२ तिमोथी 3
3
छींनी हुन्या पाँर
1आव ब सैंद नैयो, छींनीकाव बेलाक धो सहिउ दुखर हुरिज़्या। 2नो बेलाक मिँर यालाई तान्या वाज़ चेतैरिज़्यार, धनए लोभत बाऱिज़्यार, सघ्योःसिद पाँरिज़्यार, स॰द छुतरालाई याराथल्रिज़्यार, याबाबु याआमाए पाँ ब दान्या मालेर, गुन ब चेतैन्या मालेर, यायुँनी कुबातैं वाज़ हुरिज़्या, 3सुलाई ज़ मया दान्या मालेर, सुरास ब खैन्या मालेर, अर्काए उछींनी पाँद यामिन बले·द याराएरिज़्यार, माचाव य़ेनत यायुँ नैधुन्या मालेर, याछ्यास ल्योर तारिज़्यार, चाव पाँलाई सोरिज़्यार, 4छुतरालाई धोका याराएरिज़्यार, याङ़ादा याछींदा माभाल्सिद माचावदा ज़ यार्सा झाःरिज़्यार, स॰रिज़्यार, परमेस्वरकिन झन बोंन्यादा यायुँ थू जैरिज़्यार। 5पाखाङ ते धर्म यामानिज़्याव मिताव ते जैसिज़्यार, खाली यायुँल ते नो पाँए ओसक्ती भरी वैंज़्यार। निताव मिँरानी नँ अछतङ लिनी।
6नितावराए झ़िम झ़िमक दुलिद पापल गदिद लिज़्याव यार्ती माल्यो मेंमारालाई याल्योदा याराजैज़्यार। नो मेंमार माचाव याचेतैज़्याव भरिदा यायुँ थू जैद याकिला माल्यो मितावर लिज़्यार। 7कोभाराए पाँर थैद होत ज़ बाद साचो पाँलाई खर्क ज़ माथ·रैधुर। 8यान्नेस स़ोनो याम्ब्रेसनी मोसाकिन तँदा निजैसिज़्याव मिताव आव छुत पाँ पैज़्यावर ब साचो पाँकिन तँदा लिज़्यार। नोर याबुद्धी बलेस्द परमेस्वरए ओपाँनी काम मालागिउ खेर बावर ताद लेर।#प्रस ७:११ 9खाली आवराए यापाँ ते माफाबिए। ङ़ादाङाव यान्नेस स़ोनो याम्ब्रेसनी निपाँ ओमाथ॰रिउ मिताव आवराए यापाँ ब प़ाइँए ज़ ओअर्थ माल्यो थ·रैन्या लेर।
नसरेस्ज़्याव साचो पाँत ज़ लिनी
10नँ ते ङा ङापैनिउ येमदा ज़ नबाज़्या। ङा ङादोज़्यावनी नँ ब नदोज़्या, ङाताकिज़्यावदा नँ ब नताकिज़्या। ङा किताव ङायुँ ङासुहुप्ज़्याव, हिताव ज़ नँ नयुँ ब नसुहुप्ज़्या। ङा ङासहिज़्याव मिताव नँ ब नसहिज़्या। छुतलाई मया दाद ङादोज़्याव मिताव नँ ब नदोज़्या। ङा ङाथ॰रिज़्याव मिताव नँ ब नथ॰रिज़्या। 11ङाखिरी पसिद यायाँज़्याव दुखर ङासहिज़्याव मिताव नँ ब नसहिज़्या। ओहो! एन्तिओखिया, आइकोनियन स़ोनो लुस्त्राल किताव किताव दुखर ङादैके। हितावरानी ब प्रभुए जोगोइनाक्यो। 12साचो ज़ लिज़्या, येसु ख्रीसए ओसतत लिद ओयेमल बाज़्यावरालाई जुनी ब खिरी ते पसिज़्या ज़। 13खाली धुतैज़्याव स़ोनो माचाव मिँर झन ज़ बलेस्नान्या लेर। या छुतरालाई याराधुतैज़्यार, यालाई ब छुतराए याराधुतैज़्यार।
14नँ भन्या नपैसिउ पाँलाई साचो थ·रैद, ‘युँ हुबो मिँए ल्योनी ज़ ङापैसिके’ लिद मामेंःद होत ज़ लिनी। 15स़ोनो ‘धर्मसास्त्रलाव छैंव पाँ ज़िम्ज़ाकिन ज़ ङादैके’ लिद य़ाका दोयो। नो पाँए युँ हुप्दकाव येसु ख्रीसनी ताज़्याव अजम्बरी जुनी दैन्या येम थ·रैव परींव दोज़्याव। 16धर्मसास्त्रलाव पाँ भरी परमेस्वरए ओयाःनी हुव पाँ ज़। नो पाँ परमेस्वरए ओयेम पैन्यात, याखत ल्योरालाई सम्जैन्यात, मादाँवलाई सदाँन्यात, धर्मलाव य़ेन सिऊन्यात बनै ओचाहित ल्यो लिज़्या। 17ननी ज़ परमेस्वरए उमींलाई चाव य़ेन भरिल उहिल हाइन्यात प़ाइँ सरजाम जोरैसिउ लिज़्या।
Šiuo metu pasirinkta:
२ तिमोथी 3: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.