रोमी 10
10
1अ ङानैं ङामेंर, ङा ङाभेरा यहूदीराए जूँनी पोंखारिद, ‘परमेस्वरनी बाँचिउ यादैकिन ताखेहो’ है ङालिज़्या। 2नोर परमेस्वरए ल्योदा बान्या बनै धामा दोज़्यार लिन्या ते ङासैंज़्या। खाली चावस माबुझिद अऩाकल ज़ दोज़्यार। 3परमेस्वरए मिँरालाई ओल्योदा ओरासखैज़्याव येम माप़ाल्धुद यानी ज़ सखैसिउ पैंद परमेस्वरए ओयेमल माहुकेर। 4ख्रीसए ओय़ेन उसुदुमोए कानुननी बान्या येम तुपिके। है जैद ओललाई यायुँ हुप्ज़्याव भरी ते परमेस्वरस खैवर ताज़्यार।
5कानुनलाव य़ेननी परमेस्वरस खैन्याए जूँनी मोसाए अइ लिद सर्द नैव,
“कानुनलाव य़ेन माबिरैद दोज़्याव मिँ वाज़ बाँचिज़्या।”#लेबी १८:५
6युँ सुहुप्न्यानी परमेस्वरस खैन्याए जूँनी ते इताव सर्सिउ लिज़्या,
“जे, ‘स्वर्गत बान्या सुए ची उधुरिज़्याव,’ है तालिच्यो।”
(अथबा, ‘गे ख्रीसलाई स्वर्गतिन मेल गेमारैधुइ’ है ल्यो मापरिए।) 7स़ोनो,
“जे, ‘खादरल बान्या सुए ची उधुरिज़्याव,’ है ब तालिच्यो।”
(अथबा, ‘गे ख्रीसलाई सिउनी गेमासोचोइधुइ’ है ब ल्यो मापरिए।) 8बुरू ‘आव चेतैव ताके’ है लिन्या सर्सिउ लिज़्या,
“ओपाँ जेकिन तादाङ माले।
ओपाँ जेयुँल ज़ लिज़्या,
जेयाःत ज़ लिज़्या।”#ब्य ३०:१२-१४
नो पाँ फरी गे गेसथैचिज़्याव युँ सुहुप्न्या चाव था ज़। 9जेयाःत ‘येसु ख्रीस ज़ गेप्रभु’ लिद जेपाँकिन, स़ोनो जेयुँल ‘परमेस्वरए ख्रीसलाई सिउनी सोचोइक्यो’ लिद जेयुँल जेपतिकिन बाँचिन्या जेले। 10गेयुँए ज़ परमेस्वरए ओपाँलाई गेयुँ हुप्द ओलस गेखैज़्या, फरी नो गेयुँलाव पाँलाई गेयाःए पाखात पाँद गेबाँचिज़्या। 11नो धर्मसास्त्रलाव ‘ओल्योदा उयुँ सुहुप्ज़्याव मिँ लाज मोर्नो तान्या माले’#यसै २८:१६ है लिन्या पाँ 12यहूदीरालाई मनी लिज़्या, छुत जातलावरालाई मनी लिज़्या। परमेस्वर तोबोका तोबो ओतावए प़ाइँए परमेस्वर ज़ लिज़्या। जो जातए तादी ब ओललाई खिम्ज़्यावरालाई ओअसिकर थुद याएज़्याव। 13धर्मसास्त्रल मनी, “जोए परमेस्वरए उमिन हाइद परमेस्वरलाई खिम्ज़्याव, हो बाँचिन्या ले,”#योए २:३२ लिद सर्सिउ लिज़्या।
14खाली परमेस्वरलाई यायुँ यामासुहुप्किन परमेस्वरलाई कातानी ची याखिम्रिज़्याव? स़ोनो, परमेस्वरए ओपाँ थैव यामादैकिन कातानी यायुँ यासुहुप्रिज़्याव? स़ोनो, सथैन्या मिँ याल्योदा ओमाबाकिन कातानी याथैरिज़्याव? 15सथैन्या मिँलाई सुवाराए यामापरींकिन कातानी ओबाधुरिज़्याव? निताव बाज़्यावराए जूँनी धर्मसास्त्रल मनी अइ लिद सर्सिउ लिज़्या,
“चाव था रैद हुज़्याव मिँलाई रँःद,
प़ाइँए यायुँ होलाँ ताद रेंज़्यार।”#यसै ५२:७
इस्राएलीराए ‘गेमाथैए’ है लिन्या निउँ ज़ माले
16हितावत मनी इस्राएलीर जाँकोसैए चाव था थैन्या युँ ज़ मादोकेर। यसैयाए मनी अइ लिद सर्द नैव, “अ परमेस्वर, गेरासथैव पाँत सुए यायुँ ज़ माहुप्के।”#यसै ५३:१ 17है जैद थैद वाज़ युँ हुप्ज़्या — नो थैन्या ते ख्रीसए ओपाँ ज़। 18हितावत ब नो परमेस्वरए ओपाँत यायुँ माहुबो इस्राएलीराए ‘गेमाथैए’ लिन्या काता निउँ ज़ माले। धर्मसास्त्रल मनी इताव सर्सिउ लिज़्या,
“परमेस्वरए ओपाँ सथैज़्यावराए यार्गा
संसार भरिल थास्द ले।
यापाँ ब काना कुनीङ पै केस्द ले।”#भज १९:४
19हिताव ताकिन इस्राएलीराए यामाबुझिउ ते माःक। नोराए जूँनी मोसाए ङ़ादा ज़ अइ लिद सर्द नैव,
परमेस्वरए है लिज़्या,
“छुत जातलाव मिँरालाई रँःद,
जेमी तून्या ङाजैचिरिज़्या।
ङामिन मासैंज़्यावराए याल्योनी
जेरिस ब सोचोइद ङायाचिरिज़्या।”#ब्य ३२:२१
20यसैयाए ओपाँ झन ज़ कर्रा जैद इतावनी ज़ सर्द नैद यायो,
“ङालाई खिम ज़ माखिम्ज़्यावराए ल्योक ङासरैंःसिके।
पजै ज़ मापजैज़्यावरास ङादैसिके।”#यसै ६५:१
21खाली इस्राएलीराए जूँनी ते इताव ज़ लिज़्या,
“जे बनै अखत्यासो मामुइलिउ मिँरालाई
‘हुचिके’ लिद ङाकुइ थाँद नैद ङायाचिक ब जेमाहुके।”#यसै ६५:२
Šiuo metu pasirinkta:
रोमी 10: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.