Populiarios Biblijos eilutės iš ĀCƐ URÓM 3

Dalintis

Ohígbū ka odúúdú ācɛ le íne bīya, anɔ́ɔ é le ligbó lɛ Ɔwɔicō nōo ī nya ɔ̄cɛ tá ā á. Oŋmá lɛ eyīnyinyi kú Ɔwɔicō ā, ó le ɛpɔ̄hi hɛ́ lɛ alɔ. Ó yá ɛ̄nyā ohígbū Ujísɔ̄si nōo hɛ́ alɔ tá ŋmá ɛpɔ̄bí kú íne nɛ̄ alɔ bīya ā.

Ɔwɔicō mīyɛ ācɛ wā ɛgiyí nū ohígbū keé cɛ̄ɛ̄lā Ujísɔ̄si Ohɔ́nyɛtá. Ɔwɔicō yá ɛ̄nyā lɛ odúúdú ācɛ nēe cɛ̄ɛ̄lā kú Ohɔ́nyɛtá ā, ohígbū ka ɛyɛ́ɛ́yí í yɔ̄ ɔtāhɛ̄ kú ācɛ Ujíyu mɛ́mla aílɔ́wá ŋ́.

Ɔwɔicō kwú Ɔyínɔ̄nyīlɔ kú nū kwɛcɛ kéē kwú ɔ̄ ú gwɛ́ɛya, cɛ́ɛ́ o ŋmá lɛ ikwū kú nū ā, ó kwú pīya ɔwɛ nōó í je íne nɛ̄ ācɛ bīya ā yá uwā ɛhi, oŋmá lɛ ɛlā kú nū nēé cɛ̄ ā. Ɔwɔicō yá ɛ̄nyā kóō mafú ka anúɔ le kpaakpa. Eko nɛ̄ncɛ̄ ā, Ɔwɔicō lɔtū lé, anɔ́ɔ ó leyī gwō íne nɛ̄ ācɛ bīya ā bónū á. Amáŋ eko kú abālɔbányā, Ɔwɔicō í leyī gwō íne nɛ̄ ācɛ bīya ā bónū gɛ ŋ́, cɛ́ɛ́ kóō mafú ka anúɔ ī yá ɔdā okpaakpa. Ó gē mīyɛ ɛjɛ̄ɛ̄jī ācɛ nēe cɛ̄ɛ̄lā Ujísɔ̄si ā wā ɛgiyí nū.

Ohígbū keé gáā hɛ́pɔ̄hi lɛ ɔ̄cɛ dúúmā iyɔ̄bū Ɔwɔicō, o ŋmá lɛ ō yá ɔdā nɛ̄ íne ā dɔɔ̄kā ā ŋ́, amáŋ íne ā gē yá ká ācɛ kéē jé ka aá le íne bīya.

Ɛ́gɛ́nɛ̄ é tá ɔ̄ lɛ ā, “Ɔ̄cɛ dúúmā í le kpaakpa tū Ɔwɔicō ŋ́, ó kōō wɛ ɔ̄cɛ ékpónú ŋ́. Ɔ̄cɛ dúúmā í jɛ́yí ɔdā nōo le kpakpa ŋ́, ɔ̄cɛ dúúmā í dɔɔ̄kā ō yɔ̄ mla Ɔwɔicō ŋ́. Odúúdú ācɛ kwú igbīhi í cē kwu Ɔwɔicō, é le nyíleyī.

Ohígbū ɔ́ɔmā Ɔwɔicō ī mīyɛ ɔ̄cɛ wā ɛgiyí nū ohígbū kóō cɛ̄ɛ̄lā nū nɛ̄ n, ó wɛ ohígbū kóō yá ɔdā nɛ̄ íne dɔɔ̄kā ā ŋ́.

Ó lɛ ɔwɛ ŋ́! Aá kē jé ka Ɔwɔicō ī ka ɔkwɛ̄yi eko dóódu, nááná nɛ̄ ɔ̄cɛ dóódu ī kɛ̄mgbɛ̄ ā. É tá ɔ̄ ipú ɛlɔ̄ɔwɔicō kahíníī, “Ká ācɛ kéē mafú ka ákú uwɔ ā le kpaakpa á eko nāa ī kɛlā. A kē ī yá káā lɛ ɛpɔ̄hi lé eko nēe ī kɛpɔ̄ tū uwɔ.”