Ayịzaya 24
24
KỊNỊNYANAḄỌ Ḅe Fomu ḅara Kẹ Tomikiri Mẹ Pịrị ḅa
1KỊNỊNYANAḄỌ ḅe tomikiri mẹ sima fama tẹ gbọrụ tomḅọ sọ ofori ḅara kẹ anị kẹ gbin koroma ḅa. Ori anị kẹ pikiri, pikiri ḅara wẹrị tẹ anị ḅẹ atomi ma gala-galama ḅa. 2Tomḅọ goḅọ-goḅọ, gbọrụ siye mẹ mie mḅọ ḅụ paka ḅarịye — agbamịẹapụ ma na tomi ma na, omoniapụ na ịn nyana apụ na, fẹ-apụ na dẹrị-apụ na, igbigi kẹ kịnị ḅọlọarị apụ na igbigi ḅọlọ apụ na, ngọ-kọn apụ na igoin-apụ na. 3In tomikiri mẹ sima kọsịma tẹ anị fama ḅa. KỊNỊNYANAḄỌ ḅe ḍuko tẹ, anị mịẹ ḅa.
4Kiri mẹ samụnọ-kpakịkị tẹ anị ḅụ so-paka aị kpatụarị; ịnyọ bebe tomikiri mẹ ḅụ faarị; kiri mẹ na So-tọrụ mẹ na, ma maaịn ma, si tọrọkọ, tọrọkọ muarị. 5Tomi ma kiri mẹ pilema tẹ, Tamụnọ oloko ma kan ḅụ, pịkị ori Ọḅọkụ mẹ tẹ sime-gbamaso ḅẹ ye mẹ sima ḅụ. 6Mie ḅụ Tamụnọ kiri mẹ wori tẹ. Anị ḅẹ atomi ma ịn mịẹ ye dogi-ḅo ye gbarị. Ḍumo simearị apụ kịẹn-ḅịḅị ideri, ideri, ideriarị. 7Kụrọ mgbọlụ ma kpatụarị, tẹ iru saakị kụrọarị. Gbọrụ sakị ḅioḅẹlẹ sime apụ ma ḅo mịọkụ kururu tẹ, 8tẹ mịẹ tẹ kịnị ḍereku, ḍereku ọbọ anume ma na akwa ma na kuno tẹ. 9Ḅioḅẹlẹma nume su-su tẹ iru ḅuu ḅarị ofori; jen kẹ anị ḅẹ ḅẹlẹ ḅẹ ḍereku kọn-arị gbọrụḅọ-sọ ofori. 10Ama mẹ ḅio sime ye goyegoye wọlọgị tẹ, tẹ tomi ye ḅofa ịn la gotẹ warị ḅio amịna ḅụụ ịkasị wẹrịarị. 11Tomi etela ogbo ma ḅụ iru ḅarị ofori gotẹ olokuarị. Ḅioḅẹlẹ gbọrsịḅị so tẹ; amakiri mẹ ḅụ ini anị dee-siin tẹ. 12Ama mẹ gulugulu kọsị-sara fama tẹ, anị ḅẹ onu aḅọkọ ma ini arị kaan-sara tẹ. 13Sịẹ goyegoye ḅụ, bebe tomikiri mẹ kana-koro, miemẹ paka ḅa. Anị kịka ḅarịye fịye soku sakị ḅẹ kunoma mẹ, anie olivu sịn goyegoye ḅẹ mgbọlụ mamgba in fomu sara fama sakị mẹ, tẹ Kụrọ asịn ḅẹ kunoma mgbọlụ ma sọ ịn kaịn tẹ.
14Fịị-a so apụ nume su, su ḍereku ḅa. Ịrụa-ideriarị-anga anga sime apụ ḍuko ḅa KỊNỊNYANAḄỌ ḅe ḍụḅa la ḅara, 15tẹ ịrụa saakị pakarị pakịrị anga sime apụ ò tokini ḅa. Tọrụ akaka anga apụ ma KỊNỊNYANAḄỌ ḅe tokini ḅa, Izirẹlịapụ tẹkẹarị Tamụnọ ḅe. 16Tomikiri mẹ ḅụ ala tẹịn anga ḅụ wa ini Izirẹlị tokiniarị anume naa ḅa, karakaraye mịẹ sịẹ mẹ.
Kụma yẹrị, ḅiokpọ sime ị̀ pịrị-a! À sịkịrị faarị! Kịnị kẹ tomi ḅara-ḅio dẹrịmarị apụ paa dẹrịmarị, tẹ ịna mbasị mẹ paa sii tọrọkọ-tọrọkọ muarị. 17Ọrụḅọ-ọrụḅọ ì pokii. Ḅalafama aị na, olulu ma na, ḍiein ma na sime ó koruarị. 18Ḅẹḅọ-ḅẹḅọ tẹ ḅụụkụrọma tẹ ḅalafama ye gbarị ḅọ olulu ḅio ḅịkị sọ ḅa, tẹ ḅẹḅọ-ḅẹḅọ tẹ olulu gbarị ḅọ, ḍiein mḅọ kun sịẹma ḅa. Sịkọpẹlẹ-a opu eene So-tọrụ ḅụ paịn-sara ḅa, tẹ kiri mẹ suku mẹ jike ḅa. 19Kiri mẹ gẹẹ tẹẹ; anị ḅele tẹ finji sara tẹ pịkị jikearị. 20Kiri mẹ ḅioju sọ pụmbụma-pụmbụma ḅara jike ḅa, iru ḅuu tọrụ-ḅaama wararị tomḅọ ọkụ, tẹ opu erise fẹrụ jikearị kala warị kịka ḅa. Tomikiri mẹ anị ḅẹ asi ma anị jịjịma ḅaarị; anị paịn-sara ḅa, tẹ gbala-gbala jen kẹ saakị ḅịa.
21Anị ene mẹ ḅụ, KỊNỊNYANAḄỌ ḅe fomu-ḅara kẹ ọgọnọ ḅẹ akụrọ ma na tomikiri ḅẹ ḅẹrẹtọn apụ na pịrị ḅa. 22Tamụnọ amadapụ kẹ ikoliapụ kịkama tẹ kobiri gbọrụ olulu ḅio suu ḅa. Ori ikoli ḅio ini ịkasị wẹrị nwenii ịna fomu-ḅara da sakị ḅo ḅa. 23Akalụ mẹ kanakana ḅa, tẹ ịrụa ḅarị jen kẹ ḅịya ḅịa, Kụrọmamgba nyana KỊNỊNYANAḄỌ ḅe amadaḅọ sọ ḅa gotẹ. Zayọnị tụndụ ọgọnọ mie ò sime tẹ ama-da ḅarịye Jeruselemu ḅụ, tẹ ori atomi ma sịḅịdapụ ma ori ebube ẹrị ḅa.
(C) The Bible Society of Nigeria