Populiarios Biblijos eilutės iš 2 A̱korontiyawa 4

Dalintis

Mat a̱nia, zi̱ yok dam ma̱ng a̱bung ka nang zi̱ swuo ma̱nini a̱ni bah. Da̱ a̱kwonu a̱kya, zi̱ tyia̱ fwuo di̱ nkyang Ma A̱gwaza tswazwa nang zi̱ nwai nwuan a̱ni. Mat nkyang swanta na nang zi̱ nwuan ma̱nini a̱ni, na̱ na tyak ma a̱nggang. A̱wot nkyang Ma A̱gwaza tswazwa nang á̱ nwai nwuan a̱ni, na swan si̱ nat sang sangba̱p.

Huhwa mbyia̱, nzi̱t zi̱ but mi̱ fwuo bah. Ku nang nvam nzi̱t na ntyiai chet a̱ni. A̱mgba̱m ma̱ng a̱nia, á̱ bwan fwuo nzi̱t na á̱ ntyei nfai kuzang jen. Mat, a̱bung ka nang zi̱ swuo ma̱nini a̱ni, shii bah. A̱wot ka̱ na labeang bah, ka̱ na̱ tyak. A̱mgba̱m ma̱ng a̱nia, a̱bung kani ka̱ tyei nzi̱t a̱kyenkyai shi wu a̱ni, na swak swuo a̱bung nang zi̱ swuo ma̱nini a̱ni ma̱ za̱nzan. A̱wot a̱kyenkyai shi wu na ba̱ng si̱ nat sang sangba̱p!

Á̱ ya̱shuk zi̱t ma̱ng swuo a̱bung di̱ kuzang fam. A̱mgba̱m ma̱ng a̱nia, da̱ mba á̱ feap zi̱t bah. Di̱n jen jhyang, zi̱ ni̱ tyia̱ ma̱ tai. A̱mgba̱m ma̱ng a̱nia, da̱ nzi̱t, zi̱ but mi̱ fwuo bah. Á̱ ni̱ nyia̱ ma̱ng a̱nzi̱t. A̱mgba̱m ma̱ng a̱nia, A̱gwaza wu ghwon zi̱t bah. Di̱n jen jhyang, á̱ ni̱ tuu nzi̱t á̱ si̱ mat a̱byin. A̱mgba̱m ma̱ng a̱nia, á̱ tyak ma̱ng a̱nzi̱t bah.

Ma̱ninika, sai huni sai mi̱ nfwuo nzi̱t na. A̱wot nzi̱t ma̱ á̱pyia̱ nzi̱t zi̱ tai li̱la̱n nang á̱ nok ma̱ng lyem ku ni̱ fwuoi a̱nggang a̱ni; nzi̱t bya nang á̱ nkoot a̱gba̱ndang zwá wu. Si̱ huni tak kpa̱sai nang a̱gba̱ndang chet nzi̱t wu neet da̱ a̱vwuo A̱gwaza kya. Nzi̱t ma̱ á̱pyia̱ nzi̱t zi̱ byia̱ chet bah.

A̱ta̱nyeang ka ka̱ yet a̱gwaza swanta wuni a̱ni, a̱ tyia̱ lyin mi̱ nfwuo á̱niet ba̱ nwai nwuak a̱chuchuk wu a̱ni. Ba̱ si̱ mi̱n di a̱sai a̱kyenkyai shi A̱sham Nkhang wu bah. Ba̱ si̱ lak fi̱k a̱lyiat nani tazwa a̱kyenkyai shi Kristi, a̱tyu a̱ tai A̱gwaza ma̱ cha̱chaat a̱ni.

Mat A̱gwaza wa ku hyia̱ nyia̱, “Yok sai hu, ku sai mi̱ ndyin hu!” Nggu wa bu tyia̱ sai huni ku sai mi̱ nfwuo nzi̱t na, mat zi̱ ka lyen a̱kyenkyai shi A̱gwaza wu ma̱ a̱ghyi Yesu Kristi ba, a̱ ya á̱ghyi ma̱ mya̱myat a̱myat nang á̱ nwuan a̱ni.