Ezayi 2
2
Maliɠii ná-gizei
1Wooiti Amɔse ná-doun zunui Ezayi ti zɔlɔɔni GALA zea kulakɛlɛmai zu, é ʋilɛ Zuda masadai ʋa, ta Zeluzalɛme taai.
2Yeeɠɛɠala ɠaaɓelagiti ta zeelina,
Ɠɔoɠɔ GALAGI zei ʋɛlɛi ma ɠizei ɠaa ɠa ɠooza, é lo gizeiti pɛ maazu,
toɠa lo gize goiti pɛ maazu,
nuɓusɛ ʋɛbɛi ɠa ɠɛ liizu pɔ bɛ.
3Zii ɠiligiti ta ɠɛ liizu ná, ti ɗa ɠɛ ma:
«À ʋa ade lɛ Ɠɔoɠɔ GALAGI ná-gizei ma,
Zakɔɓe ná-GALAGI zei ʋɛlɛi wu,
naa ɠa a kɛ, é ná-peleiti dɛɛ ga adeye,
ade ʋa ziɛ ga ná-peleiti.»
Mazɔlɔɔ Siyɔn ɠa tɔgi a zeɠe ná,
ta Ɠɔoɠɔ GALAGI laawooi ɠa zɔlɔɔ Zeluzalɛme nɔ.
4Toɠa zaamazu logi wo zii wolaiti zɔɠɔzu,
toɠa ɠɛ ga nuɓusɛ mɔinmɔin tukpɔɠaaleʋe nui.
Ta ta-ɠɔɔɠɔ woɠa zɔkpɔiti kɛ ga kaliiti,
ti ta-ɓɛɛinti kɛ ga molo leʋe woɠaiti.
Zii la mɔ valaa zii ʋa,
nu la mɔ kɔɔɠɔ vaa ma ɠala boga.
5Zakɔɓe mavofodaiti, à ʋa deɠɛmu,
ade ziɛ Ɠɔoɠɔ GALAGI ná-wozakalagi ɠa.
Maliɠii ná-foloi
6Maliɠii, è la mɔ ɗa-nuɓusɛiti pɔ, Zakɔɓe mavofodaiti.
Mazɔlɔɔ folo ɠulazu ʋelei ma ungaiziɛ nuiti ti ʋooʋaa ti zaama,
eɠɛʋelei ti ʋooʋaai la Filisiti yooi zu.
Ɗa-nuɓusɛi ɠa yeeʋilisu ɓɔɠɔ zu ta wɛɛinti.
7Ná-zooi laavegɛ ga walii ta zanugi,
ɓela ge la ná-naavoloi ʋa.
Ná-zooi laavegɛ ga sooiti,
ta nu la zooga ná-kɔɔɠɔ wotoloiti gaalusu.
8Ná-zooi zulaavegɛ ga zɛɛ ɠalagiti ɓalaa,
ɛsɛ pɛ ka nɔkɔsu kɔɔɠɔ ganigiti bu,
aniiti tiya ɓɔɠɔi ti ti ɓɛtɛai ga yeeɓeɠai,
nuɓusɛiti ti ti ɓɛtɛai ga yeei.
9Naa ɠa é ba, nuɓusɛi pɛ maanɛɛʋɛ ga é ɓɔɠɔmaayei,
é laaʋɛɛ fufiligi ʋa.
Ɗɔun ɗa, Maliɠii, mina ti wuzeɠe!
10À lɔɔɠu fasa yeɠeiti su,
à lɔɔɠu zooi wu,
wo maaɠooza Ɠɔoɠɔ GALAGI ná-ziiɠaawanai ʋa,
ta ná-maayikii ma voloi.
11Nuɓusɛiti ta-ɠaazumaanɛɛiti gaa ɠa yei,
toɠa waso nuiti gaayei,
naama volo ná, Ɠɔoɠɔ GALAGI ɠila kpe ka a wɔɔlɔ.
12Ɠɔoɠɔ GALAGI, Fai-Pɛ-Maliɠii folo ɠila deveʋɛ,
gaazumaanɛɛ nuiti daalɔɠɔma ta waso nuiti pɛ,
ta naati daalɔɠɔma niiti ti ɓɔɠɔ lɛɛzu su, ti ɠaa ɠa yei.
13Toɠa ɠɛ Liɓan sɛdele guluiti daalɔɠɔma,
ti wuzeɠeai, ti ɠaaɠooza, ta Ɓasan sɛne guluiti pɛ.
14Toɠa ɠɛ gize ɠaaɠoozagi pɛ daalɔɠɔma
ta gize goiti daalɔɠɔma, ti wuzeɠeai.
15Toɠa ɠɛ siɠi gaaɠoozagiti daalɔɠɔma,
siɠi golaiti nu la lɔa ti ʋa.
16Toɠa ɠɛ Taalasise ɓatoiti daalɔɠɔma
ta ziɛ ɠa ɠeingiti pɛ ti wola ʋagai.
17Nuɓusɛiti ta-ɠaazumaanɛɛiti gaa ɠa yei,
toɠa waso nuiti gaayei,
naama volo ná, Ɠɔoɠɔ GALAGI ɠila kpe ka a wɔɔlɔ.
18Zɛɛ ɠalagiti kpein ta ɲɛɛlɛ.
19Nuiti ta lɔ pugiti su,
ti lɔ zooi ma yeɠeiti su,
ti maaɠooza Ɠɔoɠɔ GALAGI ná-ziiɠaawanai ʋa,
ta ná-maayikii ma voloi,
siɛgi zu é wuzeɠezu la ga é eteai maalua.
20Naama volo ná, zɛɛ ɠalagiti ti ga walii ta zanugiti,
nuiti ti ti ɓɛtɛai, ti ɗa nɔkɔ ti wu,
ta naati seɠe, ti ti ʋili ya inɛgiti bu ta dɛvɛiti.
21Nuiti ta lɔ pugiti su,
ti lɔ kɔtui ma yeɠeiti su,
ti maaɠooza Ɠɔoɠɔ GALAGI ná-ziiɠaawanai ʋa,
ta ná-maayikii ma voloi,
siɛgi zu é wuzeɠezu la ga é eteai maalua.
22À ɓe ɠalivaazu nuɓusɛi ma,
fiilɛ goi é sokpa zu, naa nɔ ɠa é ga ná-eteai,
tosuʋɛ ɠa ga mini?
Text copyright © 2023 Pioneer Bible Translators and The Bible Society in Guinea-Conakry
This work is licensed under the Creative Commons Attribution-NonCommercial-NoDerivatives 4.0 International.
https://creativecommons.org/licenses/by-nc-nd/4.0/
Texte copyright © 2023 Traducteurs Pionniers de la Bible et Alliance Biblique en Guinée
Cette œuvre est mise à disposition selon les termes de la Licence Creative Commons Attribution - Pas d'Utilisation Commerciale - Pas de Modification 4.0 International.