Lebítanüxü̃arü puracüchiga 26
26
Ngü̃xẽxẽ naxca̱x i ngẽma duü̃xü̃gü i Cori ya Tupanaga ĩnüexü̃
(Dt. 7.12-24; 28.1-14)
1¡Taxũtáma ta̱xacü pegüca̱x pexüchicüna̱xãgü nax ngẽmaxü̃ picua̱xüü̃güxü̃ca̱x! ¡Rü taxũtáma pegüca̱x ípenatoxẽxẽxü̃ ya nutagü rüe̱xna penaxümatüxü̃ i nutagü nax nape̱xegu pecaxã́pü̱xügüxü̃ca̱x rü nüxü̃ picua̱xüü̃güxü̃ca̱x! Erü choma nixĩ ya perü Cori ya Tupana chixĩxü̃.
2¡Rü penaxaure i chorü ngü̃xchigaarü ngunexü̃gü, rü nüxü̃ pengechaü̃ ya yima chopata! Choma nixĩ i Cori ya Tupana chixĩxü̃.
3-4Rü ngẽxguma nagu pexĩxgu i chorü ucu̱xẽgü rü peyanguxẽẽgu rü nagu pemaxẽgu i chorü mugü, rü choma rü ngẽxguma norü ngunexü̃wa nanguxgu rü tá pexca̱x chanapuxẽxẽ, rü ngẽma naane rü nanetügü i nawa ngẽxmagüxü̃ rü tá nixo.
5Rü ngẽma tríguarü buxu rü tá úbaarü buxuwa nangu, rü ngẽma úbaarü buxu rü tá toearü ngunexü̃wa nangu. Rü paũmaxã tá pixãwemü ñu̱xmata mea pingãxpütüwegü. Rü taxuxü̃táma i ta̱xacü pexü̃ nachixewe i pechixü̃anewa.
6Rü pechixü̃anewa rü tá petaãẽgü. Rü ngẽxguma pepeegu rü taxuca̱xtama pemuü̃e, erü ngẽma naeü̃gü i düraexü̃ rü tá pexna chayaxĩgachitanüxẽxẽ. Rü pechixü̃anewa rü nataxutama i dai.
7Rü pema rü tá peyabuxmüxẽxẽ i perü uanügü, rü taramaxã tá penadai.
8Rü wüxime̱e̱xpü̱x i pema rü tá peyabuxmüxẽxẽ i 100 i perü uanügü. Rü 100 i pema rü tá peyabuxmüxẽxẽ i 10,000 i perü uanügü. Rü perü taramaxã tá penadai i perü uanügü.
9Rü choma rü tá peétüwa chaxü rü tá pexü̃ charüngü̃xẽxẽ. Rü tá pexü̃ chimuxẽxẽ. Rü tá pemaxã chayanguxẽxẽ i ngẽma uneta ga pemaxã chaxueguxü̃.
10Rü ngẽma trigu ya taunecü ya ngupetücügu perü trigupatagu penutaque̱xexü̃ tá pengõ̱xgü. Rü ngẽma íyaxüxü̃ rü tá ípenanuxü̃ nax ngẽma ngexwaca pebuxuxü̃ i trigu rü yimá perü trigupatagu penuxü̃ca̱x.
11Rü choma rü petanüwa tá chamaxü̃ rü taxũtáma pexü̃ chaxo.
12Rü guxü̃gutáma petanügu ícharüxũũxü̃. Rü choma rü perü Cori tá chixĩ rü pema rü chorü duü̃xü̃gü tá pixĩgü.
13Rü choma nixĩ i perü Cori ya Tupana ga Equítuanewa pexü̃ íchagaxü̃xü̃ nax tama yexü̃cürü naxme̱xwa pengẽxmagüxü̃ca̱x. Rü choma nixĩ ga pexü̃ íchanguxü̃xẽẽxü̃ nawa ga yema taxü̃ ga guxchaxü̃ ga peétüwa yexmaxü̃. Rü ngẽmaca̱x i ñu̱xma rü taxúexü̃ma pemuü̃e.
Poxcu naxca̱x i ngẽma tama Cori ya Tupanaga ĩnüexü̃
(Dt. 28.15-68)
14-16Natürü ngẽxguma tama chauga pexĩnüegu, rü tama nagu pemaxẽgu i chorü mugü, rü tama penaya̱xu̱xgu rü pexü̃́ nawa̱xtümüü̃gu i chorü mugü, rü tama aixcüma chorü mugü pingu̱xẽẽgu, rü taxuwama pexü̃́ namexgu i chorü uneta, rü choma rü tá pexü̃ chapoxcu. Rü tá pexca̱x íchananguxẽxẽ i taxü̃ i ãũcümaxü̃gü, rü da̱xaweane i nawa iyuxü̃, rü axü̃ne, rü naxetüarü da̱xaweane, rü turaxüne. Rü taxuwatáma pexü̃́ name ega petoegügu, erü perü uanügü tá nanangõ̱x i ngẽma penetüarü o.
17Rü choma rü tá pemaxã charüxuanü, rü perü uanügü rü tá pexü̃ narüporamae, rü tá pemaxã inacua̱x i ngẽma pexchi aiexü̃. Rü pema rü tá naxcha̱xwa pibuxmü woo taxuxü̃ma pewe ngẽgügu.
18Rü naétü nax ngẽma pexü̃ ngupetüxü̃, rü ngẽxguma tama chauga pexĩnü̃egu, rü choma rü 7 e̱xpü̱xcüna tá wena pexü̃ chapoxcue naxca̱x i perü pecadugü.
19Rü ngẽxguma pegü picua̱xüü̃güamagu rü choma rü yexera tá guxchaxü̃ pexca̱x íchanguxẽxẽ. Rü tá chanamu nax tama napuxü̃ca̱x nax ngẽmaãcü tama naxoxü̃ca̱x i penetügü i peanewa ngẽxmagüxü̃.
20Rü natüca̱xmamare tá peanewa pepuracüe, erü taxũtáma ngẽma waixü̃müwa narüxü i penetügü. Rü ngẽma ori̱xgü i peanewa rüxügüxü̃ rü taxũtáma nixo.
21Rü ngẽxguma peyadaxẽẽgu nax tama chauga pexĩnüexü̃, rü choma rü wena tá 7 e̱xpü̱xcüna pexü̃ chapoxcue naxca̱x i ngẽma pecadugü i pexüxü̃.
22Rü tá pexca̱x íchayachoõchixẽxẽ i naeü̃gü i düraexü̃ nax pexacügüxü̃ nangõ̱xcuxü̃ca̱x rü ngẽmaãcü pingexacügüxü̃ca̱x. Rü perü wocagügu tá nawagüe, rü pegu tá nawagüe ñu̱xmatáta pigú rü ngẽmaãcü taxúetama namagu tixũ.
23-24Rü woo ngẽma guxchaxü̃ pexca̱x ínguxgu tama ipexĩnüegu rü chomaxã penueamagu, rü choma rü tá ta pemaxã chanu. Rü 7 e̱xpü̱xcüna tá pexü̃ chapoxcue naxca̱x i ngẽma pecadugü i pexüxü̃.
25Rü tá pexca̱x íchayaxüãchixẽxẽ i perü uanügü nax norü taramaxã pexü̃ nada̱i̱xü̃ca̱x, yerü tama naga pexĩnüe i ngẽma uneta ga pemaxã chaxüxü̃. Rü pema rü tá yima perü ĩanegü ya cu̱xchicaxü̃ruü̃ca̱x pibuxmü, natürü i choma rü tá ngéma pexca̱x chanamu i da̱xaweane. Rü ngẽmaãcü tá perü uanügüme̱xẽgu peyi.
26Rü ngẽxguma guxchaxü̃ naxca̱x íchanguxẽẽgu i penetügü, rü tá nanoxretama i perü paũ. Rü 10 i ngexü̃gü rü wüxitama i paũarü guruü̃wa tá nayagugü i perü paũ. Rü ngẽma nax nanoxrexü̃ i perü paũ rü tá pexü̃ nixírachigü, rü ngẽmaca̱x taxũtáma pengãxpütüwegü.
27-28Rü woo ngẽma guxchaxü̃ pexca̱x ínguxgu tama chauga pexĩnüegu rü chomaxã penueamagu, rü choma rü tá ta pemaxã chanuama. Rü 7 e̱xpü̱xcüna tá pexü̃ chapoxcue naxca̱x i ngẽma pecadugü i pexüxü̃.
29Rü ngẽxguma i pema rü perü taiyamaxã tá penegümaxã rü pexacümaxã pexãwemügü.
30Rü choma rü tá nagu chipogügü i ngẽma nachicagü i nawa perü tupananetaxü̃ picua̱xüü̃güxü̃. Rü taxregu tá chanamate i perü pumarate̱xearü guruü̃gü. Rü wüxigu tá chananutaque̱xe i pexene i yuexü̃ naétügu i ngẽma tupanachicüna̱xãgü i ngearü maxü̃ã́xü̃. Rü ngẽmawa tá pexü̃ chanawe̱x nax pexü̃ chaxoxü̃.
31Rü tá nagu chipogügü i perü ĩanegü rü nachitaxü̃güxica tá ngéma nayaxügü. Rü ngẽxgumarüxü̃ tá ta nagu chipogügü i ngẽma nachicagü i nawa perü tupananetaxü̃ picua̱xüü̃güxü̃. Rü taxũtáma namaxã chataãxẽ i naema i ngẽma pumarate̱xe i cha̱u̱xca̱x pigugüxü̃.
32Rü tá chanachixexẽxẽ i pechixü̃ane rü ngẽmaãcü i perü uanügü i nagu ãpatagüchaü̃xü̃ rü tá namaxã naba̱i̱xãchie
33Rü pema rü togü i nachixü̃anegu tá pexü̃ chawoone. Rü chorü taramaxã tá pewe chingẽchigü. Rü ngẽma pechixü̃ane rü tá chianexü̃xü̃ chayaxĩxẽxẽ. Rü perü ĩanegü rü nachitaxü̃xica tá ínayaxügü.
34Rü ngẽxguma ngẽma perü uanügüchixü̃anewa pengẽxmagüyane rü perü naane rü tá nangearü duü̃xü̃güã̱x rü tá inarüngü̃. Rü ngẽmaãcü tá nanayauxtanü ga gumá taunecügü ga nagu taguma inangü̃cü.
35Rü ngẽxguma nangearü duü̃xü̃güã̱xgu rü ngẽma naane rü tá inarüngü̃, erü yexguma pema nawa peyexmagüyane rü taguma ipenangü̃xẽxẽ.
36Rü ñuxre i pema i perü uanügüanewa maxẽãcü ngẽxmagüxe, rü tá muü̃ pexca̱x íchanguxẽxẽ. Rü ngẽxguma wüxi i naixatü rünguxgu rü nagacha̱xwa tá pibuxmü, ñoma taramaxã pewe nangẽgüxü̃rüxü̃. Rü tá ipeyayi woo taxuxü̃ma pewe ngẽgügu.
37Rü ñoma perü uanügüarü taracha̱xwa pibuxmüxü̃rüxü̃, rü pema rü perü muü̃maxã tá pegümaxã perübuxmü woo taxuxü̃ma pewe ngẽgügu. Rü pema rü taxũtáma peporae nax perü uanügümaxã pegü pedaixü̃.
38Rü ngẽma nachixü̃anegü i nawa pexü̃ nagagüxü̃gu tá peyue, rü ngẽxma tá pexü̃ nata̱xgü.
39Rü pema nax ngéma peyaxügüxü̃ rü pemaxẽxü̃ nawa i perü uanügüarü naane, rü perü chixexü̃gagu tá peyue. Rü wüxigu penatügümaxã tá peyue nagagu i norü pecadugü.
40-42Natürü ngẽxguma chope̱xewa nüxü̃ pixuxgu i perü chixexü̃ rü penatügüarü chixexü̃, rü yema nax tama chauga pexĩnüexü̃ rü chomaxã perüxuanügüxü̃, rü yema chixexü̃güca̱x perü uanügüarü naanewa pexü̃ chawogü, natürü ngẽxguma chi chopexegu pegü íperüxíragügu rü chi nüxü̃ picua̱xãchiegu i perü pecadugü, rü ngẽxguma i choma rü tá nüxna chacua̱xãchi ga yema uneta ga Acóbumaxã, rü Ichaámaxã, rü Abraáü̃maxã chaxüxü̃. Rü ngẽxgumarüxü̃ tá ta nüxna chacua̱xãchi i ngẽma naane ga noxri pexna chaxãxü̃ nax mexü̃ tá namaxã chaxueguxü̃.
43Rü ngẽxguma tama perü naanewa pengẽxmagüyane, rü ngẽma naane rü tá inarüngü̃. Natürü i pema rü tá penaxütanü i perü pecadu, yerü nüxü̃ pexo ga chorü ucu̱xẽgü rü naxchi pexai ga chorü mugü.
44Natürü woo ngẽma perü guxchaxü̃gügagu perü uanügüchixü̃anewa nax pengẽxmagüxü̃, rü choma rü tama choxü̃́ pewa̱xtümüü̃ rü tama pexü̃ chaxo. Rü ngẽmaca̱x taxũtáma pexü̃ chadai rü taxũtáma íchayanaxoxẽxẽ ga yema uneta ga perü o̱xigümaxã chaxüxü̃, erü choma nixĩ i perü Cori ya perü Tupana chixĩxü̃.
45Rü choma rü tá nüxna chacua̱xãchi ga yema uneta ga perü o̱xigümaxã chaxüxü̃ ga yexguma yema togü ga nachixü̃anegüpe̱xewa Equítuanewa íchagaxü̃gu nax norü Tupana chixĩxü̃ca̱x. Choma nixĩ i perü Cori ya perü Tupana chixĩxü̃” —ñanagürü.
46Rü yema nixĩ ga yema mugü, rü ucu̱xẽgü rü ngu̱xẽẽtaegü ga Moichéwa Iraétanüxü̃maxã nüxü̃ yaxuxü̃ ga Cori ya Tupana ga ma̱xpǘne ga Chinaíwa.
Šiuo metu pasirinkta:
Lebítanüxü̃arü puracüchiga 26: tcaP
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2022, Wycliffe Bible Translators, Inc. All rights reserved.