Populiarios Biblijos eilutės iš A̱romawa 5

Dalintis

A̱wot A̱gwaza tak zi̱t kpa̱sai nang gu nchat zi̱t ba̱t, di̱ si̱sak nang gu nta̱m Kristi gu khwu da̱nian nzi̱t, neet nang zi̱ ni̱ yet á̱niet a̱ka̱tuk nyia̱ a̱ni.

A̱wot ki̱ zi̱ ntyia̱ fwuo hu a̱ni, zi̱ si̱ mi̱n swuo nsum bah, ku ma̱ chunchwiit. Zi̱ fi̱k si̱sak nang A̱gwaza nchat zi̱t a̱ni ba̱t, mat a̱ ka̱n nang nzi̱t A̱za̱za̱rak Ntswa wu, da̱nian gu ka swan mi̱ nfwuo nzi̱t na gba̱mgbam.

Ka̱ zi̱ doot zi̱ bu gwai meang, ku nang zi̱ ni̱ nswuo a̱bung ma̱ng mai a̱ni. A̱mgba̱m ma̱ng a̱nia, zi̱ lyen nang nkyang nani mbeang nzi̱t, a̱wot na̱ tyei nzi̱t, zi̱ gbang a̱lyia̱. A̱wot nang zi̱ mgbang a̱lyia̱ a̱ni, zi̱ mban ma̱ng a̱tan za̱kwa; ma a̱nia wa a̱tan za̱kwa wu na mban nzi̱t chet nang zi̱ na ntyia̱ fwuo nang A̱gwaza na nsan nzi̱t a̱ni.

Mat a̱nia, nang á̱ ntak kpa̱sai nang zi̱ ngyet á̱tsotswat ma̱ng sang a̱bun a̱zaghyi A̱gwaza mat nwuak fwuo nzi̱t hu da̱ nggu a̱ni, zi̱ byia̱ swat nyinyang ma̱ng A̱gwaza, mat kyang hu nang Yesu Kristi A̱tyoli nzi̱t wu nyia̱ nzi̱t ndyo a̱ni. Mat nang zi̱ nnwuak fwuo da̱ A̱gwaza a̱ni, Kristi si̱ nyia̱ nzi̱t shok. A̱ si̱ nang nzi̱t a̱wat zi̱ shya̱ a̱vwuo yong a̱zaghyi nggu. A̱ja wa nang zi̱ nshya̱ ma̱nini. A̱wot zi̱ ntyia̱ fwuo ma̱ng a̱gwai. Zi̱ nwuan á̱zanson nang zi̱ na nshya̱ shi A̱gwaza hu a̱ni.

Di̱n jen nang zi̱ ntyak chet, zi̱ lyen si̱sak nang zi̱ na mbeang á̱pyia̱ nzi̱t a̱ni bah, Kristi si̱ bai da̱ a̱cha̱chaat jen a̱wa, a̱ si̱ khwu da̱nian nzi̱t, á̱niet a̱ka̱tuk nyia̱.

A̱wot nang A̱gwaza wa ntak kpa̱sai nang gu nkyiak zi̱t á̱tsotswat á̱niet ma̱ng sang a̱bun a̱zaghyi nggu, mat a̱sok Kristi na a̱ni, a̱tsak a̱lyiat, ku fa za̱m á̱ na ti̱n nzi̱t di̱ shi̱ri̱ya nang gu na nyia̱ ma̱ng mwai lyen nggu hu a̱ni.

A̱wot ma̱nang A̱da̱mu ndak khwi gba A̱gwaza hu a̱ni, ku si̱ tyia̱ á̱niet ma̱ a̱di̱di̱t si̱ nyia̱ a̱ka̱tuk nyia̱. Ma a̱nia wa, si̱sak nang Yesu Kristi nkhwi a̱lyiat A̱gwaza na a̱ni, ku si̱ tyia̱ á̱niet ma̱ a̱di̱di̱t si̱ yet á̱tsotswat á̱niet.

Mat a̱nia, ma̱ninika, ka̱ zi̱ doot zi̱ gwai A̱gwaza, mat A̱tyoli nzi̱t wu Yesu Kristi jhyi swat kpa̱ndang nzi̱t hu ma̱ng A̱gwaza.