हिब्रू 3
3
येसु मोसाकिन घेप्पा ज़
1है जैद परमेस्वरए उमिनताव खुल्सिउ गेनैं गेमेंर, परमेस्वरए परींद ओयासिउ प्रधान पुजारी येसुलाई चिऊव ताके। 2किताव मोसाए उजिउ भरी परमेस्वरए उझ़िमल सतस ओदोव, हिताव ज़ येसुए ब परमेस्वरए दोव उपरींव य़ेनलाई सतस ज़ दाद सयो·क्यो।#गन्ती १२:७ 3किताव जैसिउ झ़िमकिन जैज़्याव मिँ घेप्पा ताज़्या, हिताव ज़ मोसाकिन येसुए उमिन घेप्पाल गनिसिउ लिज़्या। 4तोबोमा तोबोए ते झ़िम जैज़्याव। हैदी ब प़ाइँ जैज़्याव ते परमेस्वर ज़। 5मोसाए परमेस्वरए उझ़िमलाव य़ेन सतस ओदोदी ब होए ओय़ेन नोकोर य़ेन वाज़ ओल्यो। होए ओपाँज़्याव ओदोज़्याव भरी ब जाँकोसै छींनीकाव तान्या पाँए ओसाची वाज़ ओल्यो। 6ख्रीस ते ओबाबु परमेस्वरए ओबताहा दैन्या झ़िमए ओर्गे मिताव ज़ लिज़्या। गे मनी होए उझ़िमलावर ज़ गेलिज़्या। खाली गेयुँ गेसुहुबोलाई माऱास्द आस दाद गेनैज़्याव ओमायो·वा पै थ॰रिद गेलिकिन वाज़ गेताज़्या।
ओज़ाए ओपाँ गेमाभैंःकिन ओछ्यास लिज़्या
7है जैद छैंव पुरूसए ओपाँव पाँ आव ज़,
“आछिम परमेस्वरए ओपाँ जेथैकिन,
8जेजिज्यु बाज्युर बनल परमेस्वरकिन तँदा याजैसिउ मिताव,
जे जेयुँ खाव ताजैच्यो।
9हो बेलाक चालीस बर्स पै अचम्ब अचम्बलाव ङाय़ेनर यारँःज़्यावत ब
ङानाल केःद्याँकेर।
10है जैद ङा नोरास ङारिस चोद अइ ब ङालिके,
‘आवराए यायुँ ते एकतार तँदा वाज़ लिज़्या।
ङाल्योदा हुन्या युँ दो ज़ मादोर।’
11है जैद ङारिसए इताव किर्या ब ङाझाःके,
‘स॰ होलाँ तान्या पोल खर्क ज़ केसो दैन्या मालेर।’ ”#भज ९५:७-११
12है जैद गेनैं गेमेंर, जोगोइसिद लिच्यो, म़ानी जेनी ख्वा ख्वार जेयुँ माहुप्द जेयुँए बले·द जींदो परमेस्वरए ल्योनी पुलुस्द बान्या ओछ्यास लिज़्या। 13बेला उलिज़्याक ज़ जे जेल सुए जेयुँ ब पापए झुकैद बलेसो ताताक लिद एकम्न्या ज़ अर्थैसिच्यो। 14गेयुँ हुप्द गेथूसिउलाई माऱास्द छींङ पै थ॰रिद गेलिकिन परमेस्वरए ओराज्यालाव बताहा ख्रीसस सिप ज़ दैन्या गेले। 15नो धर्मसास्त्रलाव है लिसिउ पाँ तामेंःच्यो। नो पाँ आव ज़,
“आछिम परमेस्वरए ओपाँ जेथैकिन,
जेजिज्यु बाज्युर परमेस्वरकिन तँदा याजैसिउ मिताव,
जे जेयुँ खाव ताजैच्यो।”#भज ९५:७-८
16नो ङ़ादा परमेस्वरए ओपाँ थैद मनी ओलकिन तँदा जैसिज़्यावर मोसाए इजिप देसनी ओरापले·वर ज़। 17नो चालीस बर्स भरिलाव परमेस्वरए उरिस चोवर ब नोर ज़। है जैद यादोव पापए चालीस बर्स भरिल नो बनल ज़ सोतोर्यान ताकेर। 18‘नो स॰ होलाँ दाव पोङ बाव दैन्या जेमाले’ है ओरादोव ब नो ओपाँ मादोज़्यावरालाई ज़।#गन्ती १४:२६-३५ 19है जैद ननी ज़ गेसैंज़्या, ओललाई यायुँ ओमाहुबोए चाव पोल बाव मादैकेर।
Šiuo metu pasirinkta:
हिब्रू 3: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.