Itsɛ́ 6
6
À tsã ɔ̀nyà méedze ní ká gbà fú adzítsɛ́-Yèésù ŋa
1Ńǹwèrè nyɛ̀ŋɛ̀#ɛ́, atɛ̀náànyì-Yèésù ŋa wà ɖi kpíkpɔ̀ máa. Náàŋírĩ-ŋa#á, ɔ̀nyà kã̀ŋa wà, tsí à náa fɔ hèbérù, tsí ɔ̀nyà kã̀ŋa gbo wà, tsí dzɛ́ ɔma-Ìyúɖà† ŋa ké, tsí à náa fɔ gɛ̀rɛ́kì. Ńbɛ̀ɛ́, atɛ̀náànyì-Yèésù yèé ŋa náa fɔ gɛ̀rɛ́kì#ɛ́ kpé ɔ̀kɔ̃̀ɔ̃́rɔ̃̀ kpíkpa fú ɔma-Hèbérù ŋa, tsí wà fɔ̀ ní: Nɔ́dzɔ́ kɔ́dzɔ́, bí à wà kpɛ̃́ dzídzɛ#ɛ́, okpó yèé ŋa wà náàŋírĩ-àŋa#á kà rí dzídzɛ#ɛ́ gbà.
2Ńbɛ̀ɛ́, adzítsɛ́-Yèésù† máàméèdzì ŋa#á kpe atɛ̀náànyì-Yèésù ŋa kpérí kpó, tsí wà rɔ́ fú ŋa ní: Kò sã̀ ní ìdzɛ kpíkpɛ̃́ kó kpã́ àŋa nódzú láre afɔ̀-Ɔ̀ɖáyé fífɔ̀. 3Ó ɖi báàyí#ɛ́, àŋa ká-àŋa gìɖì ká tsã ɔ̀nyà méedze náàŋírĩ-ara-ŋa. Ɛnɛ yèé à nákó tsã̀ ŋa#á, ká dzɛ́ ɛnɛ yèé ŋa à wà nya àyídzá-ire nára-ŋa#á. Mímí-Ɔ̀ɖáyé† kó wà ńǹtá-ŋa, tsí ká nɛ́ ifɛ̀ɛ́nɔ́ gbo. Tsí àŋa kó kɛ́ itsɛ́-dzídzɛ kpíkpɛ̃́#ɛ́, tsí ń bɔwɔ́-ŋa. 4Ńbɛ̀ɛ́, àŋa ká-àŋa, àŋa nákó nyáa mú ìwèrè-àŋa kpó, tsí wà ń wúùre, tsí wà dzíkɔ̀-Ɔ̀ɖáyé fú ɔ̀nyà ŋa.
5Tsí àŋa kpó yèé kpérí si bɛ̀#ɛ́, à gbà si ńǹtá-afɔ̀#ɛ́. Náàtsɛ̃̀tsɛ̃̀#ɛ́, à tsã Sètèfánì. Sètèfánì#ɛ́ nɛ́ àkaralé tó bɛ́ɛ̀, tsí Mímí-Ɔ̀ɖáyé gbo wà ńǹtá‐ɛ̀. Tsí à tsã Fìlíkpò gbo, tsí tsã Kpòròkɔ́rì òŋu Níkànɔ́rì gbo, tsí tsã Tìmɔ́ òŋu Kpàmɛ̀ná má nára-Nìkòlá gbo. Nìkòlá#á, ńǹlú-Àntìyɔ́tsì ní ó ti#ɛ́. Asɛ̃ŋɛ ní ó dzɛ́#ɛ́, tsí ó nyí, tsí wà tsorò-ɔma-Ìyúɖà ŋa ni. 6Ńbɛ̀ɛ́, à gbɛ̃́ ŋa wáa lɔ káà ɖíre fú adzítsɛ́-Yèésù ŋa, tsí à mɔ́wɔ́ lé ńǹtá-ŋa, tsí wúùre fú àŋa kpó.
7Ńbɛ̀ɛ́, afɔ̀-Ɔ̀ɖáyé wà tó ńǹɖì ńǹɖì ŋa wérí làkóò. Tsí ńYèrúsàlɛ́mì#ɛ́, atɛ̀náànyì-Yèésù ŋa wà ɖi kpíkpɔ̀ máa làkóò, tsí atsɛbɔ-Ɔ̀ɖáyé† kpíkpɔ̀ ŋa gbo wà gba afɔ̀#ɛ́ gbɔ́, tsí wà nɛ́ àkaralé si ńǹtá-Yèésù Ɔlá-wa.
Onùgbó-ɔma-Ìyúɖà ŋa mú Sètèfánì, tsí ká kpɛdzɔ́ báa
8Náànyì-bɛ́ɛ̀#ɛ́, Ɔ̀ɖáyé tu kùsɛ̀ɛ̀ fú Sètèfánì, tsí ikpá-Ɔ̀ɖáyé gbo wà ńǹtá‐ɛ̀, tsí ó wà tse iŋɛ́-àwùsì lákṹ lákṹ ŋa náàŋírĩ-ɔma-Ìyúɖà† ŋa.
9Ńbɛ̀ɛ́, ilé-ìkpàɖé-ɔma-Ìyúɖà ŋa†-kã̀ wà, tsí à náa kpèé ní ilé-ìkpàɖé-arú yèé à kɔ̀ dzɔ̀ɔ́ ŋa á. Ɛnɛ yèé ŋa náa kpàɖé ńlé#ɛ́, à dzɛ́ ɔma-Ìyúɖà ŋa, tsí à ti nérè-Sìrɛ́nì òŋu ńǹlú-Àlɛ̀kìsã́nɖè. Ɔ̀nyà kã̀ŋa gbo wà bɛ̀ ké, tsí ti ńlɛ̀-Sìlíkì òŋu ńlɛ̀-Àsíyà. Tsí ó ɖi nɔ́dzɔ́-kã̀, tsí àŋa kpó, à ǹɖe, tsí wà tse àrã́dzìnyà-kã̀ bá Sètèfánì. 10Ó ɖi, Mímí-Ɔ̀ɖáyé† wà ńǹtá-Sètèfánì si, tsí fúu ńfɛ̀ɛ́nɔ́ gbo tó bɛ́ɛ̀. Tsí à kò nyáa ɖugbã̀‐ɛ̀ náfɔ̀ fífɔ̀. 11Kíbí à kò nyáa ɖugbã̀‐ɛ̀#ɛ́, à káà mú owó ki arũ fú ɔ̀nyà kã̀ŋa ní ká tsòɖòbò ní: Àŋa gbɔ́, tsí Sètèfánì wà wíìnyɛ̀-íbàɖí nára-Mɔ̀ɔ́sè† òŋu Ɔ̀ɖáyé.
12Ńbɛ̀ɛ́, à káà mú arũ ɖé bá ɔ̀nyà kpó, onùgbó-ìlú ŋa gbo má nára-akɔ́nɛ nɛ́kpa-Ɔ̀ɖáyé† ŋa gbo kpó. Tsí kóyá kóyá gé#ɛ́, à káà mú Sètèfánì, tsí gbɛ̃́ɛ̃ lɔ ńǹɖì-ɛgbɛ́-àkpɛ̀dzɔ́-ɔma-Ìyúɖà ŋa†. 13À gbɛ̃́ ɛnɛ yèé à mú owó ki arũ fú ŋa#á gbo tɛ̀ náànyì. Kíbí à káà tó#ɛ́, ɛnɛ nyɛ̀ŋɛ̀ ŋa wà fɔ̀ ní: Nɔ́dzɔ́ kɔ́dzɔ́#ɛ́, Sètèfánì kà mí ìnyɛ̀-íbàɖí wíwí nára-ilé-Ɔ̀ɖáyé† òŋu ɛkpa yèé Mɔ̀ɔ́sè gbà ńɖi-Ɔ̀ɖáyé#ɛ́. 14Ó ɖi, àŋa gbɔ́ títí ó wà fɔ̀ gìɖì ní Yèésù ti Nàsàrɛ́tì nákó fɔ́ ilé-Ɔ̀ɖáyé kpó, tsí nyí orò yèé Mɔ̀ɔ́sè kɔ si, tsí àŋa wà tse ŋa#á gbo kpaɖà kpó.
15Tsí ɛnɛ yèé dzokó si ńǹɖì-ɛdzɔ́ ŋa#á kpó tadzú má Sètèfánì si, tsí à rí ní àtɛ̀dzú‐ɛ̀ wà kɔ nyɛ̀nyɛ̀nyɛ̀ kíbí àtɛ̀dzú-adzítsɛ́-ɔ̀rɔ̃†-kã̀ bɛ́.
Šiuo metu pasirinkta:
Itsɛ́ 6: ngl
Paryškinti
Kopijuoti
Palyginti
Dalintis
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© (Active), Wycliffe Bible Translators, Inc. All rights reserved.