हिब्रू 6
6
थालनलाव पाँराकिन ङ़ाकसै बान्या
1है जैद गे ख्रीसए ओपाँताव ओथालनलाव पाँराकिन जाँ ङ़ाकसै बाद पाखो ताव ताके। नो थालनलाव पाँर आवर ज़ — सिन्या सजादा लाँज़्याव य़ेनलाई ऱास्द परमेस्वरलाई युँ सुहुप्न्या, 2सछैंसिन्या, सुवाराए क्याँत कुइ नैद पोंखारिन्या, सिउनी सोवत ख्वाराए खर्क ज़ माखेम्न्या सजा दैन्या, ख्वाराए अजम्बरी जुनी दैन्या। 3परमेस्वरए ओसघैसिकिन नो पाँराकिन जाँ ङ़ादा बान्या गेले।
4ङ़ादा परमेस्वरए ओपाँत तखेप बनै सैंन्या ताव मिँ स्वर्गताव असिकर स़ोनो छैंव पुरूस ब दैद, 5उयुँल परमेस्वरए ओपाँ चाव ज़ ओल्यो लिन्या थ·रैद परमेस्वरए ओराज्यालाव अचम्बलाव सक्तीर ओदार्दी ब, 6छींनी नो मिँ परमेस्वरए ओपाँलाई सोद ओऱास्किन नो मिँलाई फरी सोवोल्द मारैसिधुइ। नो मिँए फरी ब परमेस्वरए ओज़ालाई क्रुसत तङ्गैद बीज्यात ओजैव मिताव ज़ लिज़्या।
7हिताव ज़ एँःए ब परमेस्वरए ओसवाज़्याव ऱी दैद नलाव य़ेन दाज़्यावलाई चाव चाव सैर सपरीद ओएकिन नो एँः परमेस्वरए ओअसिक धूँल उलिज़्याव मिताव ज़ लिज़्या। 8खाली नो एँःए ज़ुर ऱमर ओसपरीकिन नो एँः काम मालागिउ ताद परमेस्वरए ओसराप धूँलाव मिताव ज़ लिज़्या। निताव एँः मेंःए ओज़्यास वाज़ ताज़्या।#उत ३:१७-१८
जेथूसिउ य़ेनत मातेन्सिद कलँ ल्यो ताके
9अ गेयुँलाव गेनैं गेमेंर, जेलाई इताव ख्यो·न्या मिताव पाँर है गेदाचिदी ब, जे अजम्बरी जुनी दैन्यावाकावर ताद जेलिज़्याव मिताव गेङम्सिज़्या। 10जे ङ़ादाकिन ज़ परमेस्वरए उमिनत लिज़्यावरालाई जेरासमारिहुज़्यावए परमेस्वरए ल्योदा जेयुँ थू जैद जेनैज़्याव ननी ज़ रैंःज़्या। परमेस्वर अन्याय मादान्या ओतावए नो जेय़ेनलाई मामेंःव। 11जेल्योदा गेयुँ इताव लिज़्या, ‘नो जेआसलाई फिस्को मातान्या जैन्याए जूँनी नो य़ेनत छींङ पै ब कलँ लिद जेलिकिन ताखेहो’ है गेलिज़्या। 12है जैद जे मातेन्सिद किताव भाःकाव मिँराए परमेस्वरए ल्योदा यायुँ हुप्द थ॰रिद यादोवनी परमेस्वरए ओरायो य़ाकालाव पाँर दैकेर, जे ब हिताव ज़ दोव ताके।
परमेस्वरए ओपाँ बनै थ॰रिउ लिज़्या
13परमेस्वरए अब्राहामलाई य़ाका ओएक ओलकिन घेप्पा छुन्या ओमादैवए ओल उमिननी ज़ अइ लिद किर्या झाःक्यो, 14“आछिमकिन नँलाई बनै घ्योःव असिक ङाईंरिज़्या, नथोर बनै सबा·द ङाईंरिज़्या,”#उत २२:१६-१७ है दोक्यो। 15हुनी ज़ परमेस्वरनी ओदैव य़ाकालाई कुधु बर्स पै कींद बल्ल दैक्यो।
16मिँराए ते याकिन घेप्पालाई छुद किर्या झाःज़्यार। किर्यानी वाज़ यापाँ थ॰रिद ‘आव ताखेहो, हो ताखेहो’ लिन्या पाँ भरी ब खेम्ज़्या। 17हो मिताव ज़ परमेस्वरए ब, “ङा ङापाँ खर्क ज़ मात़ोसिउ थ॰रिउ लिज़्या,” लिद छींनीकाव ओय़ाका दैवरालाई सतैंद्यान्याए जूँनी अब्राहामलाई किर्या झाःदिक्यो। 18नो खर्क ज़ मात़ोसिज़्याव ओपाँ अब्राहामए ओक्याँत ऩेथोनी ज़ रैंःके। ङ़ादा ओयो य़ाकानी रैंःके, छींनी ओझाःव किर्यानी ब रैंःके। है जैद गे आज्यालकाव मिँराए ब परमेस्वरए ओपाँ फिस्को ओमाताज़्याव ओल्यो लिद परमेस्वरए ओयासिरिज़्याव बरदान दैन्याए जूँनी येसुए ओक्याँत ख्यासिद लिन्यात गेयुँ झेंःव ज़ लिज़्या। 19-20नो ओक्याँत ख्यासिद गेलिज़्याव येसु बनै थ॰रिउ काताए ब मापल्तैधुन्या पहर स्यासो लिज़्या। होत ज़ गेलिकिन गे ब ग्याल गिल ज़ तान्या गेमाले। नोए ज़ मल्कीसेदेक मिताव खर्क ज़ माखेम्न्या प्रधान पुजारी ताद प़ाइँरानी चोखो पोल लिज़्याव परमेस्वरए ओङ़ाक बाद गेलाई ब बान्या येम फैद्यासिक्यो।#लेबी १६:२; भज ११०:४
Šiuo metu pasirinkta:
हिब्रू 6: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.