MATAYO 15
15
Teebutyet agobo pitonwek
(Mar 7:1-13)
1Ki pwanji anyun Jeso `Pharisaik ak siriik che ki punu Jerusalem ak koleenji, 2“Amu nee si kobistoe kasubiguk pitonwegap poisyek? Amisyei icheek kotom koun eunekwak.” 3Ki wolji koleenji, “Amu nee si obistoe ng'atuutyetap Kamuktaindet amu pitonwekwok? 4#Kom 20.12; 21.17; NKNg'a 5.16; A.La 20.9 Amu ki ng'at Kamuktaindet kole, ‘Teech kwandang'ung' ak kamenng'ung',’ ak, ‘Ineendet ne mwaei ne ya agobo kwan anan kamet, komeei iman.’ 5Ago omwae ole age tugul ne leenjin kwan anan kamet, ‘Kiit age tugul ne kota nyolu atoretenen ko koagoochi Kamuktaindet,’ 6koma teechei ineendet kwanda ak kamet; kaowal anyun ng'olyootap Kamuktaindet koek puch amu pitonwekwok. 7Okweek chombilik! Ki maoten Isaiah komyee agobo okweek ye ki mwa kole,
8 # Isa 29.13 ‘Teecha pichu eng' kutusweekwak,
ago looen mugulelwekwak eng' anee.
9Ilaswo icheek puch;
kaneetisyosyekwak che ineetisye ko ng'atuutigap piik.’ ”
Tuguuk che imurwoni Chii
(Mar 7:14-23)
10Ki kuur tuiyet kobwa ole mi ak koleenji, “Ogas ak oguiye: 11ma che chutei kutit che imurwoni chii, ago che mang'une kutit che imurwoni ineendet.”
12Ki pwa anyun kasubikyik ak koleenji, “Ingen ile kaginach Pharisaik ye ka ngo kas mwaoni?” 13Kowol kole, “Keswot age tugul ne ki ma kool Abba ne mi kipsengwet, kitutu. 14#Luk 6.39 Omete icheek; icheek ko kandoik che koryotiin. Ak ngo ndochi kipkoraatyat, kipkoraatyat, kororokyin tuwai keriinget.” 15Ki wolji Petero koleenji, “Mwaiwech agobo kalewenonooto.” 16Koleenji, “Kagatomo oguiye ak okweek? 17Tos mongen ole, kiy age tugul ne punei kutit kowendi moo ak komandoi saang'? 18#Mat 12.34 Ago tuguuk che mang'une kutit kobunu muguleldo, ak chooto che ing'waniti chiito. 19Amu kabwaatutik che yaach, rumisyosyek, ibeetapkei, soksosyek, choorsosyek, paornatosyegap lembech, ng'aleek che yaacheen ko mang'une muguleldo. 20Chuuto tuguuk che ing'waniti chii; ago ngeamisye eunek che ma kiuun koma ing'waniti chii. ”
Kayanetap kobogoryo
(Mar 7:24-30)
21Ki wo Jeso eng' olooto, kwo komoswek che po Tyro ak Sidon. 22Ki mong' eng' komoswechooto kobogoryot ne po Kanaan, koriirei koleen, “Rireena ee Kiptaiyat, inyee weeriitap Daudi! Inyaliili miising' oindet cheptonyu.” 23Ago ki ma wolji `inee ng'olyoo age tugul. Ki pwanji kasubikyik, ak kogaigai ineendet koleenji, “Oon kwo, amu riirchinootech.” 24Ki wol kole, “Ki kiyokwo anyoonji keechiirek che lusyotin che po kootap Israel icheegei.” 25Ki nyo ak kogutung'ji ineendet koleen, “Kiptaiyat, toreto!” 26Ago ki wolji kole, “Ma myee kerebee lagok amitwogikwak ak kewiirchi sesenik.” 27Ago ki wol kole, “Ee, Kiptaiyat, nga agot sesenik ak icheek koamei amitwogik che iroroi eng' meesogap kiptainikwak.” 28Kowolji Jeso koleenji, “Chebyosoni, oo kayaneng'ung'! Ingoyaak ko uu nooto imache.” Ak kisop cheptonyi kobooch sainooto.
Kosoobi `Jeso piik
29Ki wo Jeso eng' olooto ak kwo koroop ole neegitee araraitap Galilaya. Ki wo kotogosta tulweet, ak kotep ng'wony eng' olooto. 30Ki pwanji ineendet tuiyosyek che eecheen komutu salamonik, che koryotiin, che namotin kutuswai, che po mugungon ak alak che chaang', komut ak konde tainnyi; ak ki isap icheek. 31Ki kwong' tuiyet ye kingo keer kong'alaaldos che ki namotin kutuswai, ko kagosapcho che ki po mugungon, kobendoti che kisolomon ak kogeertoi che ki koryotiin. Ki ilas icheek Kamuktaindetap Israel.
Kobaei `Jeso piik eliphuusyek ang'wan
(Mar 8:1-10)
32Ki kuur Jeso kasubikyik kobwa ak koleenji, “Ariiree tuiyoni, amu kogetebi tugul peetuusyek somok ama tinyei kiy ne amei. Ma mache aunda icheek koba koamoti rubo, amu imuuch kotanuiso eng' ooreet.” 33Kowol kasubikyik kole, “Ki nyoorchini ano magatiinik che tee cho eng' surkwen che yamei kebae tuiyet ne tee ni?” 34Koleenji Jeso, “Otinye magatiinik ata?” Kowol kole, “Tisap ak njireenik che mengeechen che ng'ering'.” 35Ki ng'at tuiyet kobur, 36ak konam magatinichooto tisap ak njireenik, ak ye kiga komwa kongoi, kobuutul ak kogoochi kasubik, yeityo kogoochi kasubik tuiyosyek. 37Ki am tugul kot kobiyong'so, ak koyum katuganik che kiyam konyi mesendoik tisap. 38Icheek che ki amis ko ki murenik eliphuusyek ang'wan, ama kiit kobogorisyek ak lagok. 39Kingo kagounda tuiyosyek koba, kolaany moingetap peek, ak kwo kotokyigei ye neegitee tabanwegap Magadan.
©Bible Society of Kenya, 2019