Tɛnɛ Faalaaliiti 30
30
Aguul ná-kpɔɛiti
1Yaké ná-doun zunui Aguul ná-kpɔɛiti. Zunui nii ná-deve wooiti ti Itiyɛle ná-faa ma. Itiyɛle ná-faa ma, ta Ukale.
2Gaama ʋe, nà ga ɠimalala nui, gè leʋe nuɓusɛiti kpein ba,
nuɓusɛ ɠeleɠelegi la zèa.
3Gè la ɠimalai ɠalani,
gè la GALA Ɲadegai ná-faaɠwɛgi ɠwɛɛ.#30:3 gè la GALA Ɲadegai ná-faaɠwɛgi ɠwɛɛ: Tati pelei taɠiligaa ɓalaa ka ga niiti: kɛlɛ gè nuiti ta-vaaɠwɛgi ɠwɛɛ ɓaa tama gè la nu ɲadegaiti ta-vaaɠwɛgi ɠwɛɛ
4Ɓɛ ɠa é lɛɛni geeɠɔlɔgi zu, GALA pɔ bɛ, é zeɠe ná, é yei?
Ɓɛ ɠa é fiilɛi zoga, é yɛ zea?
Ɓɛ ɠa é ziɛiti pua ná-seɠei la?
Ɓɛ ɠa é zooi ɠwɛgiti kpein daa?
Daasei ka ɓɛ, ná-doun zunui laasei ka ɓɛ?
Bo dɛɛ, ni è kwɛɛ!
5GALA daawooi ɠilagilagi pɛ ka ga gaamai.
Toɠa ga kɔɔɠɔ zɛpɛgi naati bɛ, niiti ti lɔɔɠuzu bu.
6Mina tanɔpɛ da daawooiti ma,
ni naa laade, toɠa è loɠa, è ʋɛtɛ ga zɛɛ nu.
7Ɠɔoɠɔ GALAGI, nà faa felegɔ valizu è ma,
naati kɛ bɛ̀, aisa nà-eteai ʋa ɓe:
8Màkɛ, gè mina kpɔɛ ɲaka wo, ɓaa zɛɛiti,
mina kɛ̀ ga bala nu, ɓaa kpɛtɛ nu wola.
Naa ve zèa nɔ, nii fizɔgai mà, gè eteai ziɛ.
9Mazɔlɔɔ anii pɛ ga ʋooʋana zèa, nà ʋa lia ɠɛlɛzu è ʋa,
gè ʋa ɠɛ ma: «Ɓɛ ɠa é ga Ɠɔoɠɔ GALAGI?»
Ɓaa mu, maanɔɠɔi a ɓɔina dà, gè ɓɔɠɔ ɠɛ ga unma nu,
gè ɓaaɠula nà-GALAGI ma ɠana.
10Mina va botiɠɛ nu ma, maliɠii ɠaazu.
É mina è voovo, ɗa-vaaɠaazagi ma ɠasɔi ɠa la è unma.
11Nui tanigaa ta ná, ta ɗa ti-ɠɛɛ ɠoto,
ti la tuya loa ti-lee ʋɛ.
12Nui tanigaa ta ná, ti ɓɔɠɔ ɠaazu ga ti ɲadegɛ,
tama, ti la gbani, ti ʋa ɠula ta-ɠɔzɔba vaiti su.
13Nui tanigaa ta ná, ti ɠaazulɛai,
ti ɗa wɛlɛ nui pɛ ba nɔ fawuu.
14Nui tanigaa ta ná, ti-ɲiigaiti ti ga boɠa zɔkpɔiti,
ti-ɓalɔɠaeiti ti ga boɠaiti, ti ɗa maanɔɠɔ nuiti mi,
ti ʋa ɲɛɛlɛ, ti ɠula eteai zu,
ti ʋa bala nuiti suwuɠaaleʋe, ti ɠula nuɓusɛiti saama.
15Moolɛi ná-doun anzanuiti ti fele, ti-laasei ka ga: Fe! Fe!
Ani saʋagɔ ɠa ná, ti-yii la lɛiɗa eyɛsu pɛ,
eyɛsu pɛ ti la ɠɛa ma: «É kula ɠɛa.»
16Gɔvɛalaazu, doun zɔlɔɔtala anzanui,
zooi, nii ziɛ la ga kpɔɔle wɔinzeɠe ma,
kɛlɛ ti-naanisiɛi ɠa ná ɓalaa, abui, nii é la ɠɛa ma: «É kula ɠɛa.»
17Nui ɠaazuɠɛzɛiti é ɲɛɛɠulazu la kɛɛɠɛ zu, é ɗa woozotalai ɠɛ ga dee,
kɔtuɗɛi ma ɠalawɔniiti ta ti ɠula su, koɠɛ yiʋoiti ti ti mi.#30:17 Nii ʋoluʋɛ ɠa ga faanɛɛ wuuɠwɛɛtala loun zunui ma ʋoomai la kaba zɔlɔɔga, toɠa yɛ ná filɛ wɔniiti bɛ.
18Faa saʋagɔ ɠa ge la dɛ gaaɠaani,
kpudɛai màazu:
19koɠɛi ɠoʋe pelei geezuʋɛ,
kaalii ɓokpo pelei fasai ma,
ɓatoi ná-pelei kpoloɗɛi zaamaʋɛ.
Kɛlɛ naanisiɛi ɓalaa ɠa ná:
zunui ziɛ ʋelei é lo anzalopoi ʋa.
20Wɛlɛ ʋelei wɛɛnzo anzanui a ɗa kɛ la:
a yiima vaiti kɛɛna ziilɛi, é laamaʋɛ ɓale,
é ɠɛ ma: «Gè la faa ɲɔu nɔpɛ kɛɛni.»
21Faa saʋagɔ ɠa ná,
niiti ta ɗa eteai ɲiikpi, é la ziaa bu:
22duɔi a zeina ga masagi,
ɠimalala nui a zobo sɔlɔɔna, é ɗa ɠɔnɔgi zɔlɔɔ,
23anzanui kɛlɛbai wogai da, naa a zeina zini bɛ.
Kɛlɛ naanisiɛi ɓalaa ɠa ná:
duɔ anzanui é zeizu duɔ dee ʋotogi zu.
24Sua naanigɔ ɠa ná eteai zu, ti wola lɔiɗai gola,
anɛɛ naa ʋe, ti wola ɠigɛ da ge leʋe:
25pupuiti, zɛbɛ nɔpɛ ge la ti ʋa,
kɛlɛ ta ɗa ti-ɠɔnɔgi ɠɛʋele ɓɛtɛ foɠoi,
26fasa woliiti,#30:26 fasa woliiti: Naati ta ga tufa mi zua goiti, ta ɗa mɔin ʋolu gizeiti ma. zɛbɛ la ti ʋa,
kɛlɛ ta ɗa ti-ʋuuzuʋɛ ɓɛtɛ fasaiti su,
27kotogiti, masa ge la ti unda,
ta ɗa ɓɔɠɔ zei su, ti-ma ɓulugi ɗa ɠula,
28kooloiti, niiti nu a ɗa ti zo nɔ ga yeei,
ta ɗa lɔ masagiti ta-masa pɛlɛiti bu.
29Fuluani saʋagɔ ɠa ná,
ti-ziɛ ʋelei, ta ti maanɛɛ ʋelei ga pɛtɛ gani:
30zalai, nii ziilɔai é leʋe suaiti pɛ ba,
é la ɠula ʋolu nu nɔpɛ bɛ,
31tɛɛ zinɛi,#30:31 tɛɛ zinɛi: Tati pelei taɠiligaa ɓalaa ka ga niiti: sooi ɓaa zaɓei nii a ɗa ɠaalɔ kɔɠɔʋolu valagiti ga, ɓaa mu boli zinɛi.
Kɛlɛ naanisiɛi ɓalaa ɠa ná:
masagi é loni ná-kɔɔʋɛbɛi untuɠɔ, ti ɗa li.
32Ni è ɠɛni ga ɠimalala nui, è ɗa waso,
ɓaa ni è ɠɛni kigaiziɛ ɲɔiti bosu,#30:32 ni è ɠɛni kigaiziɛ ɲɔiti bosu: Tati pelei taɠili ɓalaa ka ga nii: ni è tɔɔzeiɗa ga kigaiziɛi woga
za ʋoluma, ɓɔɠɔ zo.
33Mazɔlɔɔ nɔnɔi loɠaai ɠa nu a ɗa gulɔi zɔlɔɔ da,
sokpa loɠai ɠa ɲamai a ɗa ɠula su,
ziiɠaawanai ɠaazulɛai ɠa kpɔɛi a ɗa ɠula su.
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.