Lebítanüxü̃arü puracüchiga 24
24
Chíxü̃ i omü namaxã inaixü̃
(Éx. 27.20-21)
1Rü nüma ga Cori ya Tupana rü Moichémaxã nidexa rü ñanagürü nüxü̃:
2—¡Iraétanüxü̃xü̃ namu nax cuxü̃tawa nangegüãxü̃ca̱x i oribuarü chíxü̃ nax ngẽmamaxã guxü̃guma nanaigüxü̃ca̱x i ngẽma chopataarü omügü!
3Rü Aróü̃ tá nixĩ i nüxna dauxü̃ i ngẽma omügü, nax guxü̃ma i chütaxü̃gu nanaigüxü̃ca̱x rü taguma chope̱xewa yaxõgüxü̃ca̱x i chopatawa. Rü ngẽmaãcü guxü̃gutáma nangóone i chopata nape̱xewa i ngẽma tüyemachixü̃ i chorü mugüchixü̃pe̱xegu itüyexü̃. Rü ngẽma pemaxã nüxü̃ chixuxü̃ i mu tá nixĩ i guxü̃gutáma nagu pexĩxü̃ i pema rü penegü rü petaagü.
4Rü ngẽma omüpaweru i úiruxüchinaxca̱xwa ngẽxmagüxü̃ i omügü, rü Aróü̃ tá nixĩ i nüxna dauxü̃ nax ngẽmaãcü guxü̃guma chope̱xewa nanaigüxü̃ca̱x.
Paũgü i Cori ya Tupanape̱xegu nuxü̃
5¡Rü nayaxu i ngẽma rümemaexü̃ i trigute̱xe rü ngẽmawa naxü i 12 i paũ i maixcuraxü̃ i ãgümücü i quíruarü ngãxü̃ yáxü̃ i wüxichigü!
6¡Rü ngẽma chope̱xewa ngẽxmaxü̃ i mecha i úiruxica ixĩxü̃, rü ngẽmaétügu taxretücumügu yanu i ngẽma paũ! Rü ngẽmaãcü wüxitücumüchigü rü tá nüxü̃́ nangẽxma i 6 i paũ.
7¡Rü wüxitücumüchigü i paũcüwagu nagü i pumarate̱xe i nüxica ixĩxü̃! Rü ngẽma pumarate̱xe tá nixĩ i wüxi i ãmare i cha̱u̱xca̱x piguxü̃ nax pexna chacua̱xãchixü̃ca̱x.
8Rü nüma i chacherdóte rü guxü̃ma i ngü̃chigaarü ngunexü̃gu chope̱xegu tá nayanu i ngẽma paũ. Erü nüma ya chacherdóte nixĩ i Iraétanüxü̃égagu choxna naxããxü̃ i ngẽma paũ. Rü ngẽma tá nixĩ i wüxi i uneta i guxü̃gutáma ixĩxü̃.
9Rü ngẽma tá nixĩ i Aróü̃arü rü nanegüarü rü nataagüarü puracü i guxü̃gutáma naxügüxü̃. Rü nümagü tá nixĩ i nangõ̱xgüãxü̃ i ngẽma paũ nawa i wüxi i nachica i üünexü̃, erü natanüwa i guxü̃ma i ãmaregü i cha̱u̱xca̱x iguxü̃ rü ngẽma paũ nixĩ i yexera rüxüünemaexü̃ —ñanagürü.
Poxcu naxca̱x i wüxi i yatü i Cori ya Tupanape̱xewa chixexü̃ ixugüxü̃
10-11Rü Iraétanüxü̃tanüwa rü nayexma ga wüxi ga yatü ga naé Iraétanüxü̃ ixĩxẽ rü nanatü rü Equítuanecüã̱x ixĩcü. Rü naé rü Cheromíx nixĩ ga ngĩéga, rü Dibirí nixĩ ga ngĩnatü ga Dáü̃tanüxü̃ ixĩcü. Rü yema yatü rü yema ínapegüxü̃wa wüxi ga Iraétanüxü̃maxã narüxutagagü. Rü Tupanachiga chixexü̃ nixugü, rü yemaca̱x Moichéxü̃tawa nanagagü.
12Rü poxcupataü̃gu nanamugü ñu̱xmata Cori ya Tupana Moichémaxã nüxü̃ ixu i ta̱xacü tá namaxã naxüxü̃.
13Rü Cori ya Tupana rü Moichémaxã nidexa rü ñanagürü nüxü̃:
14—¡Ngẽma ípepegüxü̃wa ínata̱xüchi i ngẽma yatü i chixexü̃ chauchiga ixugüxü̃! Rü guxü̃ma i ngẽma duü̃xü̃gü i nüxü̃ ĩnüexü̃ nax chixexü̃ chauchiga yaxugüxü̃ rü naerugu tá nanuxme̱x. ¡Rü ngẽmawena rü nutamaxã ípenamuxũchi ñu̱xmata nayu̱x!
15-16¡Iraétanüxü̃maxã nüxü̃ ixu i ñaa chorü ore!: “Ngẽma chauégamaxã chixexü̃ ixugüxü̃, rü ngẽma norü pecadugagu tá nutamaxã ínanamuxũchigü i guxü̃ma i ngẽma ĩanecüã̱x i duü̃xü̃gü ñu̱xmata nayu̱x. Rü woo chi to i nachixü̃anecüã̱x yixĩxgu rüe̱xna wüxi i Iraéanecüã̱x yixĩxgu i chauégamaxã chixexü̃ ixugüxü̃, rü yu tá namaxã pexuegugü.
17Rü ngẽma máetaxü̃, rü yu tá namaxã pexuegu.
18Rü ngẽma duü̃xü̃ i wüxi i naxü̃na i tama noxrü ixĩxü̃ imáxü̃, rü naxü̃namaxã tá nanatáeguxẽxẽ.
19Rü ngẽma duü̃xü̃ i namücüxü̃ napi̱xẽẽxü̃, rü ngẽxgumarüxü̃ tá ta nanapi̱x i nümax.
20Rü ngẽxguma texé wüxíexü̃ ibüyechacüügu rü ngẽxgumarüxü̃ tá ta tüxü̃ nibüyechacüügü. Rü ngẽxguma texé wüxíexü̃ ichaixetüxẽẽgu rü tüxü̃ rü tá ta nicháixetüxẽxẽgü. Rü ngẽxguma texé wüxíexü̃ ibüepütagu rü tüxü̃ rü tá ta nibüepütaxü̃gü. Rü ngẽmaãcü ngẽmatama ngúxü̃ i toguxexü̃ tingexẽẽxü̃ rü tüma rü tá ta nayange.
21Rü ngẽma duü̃xü̃ i wüxi i naxü̃na i tama norü ixĩxü̃ imáxü̃, rü naxü̃namaxã tá natáeguxẽxẽ. Rü ngẽma duü̃xü̃ i to i duü̃xü̃xü̃ imáxü̃, rü yu tá namaxã naxuegu.
22Rü ngẽma mu tá nixĩ i nagu pexĩxü̃, Pa Iraétanüxü̃x, rü ngẽmatama mu tá nixĩ i nagu naxĩxü̃ i ngẽma togü i nachixü̃anecüã̱xgü i petanügu ãpatagüxü̃. Rü choma nixĩ ya Cori i perü Tupana chixĩxü̃” —ñanagürü.
23Rü yexguma ga Moiché rü Iraétanüxü̃maxã nüxü̃ nixu ga yema Tupanaarü mu. Rü nümagü ga Iraétanüxü̃ rü yema ínapegüxü̃arü düxétüwa ínanagaxüchi ga yema yatü ga chixexü̃ Tupanachiga ixugüxü̃. Rü nutamaxã ínamuxũchigüãcü nayama̱xgü. Rü yemaacü ga Iraétanüxü̃ rü yema Cori ya Tupana Moichémaxã nüxü̃ ixuxü̃ãcü yema yatüxü̃ nima̱xgü.
Šiuo metu pasirinkta:
Lebítanüxü̃arü puracüchiga 24: tcaP
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2022, Wycliffe Bible Translators, Inc. All rights reserved.