रोमी 16
16
प़ाइँलाई जेरो लिज़्या
1परमेस्वरए उमिनताव गेबैंनी फिबीलाई सरेसो ङापरींचिज़्या। नोए किंक्रियालाव मन्दलील परमेस्वरए ओय़ेनत यासघैज़्याव। 2जे परमेस्वरए छैंव उमींराए दाव परिन्या य़ेन दाद, प्रभुए उमिनत चावस नैच्यो, नोलाई ओचाहिज़्याव भरिल सघैच्यो। ओल ब कुधुलाई सघैद यानैव, ङालाई मनी सघैद नैनाव।
3ङास येसु ख्रीसए ओय़ेन दाज़्याव अकिलास स़ोनो प्रिस्किलानिलाई जेरो है दाद्याँच्यो। 4नोनी ङाजूँनी कोज़ाइ म़ानी निजिउ ब झाःकिनी। नोनी निगुन ङा वाज़ माःक, छुत जातलाव मन्दलीराए ब प़ाइँए ज़ चेतैज़्यार। 5नोनी निझ़िमकाव दुप्सिज़्याव मन्दलीलाई ब जेरो है दाद्याँच्यो। ङायुँलाव ङानैं इपेनितसलाई मनी जेरो लिज़्या। नो एसिया भरिल प़ाइँरानी उस॰कत ख्रीसए ओपाँत हुव मिँ ज़।
6जेजूँनी सैःसिवा जैसिद जेय़ेन दोव मरियमलाई मनी जेरो लिज़्या।
7ङास झ्यालखानाल ल्यो यहूदी ङानैं एन्द्रोनिकस स़ोनो युनियसनिलाई जेरो लिज़्या। नोनी निमिन येसुए ओसाचीराए खार्ल थासो लिज़्या। नोनी ङाकिन ङ़ादा ज़ ख्रीसलाई नियुँ हुबोनी निल्यो।
8प्रभुए उमिनताव ङायुँलाव ङानैं एम्प्लीआतसलाई जेरो लिज़्या।
9ख्रीसए जूँनी गेस य़ेन दोज़्याव उर्बानस स़ोनो ङायुँलाव ङानैं स्ताखुसलाई पाला जेरो लिज़्या।
10ख्रीसए उमिनत थ॰रिउ अपेल्लेसलाई जेरो लिज़्या। अरिस्तोबुलसए उझ़िमलावरालाई ब जेरो लिज़्या।
11यहूदी ङानैं हेरोदियनलाई जेरो लिज़्या। प्रभुलाई यायुँ हुप्ज़्याव नर्किससए उझ़िमलावरालाई जेरो लिज़्या।
12प्रभुए ओय़ेन कुधु दाज़्याव त्रुफेना स़ोनो त्रोफोसा ङाबैंनीनिलाई ब जेरो लिज़्या। परमेस्वरए ओय़ेन सैःसिवा जैसिद दोज़्याव ङायुँलाव ङाबैंनी परसीसलाई ब जेरो लिज़्या।
13प्रभुए उरूजिउ रूफसलाई स़ोनो ओआमालाई पाला जेरो लिज़्या। नोए ओआमा ङा ब ङाआमा स्यासो ज़।
14असिंक्रितस, फ्लेगन, हर्मेस, पत्रोबास, हर्मास स़ोनो नोरास लिज़्याव गेदाज्यु भाइरालाई प़ाइँलाई ज़ जेरो लिज़्या।
15फिलोलोगस, युलिया, ओलिम्पास, नेरियस, ओल ओबैंनी स़ोनो नोरास लिज़्याव परमेस्वरए छैंव उमींरालाई प़ाइँलाई जेरो लिज़्या।
16आव जेरो जे जेल ब मयास#16:16 ग्रीक खामनी — छैंव माइँ। है दासिच्यो। पो पोङाव ख्रीसए ओमन्दलीराए मनी जेरो है दाचिज़्यार।
परमेस्वरए ओपाँ बले·ज़्यावरानी जोगोइसिन्या
17अ ङानैं ङामेंर, जेस फरी ङाबिन्ती तोबो लिज़्या — फातैज़्यावरास जोगोइसिद लिच्यो। जेलाई पैसिउ परमेस्वरए ओपाँ तँदा बले·द जेयुँ जेसुहुबोलाई बले·द्याव पैंज़्यार। है जैद जे नितावरानी अछतङ लिच्यो। 18नोराए गेप्रभु ख्रीसए ओसेवा मादोर, याभूँदीए ओसेवा वाज़ दोज़्यार। यायाःत रग रग जैद लातो गाँदोरालाई याराधुतैज़्यार। 19खाली जे ते परमेस्वरए ओपाँ चावस जेदोज़्याव प़ाइँए ज़ थैद नैर। होए जूँनी जेस ङा बनै खुसी ङालिज़्या। है जैद जे चावत बनै सैंन्यार ताच्यो, माचावत जेखत माल्योर ताच्यो। 20युँ होलाँ जैद्याज़्याव परमेस्वरए चाँदो ज़ जेसुतुर सैतानलाई जेखँ धूँल रूम्द्याचिरिज़्याव। गेप्रभु येसुए गराँव उयुँ जेस ओताक।
21ङास य़ेन दोज़्याव तिमोथीए ब जेलाई जेरो है दाचिज़्याव। यहूदी ङानैंर लुकियस, यासोन स़ोनो सोसिपात्रोसराए मनी जेरो है दाचिज़्यार।
22पावलए उजूँनी आव पाँ सर्द्याज़्याव ङा तर्तियसए मनी जे प़ाइँलाई ‘प्रभुए उमिननी जेरो’ है ङादाचिज़्या।
23ङा ङालिज़्याव झ़िमए ओर्गे गायसए पाला उझ़िमलाव दुप्सिज़्याव मन्दलीरास जेलाई जेरो है दाचिज़्यार। सहरलाव कोस चलैज़्याव इरास्तस स़ोनो गेभाइ क्वार्तसनी पाला जेरो है दाचिज़्यानी।
24[गेप्रभु येसु ख्रीसए गराँव उयुँ जेस ज़ ओताक। आमेन।]
खेम्न्या असिकर
25ङा ङासथैचिज़्याव येसु ख्रीसए चाव ओथानी जेलाई परमेस्वरए ग्याल गिल मातान्या थ॰रिउ जैचिधुज़्याव। नो थात भाःकिनकाव कप्सिउ सुए ज़ यामाबुझिताव पाँर सतैंसिउ लिज़्या। 26अजम्बरीलाव परमेस्वरए ओगोइँनी ज़ प़ाइँ जातलाव मिँराए यायुँ सुहुप्द्याद नो पाँ सभैंःन्याए जूँनी नो ङ़ादाङाव सर्सिउ धर्मसास्त्रलाव पाँए ओअर्थ भरी आज्याल छर्लङ्ग ज़ रैंःद याखार्ल थास्के। 27है जैद प़ाइँ सैंज़्याव तोबोका तोबो परमेस्वरलाई येसु ख्रीसनी खर्क ज़ माखेम्न्या ज़गै मगै ओताक। आमेन।
Šiuo metu pasirinkta:
रोमी 16: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.