Populiarios Biblijos eilutės iš संत.मत्‍ती 6

Dalintis

आपे जामा तरअः पहिल परमेसर आला राईज आउर हुनी आला धरम रअः खोजाईर रे ताहिनपे, आउर आपे के होना जामा जिनीस नेकान गी भेटाव कोआ।

गापा रअः आलपे फिकिर के, गापा रेनअः फिकिर अपन के खुदे का-कामी पड़ाव कोआ। तिसिंग रअः दुख तिसिंग लःअय ढेरा।

“हिना लःअय ईङ आपे के बेताअः दिपीईंग, ची अपन जीव लःअय एतान होः आलपे फिकिर के, ची आबु एतान जोम नुयाँबु, आउर अपन होड़ो लःअय एतान सोलोंगेआबु? एतान जिनगी घोटो तरअः आउर होड़ो गेन्दरअ तरअः बाईढ़ के कनोआँ?

जब आम बिनती याम, दो अपन कुड़िया रे सेन केते दुवार जापुःड केमे, आउर दनांग रे अपन बाबा तरअः बिनती में, आम आली बाबा जे दनांग रे कामी लअः के नेलेआय। आम के होना रअः बानी एमा केमेआय।

दो आपे नोःआँ लकान बिनती पे, “‘ए आले आली सिरमा रे ताहिनोई बाबा, आम आला नुमू रअः बड़ाई हुयाअः। आम आला राईज हिजोअ, आम आला मरजी, जे लकान सिरमा रे पुरायोआ, हिकान गी ओत रे होः पुरा हुयाअः।

तिसिंग आले के दिन भाईर रअः जोजोम लःअय एममे।

आउर जे लकान आले अपन गुनाहगारकु के छमा तद कुआले। हिना लकान गी आम होः आले के होः छमा लेमे।

आउर आले के परीकछा रे आलुम पड़ाव ची केले, बकिर आले के बुराई तरअः बंचाव लेमे।’

“जदि आपे एटाअकु आला गुनाह के छमा यापे, दो आपे आली सिरमा रिनी बाबा होः आपे के छमा केपेआय।

सिरमा रिनकु ओड़े के नेल कुपे, हुंकू हेरे आकु ना दो ईरे-आकु, आउर ना दो पोटोम रे दोहोयाकु, सेरे होः आपे आली सिरमा रिनी बाबा हुंकू के जोजोम लःअय एमा कुआय, हुंकू तरअः किमती कनेपेआ एतान?

“अपन लःअय ओत रे धन आलपे जवार के, जे एड़े चितयाआ आउर घुन जोमेआकु, आउर चोर दुवार टोकरा केते चोरेआकु। बकिर अपन लःअय सिरमा रे धन जवारेपे, जे एड़े ना चितयाआ आउर ना घुन जोमेआकु, आउर चोर दुवार टोकरा केते चो-चोर काकु दड़ीआ। एता लःअय ची जे एड़े आपे आला धन एदनाअ, हिनाःड़े आपे आला मन तापे होः ताहिकोआ।

“जाहें होड़ बनहोंड़ गोमके के सेवा-सुसार इरकु दड़ीआ, एता लःअय ची हुनी मिहोंड़ के बिदोड़ आउर एटाई के दुलार कियाय, चाहे मिहोंड़ लोः मिलाव ताही कोआय, आउर एटाई के घींड़ कियाय, आपे परमेसर आउर खरचा बनार के से-सेवा एरपे दड़ीआ।

ए थोड़हे बि-बिसवासकु, ओत रअः बीर तिसिंग भाईर एदनाअ आउर गापा सेंगेल रे लो केआकु, जदि परमेसर होना के नोःआँ लकान सपड़ायाय, दो हुनी आपे के एता लःअय एरे सोलोंगोअ पेआ?

बकिर जब आपे दान एमा कुआपे, दो आपे आला जोम तीः कामीयाय, होना के कोंजरा तीः आलु पाड़ी चाही। आम आला दान उकु ताहिनोअ चाही। आउर आपे आली बाबा जे उकु केते दान एमेआपे जामा के नेलेआय, हुनी आपे के होना रअः बानी एमा केपेआय।

“चौंचित ताहिन पे, होड़कु के दे-देखाव लःअय अपन धरम रअः काम आलपे कामी के। कोवान दो अपन सिरमा रिनी बाबा तरअः एतान बानी होः एरपे नामेआ।

“जब आपे उपासेआपे दो ढोंगीकु लकान मेःड-मुहांड़ नुर केते आलपे उपास के। हुंकू अपन मेःड-मुहांड़ मुरझाव तआकु, जेकर से ची होड़ समझअकु, हुंकू उपास तदाकु, ईङ आपे के सचे बेताअः दिपीईङ, हुंकू अपन बानी नाम चुकाव नाकु। जब आपे उपासेआपे, दो अपन बोहोअ रे सुनूम ओजाः गेपे आउर मेःड-मुहांड़ आबुनेपे, जेकर से होड़कु के कोवान बकिर आपे आली बाबा जे दनांग रे एदानिया, नोःआँ पता चलाअ ची आपे उपास दापे, आपे आली बाबा जे दनांग ओना केहोः नेलेआय, आपे के होना रअः बानी एम केआय।