Lebítanüxü̃arü puracüchiga 21
21
Mugü i chacherdótegüca̱x ixĩxü̃
1Rü Cori ya Tupana rü Moichéxü̃ ñanagürü: —¡Namaxã idexa i ngẽma chacherdótegü i Aróü̃ nataagü, rü namaxã nüxü̃ ixu rü tama name nax wüxi i natanüxü̃ i yuxü̃xü̃ yangógügüxü̃, rü ngẽmaãcü nax nügü yaxãũxãchixẽxẽxü̃!
2-3Natürü marü name nax tüxü̃ yangógügüxü̃ ega wüxi i natanüxü̃xüchi tixĩxgu ngẽxgumarüxü̃ ya norü mama, rüe̱xna norü papa, rüe̱xna nane, rüe̱xna naxacü, rüe̱xna naenexẽ, rüe̱xna naeya̱x i taguma ãtecü i nanatüpatawatama maxü̃cü. Rü ngẽxgumaxicatama nixĩ i namexü̃ nax nügü yaxãũxãchixẽẽxü̃, erü natanüxü̃xüchi tixĩ.
4Rü nümagü i chacherdótegü rü choma ichanamugü nax duü̃xü̃gümaxã inacua̱xgüxü̃ca̱x, rü ngẽmaca̱x tama name nax nüxü̃ yangógügüxü̃ i wüxi i yuxü̃ i tama natanüxü̃xüchi ixĩxü̃ nax ngẽmaãcü tama nügü yaxãũxãchixẽẽgüxü̃ca̱x.
5Rü ngẽma chacherdótegü rü ngẽxguma nayu̱xgu i wüxi i natanüxü̃ rü tama name nax togürüxü̃ norü ngechaü̃maxã nügü yadügüeruxü̃, rü nügü yadüxchinagugüxü̃, rü nügü napi̱xẽẽgüxü̃ i naxü̃negüwa.
6Rü ngẽma chacherdótegü rü name nax aixcüma Tupanana nügü naxãgüxü̃ rü nügüna nadaugüxü̃ nax tama naxãũãchigüãxü̃ca̱x i Tupanaéga. Erü nümagü nixĩ i Tupanana naxãgüãxü̃ i ãmaregü i igugüxü̃ rü paũ i Tupanaca̱x ixĩxü̃, rü ngẽmaca̱x name nax guxü̃guma Tupanape̱xewa nügüna nadaugüxü̃ nax tama yaxãũãchigüxü̃ca̱x.
7Rü ngẽma chacherdótegü rü tama name nax wüxi i ngexü̃ i naxü̃nemaxã taxexü̃maxã naxãmaxü̃, rü woo wüxi i ngecü i yatüxü̃ ngĩxü̃ yauxmareãcü ngĩxü̃ne cuáxcümaxã naxãmaxü̃, rüe̱xna wüxi i ngecü i íta̱xtecümaxã naxãmaxü̃, erü nümagü i ngẽma chacherdótegü rü Tupana nüxü̃ naxunetagü nax norü puracü naxügüxü̃ca̱x.
8Rü cupe̱xewa naxüüne i ngẽma chacherdóte, erü nüma nixĩ i choxna naxããxü̃ i ngẽma paũ i üünexü̃ i cha̱u̱xca̱x ixĩxü̃. Rü tá cuxca̱x naxüüne i ngẽma chacherdóte, erü choma ya Cori ya Tupana rü chaxüüne. Rü choma nixĩ i chaxunetaxü̃ i ngẽma chacherdóte nax chope̱xewa naxüünexü̃ca̱x.
9Rü ngẽxguma wüxi i chacherdótexacü rü ngexü̃ i naxü̃nemaxã taxexü̃ãcü namaxü̃gu, rü tama ngĩgü ingechaü̃ rü tama ngĩnatüxü̃ ingechaü̃. Rü name i noxtacüma maxãcü ngĩxü̃ pigu.
10Rü nüma i chacherdótegüarü ãẽ̱xgacü i marü chíxü̃ i üünexü̃maxã baeruxü̃ rü nagu icúxü̃ i ngẽma naxchiru i üünexü̃, rü ngẽxguma nayutanügu rü tama name nax nügü ínangegüeruxü̃ rü naxchirugu nagáugüxü̃.
11Rü nüma i chacherdótegüarü ãẽ̱xgacü rü taxũtáma nagu naxücu i wüxi i nachica i wüxi i yuxü̃ nawa ngẽxmaxü̃ rü woo nanatü rüe̱xna norü mama tixĩxgu nax tayuxü̃. Rü ngẽmaãcü taxũtáma wüxi i yuxü̃gagu nügü naxãũãchixẽxẽ.
12Rü taxũtáma chopatawa ínaxũxũ rü taxũtáma ngẽmaãcü wüxi i yuxü̃gagu nanaxãũãchixẽxẽ ya yima chopata. Erü nüma rü marü chíxü̃ i üünexü̃maxã nabaeru nax chorü puracü naxüxü̃ca̱x. Rü choma ya Cori ya Tupana nixĩ i nüxü̃ chixuxü̃ i ngẽma.
13Rü ngẽxguma naxãxma̱xgu rü name nax ngecü i taguma yatü ngĩxü̃ne cua̱xcümaxã nax naxãmaxü̃.
14-15Rü nüma i chacherdótegüarü ãẽ̱xgacü rü tama name nax ngecü i yutecümaxã rüe̱xna íta̱xtecümaxã naxãmaxü̃. Rü tama name nax ngĩmaxã naxãmaxü̃ i wüxi i nge i yatü ngĩxü̃ iyauxmarecü naxü̃ne cua̱xcü rüe̱xna wüxi i ngexü̃ i naxü̃nemaxã taxexü̃maxã naxãmaxü̃. Rü ngẽxguma naxãxma̱xgu rü name nax ngĩmaxã naxãmaxü̃ i wüxi i nge i taguma yatü ngĩxü̃ne cua̱xcü. Rü name nax natücumücüã̱xmaxã naxãmaxü̃ nax tama duü̃xü̃güpe̱xewa nagu yanachixexü̃ca̱x i nataagü, erü choma ya Cori ya Tupana nixĩ i nüxü̃ chaxunetaxü̃ nax chacherdótearü ãẽ̱xgacü yixĩxü̃ca̱x —ñanagürü.
Name nax taxuwama nachixexü̃ i chacherdótegü
16Rü nüma ga Cori ya Tupana rü Moichémaxã nidexa rü ñanagürü:
17—¡Aróü̃maxã nüxü̃ ixu, rü ngẽma nataagü i naxü̃newa nüxü̃́ nangẽxmaxü̃ i ta̱xacürü chixexü̃ rü taxũtáma choxna nanaxã i ngẽma paũ i cha̱u̱xca̱x ixĩxü̃!
18-20Rü aixcüma tama name ya yíxema tümaxü̃newa chixéxe nax choxna ãmare taxãxü̃ ngẽxgumarüxü̃ ya yíxema ngexetüxe, rüe̱xna chixri ixũxẽ rüe̱xna chixeráü̃xẽ, rüe̱xna chixepachinüxẽ, rüe̱xna ibüyeparaxe, rüe̱xna ibüyechacüüxe, rüe̱xna püca̱xwéxe, rüe̱xna nũxchanexü̃chixe, rüe̱xna tauxetüxe, rüe̱xna churiã́xẽ, rüe̱xna rüxo̱xõnexẽ, rüe̱xna chixepü̱xüchareéxe.
21Rü ngẽmaãcü taxuxü̃táma i Aróü̃taxa i naxü̃newa chixexü̃ rü ãmare i guxü̃ Tupanana naxã, erü naxü̃newa rü nachixe. Rü ngẽmaca̱x taxucürüwama ãmare i paũ Tupanana nayaxã.
22Natürü name nax tanangṍxü̃ i ngẽma paũ rü naguxü̃raü̃xü̃ i õna i üünexü̃ rü Üünexüchixü̃.
23Natürü taxucürüwama nüxü̃ naxüpetü i ngẽma tüyemachiãruxü̃ rü taxucürüwama nüxna nangaicama i ãmarearü guruxü̃ nax tama ngẽmaãcü naxãũãchixẽẽãxü̃ca̱x ya chopata. Erü ngẽma chacherdótegü rü choma i Cori ya Tupana nixĩ i nüxü̃ chaxunetaxü̃ chorü puracüca̱x —ñanagürü.
24Rü Moiché rü yema Tupana namaxã nüxü̃ ixuxü̃ãcütama Aróü̃maxã, rü nanegümaxã rü guxü̃ma i Iraétanüxü̃maxã nüxü̃ nixu.
Šiuo metu pasirinkta:
Lebítanüxü̃arü puracüchiga 21: tcaP
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2022, Wycliffe Bible Translators, Inc. All rights reserved.