Proverbios 19
19
1Ícha jína nóani la chróchóntani kjuasàya
ke chrókꞌónani ijnko chojni lo̱nti̱ la ko chꞌia.
2Jehya jína sichꞌeni ijnko nkehe ti kjuénka̱yáxinhñani
kixin ti nkehe tjoka tóhen la tꞌaxrjehya jína.
3Ti chojni lo̱nti̱ la tuénxín nchekꞌitjáña ti nti̱a kuènté,
la ndá ndáchro sin kixin Itꞌéni Díos chónta ijie̱.
4Ti nkexro rico la chónta nchónhña nkexro tꞌiton;
a̱ndá ti nkexro nóa, la kjónté ti nkexro tꞌiton, la títo̱he ti jehe sin.
5Ti chojni nduáhya chronka la tsjasóte;
la ti nkexro xriko kjuachꞌia la tíha tsꞌitjáñaxín.
6Nchónhña chojni chréhe̱ ti nkexro tjinki̱tsa;
kaín chojni tjinkaon tsonixje̱he̱ ti nkexro a kixin tjinkaon sin ti nkehe tsjajon chꞌan.
7Ti sin nóa, la hasta ti sin kícho títo̱he ti jehe sin,
ndá ti xi̱kaha, la kjá kaín ti sin tꞌiton sin la a̱ntsí tjoka tsíto̱he sin chꞌan.
Ti ó tsjeyá chꞌan ti sin a
la tsꞌitjahya sin chꞌan.
8Ti nkexro kꞌuitja kjuaxrexinkaon jína la tjue̱he a̱sén.
Ti nkexro jína xráxinkaon ti nkehe kꞌuitja la jína tsjakꞌe.
9Ti chojni nduáhya chronka la tsjasóte sin
la kaín ti chojni xrico kjuachꞌia la tsꞌitjáña.
10Jehya jína kixin ijnko chojni lo̱nti̱ chróchónta itsjé nkehe tjete
la jehya jína kixin ijnko chojni chꞌexón ixra̱ chrókꞌue̱tue̱hen ti nkexro tꞌe̱to̱an.
11Ti nkexro chónta kjuaxrexinkaon jína la tjokahya tónínkaon.
Ti chojni chónta kjuasáye la tꞌitjáñehe ti nkehe nduáhya kjuíchꞌe ijnko chojni.
12Éxi ti tójie̱he ijnko koxra̱ mé xi̱kaha ti kjuanínkaon kuènté ijnko rey;
a̱ndá ti tjinki̱tsa chꞌan íso chojni la éxi ti ichrin náxrjón tꞌaniá.
13Ti ixjan lo̱nti̱ la nchekꞌává ti itꞌé.
Ti chojnichjin nkoya̱xón tꞌóyakote ti xìi la éxi ti nchia nkochríxín tꞌáña.
14Ti itꞌé ijnko xjan la títo̱éhe ti xje̱en nchia la ko nkehe tjete,
kjánchó Itꞌéni Díos mé tjajon ti ichjién sin tjenka̱yáxin jína.
15Ti kjuaséhe la jehó nchekꞌajua chojni,
la ti chojni séhe la jehó tsꞌenxín kjinta.
16Ti nkexro nchexiteyá ti nkehe kꞌue̱to̱an Díos la tjue̱he a̱sén;
a̱ndá ti nkexro titekakonhña la itsꞌen.
17Ti nkexro nchekjen ti chojni nóa la éxi chrókjuinchekjen sin Itꞌéni Díos nkojín nkehe,
la jehe chꞌan tsje̱nke̱he chꞌan ti jehe sin kixin ti nkehe jína kjuíchꞌe sin.
18Tjenduéhe xja̱an ti na̱xa̱ chájan,
kjánchó jehya imá chrókónínkakohen hasta chrókꞌóñá xjan.
19Ti nkexro imá tónínkaon la tsjasóte;
xrokjuahya tsonixjehé ti nkexro jie̱he kixin a̱ntsí tso̱nínkaon.
20Tihín ti kjuaxrexinkaon jína la titekaoan,
ndá chrꞌéxi̱n tso̱noha ti nkehe jína.
21Nchónhña nkehe tjenka̱yáxin chojni sichꞌe sin,
kjánchó jehó Itꞌéni Díos mé tsochronka ti nkehe tso̱hen.
22Náxrjón ti nkexro nchexiteyá ti nkehe tsondáchro.
Ícha jína nóani ke chrókꞌónani ijnko chojni imá chꞌia.
23Ti tsjikosáyeheni Itꞌéni Díos la tíha tsjajon kjuachón,
la kjuaxróxin tsꞌejójuani la í tso̱kohya ninkehó kjuachrakon.
24Ti chojni séhe la itsé ti nkehe tjiá ti plato kixin sinie,
kjánchó séhe chróchrꞌaxehen irꞌua.
25Ti chojni na̱xa̱ noehña jína la jehó tsꞌitja ti ó tsꞌikon tsjasóte íjnko chojni titekakonhña,
a̱ndá ti nkexro tjenka̱yáxin jína la jehó tsonixje̱he̱ sin, la tjoka tienxín.
26Ti ixjan teéhe ti itꞌé la ko tꞌinkíté ti ìñé
mé ijnko ixjan chóntahya kjuasàye la ijnko kjuatosuéhe̱ tíha.
27Xje̱eni, ti tsjakꞌehya tsinhín ti kjuaxrexinkaon jína
la tsjichròe la tsi̱to̱hé ti nkehe jína.
28Ti chojni nduáhya chronka nkayakon ti juez la tjanoá ti nkehe jína;
a̱ndá ti chojni jínahña la tóxríhi̱n sin ti nkehe jínahña ichꞌe sin éxi ijnko nkehe chrókjonie sin.
29Ó tjechóhen ti nkehe tsjasótexín ti chojni tjatènkíhi la chóntahya kjuasàya
la ti sin lo̱nti̱ la tsꞌekon sin.
Šiuo metu pasirinkta:
Proverbios 19: poeNTplus
Paryškinti
Dalintis
Palyginti
Kopijuoti
Norite, kad paryškinimai būtų įrašyti visuose jūsų įrenginiuose? Prisijunkite arba registruokitės
© 2016, Wycliffe Bible Translators, Inc. All rights reserved.