Iraétanüxü̃arü muxchiga 22
22
Baláx rü Balaáü̃ca̱x nangema
1Rü nüma ga Iraétanüxü̃ rü inaxĩ rü Moáanearü metachinüxü̃gu nayapexgü ga natü ga Yudáü̃arü éstegu ga ĩane ga Yericúarü to̱xma̱xtagu.
2Rü nüma ga Moáanearü ãẽ̱xgacü ga Baláx ga Chipóx nane rü nüxü̃ nacuáchiga ga ñuxãcü yema Iraétanüxü̃ rü Amoréugüxü̃ naporamaegüxü̃.
3Rü yexgumarüxü̃ ta ga yema norü duü̃xü̃gü ga Moáanecüã̱xgü, rü namuü̃e ga yexguma yema Iraétanüxü̃xü̃ nadaugügu ga nax namuxũchixü̃.
4-5Rü yemaca̱x ga yema Moáanecüã̱xgü rü Madiáü̃anecüã̱xgüarü ãẽ̱xgacügümaxã nidexagü rü ñanagürügü nüxü̃: —Guxü̃ma i ñaa duü̃xü̃gü i Iraétanüxü̃ rü tá nanapáxẽxẽ i torü naane, ñoma wüxi i woca i maxẽ nagu̱xẽẽxü̃rüxü̃ —ñanagürügü. Rü yemaca̱x ga nüma ga Moáanearü ãẽ̱xgacü ga Baláx rü Tupanaarü orearü uruxü̃ ga Balaáü̃ ga Beúx naneca̱x nangema. Rü nüma ga Balaáü̃ rü ĩane ga Petúxcüã̱x nixĩ rü taxtü ga Eufrátearü ngaicamagu naxãchiü̃ ga Amáxchixü̃anewa. Rü nüma ga Baláx rü duü̃xü̃güxü̃ namu nax Balaáü̃xü̃ ñagüxü̃ca̱x: —Equítuanewa ne naxĩ i duü̃xü̃gü i chauchixü̃ane yapaxẽẽgüxü̃. Rü ñu̱xma rü marü chorü to̱xma̱xtawa nangugü.
6¡Rü paxa nua naxũ, Pa Balaáü̃x, rü chaugagu chixexü̃ namaxã naxuegu i ngẽma duü̃xü̃gü! Erü tá toxü̃ narüporamaegü. Rü bexmana ega chixexü̃ namaxã cuxuegugu rü tá choxü̃́ natauxcha nax nüxü̃ charüporamaexü̃ rü íchawoxü̃xü̃ i nua chauchixü̃anewa. Rü choma rü meama nüxü̃ chacua̱x rü ngẽxguma ta̱xacümaxã mexü̃ cuxuegugu rüe̱xna chixexü̃ namaxã cuxuegugu, rü guxü̃guma aixcüma ningu —ñanagürü.
7Rü yexguma ga yema Moáanecüã̱xgü rü Madiáü̃anecüã̱xgüarü ãẽ̱xgacügü rü diẽrumaxã Balaáü̃xü̃tawa naxĩ nax naxütanügüãxü̃ca̱x nax chixexü̃ Iraétanüxü̃maxã naxueguxü̃ca̱x. Rü yexguma Balaáü̃xü̃tawa nangugügu, rü namaxã nüxü̃ nixugügü ga Baláxarü ore.
8Rü nüma ga Balaáü̃ rü nanangãxü̃ rü ñanagürü nüxü̃: —¡Ẽcü nuxã pepegü i ñaa chütaxü̃! Rü moxü̃ pa̱xmama tá pexü̃ changãxü̃ i ngẽma Tupana chomaxã nüxü̃ ixuxü̃ãcüma —ñanagürü. Rü yemaacü ga yema Moáanearü ãẽ̱xgacü ga orearü ngeruü̃gü rü yexma napegü.
9Natürü ga Cori ya Tupana rü yema chütaxü̃ rü Balaáü̃ca̱x nango̱x, rü nüxna naca rü ñanagürü: —¿Taxacügü nixĩ i ngẽma yatügü i cuxü̃tawa ngẽxmagüxü̃? —ñanagürü.
10-11Rü Balaáü̃ rü Tupanaxü̃ nangãxü̃ rü ñanagürü: —Baláx ya Chipóx nane ya Moáanearü ãẽ̱xgacü nua chauxü̃tawa nanamugü i norü ngü̃xẽẽruü̃gü nax chomaxã nüxü̃ yanaxugüexü̃ca̱x nax nangẽxmaxü̃ i duü̃xü̃gü i Equítuanewa íchoxü̃xü̃ rü ñu̱xma rü guxü̃ma i nachixü̃anegu chocuxü̃. Rü Baláx nanaxwa̱xe nax ngéma chaxũxü̃ nax chixexü̃ ngẽma duü̃xü̃gümaxã chayaxueguxü̃ca̱x nax ngẽmaãcü Baláx nüxü̃ rüporamaexü̃ca̱x rü ínawoxü̃ãxü̃ca̱x i norü naanewa —ñanagürü.
12Rü nüma ga Tupana rü Balaáü̃maxã nüxü̃ nixu rü ñanagürü: —Tama chanaxwa̱xe i nawe curüxũ rü chixexü̃ namaxã cuxuegu i ngẽma Iraétanüxü̃, erü ngẽma duü̃xü̃gü rü chomatama marü mexü̃ namaxã chaxuegu —ñanagürü.
13Rü yexguma moxü̃ãcü pa̱xmama ínadaxgu ga Balaáü̃ rü namaxã nüxü̃ nixu ga yema ãẽ̱xgacügü ga Baláx yéma mugüxü̃ rü ñanagürü nüxü̃: —¡Ẽcü pewoegu pechixü̃aneca̱x! Cori ya Tupana rü tama nanaxwa̱xe nax pewe charüxũxü̃ —ñanagürü.
14Rü yema ãẽ̱xgacügü ga Moáanecüã̱xgü rü nawoegu ga Baláx íyexmaxü̃wa, rü namaxã nüxü̃ nixugüe rü ñanagürügü: —Nüma i Balaáü̃ rü tama towe narüxũxchaü̃ —ñanagürügü.
15Natürü nüma ga Baláx rü tama inaxĩnü, rü wenaxarü togü ga norü ngü̃xẽẽruü̃gü yéma Balaáü̃xü̃tawa namugü. Natürü yemagü rü yema nüxíra yéma namugüxü̃xü̃ narümumae rü ñu̱xũchi yema nüxíra namugüxüxü̃étüwa ügüxü̃ nixĩgü.
16Rü nüma ga yema ãẽ̱xgacügü rü Balaáü̃xü̃tawa naxĩ rü ñanagürügü nüxü̃: —Nüma ya Baláx ya Chipóx nane rü moxẽ cuxca̱x nua namu rü ñanagürü: “¡Taxṹ i cuxoxü̃ nax chauxü̃tawa cuxũxü̃!
17Rü choma rü poraãcü cumaxã chataãxẽ rü mea tá cuxü̃ chayaxu. Rü tá cuxna chanaxã i guxü̃ma i ta̱xacü i naxca̱x ícuca̱xaxü̃. ¡Ẽcü nua naxũ rü choxü̃ rüngü̃xẽxẽ nax chixexü̃ namaxã cuxueguxü̃ca̱x i ñaa Iraétanüxü̃!” ñanagürü ga Baláx —ñanagürügü.
18Natürü nüma ga Balaáü̃ rü nanangãxü̃ rü ñanagürü: —Woo chi Baláx choxna naxãxgu i guxü̃ma i úiru rü diẽru i napatawa ngẽxmaxü̃, natürü i choma rü taxucürüwa ta̱xacü chaxü, rü woo taxü̃ rü woo íxraxü̃, ega tama chorü Cori ya Tupanaarü mu yixĩxgu.
19Natürü name nixĩ i pema rü ta rü nuxã pepegü i ñaa chütaxü̃, erü ñaa chütaxü̃gu tá nüxü̃ chacua̱x rü ta̱xacüxü̃ tá chomaxã yaxu ya Cori ya Tupana —ñanagürü.
20Rü yema chütaxü̃gu rü nüma ga Tupana rü Balaáü̃ca̱x nango̱x rü ñanagürü nüxü̃: —Ñu̱xma nax cuxca̱x nua naxĩxü̃ i ngẽma yatügü rü ¡ẽcü, írüda rü nawe rüxũ! Natürü ngẽma choma cumaxã nüxü̃ chixuxü̃xica tátama nixĩ i cuxüxü̃ —ñanagürü.
Tupanaarü orearü ngeruxü̃ i daxũcüã̱x rü Balaáü̃ca̱x nango̱x
21Rü moxü̃ãcü pa̱xmama rü ínarüda ga Balaáü̃ rü norü búru naxü̱xma̱xwa̱xe rü nawe narüxũ ga yema ãẽ̱xgacügü ga Moáanecüã̱xgü.
22Rü nüma ga Balaáü̃ rü norü búruétügu nixũ, rü taxre ga norü duü̃xü̃gü ínayaxümücügü. Natürü ga Tupana rü nanu. Rü yemaca̱x nixĩ ga Tupanaarü orearü ngeruxü̃ i daxũcüã̱x ga Balaáü̃arü búruxü̃ yachiyepe̱e̱xü̃ nax taxuacü naxüpetüxü̃ca̱x.
23Rü yema búru rü nüxü̃ nadau ga yema Tupanaarü orearü ngeruxü̃ ga norü taramaxã namagu chíxü̃. Rü yemacha̱xwa namana ínaxücu rü ínangemaanexü̃wa naxũ. Natürü nüma ga Balaáü̃ rü tama nüxü̃ nadau ga yema Tupanaarü orearü ngeruxü̃ rü yemaca̱x nanacua̱xi ga norü búru nax namawa naxũxü̃ca̱x.
24Rü yemaca̱x nüma ga Tupanaarü orearü ngeruxü̃ i daxũcüã̱x rü yema nama íxãxtapü̱xanexü̃gu rü íyaxi̱xyemaxü̃gu nayachi ga úbanecü íyixĩxü̃wa.
25Rü yema búru rü wenaxarü nüxü̃ nadau ga yema Tupanaarü orearü ngeruxü̃ i daxũcüã̱x rü yemaca̱x naxtapü̱xwaama naxĩ̱xpetü rü Balaáü̃xü̃ yéma nayaxũxtüpara. Rü nüma ga Balaáü̃ rü wenaxarü nanacua̱xi.
26Natürü nüma ga Tupanaarü orearü ngeruxü̃ i daxũcüã̱x rü nüxíra nape̱xewaama naxũ rü yema poraãcü íyaxi̱xyemaxü̃gu nayachi ga ngextá taxuwama ínaxüpetüégaxü̃wa.
27Rü yema búru rü wenaxarü nüxü̃ nadau ga yema Tupanaarü orearü ngeruxü̃ i daxũcüã̱x, rü yemaca̱x narüñuãchi yerü taxuwama naxüpetüéga. Rü yexguma ga Balaáü̃ rü nanu, rü poraãcü nanacua̱xi.
28Rü yemaca̱x ga Tupana rü nayadexaxẽxẽ ga yema búru nax Balaáü̃maxã yadexaxü̃ca̱x, rü ñanagürü: —¿Ta̱xacü cumaxã chaxü? Rü ñaamaxã rü marü tomaepü̱xcüna nixĩ nax choxü̃ cucua̱xixü̃ —ñanagürü.
29Rü nüma ga Balaáü̃ nanangãxü̃ ga norü búru rü ñanagürü nüxü̃: —¿Tü̱xcüü̃ i chaugu quidauxcüraxü̃xü̃? Rü ngẽxguma chi chaxãarü taráã̱xgux rü ñu̱xma chitama nixĩ i cuxü̃ chimáxü̃ —ñanagürü.
30Natürü ga yema búru rü ñanagürü nüxü̃: —Choma nixĩ i curü búru i guxü̃guma chautagu cuxaunagüüxü̃ ega ngextá cuxũũxgu. Cuma rü meama nüxü̃ cucua̱x rü taguma ñuxgu ñu̱xmarüxü̃ cumaxã chixĩ —ñanagürü. Rü nüma ga Balaáü̃ rü nanangãxü̃ rü: —Aixcüma nixĩ i ngẽma —ñanagürü.
31Rü yemaca̱x ga Cori ya Tupana rü Balaáü̃xü̃ nüxü̃ nadauxẽxẽ ga yema norü orearü ngeruxü̃ i daxũcüã̱x ga namaarü ngãxü̃gu chíxü̃ norü taramaxã. Rü yemaxü̃ nada̱u̱xgu ga Balaáü̃ rü ñaxtüanegu nanangücuchi.
32Natürü ga Tupanaarü orearü ngeruxü̃ i daxũcüã̱x rü Balaáü̃xü̃ ñanagürü: —¿Tü̱xcüü̃ tomaepü̱xcüna cuyama̱x i ngẽma curü búru? Rü choma nixĩ i cuxü̃ chichiyepe̱e̱xü̃, erü ngẽma ngéma nax cuxũxü̃ rü tama chorü me nixĩ.
33Rü ngẽma curü búru rü choxü̃ nadau rü ngẽmaca̱x tomaepü̱xcüna choxü̃ ínaxüeguãchi. Rü ngẽxguma chi taxũchima choxü̃ ínaxüeguãchigu, rü marü chi cuxü̃ chiima̱x natürü ngẽma curü búru rü chi chanamaxẽxẽ —ñanagürü.
34Rü nüma ga Balaáü̃ rü Tupanaarü orearü ngeruü̃xü̃ nangãxü̃ rü ñanagürü: —Chixexü̃ chaxü erü tama nüxü̃ chacua̱x nax cuma yixĩxü̃ i choxü̃ quichiyepe̱e̱xü̃. Rü ngẽxguma cuxca̱x nachixegu nax ngéma chaxũxü̃ rü tá chataegu —ñanagürü.
35Natürü ga Tupanaarü orearü ngeruxü̃ i daxũcüã̱x rü nanangãxü̃ rü ñanagürü: —Marü name i nawe curüxũ i ngẽma yatügü, natürü ngẽma cumaxã nüxü̃ chixuxü̃xica tátama nixĩ i nüxü̃ quixuxü̃ —ñanagürü. Rü yemaca̱x ga Balaáü̃ rü nawe narüxũ ga yema ãẽ̱xgacügü ga Baláx yéma mugüxü̃.
Baláx rü mea Balaáü̃xü̃ nayaxu
36Rü yexguma Baláx nüxü̃ cuáchigagu ga Balaáü̃ nax yangaicaxü̃, rü nüma ga Baláx rü inaxũãchi nax Balaáü̃xü̃ nayaxuxü̃ca̱x. Rü wüxi ga ĩane ga Moáanecüã̱xgüarügu nüxü̃ nangau. Rü guma ĩane rü natü ga Arnóü̃cutüwa nayexma ga Moáchixü̃anearü üyeanewa.
37Rü ñanagürü nüxü̃: —Muẽ̱xpü̱xcüna chanamu nax cuxca̱x yacagüxü̃ca̱x. ¿Rü ta̱xacüca̱x i tama nua cuxũxchaü̃xü̃? ¿Ẽ̱xna nagu curüxĩnü rü taxũchima mea cuxü̃ chayaxu? —ñanagürü.
38Rü nüma ga Balaáü̃ rü nanangãxü̃ rü ñanagürü: —Dücax, marü nua chaxũ nax cuxü̃ íchayadauxü̃ca̱x. Natürü i choma rü choxü̃́ nataxu i pora nax chauechamatama ta̱xacürü orexü̃ chixuxü̃ca̱x. Erü choma rü ngẽma Tupana chomaxã nüxü̃ ixuxü̃xicatama tá nixĩ i nüxü̃ chixuxü̃ —ñanagürü.
39Rü nüma ga Balaáü̃ rü ãẽ̱xgacü ga Baláxwe narüxũ ñu̱xmata Quiriáx-uchúwa nangugü.
40Rü yéma ga Baláx rü norü duü̃xü̃güxü̃ namu nax wocagü rü carnérugü nada̱i̱xü̃ca̱x. Rü ñu̱xũchi Balaáü̃xü̃tawa rü yema togü ga ãẽ̱xgacügü ga íyaxümücügüxü̃tawa nanamugü ga ñuxre ga namachi nax nüxna naxãgüãxü̃ca̱x.
41Rü moxü̃ãcü rü nüma ga Baláx rü Balaáü̃xü̃ ínayadau. Rü ma̱xpǘne ga Bamóx-baágu nanaxĩnagüxẽxẽ nax yéma nüxü̃ nadauxü̃ca̱x ga Iraétanüxü̃ íyexmagüxü̃wa.
Šiuo metu pasirinkta:
Iraétanüxü̃arü muxchiga 22: tcaP
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2022, Wycliffe Bible Translators, Inc. All rights reserved.