Populiarios Biblijos eilutės iš Roma 5

Dalintis

Ampo' daine' noa pa'kalemunna Puang Alataala, aka' napalanda'ne' pa'kalemunna pano di kita' noa indee: naonge madosakingkea', ya' umbeho Kristus dipatei aka' kita'.

Anna ponna ke hannuingke dai' di Puang Alataala, ya' daingkea' la bundu. Tainsang indee aka' tasa'ding umba noa pa'kalemunna Puang Alataala yaling di inahanta ungngolai Inaha Masero ang nabeaingkea'.

Anna tadia inde supu, ampo' kahsi toingkea' yaling di kamadahhaang ang manghoaingkea'. Aka' tainsang taoatee inde kamadahhaang mala ungkeboaing kamatoto'ang yaling di kapampetahpa'ang, anna inde kamatoto'ang yaling di kapampetahpa'ang mala ungkeboaing katähängang yaling di pesändä', anna inde katähängang yaling di pesändä' mala ungkeboaing kapahannuang dai' di Puang Alataala.

Dinoa marohomingkea' di olona Puang Alataala aka' kapampetahpa'anta. Dahi mengkalao dinoa mapiang kasikenteantaa' Puang Alataala aka' Dehatanta Puang Yesus Kristus. Ungngolai Puang Yesus Kristus lambi' malaingkea' umpesa'dingngi mana' pa'kalemunna Puang Alataala ang tatahimbong dinoa aka' mampetahpa'ingkea'. Anna kahsiingkea' aka' hannu loloingke taoate la untahimboingkea' taha yaling di kamatandeanna Puang Alataala.

Di tempona ang puha napama'tantu Puang Alataala, naonge daingkea' kekaya napobua' dosa, donetoo Kristus mate aka' kita', moinnakato anna daingkea' untuhu'i Puang Alataala.

Dahi mendahimingkea' maroho di olona Puang Alataala aka' puhamingkea' nasulängngi Puang Yesus ungngolai kamateanna. Dianto anna mengkalao dinoa tainsammi taoate la dipabeba'ingkea' di hao mai di kakeaha'anna Puang Alataala ungngolai Puang Yesus ke lambi'mi yato Allo Pampahehsaang.

Nasuhummi ingkänna hupatau mendahi to madosa, aka' Adam dai untuhu'i Puang Alataala. Noa toi nasuhung mala maroho ingkänna tau di olona Puang Alataala, aka' Puang Yesus untuhu'ine' Puang Alataala, dianto umbeho Kalaena dipatei.

Anna tuhtuang kehängngäng kakahsiang yaling di inahanta aka' sikapiaimingkea' Puang Alataala ungngolai Dehatanta Puang Yesus Kristus. Aka' ungngolai Puang Yesus Kristus mendahi mahasang kasikenteanta Puang Alataala.