2 ရႃႇၸဝၢင်ႇ 7
7
ၽြႃးပဵၼ်ၸဝ်ႈဝႆႉၵတီႉတီႈတႃႇဝိတ်ႈ
(တူၺ်း၊ 1 ရႃႇၶျုၵ်ႈ 17:1-15)
1မိူဝ်ႈဢၼ်ၶုၼ်ႁေႃၶမ်း လႆႈယူႇၼိမ်ၼိမ်လီလီၵႃႈတီႈႁေႃၸဝ်ႈလႄႈ၊ ထႃႇဝရႃႉၽြႃးပၼ်မၼ်းၵတ်းယဵၼ်ၶျၢမ်းသႃႇၵၢင်းလွတ်ႈသေ ရၢၼ်ႇသူႇမၼ်းၵႃႈဢၼ်မီးလဵပ်ႈႁွပ်ႈမၼ်းယူႇၵူႈတီႈၵူႈလႅၼ်ၼၼ်ႉၸိုင်၊- 2ၶုၼ်ႁေႃၶမ်းၼၼ်ႉလၢတ်ႈတီႈပရေႃးၽႅတ်ႈၼႃႇသၼ်ႇလႄႈဝႃႈ၊ တူၺ်းလူး၊ ၵဝ်ၸိုင်လႆႈယူႇၵႃႈၼႂ်းႁေႃမႆႉဢႃႇရိတ်ႉဢေႃႈ။ တိူၵ်ႈတႃႇထႃႇဝရႃႉၽြႃးၸမ်ႉ လႆႈယူႇၵႃႈၼႂ်းၽႃႈၵင်ႈဢေႃႈ၊ ဝႃႈၼင်ႇၼႆသေယဝ်ႉ၊- 3ၼႃႇသၼ်ႇ ၶိုၼ်းလဝ်ႊလၢတ်ႈတီႈၶုၼ်ႁေႃၶမ်းလႄႈဝႃႈ၊ ၵႂႃႇလႄႈႁဵတ်းၸွမ်းၵႃႈၼင်ႇဢၼ်မီးၼႂ်းႁူဝ်ၸႂ်ၸဝ်ႈႁဝ်းၼၼ်ႉသေၵမ်းတီႈၶႃႈ။ ထႃႇဝရႃႉၽြႃးမီးယူႇလူၺ်ႈၵၼ်တင်းၸဝ်ႈႁဝ်းတီႈၶႃႈဢေႃႈ၊ ဝႃႈၼင်ႇၼႆဢေႃႈ။
4ၼႂ်းၶိုၼ်းၼၼ်ႉ၊ ၼုၵ်ႈၵပၢတ်ႈထႃႇဝရႃႉၽြႃး ႁွတ်ႈမႃးတီႈၼႃႇသၼ်ႇလႄႈဝႃႈ၊- 5ၵႂႃႇလႄႈမွၵ်ႇလၢတ်ႈတီႈၶႃႈၵဝ်တႃႇဝိတ်ႈၼၼ်ႉလႄႈဝႃႈ၊ ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ မႂ်းတၵ်းလႆႈႁဵတ်းႁိူၼ်းပုၼ်ႈဢၼ်ၵဝ်တၵ်းယူႇႁိုဝ်။- 6ၵဝ်ဢမ်ႇယူႇၵႃႈၼႂ်းႁိူၼ်းၸႃႉၸဵမ်မိုဝ်ႉဝၼ်းဢၼ် ၵဝ်ၼုၵ်ႈဢဝ်ၵူၼ်းမဵဝ်းဢီႉသရေႇလႃႉတင်းလၢႆ ဢွၵ်ႇသေၵႃႈၼႂ်းမိူင်းဢေႇၵိပ်ႉတူႉမႃးၼၼ်ႉ တေႃႇထိုင်ႁွတ်ႈဝၼ်းမိူဝ်ႈၼႆႉလႄႈ ၵဝ်ယူႇၵႃႈၼႂ်းမူဝ်းၵႃႇ ဢိၵ်ႇတင်းသုမ်ႉထဵင်သေလႄႈ လႄႇလဵပ်ႈမႃးယဝ်ႉ။- 7ၵႃႈတီႈဢၼ်ၵဝ်လႄႇလဵပ်ႈလူၺ်ႈၵၼ်တင်းၵူၼ်းမဵဝ်းဢီႉသရေႇလႃႉတင်းသဵင်ႈတင်းလူင်ၵူႈတီႈၵူႈလႅၼ်ၼၼ်ႉ၊ ၵဝ်ယၢမ်ႈထၢမ်တီႈ ၵူၼ်းလူင်ဢၼ်ၸီႇယၢင်ႇတြႃး ဢၼ်ၵဝ်ၸႂ်ႉသွႆႁႂ်ႈလႆႈလဵင်ႉလႆႈထိင်းၵူၼ်းၵဝ်မဵဝ်းဢီႉသရေႇလႃႉၸိူဝ်းၼၼ်ႉၼၼ်ႉသေၵေႃႉသေၵူၼ်းလႄႈဝႃႈ၊ ၵွပ်ႈပိူဝ်ႈၸိူဝ်ႉၼင်ႇႁိုဝ်လႄႈ မႂ်းဢမ်ႇႁဵတ်းႁိူၼ်းမႆႉဢႃႇရိတ်ႉပုၼ်ႈၵဝ်ၼင်ႇႁိုဝ်။ ဝႃႈၼင်ႇၼႆႁိုဝ်။- 8မိူဝ်ႈလဵဝ်ၼႆႉၸိုင်၊ မႂ်းလၢတ်ႈတီႈၶႃႈၵဝ်တႃႇဝိတ်ႈၼၼ်ႉလႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃးမီးဢမိင်ႉလႄႈဝႃႈၸမ်ႉ၊ ၵဝ်ၼုၵ်ႈဢဝ်မႂ်းသေၵႃႈၼႂ်းၶွၵ်ႈသူဝ်းတီႈဢၼ်လဵင်ႉထိင်းသူဝ်းၼၼ်ႉမႃးလႄႈ ၶၢၼ်းမႂ်းဝႆႉၵႃႈၼႂ်းဢရႃႇၶုၼ်ဢၼ်ဢုပ်ႉပိူင်ႇၵူၼ်းၵဝ် ၵူၼ်းမဵဝ်းဢီႉသရေႇလႃႉတင်းလၢႆၼႆႉယဝ်ႉ။- 9ၵဝ်ၸွမ်းလူၺ်ႈၵၼ်တင်းမႂ်းၵႂႃႇၵႃႈတီႈၵႃႈဢၼ်မႂ်းၵႂႃႇၼၼ်ႉလႄႈ ပႄႇၽဵဝ်ႈရၢၼ်ႇသူႇမႂ်းၵႃႈမီးပႅတ်ႈသေၵႃႈတီႈၽၢႆႇၼႃႈမႂ်းသေယဝ်ႉ၊ ပၼ်ၼႃႇမႃႉၸိုဝ်ႈသဵင်တီႈမႂ်းမိူၼ်ၸိူဝ်ႉၼင်ႇ ၼႃႇမႃႉၸိုဝ်ႈသဵင်ၵူၼ်းယႂ်ႇၵူၼ်းလူင်ၼႂ်းၵူၼ်းလိၼ်မိူင်းတင်းလၢႆၼၼ်ႉယဝ်ႉ။- 10ၼွၵ်ႈသေၼၼ်ႉ ၵဝ်တၵ်းၸီႇယၢင်ႇၶၢၼ်းဝႆႉတီႈဢၼ်ၵူၼ်းၵဝ် ၵူၼ်းမဵဝ်းဢီႉသရေႇလႃႉတင်းလၢႆ တၵ်းယူႇၼၼ်ႉလႄႈ ႁႂ်ႈၶဝ်မၼ်ႈၶိူင်ႇ၊ ႁႂ်ႈၶဝ်ဢမ်ႇလႆႈၶၢႆႉလႆႈပုတ်ႈၵမ်းလိုၼ်းလႄႈ ယူႇၵႃႈၼႂ်းတီႈယူႇၶဝ်ၼၼ်ႉဢေႃႈ။ ၵမ်းလိုၼ်းၶဝ်ၸိူဝ်းဢၼ်ဢမ်ႇတြႃးၼၼ်ႉ တၵ်းဢမ်ႇလႆႈၼိၵ်ႈၸၢၵ်ႈငႅၼ်းသႄးမိူၼ်ၸိူဝ်ႉၼင်ႇဢၼ်မိူဝ်ႈဢွၼ်တၢင်းၼၼ်ႉ၊- 11ဢိၵ်ႇတင်းၶိင်ႇမိူဝ်ႈဢၼ် ၵဝ်ၶၢၼ်းၵူၼ်းလူင်ဢၼ်ၸီႇယၢင်ႇတြႃးၸိူဝ်းၼၼ်ႉဝႆႉ ၵႃႈၼႂ်းၵူၼ်းၵဝ်မဵဝ်းဢီႉသရေႇလႃႉတင်းလၢႆၼၼ်ႉ။ မႂ်းၵေႃႈၵဝ်တၵ်းႁႂ်ႈၵတ်းယဵၼ်ၶျၢမ်းသႃႇၵၢင်းလွတ်ႈသေၵႃႈၼႂ်းမိုဝ်းရၢၼ်ႇသူႇမႂ်းတင်းသဵင်ႈတင်းလူင်ဢေႃႈ။ လိူဝ်သေၼၼ်ႉဢမ်ႇၵႃး ထႃႇဝရႃႉၽြႃးမွၵ်ႇလၢတ်ႈတီႈမႂ်းလူၺ်ႈလွင်ႈဢၼ်ထႃႇဝရႃႉၽြႃး တၵ်းႁႂ်ႈပီႈၼွင်ႉၸိူဝ်ႉၶိူဝ်းမႂ်းတႄႇယူႇၼၼ်ႉဢေႃႈ။- 12မိူဝ်ႈဢၼ်မိုဝ်ႉဝၼ်းဢသၢၵ်ႈမႂ်းတၵ်းတဵမ်လႄႈ မႂ်းတၵ်းၼွၼ်းလပ်းလူၺ်ႈၵၼ်တင်းပူႇမွၼ်ႇမႂ်းၸိူဝ်းၼၼ်ႉၸိုင်၊ ၵဝ်တၵ်းယုၵ်ႉယွင်ႈၸိူဝ်ႉၶိူဝ်းမႂ်း လိုၼ်းမႂ်းဢၼ်သိုပ်ႇဢွၵ်ႇၵႃႈတီႈမႂ်းၼၼ်ႉလႄႈ ႁႂ်ႈသိုင်ႇၸိုင်ႈဝၢၼ်ႈမိူင်းမၼ်းတႄႇယူႇဢေႃႈ။- 13မၼ်းၼၼ်ႉတၵ်းလႆႈႁဵတ်းႁိူၼ်းပုၼ်ႈၼႃႇမႃႉၸိုဝ်ႈသဵင်ၵဝ်လႄႈ၊ ၵဝ်တၵ်းႁႂ်ႈရႃႇၸႃႉပလၢင်ႇသိုင်ႇၸိုင်ႈဝၢၼ်ႈမိူင်းမၼ်းၼၼ်ႉ တႄႇယူႇတႃႇသေႇဢေႃႈ။- 14ၵဝ်တၵ်းပဵၼ်ပေႃႈမၼ်းလႄႈ မၼ်းၵေႃႈတၵ်းပဵၼ်လုၵ်ႈၸၢႆးၵဝ်ဢေႃႈ။ ပေႃးမၼ်းၼၼ်ႉႁဵတ်းတူႉၸရိူၵ်ႈၸိုင်၊ ၵဝ်တၵ်းဢဝ်တင်းၶွၼ်ႉဝၢႆ ဢၼ်ၵူၼ်းၸၢင်ႈသုင်းသွင်ႇၼၼ်ႉ သင်ႇသွၼ်သုင်းမႃႉမၼ်းလႄႈ ၵဝ်တၵ်းပေႃႉယႅၼ်ႉမၼ်းမိူၼ်ၸိူဝ်ႉၼင်ႇဢၼ် လုၵ်ႈၵူၼ်းတင်းလၢႆပေႃႉယႅၼ်ႉၼၼ်ႉဢေႃႈ။- 15ၵူၺ်းၵႃႈ ၵရူႉၼႃႇၵဝ်တၵ်းဢမ်ႇၽၢတ်ႇယၢၼ်သေၵႃႈတီႈမၼ်း မိူၼ်ၸိူဝ်ႉၼင်ႇဢၼ် ၵဝ်ၼုၵ်ႈဢဝ်သေၵႃႈတီႈသေႃးလူႉ ဢၼ်ၵဝ်ပႅတ်ႈဝႆႉၵႃႈတီႈၽၢႆႇၼႃႈမႂ်းၼၼ်ႉ။- 16မဵဝ်းၸိူဝ်ႉၶိူဝ်းမႂ်း ဢိၵ်ႇတင်းသိုင်ႇၸိုင်ႈဝၢၼ်ႈမိူင်းမႂ်းၼၼ်ႉ တၵ်းတႄႇယူႇတႃႇသေႇမၼ်ႈၶိူင်ႇၵႃႈတီႈၽၢႆႇၼႃႈမႂ်းဢေႃႈ။ ရႃႇၸႃႉပလၢင်ႇမႂ်းၵေႃႈ တၵ်းတႄႇယူႇတႃႇသေႇမၼ်ႈၶိူင်ႇဢေႃႈ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။- 17ၼင်ႇၼၼ်လႄႈ ၼႃႇသၼ်ႇဢဝ်ၵႂၢမ်းပျႃႇတိၵ်ႈၸဝ်ႈၵႃႈမီးၼႆႉ ဢိၵ်ႇတင်းရူႇပႃႇရူင်ႇတင်းသဵင်ႈတင်းမူတ်းၼႆႉ ၶိုၼ်းမွၵ်ႇလၢတ်ႈတီႈတႃႇဝိတ်ႈဢေႃႈ။
ၵႂၢမ်းသူးတွင်းတႃႇဝိတ်ႈ
(တူၺ်း၊ 1 ရႃႇၶျုၵ်ႈ 17:16-27)
18မိူဝ်ႈၼၼ်ႉ ၶုၼ်လူင်တႃႇဝိတ်ႈ ၶဝ်ႈၵႂႃႇၵႃႈၼႂ်းလႄႈ ၼင်ႈယူႇၵႃႈတီႈၽၢႆႇၼႃႈထႃႇဝရႃႉၽြႃးသေလႄႈ သူးတွင်းလႄႈဝႃႈ၊ ၸဝ်ႈထႃႇဝရႃႉၽြႃးတီႈၶႃႈ၊ ၶႃႈၸဝ်ႈၼႆႉပဵၼ်ၵူၼ်းၸိူဝ်ႉၼင်ႇႁိုဝ်လႄႈ ၸဝ်ႈႁဝ်းတၵ်းယုၵ်ႉယွင်ႈၶႃႈၸဝ်ႈၼႃႇလူင်လၢင်ထၢၼ်ႇၼႆႉတီႈၶႃႈ။ မဵဝ်းၸိူဝ်ႉၶိူဝ်းၶႃႈၸဝ်ႈၼႆႉ ပဵၼ်မဵဝ်းၸိူဝ်ႉၶိူဝ်းၸိူဝ်ႉၼင်ႇႁိုဝ်တီႈၶႃႈ။- 19ၵူၺ်းၵႃႈ ၸဝ်ႈထႃႇဝရႃႉၽြႃးတီႈၶႃႈ၊ ၵျေးၸူးၼၼ်ႉပဵၼ်ၵျေးၸူးဢၼ်လဵၵ်ႉဢၼ်ၵေႇ သိုဝ်ႈၼႃႈတႂ်ႈတႃၸဝ်ႈႁဝ်းလႄႈ ၸဝ်ႈႁဝ်းဢဝ်မဵဝ်းၸိူဝ်ႉၶိူဝ်းၶႃႈၸဝ်ႈ သိၼ်ႇၽႃႁွမ်းလူၺ်ႈၵၼ်တင်းၶိင်ႇၵႃႇလႃႉ ဢၼ်ႁိုင်ၼႃႇလူင်လၢင်ယူႇသေလႄႈ သမ်ႉမီးဢမိင်ႉလူၺ်ႈလွင်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၼႆႉတီႈၶႃႈလူင်ပႄႇ။ ၸဝ်ႈထႃႇဝရႃႉၽြႃးတီႈၶႃႈ၊ ၵူၼ်းတင်းလၢႆယၢမ်ႈမီးထုင်းၸၢမ်ႇ ဢၼ်ၸီႇယၢင်ႇၸိူဝ်ႉၼင်ႇၼႆတီႈၶႃႈႁိုဝ်။- 20တႃႇဝိတ်ႈ တၵ်းလႆႈလဝ်ႊလၢတ်ႈၸိူဝ်ႉၼင်ႇႁိုဝ်ထႅင်ႈတီႈၶႃႈ။ ၸဝ်ႈထႃႇဝရႃႉၽြႃးတီႈၶႃႈ၊ ၸဝ်ႈႁဝ်းႁူႉၶႃႈၸဝ်ႈႁဝ်းယူႇတီႈၶႃႈဢေႃႈ။- 21ၵွပ်ႈပိူဝ်ႈဢၼ်ၸဝ်ႈႁဝ်းထွၵ်ႈလူၺ်ႈၼုၵ်ႈၵပၢတ်ႈၸဝ်ႈႁဝ်းသေလႄႈ ၸွမ်းၵႃႈၼင်ႇဢၼ်ဢလူဝ်ႇႁူဝ်ၸႂ်ၸဝ်ႈႁဝ်းမီးၼၼ်ႉလႄႈ၊ ၸဝ်ႈႁဝ်းႁဵတ်းလွင်ႈတၢင်းၵူႈၸိူဝ်ႉၵူႈပိူင်ဢၼ်ယႂ်ႇၼႃႇလူင်လၢင်ၼႆႉ ႁႂ်ႈၶႃႈၸဝ်ႈလႆႈႁူႉလွင်ႈမၼ်းတီႈၶႃႈယဝ်ႉ။- 22ပိူဝ်ႈဢၼ်ပဵၼ်ၼင်ႇၼႆလႄႈ၊ ၸဝ်ႈထႃႇဝရႃႉၽြႃးတီႈၶႃႈ၊ ၸဝ်ႈႁဝ်းယႂ်ႇမျၢတ်ႈတီႈၶႃႈဢေႃႈ။ ၵႃႈၼင်ႇဢၼ်ၶႃႈၸဝ်ႈႁဝ်းတင်းသဵင်ႈတင်းလူင်လႆႈငိၼ်းၼၼ်ႉ၊ ဢမ်ႇမီးၽြႃးဢၼ်မိူၼ်ၵၼ်တင်းၸဝ်ႈႁဝ်းတီႈၶႃႈ။ ၼွၵ်ႈသေၸဝ်ႈႁဝ်း ဢမ်ႇမီးၽြႃးတၢင်ႇသူႇတၢင်ႇပႃးတီႈၶႃႈ။- 23ၵႃႈၼိူဝ်လိၼ်မိူင်းၼႆႉ မီးမဵဝ်းၵူၼ်းသေၸိူဝ်ႉသေမဵဝ်း ဢၼ်မိူၼ်ၵၼ်တင်းၵူၼ်းၸဝ်ႈႁဝ်းမဵဝ်းဢီႉသရေႇလႃႉဢၼ်ၽြႃးပဵၼ်ၸဝ်ႈ ၵႂႃႇလႄႈထုတ်ႇၼုၵ်ႈဢဝ် ပုၼ်ႈမၼ်းၸဝ်ႈလွင်ႈၼင်ႇႁိုဝ်တၵ်းႁႂ်ႈၼႃႇမႃႉၸိုဝ်ႈသဵင်မၼ်းၸဝ်ႈ ထၢင်ႇသႃးလႄႈႁဵတ်းလွင်ႈတၢင်းဢၼ်ယႂ်ႇဢၼ်လူင်ပုၼ်ႈသူ ဢိၵ်ႇတင်းတၢင်းဢၼ်လီၵူဝ်လီႁႄတင်းလၢႆ ပုၼ်ႈမိူင်းၸဝ်ႈႁဝ်း ၵႃႈတီႈၽၢႆႇၼႃႈၵူၼ်းၸဝ်ႈႁဝ်း ဢၼ်ၸဝ်ႈႁဝ်း ထုတ်ႇၼုၵ်ႈဢဝ်ဢွၵ်ႇသေၵႃႈၼႂ်းၸႃႉၸဵမ်မိူင်းဢေႇၵိပ်ႉတူႉလႄႈမိူင်းတင်းလၢႆ၊ ၽြႃးၶဝ်တင်းလၢႆၼၼ်ႉၼႆႉသေၸိူဝ်ႉသေမဵဝ်းတီႈၶႃႈႁိုဝ်။- 24လွင်ႈမၼ်းၸမ်ႉ ၸဝ်ႈႁဝ်းႁႂ်ႈၵူၼ်းၸဝ်ႈႁဝ်း မဵဝ်းဢီႉသရေႇလႃႉၼႆႉ မၼ်ႈၶိူင်ႇၼႅၼ်ႈၼႃ ႁႂ်ႈၶဝ်လႆႈပဵၼ်ၵူၼ်းၸဝ်ႈႁဝ်းယူႇတႃႇသေႇလႄႈ ၸဝ်ႈႁဝ်းထႃႇဝရႃႉၽြႃးၼႆႉ ပဵၼ်ၽြႃးပဵၼ်ၸဝ်ႈၶဝ်တီႈၶႃႈဢေႃႈ။- 25မိူဝ်ႈလဵဝ်ၼႆႉၸိုင်၊ ၸဝ်ႈထႃႇဝရႃႉၽြႃးတီႈၶႃႈ၊ ႁႂ်ႈၵႂၢမ်းဢၼ်ၸဝ်ႈႁဝ်းမီးဢမိင်ႉဝႆႉတီႈၶႃႈၸဝ်ႈႁဝ်း ဢိၵ်ႇတင်းတီႈပီႈၼွင်ႉၸိူဝ်ႉၶိူဝ်းၶႃႈၸဝ်ႈႁဝ်းၸိူဝ်းၼၼ်ႉၼၼ်ႉ တႄႇယူႇတႃႇသေႇ မၼ်ႈၶိူင်ႇလႄႈ ႁဵတ်းၸွမ်းၵႃႈၼင်ႇဢၼ်ၸဝ်ႈႁဝ်း မီးဢမိင်ႉဝႆႉၼၼ်ႉသေၵမ်းတီႈၶႃႈ။- 26ႁႂ်ႈၼႃႇမႃႉၸိုဝ်ႈသဵင်ၸဝ်ႈႁဝ်းမီးတၢင်းဢၼ် ယုၵ်ႉယွင်ႈယူႇတႃႇသေႇလႄႈဝႃႈ၊ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ပဵၼ်ၽြႃးပဵၼ်ၸဝ်ႈ ဢၼ်လႆႈဢုပ်ႉပိူင်ႇ မဵဝ်းဢီႉသရေႇလႃႉဢေႃႈ၊ ဝႃႈၼင်ႇၼႆယူႇသေၵမ်းလူၺ်ႈတီႈၶႃႈ။ ႁႂ်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းတႃႇဝိတ်ႈၼႆႉ တႄႇယူႇၵႃႈတီႈၽၢႆႇၼႃႈၸဝ်ႈႁဝ်းသေၵမ်းလူၺ်ႈတီႈၶႃႈ။- 27လွင်ႈမၼ်းၸမ်ႉ ၸဝ်ႈပူဝ်ႇပႃႇၵၢင်ႁၢဝ်ထႃႇဝရႃႉၽြႃး ၽြႃးပဵၼ်ၸဝ်ႈမဵဝ်းဢီႉသရေႇလႃႉတီႈၶႃႈ၊ ၵွပ်ႈပိူဝ်ႈဢၼ်ၸဝ်ႈႁဝ်းပၼ်ပျႃႇတိၵ်ႈတီႈၶႃႈၸဝ်ႈႁဝ်းၼႆႉလႄႈဝႃႈ၊ ၵဝ်တၵ်းႁႂ်ႈမဵဝ်းၸိူဝ်ႉၶိူဝ်းမႂ်းတႄႇယူႇဢေႃႈ၊ ဝႃႈၼင်ႇၼႆၼၼ်ႉလႄႈ ၶႃႈၸဝ်ႈႁဝ်းၼႆႉ မီးၸႂ်ဢၼ်ၶႂ်ႈႁဵတ်းသူးတွင်းပထၼႃႇၼႆႉ ၵႃႈတီႈၽၢႆႇၼႃႈၸဝ်ႈႁဝ်းတီႈၶႃႈဢေႃႈ။- 28မိူဝ်ႈလဵဝ်ၼႆႉၵေႃႈ ၸဝ်ႈထႃႇဝရႃႉၽြႃးတီႈၶႃႈ၊ ၸဝ်ႈႁဝ်းၸႂ်ႈၽြႃးပဵၼ်ၸဝ်ႈတီႈၶႃႈဢေႃႈ။ ၵႂၢမ်းၸဝ်ႈႁဝ်းၵေႃႈ ၸိုဝ်ႈၸႂ်ႈတီႈၶႃႈဢေႃႈ။ ၵျေးၸူးၼႆႉၸိုင် ၸဝ်ႈႁဝ်းဝႆႉၵတီႉတီႈၶႃႈၸဝ်ႈႁဝ်းၼႆႉတီႈၶႃႈယဝ်ႉ။- 29ပိူဝ်ႈဢၼ်ပဵၼ်ၼင်ႇၼႆလႄႈ ၶႅၼ်းတေႃႈမီးၸႂ်ဢၼ်ဢူၼ်ႈၼူပ်ႈၵွမ်းၸူးႁႂ်ႈလႆႈပၼ်တၢင်းလီ တီႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၼႆႉ ႁႂ်ႈတႄႇယူႇၵႃႈတီႈၽၢႆႇၼႃႈၸဝ်ႈႁဝ်းတႃႇသေႇ မၼ်ႈၶိူင်ႇသေၵမ်းတီႈၶႃႈ။ ၸဝ်ႈထႃႇဝရႃႉၽြႃးတီႈၶႃႈ၊ ၸွမ်းၵႃႈၼင်ႇဢၼ်ၸဝ်ႈႁဝ်းမီးဢမိင်ႉဝႆႉၼၼ်ႉလႄႈ၊ ႁႂ်ႈမဵဝ်းၸိူဝ်ႉၶိူဝ်းၶႃႈၸဝ်ႈႁဝ်းၼႆႉ လႆႈၶၢမ်ႇမင်ႇၵလႃႇ ဢၼ်ၸဝ်ႈႁဝ်းပၼ်တၢင်းလီၼၼ်ႉ ယူႇတႃႇသေႇမၼ်ႈၶိူင်ႇသေၵမ်းလူၺ်ႈတီႈၶႃႈ၊ ဝႃႈၼင်ႇၼႆဢေႃႈ။
Copyright © 2021 by OMF International, Shan Baptist Churches Fellowship