MATAYO 21
21
Taagetap Jeso eng' Jerusalem
(Mar 11:1-11; Luk 19:29-40; Jhn 12:12-19)
1Ye kiriiktoi icheek Jerusalem, komi Bethphage eng' tulweetap Mseituni, koyookto Jeso kasubik aeng', 2koleenji, “Oba agoi nganaseet ne mi taing'wong', ak onyooru sigiryet ne rataat, komi ak moitanyi; otyach tuwai ak ogetwo. 3Ngo mwaiwok chii kiy, oleenji ineendet makyingei Kiptaiyat chooto; ak kogoonok.” 4Kayaak ni si kobiit kosulda ne ki kimwa kobun maotyot kole,
5 # Zek 9.9 “Omwachi cheptap Zion,
Keero, nyoonjinin Laitoryandeng'ung',
tala, ak kobunu sigiryet,
ak moitap sigiryet, parnotyot.”
6Ki pa kasubik ak koyai ko uu ye ki iarorchi Jeso icheek. 7Kiget sigiryet ak moitanyi, ak koiitoochi ngoroikwak, ak kotebee inee parak. 8Ki iito che chaang' che po tuiyet ngoroikwak eng' ooreet; ak ki ep alak mooriigap keetiik ak koiito eng' ooreet. 9#T.Kal 118.25-26 Kimwaoti tuiyosyek che ki indoe ineendet ak che ki isubi eng' kutit ne oo koleen,
“Hosanna weeriitap Daudi!
Iberuurot ineendet ne nyoonei eng' kainetap Kiptaiyat!
Hosanna eng' ole toroor miising'!”
10Ye kingo mong'ji Jerusalem, kochirchiren nganaseet komugul koteebe kole, “Ng'oo ni?” 11Ki wol tuiyosyek kole, “Ni ko maotyot Jeso, ne punu Nazareth ne po Galilaya.”
Koyonei `Jeso chemung'araek eng' Hekaluut
(Mar 11:15-19; Luk 19:45-48; Jhn 2:13-22)
12Ki wo Jeso hekaluutap Kamuktaindet, ak koon tugul che ki aldaisyei ak che ki alisyei eng' yooto. Kigabui mesosyek che po woliigap silingisyek ak ng'echerogap che ki aldoi cheptugenik. 13#Isa 56.7; Jer 7.11 Ki leenji icheek, “Siraat keele,
‘Kiguure koonnyu kootap saaet,’
ago kaowal koek kebeneetap rebiik.”
14Ki pwanji ineendet eng' Hekaluut icheek che ki koryotiin ak che ing'waldos, ak ki isoop icheek. 15Ago ye kingo keer tisiik che eecheen ak siriik tuguuk che ki yai che po kwong'eet, ak lagok che kimwaei eng' kutit ne oo eng' Hekaluut, kole, “Hosanna weeriitap Daudi,” konereekso icheek miising'. 16#T.Kal 8.3 Ki teebe icheek ineendet koleenji, “Igase ne mwaei chu?” Kowolji Jeso icheek koleenji, “Ee, ki ma osoman keele,
‘Ki ichopchigei kosulda kalasunet
kobun kutusweegap lagok ak che reritos.’ ”
17Ki pagaakta icheek, ak kwo komanda eng' nganaseet kwo agoi Bethania, ole ki wo koru olooto kemout.
Mogoiywet ne ma iyiei logoek
(Mar 11:12-14, 20-24)
18Eng' karononooto, ye ki weeksei kowendi nganaseet, koam rubeet. 19Kingo keer mogoywet eng' tabandap ooreet, kwo ole mi ago ma nyoorchi kiy kobatee sogeek kityo. Ak ki leenji keetoto, “Kobooch ra, koma iyie logoek kogeny agoi!” Ak koma tyanit kores mogoywondonooto. 20Ye kingo keer kasubik, kokwong'yo ak komwaei koleen, “Katepto ano si kores mogoywet koma tyanit?” 21#Mat 17.20; 1Kor 13.2 Ki wolji Jeso koleenji, “Amwaiwok iman ale, ngo tinye kayaneet, amosage, ko moyae ne kageyachi mogoywondoni kityo, ago agot ngo mwachi tulwooni oleenji ‘Ngesutin ak kewiirchin araraita,’ koyaaksei. 22Tuguuk alak tugul che osoome eng' saaet, oyani, otaache.”
Koesyoi `piik kimnateetap Jeso
(Mar 11:27-33; Luk 20:1-8)
23Ye kingwo Hekaluut oriit, ak ye kita koneetisyei, kobwonji ineendet tisiik che eecheen ak poisyegap pichooto ak koleenji, “Nee kimnateet ne iyae tuguuchu? Ak kigoonin ng'oo kimnatoni?”
24Kowolji Jeso koleenji, “Amache agane ateebenak ng'olyoo agenge, ne ngo mwaiwo, amwaiwok agane kimnatonooto ayae tuguuchu. 25Ki punu ano kabatisanetap Johana? Ki punu kipsengwet anan ki punu piik?” Ak kichaamjigei icheegei kole, “Ngot kemwa keele, ‘Ki punu kipsengwet,’ komwaiwech kole, ‘Kilya anyun si moyan ineendet?’ 26Ago ngemwa keele, ‘Ki punu piik,’ ki iywei tuiyet, amu iyani piik tugul kole Johana ko ki maotyot.” 27Ki wolji `piik Jeso koleenji, “Ma kingen.” Komwachi agine koleenji, “Ma mwaiwok agane kimnateet ne ayae tuguuchu.
Kalewenet agobo weeriik aeng'
28“Ago oleen nee? Ki tinyei chii weeriik aeng'; ki wo ole mi weeriit ne po tai ak koleenji, ‘Weeri, ui poisye rani eng' mbareetap sabibuk.’ 29Ak ki wol kole, ‘Ma wendi,’ ago eng' let kosik ak kwo. 30Yeityo kwo ole mi ne po aeng' ak komwachi ko uu nooto. Ki wol kole, ‘Abba, awendi,’ ago ma wo. 31Ng'oo eng' chooto aeng' ne ki yai mageetap kwandanywa?” Kole, “Ne po tai.” Ki mwachi `Jeso icheek koleenji, “Amwaiwok iman ale, sip kondoenak koitei laitornatetap Kamuktaindet taagigap aisuruut ak chepkugonik. 32#Luk 3.12; 7.29-30 Amu kinyonjok Johana eng' ooreetap imanda, ago ma oyan ineendet, ago ki iyan ineendet taagigap aisuruut ak chepkugonik. Agot ye kingo kaogeer, koma osigu ak oyan ineendet.
Kalewenet agobo mbareetap sabibuk
(Mar 12:1-12; Luk 20:9-19)
33 # Isa 5.1-2 “Ogas kalewenet age: ki mi chiito age ne ki tinyei koot, ne kiminji sabibuk mbareet, ak kong'oot, ak kobal keriinget ole kiruruung'e logoek, ak koteech koot ne kooi. Kimanakyi meek ak kwo emet age. 34Ye kingo kagoriik ruroteetap logoek, koyookto otwogikyik koba ole mi meek, si koip logoekyik. 35Ki nam meek otwogikyik, kibir age, ak ki par age, ak kilach age eng' koik. 36Ki iyookto kogeny otwogik alak che siirei che po tai; ak ki yachi icheek ko uu nooto. 37Eng' let koyookyi weeriinnyi koleen, ‘Teechei weeriinnyu.’ 38Ago ye kingo keer meek weeriit, komwachigei kole, ‘Ni ne po tuguuk; obwa, kebar ineendet ak kenyaban tuguuk che kata tuun punjin ineendet.’ 39Ara ki nam ineendet ak kotoorta komanda eng' mbar, ak kobar.
40“Nooto anyun ye nyo chiitap ko po mbareetap sabibuk, koyachin nee meechooto?” 41Ki wol kole, “Parei chiichooto po mbareet pichooto yaacheen eng' pareet ne ya, ak komanakyi mbareetap sabibuk meek alak, che igoochin ineendet logoek eng' ruratennywa.”
42 # T.Kal 118.22-23 Ki leenji `Jeso icheek, “Tom osoman siruutik keele:
‘Koita ne ki eesyo teegik,
ko koek nooto metit ne po luuita;
punu Kiptaiyat niito
ak po kwang'ut eng' konyekyok?’
43“Nooto anyun amwaiwok ale, kirebenok laitornatetap Kamuktaindet, ak kigoochi laitornatet age ne yiei logoekyik. 44Ineendet ne ibutyin kooi parak koilei konyaknyagansei; ak age tugul ne tururchingei koiito, konyirnyiraksei.”
45Ye kingo kas tisiik che eecheen ak Pharisaik kalewenaikyik, konai kole kang'alaali ineendet agobo icheek. 46Ki cheeng' icheek oor kole si konam ineendet, ago kiywei tuiyosyek, amu ki iyani piik kole ineendet ko maotyot.
©Bible Society of Kenya, 2019