हिब्रू 4
4
परमेस्वरए ल्योदा बान्या मौका छुपिन्या
1है जैद जोगोइसिद ल्यो ताके, नो स॰ होलाँ तान्या पोल पसिन्या मौका गेलाई परमेस्वरए याद नैसिउ। नो मौका छुपिउ ताके, म़ानी गे ब पसिधुन्या गेमाले। 2मोसाए ओपालाकाव मिँराए परमेस्वरए ओपाँ याथैव मिताव गे ब थैव ज़ गेनैज़्या। खाली नोराए ओपाँ थैद ब यायुँ ओमाहुबोए नो पाँ नोरालाई अऩाकलाव ज़ ताके। 3ओललाई यायुँ हुबोर वाज़ नो स॰ होलाँ तान्या पोल पसिज़्यार। यायुँ माहुबोराए जूँनी ते ओल परमेस्वरए ज़ है लिद ले,
“ङारिसए इताव किर्या ब ङाझाःके,
‘स॰ होलाँ तान्या पोल खर्क ज़ केसो दैन्या मालेर।’ ”#भज ९५:११
हैदी ब गे मिँरालाई तोबो स॰ होलाँ तान्या पो नाम नमलाव ओय़ेन ओखेमो छ्यामकिन ज़ उलिज़्याव। 4धर्मसास्त्रल ब ऩासिन्या छ्यामए जूँनी तोथोल अइ लिद सर्सिउ लिज़्या,
“परमेस्वरए नाम नमलाव ओय़ेन भरी ओखेमोत
सात दिनलाव छ्याम ऩासिके।”#उत २:२
5खाली ङ़ादाङाव है गेलिज़्याव मिताव धर्मसास्त्रल इताव सर्सिउ लिज़्या, “स॰ होलाँ तान्या पोल खर्क ज़ केसो दैन्या मालेर।”
6हैदी ब नो पोल पसिन्यार लिज़्यार ज़। खाली नो भाःकाव मिँराए ओपाँ थैद ब यामादोवए पसिउ मादैकेर। 7है जैद नोराकिन कुधु छींङ परमेस्वरए दाऊद राजाए ओयाःनी गेलाई ब तोबो मौका जैद्यासिक्यो। नोए ओपाँ आव ज़,
“आछिम परमेस्वरए ओपाँ जेथैकिन,
जे जेयुँ खाव ताजैच्यो।”#भज ९५:७-८
8यहोसूए इस्राएलीरालाई परमेस्वरए य़ाका ओरायो देसल ओरासकेस्क नो स॰ होलाँ तान्या पोल पसिन्या मौका भरी ओखेमो ताकिन परमेस्वरए छींनी गेलाई निताव पाँ है दान्या ओमाल्यो।#ब्य ३१:७; यहो २२:४ 9है जैद परमेस्वरए उमीं ताज़्याव भरिरालाई स॰ होलाँ तान्या पो नैसिउ ज़ लिज़्या। 10जो मिँ नो पोल केस्ज़्या, किताव परमेस्वरए ओय़ेन भरी खेम्द ओऩासिउ, हिताव ज़ नो मिँ ब ओय़ेनरानी ओर्सार नैज़्याव।#उत २:२ 11है जैद गे नो स॰ होलाँ तान्या पोल बान्यादा युँ थू जैव ताके। ङ़ादाङाव ओपाँ मादोज़्यावर यामापसिधुज़्याव मिताव ताताक।
12परमेस्वरए ओपाँ बनै ओसक्ती ल्यो स़ोनो य़ेन दावका दाव ज़ लिज़्या। नो पाँ आनी हुनी ओधार ल्यो तरवालीकिन ब छाव ओतावए मिँए युँल पसिद क्याँ भरिल सरालिसिद युँलाव पाँ स़ोनो बुद्धी भरी ब सरसाप खिम्द जाँचिज़्याव। 13स़ोनो परमेस्वरए ओराजैव भरिल ओल ओमारँःव म़ोंसिउ काता ज़ माले। परमेस्वरए ओङ़ाक प़ाइँ ज़ फैसिउ लिज़्या। गेय़ेन भरी ब तछा ओललाई है दाव ज़ परिज़्या।
प्रधान पुजारी येसु
14है जैद परमेस्वरए ओज़ा प़ाइँरानी घेप्पा गेप्रधान पुजारी येसु आव नामनी गेजूँनी स्वर्गत परमेस्वरए ओङ़ाक ओबावए नो गेयुँ हुबो पाँलाई माऱास्द ज़ थ॰रिद ल्यो ताके। 15गे गेप्रधान पुजारीए गेदुखर रँःद उयुँ ओमानाज़्याव ते माःक। ओल ब गे गेदैज़्याव मिताव दुखरानी जाँचिसिके। खाली ओजाँचिसिदी ब पाप ते मादोव। 16हो मिताव ज़ गे ब उयुँ य़ालो परमेस्वरए ल्योक माछे·द ज़ बाव ताके। हो ताकिन ची ङ़ादाङाव गेबले·व य़ेनर ब उयुँ नाद ऱास्न्या ले। फरी खाँचो ओताव बेलाक ब सघैन्या ले।
Šiuo metu pasirinkta:
हिब्रू 4: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.