Tiito 1
1
Amakëërërryö
1Ritashandighi reno, nö-öni Pauro ndyandëkirë, öni ömököri uwa emeremo uwa Waryobha, ono ndëngë omotomwa uwa Yëësu Kiristo. Naatomwa ndaghërri abhantö bhano bhaashaaghorwa na Waryobha, okore bhamukumi na okomanya obhoheene ubhwa Yëësu Kiristo. Obhoheene bhuyö, mbo bhokoraghërrya abhantö bhasooke Waryobha, 2na mboraabhahaane ubhweseghe ubhwa öbhöhöru ubhwa amakora ghonswe igho. Waryobha ono atakorongoha, we yaaraghaini öbhöhöru bhuyö, kora ekebhara ketaraabhombwa. 3Bhoono eno yo enkaagha eno Waryobha ahanshirë igha ööröki harabhu igho Amangʼana aghaaye Amaiya. Waryobha Ömötöörya uwëëtö yaahanshirë igha, angʼaane emeremo ighya okoraareka amangʼana ghayö. 4Tiito nu-uwe nkwandekera. Uwe m-maheene igha, m-moona uwaane örë ku-mukumo ghono tokosanga.
Örööbhö na omorembe bheno bhikurwa ku-Waryobha Taata uwëëtö, na ku-Kiristo Yëësu Ömötöörya uwëëtö, bhebhe hamwë na uwe.
Tiito aratëëbhibhwa ukushaaghoraabhaghaaka abhatangati abha ekanisa
5Hano naaruurë Kerete hayö, naakutighirë-ho igha, omarërri okokora amangʼana ghaara ghaatighaayë, hamwë na ukushaaghora abhaghaaka abha ekanisa mu-mighi ghyonswe igho, kya bhono naakoraghërrya. 6Omoghaaka omotangati uwa ekanisa, ni-igha abhe ömöntö ono atakotemwa amasoro. Abhe umushaasha nyamokari ömwë igho,#1:6 Abhe umushaasha nyamokari ömwë igho. Ensonga iyaako iyëndë ni-igha, atakaabha omosooraare. abhe na abhaana abhakumya, bhano bhatarë abhamangarru, handë bhano bhatakwighwa. 7Ko bhoora igha, omoghaaka omotangati uwa ekanisa, uyö we umwimërërri ono yaaghöötibhwa emeremo ighya Waryobha, ku bhuyö ni-igha, atakaabha ömöntö uwa okotemwa amasoro. Atakaabha na ekeghaaka, atakaabha ömöntö uwa enkoro, atakaabha ömörëëbhi, atakaabha umutindi, kora atakaabha na oronamba urwa seehera. 8Kasi asërëëninga abhantö, abhe ömöntö ono ahanshirë amangʼana amaiya, abhe ömöntö ono akogheera ngʼora amangʼana, ömöntö uwa heene, ömöhörëëru, ono akwirebherra umwene. 9Aghootenga bhuuya amangʼana agha obhoheene agha Yëësu Kiristo, kya bhono yëëghibhwa. Hayö ho araatore okotogheka abhantö ko amëëghyö agha obhoheene, na okohengera bhonswe igho bhano bhakunyeera senkaani amëëghyö ghayö.
10Nkökötëëbhya ndë igho, ko bhoora igha, bhaaho abhantö abhaaru Kerete hayö, bhano bhatakwighwera engʼana, bhano bhakoghamba amangʼana ghano ghataana ubhwera, kora m-barongo, ekenene, na-Bhayahudi bhaara bhakokangʼasërrya eteemo iyaabho iya Ikiyahudi. Abhantö bhayö, ni-igha bhakaanibhwi ukwëghya, 11ko bhoora ukwëghya ukwabho, nkusirya körë abhantö mu-mighi ighyabho ghyonswe igho. Bharëëghya amangʼana ghano ghataana enshera, okore bhanyoore seehera, ko enshera engogho eno ëkösöökya. 12Yaare-ho Omokerete ömörööti uwaabho abheene, ono yaaghambirë igha, “Abhakerete m-barongo nkaagha syonswe igho, mbatuubhaini kya sityënyi sengogho isya mwi-sisi, m-booro, kora m-bahobhaaru!” 13Amangʼana ghayö m-maheene. Ku bhuyö okaaninga abhantö bhayö bhököngʼu, okore bhaghoote amëëghyö agha obhoheene. 14Bhatakaitegherranga amaghano agha Ikiyahudi, ghano ghataana ubhwera bhwobhwonswe bhoora, bheena amaraghërryö agha abhantö bhano bhaatigha obhoheene.
15Mbe, abhantö bhayö nkwëghya bharë igha, bheeho ëbhëntö ibhinyanku. Kasi öni ndaghamba igha, ëbhëntö bhyonswe igho bhyasendoorwa, ku bhuyö m-biiya, ko bhano bhaana eteemo inshiiya ku-Waryobha. Kasi ko abhanyanku na bhano bhatakukumya, ëbhëntö bhyonswe igho m-binyanku, ko bhoora igha, amaitegherro aghaabho na senkoro isyabho, nsishööyë ubhunyanku. 16Abheene nkoghamba bharë igha, mbamanyirë Waryobha, kasi amangʼana ghano bhakokora nkwörökya gharë igha, nkumwanga bharë. Abhantö bhayö, m-basëësëëbhya abha senkoro, m-batëëyu, tebhaana ubhwera ubhwa okokora amangʼana amaiya hë.
© 2021, Wycliffe Bible Translators, Inc. All rights reserved.