१ यूहन्ना 5
5
परमेस्वरए ओसाची पतिन्या
1जोए ‘येसु परमेस्वरए खतैद उपरींव ख्रीस ज़’ है लिद पतिज़्याव, नो परमेस्वरनी जर्मिउ लिज़्या। स़ोनो जोए गेलाई जर्मैज़्याव गेबाबुलाई मया दोज़्याव, होए परमेस्वरए ओराजर्मैव ओज़ारालाई ब मया यादोज़्याव। 2गे परमेस्वरलाई मया दाद ओपाँ गेदोकिन ननी ज़ परमेस्वरए ओराजर्मैव ओज़ारालाई मया गेरादोज़्याव गेसैंज़्या। 3परमेस्वरए ओपाँ गेदोकिन वाज़ परमेस्वरलाई मया गेदोज़्याव थ॰रिज़्या। ओल ओज़ारालाई ओपाँर दान्या खाव माले, झ्यासो लिज़्या। 4काराव ल्यो ताकिन परमेस्वरए ओज़ार ओलनी जर्मिउर यातावए आव मानुवाताव यालाई बले·व पैंज़्याव पाँरालाई याराहारैज़्यार। नो गेराहारैज़्याव ओललाई गेयुँ हुप्द गेलिज़्यावनी ज़। 5‘येसु परमेस्वरए ओज़ा ज़’ लिद पतिज़्यावराए वाज़ मानुवाताव यालाई बले·व पैंज़्यावरालाई याराहारैधुज़्यार।
6नो परमेस्वरए ओज़ा येसु ख्रीस मिँ मिन्सिद उहुव, ऱील ओसछैंसिउ छ्याम ब रैंःके, उझी सोभोद उजिउ ओझाःव छ्याम ब रैंःके। 7आज्याल गेयुँल बास दाद नैज़्याव परमेस्वरए उपुरूसए ब होए ओसाची ज़ यासिज़्याव। नो पुरूसए साचो थ॰रिउ पाँ वाज़ दोज़्याव। 8येसु परमेस्वरए ओज़ा ज़ लिद साची याज़्यावर स़ोम्लो लिज़्यार। तोबो परमेस्वरए उपुरूस, तोबो ऱील ओसछैंसिउनी, तोबो उझी सोभोद उजिउ ओझाःवनी ज़। है जैद नो स़ोम्लोराए यासाची खैज़्या। 9गे मिँराए यासाची गेपतिज़्या, परमेस्वरए ओसाची ते झन थ॰रिउ लिज़्या। परमेस्वरए मिँरालाई साची ओराएज़्याव ओज़ाए उजूँनी ज़ लिज़्या। 10जोए ओज़ालाई उयुँ हुप्ज़्या, होए परमेस्वरए ओसाची उयुँल रैद नैव। फरी जोए परमेस्वरए ओसाचीत उयुँ माहुबे, होए नो साचीलाई धुत थ·रैज़्याव, काराव ल्यो ताकिन परमेस्वरए ओज़ाए जूँनी ओयो साची मापतिउ। 11गेलाई परमेस्वरए ओयासिज़्याव साची आव ज़ — गे मिँर अजम्बरी जुनी दैन्यार गेताज़्या, नो जुनी ओज़ाए ओक्याँत वाज़ लिज़्या। 12जोए परमेस्वरए ओज़ालाई उयुँल रैज़्याव, होए ज़ अजम्बरी जुनी दैज़्याव। जोए ओज़ालाई उयुँल मारैव, होस अजम्बरी जुनी माले।
13आव ङासरो चिथी जे परमेस्वरए ओज़ालाई जेयुँ हुप्ज़्यावराए जूँनी सर्द ङानै। आव चिथीनी ज़ अजम्बरी जुनी जेस उलिज़्याव सैंन्या जेले। 14परमेस्वरए ओपैंज़्याव मितावनी गेऩिकिन ‘गेऩिउ भरित थैद्यान्या ले’ लिद ओङ़ाक माछे·द ज़ बान्या गेयुँ हुप्न्या ले। 15नो गेऩिउ भरित ओथैकिन नो भरी गेदैधुके लिन्या गेसैंज़्या।
नैंलाई पापनी सोवोल्न्या
16जेनी तोबो जेनैंए पाप ओदोज़्याव जेसैंकिन, नोए उजूँनी पोंखारिद जेएकिन, नोलाई परमेस्वरए बाँचैन्या ले। नोए ओदोज़्याव पापनी माओल्द सिन्या सजादा ज़ ओबाकिन पोंखारिद जेमाएदी ब ताए। 17असतलाव य़ेन भरी पाप ज़ लिज़्या। हैदी ब नो जेनैं पापनी ओल्धुन्या स्यासो उलिकिनी, नोए जूँनी पोंखारिउ ज़ ताके।
18परमेस्वरनी जर्मिउ मिँए ते पाप दावका दाव माले लिन्या गेसैंज़्या। परमेस्वरए ओज़ा ख्रीसए ज़ नोलाई पाथस नैद सैतानलाई बले·व मायो। 19गे परमेस्वरनिकावर ज़ लिन्या गेसैंज़्या। मानुवाताव भरी ते सैतानए उधूँल ज़ लिज़्यार। 20गे आव ब गेसैंज़्या, परमेस्वरए ओज़ाए साचो परमेस्वरलाई सरेसो परींन्याए जूँनी ओल ओक्याँत ज़ सरेसो परींसिक्यो। ओज़ा येसु ख्रीसनी साचो परमेस्वरस सिप गेलिज़्या। साचो परमेस्वर ब ओल ज़, अजम्बरी जुनी ब ओल ज़।
21ङाबाबुज़ार, जे मिँराए याजैव अङग्यालाई ‘आव ज़ ईस्वर’ है लिज़्यावराए ल्योनी जोगोइसिद लिच्यो।
Šiuo metu pasirinkta:
१ यूहन्ना 5: NKham
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2015, Wycliffe Bible Translators, Inc. All rights reserved.