼ်း ဢၼ်ဢုမ်ႇႁေႃႇရုၵ်ႈထူႉဢၼ်တွင်ႈႁဵတ်းၶၵ်းႁဵတ်း တင်းတီႈၶမ်းဢၼ် ဢုမ်ႇႁေႃႇရုၵ်ႈထူႉ ဢၼ်သွၼ်းႁဵတ်း လေႃႇႁဵတ်းၼၼ်ႉၵူဝ်ႈၵိူၵ်ႇလႄႈ ပႄႇပႅတ်ႈၸိူဝ်ႉၼင်ႇၶူဝ်းလဵင်းဢၼ် ၵူဝ်ႈၵိူၵ်ႇၼၼ်ႉ ယူႇသေလႄႈဝႃႈ၊ ၵႂႃႇတႃႉမႂ်း၊ ဝႃႈၼင်ႇၼႆဢေႃႈ။- 23မၼ်းၸဝ်ႈတၵ်းႁႂ်ႈ ၽူၼ်တူၵ်းပုၼ်ႈၸိူဝ်ႉၽၼ်းဢၼ်မႂ်းဝၢၼ်ႇပိုၼ်ဝႆႉ ၵႃႈတီႈၼႃႈလိၼ်ၼၼ်ႉလႄႈ ပၼ်ၶဝ်ႈမုၼ်းဢၼ်ပဵၼ်မႃးၵႃႈတီႈမၢၵ်ႇလိၼ်ႁူင်းလိၼ်ၼၼ်ႉလႄႈ တၵ်းပျေႉၸုမ်ႇလိူင်ႇၸႂ်ၼမ်ၼႃႇလူင်လၢင်ဢေႃႈ။ ၼႂ်းမိုဝ်ႉဝၼ်းၶိင်ႇၵႃႇလႃႉၼၼ်ႉ၊ သူဝ်းဝူဝ်းမႂ်း တင်းလၢႆ တၵ်းလႆႈၵိၼ်ယူႇၵႃႈၼႂ်းတီႈဢၼ်ၵႂၢင်ႈလီလႃးလီဢေႃႈ။- 24ဝူဝ်းဢိၵ်ႇတင်းလီႈ ဢၼ်ႁဵတ်းၵႃႈတီႈလိၼ်ၸိူဝ်းၼၼ်ႉၵေႃႈ တၵ်းလႆႈၵိၼ်ၶဝ်ႈပိူၵ်ႇဢၼ်လေႃးလူၺ်ႈၵိူဝ်၊ ဢၼ်ဢဝ်တင်းလူင်ႈဢိၵ်ႇတင်းၶိုင် ၽတ်းဢဝ်ၶိုင်ဢဝ်ၼၼ်ႉၵူၺ်းဢေႃႈ။- 25ၼမ်ႉမႄႈတီႈဢၼ်ၼမ်ႉလႆယူႇ ဢိၵ်ႇတင်းၼမ်ႉႁွင်ႈၼမ်ႉၵႄးတင်းလၢႆ တၵ်းမီးၵႃႈၼိူဝ်လွႆဢၼ်သုင်ၵႃႈမီးဢိၵ်ႇတင်း ၵႃႈၼိူဝ်ၵုင်း ဢၼ်ထၢင်ႇသႃးၵႃႈမီးၼၼ်ႉ ၼႂ်းမိုဝ်ႉဝၼ်းဢၼ်ဢဝ်ၵူၼ်းၼမ်ၼႃႇလႆႈၶၢမ်ႇတၢင်းဢၼ်ဢဝ်တၢႆလႄႈ တိူၵ်ႈတီႈတိုၵ်းသိုၵ်းတင်းလၢႆ လႆႈလူမ်ႉပင်းၼၼ်ႉဢေႃႈ။- 26ဢၼ်လႅင်းလိူၼ်ၼၼ်ႉ တၵ်းပဵၼ်ၸိူဝ်ႉၼင်ႇဢၼ်လႅင်းၵၢင်ဝၼ်းလႄႈ ဢၼ်လႅင်းၵၢင်ဝၼ်းၼၼ်ႉ တၵ်းယဵင်ႈၶႅၼ်း လႅင်းမႃး ၸဵတ်းပုၼ်ႈ ပဵင်းတၢၼ်ႇဢၼ်လႅင်းၸဵတ်းဝၼ်း ၼႂ်းမိုဝ်ႉဝၼ်းဢၼ် ထႃႇဝရႃႉၽြႃး ပွင်မႄးႁွႆးလူႉႁွႆးႁၵ်း ၵူၼ်းမၼ်းၸဝ်ႈတင်းလၢႆလႄႈ ႁႂ်ႈႁွႆးတၢမ်ႇၶဝ်ႁၢႆၼၼ်ႉဢေႃႈ။- 27တူၺ်းလူး၊ ၼႃႇမႃႉၸိုဝ်ႈသဵင် ထႃႇဝရႃႉၽြႃး လုၵ်ႉသေၵႃႈတီႈဢၼ်ၵႆမႃးလႄႈ တၢင်းၸႂ်မႆႈၶႆႈၸႃႉမၼ်းၸဝ်ႈ ႁုပ်ႇမႆႈလႄႈ ပဵၼ်ၵႂၼ်းဢွၵ်ႇၶိုၼ်ႈယူႇဢေႃႈ။ သူပ်းမၼ်းၸဝ်ႈၼၼ်ႉတဵမ်ဝႆႉတင်း တၢင်းၸႂ်မႆႈၶႆႈၸႃႉလႄႈ လိၼ်ႉမၼ်းၸဝ်ႈၼၼ်ႉ ပဵၼ်ၸိူဝ်ႉၼင်ႇၽႆး ဢၼ်တုတ်ႇယူႇဢေႃႈ။- 28တၢင်းဢၼ်ထူၺ်ႈၸႂ်ဢွၵ်ႇမၼ်းၸဝ်ႈၼၼ်ႉၵေႃႈ ပဵၼ်ၸိူဝ်ႉၼင်ႇၼမ်ႉဢၼ်ထူမ်ႈႁူမ်ႇၶိုတ်းထိုင် ၵႃႈတီႈၶေႃး ႁႂ်ႈလႆႈဢဝ်ၶိုင်မူႉသႃႇ ၶိုင်ႁွၼ်ႈမဵဝ်းၵူၼ်းတင်းလၢႆပႅတ်ႈလႄႈ ၵၵ်ႉဢၼ်ႁႂ်ႈပိူင်ႈတၢင်းၵႂႃႇၼၼ်ႉ တၵ်းလႆႈမီးၵႃႈၼႂ်းသူပ်းၶဝ်ဢေႃႈ။- 29သူတၵ်းလႆႈမီးတၢင်းဢၼ်ႁဵတ်းၵႂၢမ်း မိူၼ်ၸိူဝ်ႉၼင်ႇဢၼ်မီးၼႂ်းၶမ်ႈဝၼ်းဢၼ်ၶၢမ်ႇပွႆး ဢၼ်မူတ်းၸၢင်ႇၼၼ်ႉလႄႈ တၵ်းလႆႈ ၸူမ်းသိူဝ်းမိူၼ်ၸိူဝ်ႉၼင်ႇဢၼ် ၵေႃႉဢၼ် ပဝ်ႇပီႇသေလႄႈ ၵႂႃႇၸူးၵႃႈတီႈ ထႃႇဝရႃႉၽြႃး မၢၵ်ႇႁိၼ်မၢၵ်ႇၽႃ မဵဝ်းဢီႉသရေႇလႃႉၼၼ်ႉဢေႃႈ။- 30ထႃႇဝရႃႉၽြႃး တၵ်းပွႆႇသဵင်မၼ်းၸဝ်ႈ ဢၼ်မုၼ်ယႂ်ႇၼၼ်ႉလႄႈ ၼႄပျႃးတၢင်းဢၼ်ၶႅၼ်မိုဝ်းမၼ်းၸဝ်ႈတူၵ်းႁွတ်ႈ ဢိၵ်ႇလူၺ်ႈၵၼ်တင်းတၢင်းဢၼ် တေႃးသႃႉတၢင်းၶႆႈၸႃႉမၼ်းၸဝ်ႈ ဢွၵ်ႇႁႅင်းၼႃႇ၊ တၢင်းဢၼ်ပဵဝ်ၽႆးမႆႈ ဢိၵ်ႇတင်းၽူၼ်လူင် လူမ်းလူင်ဢၼ်ပႃးမၢၵ်ႇႁဵပ်းၸိူဝ်းၼၼ်ႉဢေႃႈ။- 31ပိူဝ်ႈၼႆလႄႈၵူၼ်းဢႃႇသူႉရီႉၼၼ်ႉ တၵ်းလႆႈၶၢမ်ႇတၢင်းဢၼ်သဵင် ထႃႇဝရႃႉၽြႃး ဢဝ်ၶျႃးတူၵ်းပႅတ်ႈ ဢိၵ်ႇတင်းတၢင်းဢၼ် ၵၼ်းႁွၵ်ႇမၼ်းၸဝ်ႈ ပၼ်တၢမ်ႇၼၼ်ႉဢေႃႈ။- 32ၵမ်တၢမ်းၵႃႈဢၼ်ၵၼ်းႁွၵ်ႇ ဢၼ်ထႃႇဝရႃႉၽြႃး ၸီႇယၢင်ႇလႄႈ ၶျႃးသႂ်ႇဝႆႉ ၵႃႈၼိူဝ်မၼ်းၼၼ်ႉ ႁွတ်ႈထိုင်ၵူႈပွၵ်ႈၵူႈၵမ်းၼၼ်ႉ တၵ်းပဵၼ် ပႃးလူၺ်ႈၵၼ်တင်း တၢင်းဢၼ်လဵတ်းတိင်ႇ ႁႆႇၵွင်ၶဵတ်ႇဢေႃႈ။ မၼ်းၸဝ်ႈတၵ်းတိုၵ်းတေႃးမၼ်း ၼႂ်းပွႆးတိုၵ်းသိုၵ်း ဢၼ်ႁႅင်းယႂ်ႇၼႃႇတင်းလၢႆဢေႃႈ။- 33လွင်ႈမၼ်းၸမ်ႉ တီႈတေႃးၽႅတ်ႉၼၼ်ႉ လႆႈမီးတၢင်းဢၼ်ၸီႇယၢင်ႇပွင်ႁဵတ်းဝႆႉယဝ်ႉမိူဝ်ႈၵွၼ်ႇ ဢွၼ်ၼႆႉၼၼ်ႉလႄႈ မီးတၢင်းဢၼ်မႄးႁႅၼ်းဝႆႉပုၼ်ႈ ၶုၼ်ႁေႃၶမ်း ဢမၢၼ်ႇၶၼ်ပဵၼ်ဢေႃႈ။ မၼ်းၸဝ်ႈႁဵတ်းႁႂ်ႈပဵၼ်ဢၼ်လိုၵ်ႉလမ်ႇယႂ်ႇၵႂၢင်ႈၼႃႇလႄႈ တီႈဢၼ်ၵွင် ဢၼ်သုင်မၼ်းၵေႃႈ ပဵၼ်ၽႆး ဢိၵ်ႇတင်း ၽိုၼ်းၼမ်ၼႃႇဢေႃႈ။ တၢင်းဢၼ်ထူၺ်ႈၸႂ်ဢွၵ်ႇ ထႃႇဝရႃႉၽြႃးၼၼ်ႉ တၵ်းလႆႈဢဝ် ၽႆးတုတ်ႇမၼ်းၼၼ်ႉ မိူၼ်ၸိူဝ်ႉၼင်ႇၵၢၼ်ႉဢၼ်ၶိုဝ်ႇပဵၼ်ၼၢမ်ၼၼ်ႉဢေႃႈ။
Copyright © 2021 by OMF International, Shan Baptist Churches Fellowship